ၸုမ်းၵူၼ်းၼုမ်ႇလႄႈ ၵူၼ်းပၢႆႈၽေး တီႈဝဵင်းလၢႆးၶႃႈ ႁူမ်ႈဢွၼ်ၵၼ်ၸတ်းပၢင် တႆႈတဵၼ်း ယွၼ်းပွလ်း (သူး) ႁႂ်ႈပၢင်တိုၵ်းၸဵဝ်းဝၢႆး ။ ႁႂ်ႈၵူၼ်းပၢႆႈၽေးသိုၵ်း လႆႈၸဵဝ်းပွၵ်ႈႁိူၼ်း ဢဝ်မၢၵ်ႇၶဝ်ႈတဝ်ႈၼမ်ႉ ။ တီႈတႃႈၵုင်ႈၵေႃႈ ၸတ်းပၢင်တုၵ်းယွၼ်း ႁႂ်ႈၵိုတ်းပၢင်တိုၵ်းလႄႈ ႁပ်ႉတၢၼ်းငိုၼ်း ၸွႆႈထႅမ်ၵူၼ်းထူပ်းၽေး ။

ဝၼ်းတီႈ 19/11/2015 ပီႈၼွင်ႉၵူၼ်းဝၢၼ်ႈၵူၼ်းမိူင်း ၼႂ်းဝဵင်းလၢႆးၶႃႈ ၊ ၸုမ်းၵူၼ်းၼုမ်ႇ တင်းၵူၼ်းပၢႆႈၽေး ၸိူဝ်းလုၵ်ႉတၢင်းမိူင်းၼွင် မႃးယူႇသဝ်းပိုင်ႈဢိင်ၸွမ်းဝတ်ႉဝႃး တီႈဝဵင်းလၢႆးၶႃႈ လႆႈႁူမ်ႈၵၼ်ဢွၵ်ႇမႃးယွၼ်းပွလ်း ႁႂ်ႈၵိုတ်းပၼ်ပၢင်တိုၵ်း ။


ၽူႈတႅၼ်းသၽႃးၸႄႈမိူင်း (ၶဵတ်ႇလိူၵ်ႈတင်ႈမၢႆ 1) ဝဵင်းလၢႆးၶႃႈ ၊ ပႃႊတီႊႁူဝ်သိူဝ် ၸၢႆးၵျေႃႇၸေႇယ လၢတ်ႈဝႃႈ - မီးပၢင်ယွၼ်းပွလ်း ႁႂ်ႈၵိုတ်းပၼ်ပၢင်တိုၵ်း တီႈဝဵင်းလၢႆးၶႃႈ ။ ၵူၼ်းမႃးၶဝ်ႈႁူမ်ႈ ပဵၼ်ပီႈၼွင်ႉပၢႆႈၽေး တၢင်းမိူင်းၼွင် ဢၼ်မႃးမီးတီႈလၢႆးၶႃႈ ၊ တင်းၶွမ်ႊမတီႊလူလွမ် ၵုမ်းၵမ်ၸွႆႈထႅမ် ၵူၼ်းပၢႆႈၽေး တီႈလၢႆးၶႃႈလႄႈ ၸုမ်းၵူၼ်းၼုမ်ႇၵမ်ႈၽွင်ႈ တင်းမူတ်း ဢမ်ႇယွမ်းမွၵ်ႈ 500 ၵေႃႉ ။


သိုပ်ႇလၢတ်ႈဝႃႈ - ပၢင်ယွၼ်းသူးၼႆႉ လုၵ်ႉတီႈဝတ်ႉ (ၵျွင်း) ပၢင်ႇသေ ဢွၼ်ၵၼ်ပႆၵႂႃႇတီႈၵၢင်ဝဵင်း ၊ ၵႂႃႇတီႈဝတ်ႉ(ၵျွင်း) ၽြႃးလူင် မႁႃမျၢတ်ႈမုၼိ တီႈၵျွင်းတေႃႇႁူဝ်ဝဵင်း ဝဵင်းလၢႆးၶႃႈ ။ ပီႈၼွင်ႉတႆးႁဝ်းၼႆႉ ဝၼ်း 8 ၶမ်ႈ လိူၼ်လပ်း / လိူၼ်မူၼ်းၸိူဝ်းၼႆႉ တိုၼ်းဢွၼ်ၵၼ်ႁႃဝႆႈၽြႃးယဝ်ႉ ၊ ၵွပ်ႈၼၼ် လႆႈၸႂ်ၵၼ်တင်းၼမ်သေ ၸူဝ်းႁွင်ႉၵၼ်ၵႂႃႇသႆႈသယၼ်းယွၼ်းပွလ်း - ဝႃႈၼႆ ။


ဢၼ်လႆႈၸတ်းပၢင်ယွၼ်းပွလ်းၼႆႉ မီးယိူင်းဢၢၼ်းဝႃႈ - ၵွပ်ႈမီးပၢင်တိုၵ်းလႄႈ ၵူၼ်းဝၢၼ်ႈၵူၼ်းမိူင်းလႆႈပၢႆႈယၢၼ်ႁိူၼ်းယေး ဝၢၼ်ႈသူၼ် ။ ၵွပ်ႈၼၼ် ပေႃးဝႃႈၵိုတ်းပၼ်သိုၵ်းၵွၼ်ႇ ၵူၼ်းပၢႆႈၽေးသိုၵ်းၶဝ် ၸင်ႇတေၸၢင်ႈလႆႈမိူဝ်းယူႇၶိုၼ်းႁိူၼ်း ။ ၵွပ်ႈၼၼ် ၶႂ်ႈႁႂ်ႈပၢင်တိုၵ်းၼႆႉ ၸဵဝ်းဝၢႆးလႄႈႁႂ်ႈၸဵဝ်းလႆႈပွၵ်ႈ ၶိုၼ်းႁိူၼ်း ။ မိူဝ်ႈလဵဝ် ၵူၼ်းပၢႆႈၽေး ဢၼ်မႃးမီးတီႈလၢႆးၶႃႈၼႆႉ မီး 693 ၵေႃႉ ။ မႃးပိုင်ႈဢိင်ယူႇသဝ်းၸွမ်းတီႈဝတ်ႉ (ၵျွင်း) ပၢင်ႇ ၊ ၵျွင်းၶမ်း ၊ ၵျွင်းၵုင်းၼိမ် 3 တီႈ ။


ၵူၼ်းပၢႆႈၽေးၼႆႉ မႃးတီႈလၢႆးၶႃႈၸဵမ်မိူဝ်ႈၼႃႈ ပၢင်လိူၵ်ႈတင်ႈ (08/11/2015) ။ ဝၢႆးလိူၵ်ႈတင်ႈယဝ်ႉ ဝၼ်းတီႈ 10/11/2015 ၵွပ်ႈပိူဝ်ႈဢဝ်ႁိူဝ်းဝိၼ်ယိုဝ်း တီႈမိူင်းၼွင်လႄႈ တႄႇဢဝ်ၼၼ်ႉမႃး ၵူၼ်းပၢႆႈၽေးၵေႃႈတိူဝ်းၼမ်မႃး ။ မိူဝ်ႈလဵဝ်ၼႆႉ ၵွပ်ႈပဵၼ်ၶၢဝ်းယၢမ်းဢဝ်ၶဝ်ႈဢဝ်ၼမ်ႉၶဝ်လႄႈ ပီႈၼွင်ႉၵူၼ်းပၢႆႈၽေးၶဝ်ၵေႃႈ ၵူဝ်ပူၼ်ႉၶၢဝ်းယၢမ်းမၼ်းၵႂႃႇ ။ ပေႃးပူၼ်ႉၶၢဝ်းယၢမ်းမၼ်းၵႂႃႇၸိုင်ဢမ်ႇဢဝ်လႆႈၼႆ တႃႇတေယူႇၵိၼ်ၵႂႃႇတၢင်းၼႃႈ ၶဝ်တေမီးတၢင်းယၢပ်ႇၽိုတ်ႇၶၢၼ်ၸႂ်ၼမ် ။ မိူဝ်းၼႃႈၼႆႉ လွင်ႈၵူၼ်းပၢႆႈၽေးတေၼမ်မႃး ဢမ်ႇၼမ်မႃးၼၼ်ႉ မၼ်းယူႇတီႈပၢင်တိုၵ်းတေယၢဝ်း ဢမ်ႇယၢဝ်း ။


ၶၢဝ်းယၢမ်းမိူဝ်ႈလဵဝ်ၼႆႉ ပီႈၼွင်ႉတႆးႁဝ်းၶႃႈ မီးတီႈလႂ် ဝဵင်းလႂ် မိူင်းလႂ်သေဢမ်ႇဝႃႈ ၶႂ်ႈႁႂ်ႈဢွၼ်ၵၼ်ၶဝ်ႈၸႂ် တူၺ်းထိုင်ပၼ် ပီႈၼွင်ႉတႆးႁဝ်း ဢၼ်လႆႈပၢႆႈၽေးယူႇ ။ မိူဝ်ႈလဵဝ်ၼႆႉ ႁူဝ်ၵူၼ်းပၢႆႈၽေးသိုၵ်း ၶႂ်ႈမီးယူႇမွၵ်ႈ 8 ႁဵင် တေႃႇထိုင် 1 မိုၼ်ႇ ။ လွင်ႈၼႆႉ ပဵၼ်လႆႈၸိူင်ႉႁိုဝ်ၵေႃႈ ႁႂ်ႈဢွၼ်ၵၼ်ၸွႆႈထႅမ် - ၸၢႆးၵျေႃႇၸေႇယ သိုပ်ႇလၢတ်ႈၵႂႃႇၼင်ႇၼႆ ။


ထႅင်ႈၾၢႆႇၼိုင်ႈ မိူဝ်ႈဝၼ်းတီႈ 19/11/2015 ၵူၺ်းၼင်ႇၵဝ်ႇ ၊ ၼႂ်းဝဵင်းတႃႈၵုင်ႈ (မိူင်းမၢၼ်ႈ) ၵေႃႈ မီးၸုမ်းၵူၼ်းၼုမ်ႇတႆး တင်းၵူၼ်းၼုမ်ႇလၢႆလၢႆၸၢဝ်းၶိူဝ်း ၊ ဢွၵ်ႇမႃးတူင်ႉၼိုင် ႁပ်ႉငိုၼ်းၸွႆႈထႅမ် တႃႇၸွႆႈၵူၼ်းထူပ်းၽေးသိုၵ်း ၼႂ်းမိူင်းတႆး ။


ၸၢႆးဢွင်ႇမိၼ်ႉဢူး ၽူႈၶဝ်ႈႁူမ်ႈၵၢၼ်တူင်ႉၼိုင် လၢတ်ႈဝႃႈ - တီႈတႃႈၵုင်ႈၼႆႉ လႆႈယိပ်းပၢႆႉလိၵ်ႈ ၵိုတ်းပၢင်တိုၵ်းသေ တူင်ႉၼိုင်ႁပ်ႉငိုၼ်းၸွႆႈထႅမ် ၊ ႁဵတ်းႁႂ်ႈၵူၼ်းၼႂ်းမိူင်းၼွၵ်ႈမိူင်း ၵူႈၸိုင်ႈမိူင်းပေႃးႁူႉၸွမ်း ။ ၵူၼ်းၼုမ်ႇၼႂ်းတႃႈၵုင်ႈလၢႆၵေႃႉလၢႆၸုမ်းၵေႃႈ ဢွၼ်ၵၼ်မႃးႁူမ်ႈပႃးတင်းလုၵ်ႈႁဵၼ်းယၢင်းလႅင် ၸိူဝ်းမႃးၶိုၼ်ႈၸၼ်ႉၸွမ် ။ ၼႂ်းၼႆႉ ပႃးပီႈၼွင်ႉၶၢင် ၶျၢင်း ရၶႅင်ႇၸိူဝ်းၼႆႉ ၊ တင်းမူတ်းႁူမ်ႈၵၼ်မီးၵူၼ်း 20 ပၢႆ ။  တီႈတႃႈၵုင်ႈၼႆႉ လႆႈငိုၼ်း 4 သႅၼ်ပၢႆ ၊ ၼွၵ်ႈသေၼၼ်ႉ ပဵၼ်ငိုၼ်းၻေႃႊလိူဝ်ႊၵေႃႈမီး - ဝႃႈၼႆ ။


ၸဝ်ႈတႃႇၼၶဝ် ဢၼ်တိတ်းတေႃႇၵပ်းၾူၼ်ႊ ၸွႆႈထႅမ်မႃးၵေႃႈမီး ။ ၶူဝ်းၶွင်ဢၼ်လႆႈႁပ်ႉၼၼ်ႉ ၶဝ်ႈသၢၼ် 15 ထူင် ၊ ၼမ်ႉမၼ်း 2 ထၢင် (ပုင်း) ။ ဢိင်ၼိူဝ် ထိုင်ၶၢဝ်းၵတ်းယဝ်ႉလႄႈၵမ်ႈၽွင်ႈၵေႃႈၸွႆႈမႃး သိူဝ်ႈၶူဝ်းၸိူဝ်းၼႆႉ - ၸၢႆးဢွင်ႇမိၼ်ႉဢူး သိုပ်ႇလၢတ်ႈၼင်ႇၼႆ ။