ၽွင်းလူင်ၾၢႆႇၾႆးၾႃႉ ဢူးၶိၼ်ႇမွင်ႇၸူဝ်း ၸီႉသင်ႇႁႂ်ႈတပ်ႉသိုၵ်းၸိုင်ႈတႆး (SSPP/SSA) ထွၼ်တပ်ႉဢွၵ်ႇပၼ် ၸိူဝ်းပၵ်းၼႂ်းဝူင်ႈၵၢင် မိူင်းၼွင် - မိူင်းသူႈ တင်းသဵင်ႈ ၊ ဝၢႆးႁူပ်ႉတူဝ်တႅၼ်း SSPP/SSA တီႈတႃႈၵုင်ႈ ။

ၽွင်းလူင်ၾၢႆႇၾႆးၾႃႉ ဢူးၶိၼ်ႇမွင်ႇၸူဝ်း လႄႈ ပႃႊတီႊမႂ်ႇသုင်ၸိုင်ႈတႆး (SSPP/SSA)  ႁူပ်ႉၵၼ် မိူဝ်ႈလၢႆပီပူၼ်ႉမႃး

ဝၢႆးတူဝ်ၽွင်းလူင်ၾၢႆႇၾႆးၾႃႉ ဢူးၶိၼ်ႇမွင်ႇၸူဝ်း ႁူပ်ႉထူပ်းဢုပ်ႇဢူဝ်း တူဝ်တႅၼ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ဝၼ်းတီႈ 20/11/2015 (မိူဝ်ႈဝႃး) ဝၢႆးဝၼ်းယဝ်ႉ ထိုင်မႃးဝၼ်းတီႈ 21/11/2015 မိူဝ်ႈၼႆႉ ပွတ်းၼႂ် ၊ ၶိုၼ်းသိုပ်ႇၾူၼ်ႊၸီႉသင်ႇပူင်လၢတ်ႈမႃးဝႃႈ  ႁႂ်ႈတပ်ႉသိုၵ်းၸိုင်ႈတႆး (SSPP/SSA) ထွၼ်တပ်ႉပၢင်သဝ်း ၸိူဝ်းပၵ်းၼႂ်းၵႄႈမိူင်းၼွင် - မိူင်းသူႈ  ဢွၵ်ႇပၼ်တင်းသဵင်ႈ ၊ လူၺ်ႈတၵ်းဢမ်ႇလႆႈမီးၶေႃႈၼွင်ႇ (ငိူၼ်ႈၶႆ) သင် ။


မိူဝ်ႈဝၼ်းတီႈ 20/11/2015 ယၢမ်းဝၢႆးဝၼ်း ၵေႃႉပဵၼ်ၽွင်းလူင်ၾၢႆႇၾႆးၾႃႉ ဢူးၶိၼ်ႇမွင်ႇၸူဝ်း တင်းတူဝ်တႅၼ်း SSPP/SSA ႁူပ်ႉထူပ်းၵၼ်တီႈဝဵင်းတႃႈၵုင်ႈ ။ မိူဝ်ႈၽွင်းႁူပ်ႉၵၼ်ၼၼ်ႉ တူဝ်ၽွင်းလူင်ၾၢႆႇၾႆးၾႃႉ ဢူးၶိၼ်ႇမွင်ႇၸူဝ်း လၢတ်ႈဝႃႈ - ႁႂ်ႈၶွတ်ႇၽွတ်ႈၶွမ်ႊမတီႊသေ ႁၢင်ႈႁႅၼ်းတႃႇဢုပ်ႇဢူဝ်းၵၼ် ၼႂ်းဝၼ်းၸၼ် (23/11/2015) တေမႃးၼႆႉ ။ လွင်ႈၼႆႉ လႆႈၸႂ်ၵၼ်ယဝ်ႉသေ ႁၢင်ႈႁႅၼ်းတႃႇဢုပ်ႇဢူဝ်းၵၼ်ယဝ်ႉ ။ ၵူၺ်းၵႃႈ ၽိူဝ်ႇထိုင်မႃးမိူဝ်ႈၼႆႉ သမ်ႉလၢတ်ႈမႃးထႅင်ႈလွင်ႈၼိုင်ႈ ။


ၵဵဝ်ႇၵပ်းလွင်ႈၼႆႉ ၸဝ်ႈၼေႃႇလဵၵ်းလၢတ်ႈဝႃႈ - မိူဝ်းဝႃး ႁဝ်းၶႃႈဢုပ်ႇၵုမ်ၵၼ် ပေႃးၶႅမ်ႉလႅပ်ႈၵူႈလွင်ႈယဝ်ႉ ၊ မိူၼ်ၼင်ႇ တႃႇတေၵႄႈလိတ်ႈပၼ်ႁႃပၢင်တိုၵ်း ။ ၾၢႆႇ ယလၶ (တိူင်းသိုၵ်းဝၼ်းဢွၵ်ႇ ၶူဝ်လမ်) ဢုပ်ႇလၢတ်ႈမႃးၵေႃႈဝႃႈ တေၵိုတ်းတိုၵ်းၵၼ်တင်းသွင်ၾၢႆႇယဝ်ႉၼႆလႄႈ ၵူၼ်းဝၢၼ်ႈၵူၼ်းမိူင်းၵေႃႈ မီးတၢင်းသိူဝ်းၸႂ် ႁၢင်ႈႁႅၼ်းတႃႇတေပွၵ်ႈႁိူၼ်း ႁင်းၽႂ်ႁင်းမၼ်း ။ ၵူၺ်းၵႃႈ ၽိူဝ်ႇထိုင်မိူဝ်ႈၼႆႉသမ်ႉ ၵပ်းၾူၼ်ႊမႃးလၢတ်ႈဝႃႈ - ႁႂ်ႈထွႆထွၼ်ပၼ်တင်းမူတ်းတင်းသဵင်ႈၼႆလႄႈ တေႁဵတ်းႁိုဝ်ပႆႇႁူႉ ။ ဢၼ်ဝႃႈႁႂ်ႈၶွတ်ႇၽွတ်ႈၶွမ်ႊမတီႊသေ တေဢုပ်ႇဢူဝ်းၵၼ် ၼႂ်းဝူင်ႈတေမႃးၼႆႉၵေႃႈ တေပဵၼ်ဢုပ်ႇ ဢမ်ႇပဵၼ်ဢုပ်ႇ ဢမ်ႇၸၢင်ႈဝႃႈယဝ်ႉ ။ မိူဝ်ႈဝၼ်းတီႈ 18 ၼၼ်ႉၵေႃႈ တူဝ်ၵျီႊဝၼ်ႊ (G1) တိူင်းသိုၵ်း ယလၶ (ၶူဝ်လမ်) ၼႆႉ ၵပ်းသိုပ်ႇၸူးၽူႈမီးပုၼ်ႈၽွၼ်းငဝ်ႈငုၼ်း SSPP/SSA သေလၢတ်ႈဝႃႈ - သိုၵ်းႁဝ်းသွင်ၾၢႆႇၼႆႉ ထိုင်တီႈလႂ်ၵေႃႈယူႇဝႆႉတီႈၼၼ်ႈ ႁဝ်းၵိုတ်းတိုၵ်းၵၼ်ဝႆႉၸူဝ်ႈၵႅပ်ႉ ၊ ယႃႇပေယိုဝ်းၵၼ် - ဝႃႈၼႆ ။


ၽူႈမီးပုၼ်ႈၽွၼ်း SSPP/SSA ၸဝ်ႈၼိုင်ႈၵေႃႈ ယင်းလၢတ်ႈဝႃႈ - ဢၼ်ႁဵတ်းယူႇယၢမ်းလဵဝ်ၼႆႉ မၼ်းပဵၼ်ၶေႃႈပူင်ၼေႇပျီႇတေႃႇ ၊ ပဵၼ်ၾၢႆႇသိုၵ်းမၢၼ်ႈ ။ မိူဝ်ႈဝႃးၼႆႉ ယိၼ်းၶၢဝ်ႇဝႃႈ ရူတ်ႉၵႃးသိုၵ်းမၢၼ်ႈ 30 လမ်းပၢႆ လုၵ်ႉတၢင်းတူၼ်ႈတီးသေ မုင်ႈၼႃႈမႃးတၢင်းၼႃႈလိၼ် SSPP/SSA ။ ဢၼ်လုၵ်ႉတၢင်းဝဵင်းလိူဝ်ႇသေ ဢဝ်ပႃးၵႃးၵၢပ်ႇလဵၵ်း ၊ ၵႃးတိုၵ်းၸိူဝ်းၼႆႉ ၶိုၼ်ႈမႃးတၢင်းလႃႈသဵဝ်ႈၵေႃႈမီး ၊ ၵမ်ႈၼမ်တႄႉလႆႈႁူႉဝႃႈ တေသူင်ႇမႃးတၢင်းတၢင်ႉယၢၼ်း - ဝႃႈၼႆ ။


ထိုင်မႃးဝၼ်းတီႈ 19/11/2015 ၵၢင်ၼႂ်ၼၼ်ႉ ယွၼ်ႉဢမ်ႇပဵၼ်ပၢင်တိုၵ်းၵၼ်ယဝ်ႉလႄႈ ၵူၼ်းပၢႆႈၽေးသိုၵ်းၵေႃႈ 2-3 ဝၼ်းၼႆႉ ပေႃးငဝ်းလၢႆးလီၵေႃႈ ႁၢင်ႈႁႅၼ်းတေပွၵ်ႈႁိူၼ်းၽႂ်ႁိူၼ်းမၼ်း ။ ၵူၺ်းၵႃႈ မိူဝ်ႈဝႃးမိူဝ်ႈၼႆႉ သမ်ႉလႆႈယိၼ်းၶၢဝ်ႇဝႃႈ သိုၵ်းမၢၼ်ႈမုင်ႈၼႃႈၸူးငဝ်ႈငုၼ်းဝၢၼ်ႈႁႆး ၼမ်လိူဝ်မႃးၼႆလႄႈ ၵူၼ်းပၢႆႈၽေးၶဝ်ၵေႃႈ တေမိူဝ်းႁိုဝ် ဢမ်ႇမိူဝ်းႁိုဝ်ၼၼ်ႉ ဢမ်ႇၸၢင်ႈတႅပ်းတတ်းၵၼ်ယဝ်ႉ - ၸၢႆးႁၢၼ် ၵေႃႉဢၼ်ၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈ ။


တင်ႈတႄႇဝၼ်းတီႈ 06/10/2015 မႃးတေႃႇထိုင်ဝၼ်းတီႈ 18/11/2015 ၼႆႉ တပ်ႉသိုၵ်းမၢၼ်ႈ ပိုတ်ႇၼႃႈသိုၵ်းတေႃႇ SSPP/SSA ႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းယူႇၼႂ်းပိုၼ်ႉတီႈ ၼႂ်းၸႄႈဝဵင်းမိူင်းသူႈ မိူင်းၼွင် ၵေးသီး 1 မိုၼ်ႇပၢႆ လႆႈပၢႆႈယၢၼ်ႁိူၼ်းယေး တီႈယူႇ ။