ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၵႂႃႇၸွႆႈထႅမ် ၵူၼ်းထူပ်းၽေးသိုၵ်း ဢၼ်လုၵ်ႉတၢင်းမိူင်းၼွင် မိူင်းသူႈ မႃးပသေႃႉႁူမ်ႈယူႇသဝ်း ၸွမ်းဝတ်ႉ (ၵျွင်း) တီႈဝဵင်းလၢႆးၶႃႈ ။

ၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA) ၵႂႃႇၸွႆႈထႅမ် ၵူၼ်းထူပ်းၽေးသိုၵ်း တီႈဝဵင်းလၢႆးၶႃႈ

မိူဝ်ႈဝၼ်းတီႈ 21/11/2015 ၽူႈယႂ်ႇၵူၼ်းလူင် ၸၼ်ႉၽူႈၼမ်း ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA)  ၸဝ်ႈဢွင်ႇမျႃႉ ၊ ၸဝ်ႈၸၢႆးဢူး ဢိၵ်ႇတင်းၽူႈမီးပုၼ်ႈၽွၼ်းၵမ်ႈၽွင်ႈ ႁွတ်ႈၽႅဝ်ၵႂႃႇတီႈဝဵင်းလၢႆးၶႃႈ ။ ႁူပ်ႉထူပ်းၵူၼ်းပၢႆႈၽေးသေ ယိုၼ်ႈမွပ်ႈၸွႆႈထႅမ်ပၼ် ၶူဝ်းၶွင်ၶိူင်ႈၸႂ်ႉသွႆ တွၼ်ႈတႃႇၵူၼ်းပၢႆႈၽေးသိုၵ်းၶဝ် ၸိူဝ်းမႃးပိုင်ႈဢိင်ယူႇသဝ်းဝႆႉ တီႈဝတ်ႉ (ၵျွင်း) ပၢင်ႇ ၊ ၵျွင်းၶမ်း ။


ၵူၼ်းဝၢၼ်ႈၵူၼ်းမိူင်း ၸိူဝ်းထူပ်းၽေးသိုၵ်းသေ ပၢႆႈၽေးႁွတ်ႈၽႅဝ်ဝႆႉတီႈမိူင်းလၢႆးၶႃႈၼႆႉ ပဵၼ်ၵူၼ်းဝၢၼ်ႈၵူၼ်းမိူင်း တၢင်းမိူင်းၼွင် မိူင်းသူႈ ။ မိူဝ်ႈလဵဝ် ၵူၼ်းပၢႆႈၽေးတင်းမူတ်းမီး 700 ပၢႆ ။


ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းလူင်ဢွင်ႇမျႃႉ လၢတ်ႈဝႃႈ - ပၼ်ႁႃၵၢၼ်သိုၵ်းၼႆႉ ၵွပ်ႈဢမ်ႇဢဝ်လၢႆးၵတ်းယဵၼ်ၵႄႈလိတ်ႈလႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း တူၵ်းတၢင်းယၢပ်ႇၽိုတ်ႇ ။ ၵွပ်ႈၼၼ်လႄႈ ၶႂ်ႈတိုၵ်းသူၼ်းဝႃႈ ပၼ်ႁႃၵၢၼ်သိုၵ်း ပၼ်ႁႃၵၢၼ်မိူင်းၼၼ်ႉ ယႃႇပေဢဝ်လၢႆးၵၢၼ်သိုၵ်းၵႄႈလိတ်ႈ ၊ ႁႂ်ႈဢဝ်လၢႆးၵၢၼ်မိူင်းသေ ၵႄႈလိတ်ႈၵၼ်ၵႂႃႇ ။ ၼႂ်းပိုၼ်ႉတီႈၼႃႈလိၼ်ၸၢဝ်းၶိူဝ်းၼႆႉ ယႃႇပေသိုပ်ႇႁဵတ်းပၢင်တိုၵ်းၵၼ်ထႅင်ႈယဝ်ႉ ၊ ႁႂ်ႈၶတ်းၸႂ်လူတ်းယွမ်းပၢင်တိုၵ်းၵႂႃႇ ။ ၸုမ်းၸိူဝ်းဢၼ်လူင်းလၢႆးမိုဝ်း ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) ၵႂႃႇယဝ်ႉၼၼ်ႉၵေႃႈ လွင်ႈၼႆႉ ယၢမ်ႈတုၵ်းယွၼ်းမႃးယူႇ - ဝႃႈၼႆ ။


ၵူၼ်းမိူင်းၼွင် ၼၢင်းႁွမ် လၢတ်ႈဝႃႈ - ငိၼ်းသဵင်ႁိူဝ်းဝိၼ်မႃးလႄႈ လုၵ်ႈဢွၼ်ႇၶဝ်လႅၼ်ႈဢွၵ်ႇၵႂႃႇတူၺ်း ၊ ယူႇဢမ်ႇႁိုင်ၵေႃႈ ပွႆႇမၢၵ်ႇလူင်သႂ်ႇတိၵ်းတိၵ်းလႄႈ ႁဵတ်းႁႂ်ႈၾႆးမႆႈႁိူၼ်းၵႂႃႇ 2 လင် ၊ ႁဝ်းၶႃႈၶၢႆႉမႃးယူႇတီႈလၢႆးၶႃႈၼႆႉ မီး 10 ဝၼ်းပၢႆယဝ်ႉ ။ မႃးယူႇတီႈၼႆႈၼႆႉ ၵၢၼ်သင်ၵေႃႈဢမ်ႇၸၢင်ႈႁဵတ်း ၊ တီႈဝၢၼ်ႈႁဝ်းၶႃႈယူႇၼႆႉ ၶၢဝ်းၼႆႉပဵၼ်ၶၢဝ်းပၢတ်ႇၶဝ်ႈ ၊ ထုၵ်ႇလီလႆႈမိူဝ်းပၢတ်ႇၶဝ်ႈယဝ်ႉ - ဝႃႈၼႆ ။


ၼၢင်းၼၢင်း ၵူၼ်းမိူင်းၼွင် ၵေႃႈလၢတ်ႈဝႃႈ - သဵင်မၢၵ်ႇသဵင်ၵွင်ႈၼႆႉ မၼ်းလင်ႁႅင်းလႄႈၵူၼ်းဝၢၼ်ႈ ၵူၼ်းမိူင်းတူၵ်းၸႂ် ။ ၵွပ်ႈၼၼ် မႄႈၶႃႈၼၢင်း ဢႃယု 84 ပီၼၼ်ႉ တူၵ်းၸႂ်သဵင်ၵွင်ႈသဵင်မၢၵ်ႇသေ လႆႈလူႉသဵင်ႈသုတ်းမုၼ်ၵႂႃႇ ယွၼ်ႉပိူဝ်ႈပၢင်တိုၵ်းၼႆႉ ။ ၵွပ်ႈၼၼ်လႄႈ တုၵ်းယွၼ်းႁႂ်ႈၵိုတ်းပၼ်ပၢင်တိုၵ်းၽႂ်းၽႂ်းသေၵမ်း - ဝႃႈၼႆ ။


ၼႂ်းလုၵ်ႈလိူၼ်ၼူဝ်ႊဝႅမ်ႊၿိူဝ်ႊၼႆႉ သိုၵ်းမၢၼ်ႈႁႅၼ်းသိုၵ်း လေႃႇတိုၵ်း SSPP/SSA ႁၢဝ်ႈႁႅင်းလႄႈ ၵူၼ်းပၢႆႈၽေး တီႈႁၢႆးပႃ မိူင်းသူႈ မီး 1,300 ပၢႆ ။ တီႈၵဵင်းလိူၼ် မီး 900 ပၢႆ ၊ တီႈတူၼ်ႈတီး 300 ပၢႆ ၊ တီႈလႃႈသဵဝ်ႈမီး 300 ပၢႆ (မိူဝ်ႈလဵဝ် ပွၵ်ႈၶိုၼ်းယဝ်ႉ) ၊ တီႈလၢႆးၶႃႈမီး 700 ပၢႆ ။ တီႈဝၢၼ်ႈဝႃႉ မီး 1,000 ပၢႆ - ၼႆယဝ်ႉ ။