ၽူႈၼမ်းၸၼ်ႉသုင် ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၵႂႃႇၼေႇပျီႇတေႃႇ ၸွမ်းၼင်ႇလူင်ပွင်ၸိုင်ႈမၢၼ်ႈ ႁွင်ႉဝွၵ်ႇမႃး ။ တေဢုပ်ႇဢူဝ်းတုၵ်းယွၼ်း လွင်ႈႁႂ်ႈၵိုတ်းပၼ်ပၢင်တိုၵ်း ၼႂ်းမိူင်းတႆး ။ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉ ၵႅမ်ၽူႈၼမ်းၼႂ်း SSPP/SSA ၸဝ်ႈၶမ်းတီႇ ၼင်ႇၼႆ ။

ထၢမ် - ငိၼ်းၶၢဝ်ႇဝႃႈ ၸဝ်ႈၼေႃႇလဵၵ်း တင်း ဢူးတဵင်းၸေႃႇ ၊ တေႁူပ်ႉၵၼ်တီႈၼေႇပျီႇတေႃႇ ၼႆၶႃႈႁႃႉ ?။


တွပ်ႇ - ၶဝ်ၵပ်းၾူၼ်ႊမႃး လၢတ်ႈတေႃႇၵၼ် ၵဵဝ်ႇၵပ်းလွင်ႈပၼ်ႁႃ လွင်ႈတႃႇတေၵိုတ်းယိုဝ်းၵၼ်ၸိူဝ်းၼႆႉ ။ တီႈၼေႇပျီႇတေႃႇႁွင်ႉမႃးလႄႈ ၸဝ်ႈၼေႃႇလဵၵ်း လူင်းၵႂႃႇမီးတီႈၼေႇပျီႇတေႃႇသေ ပႂ်ႉႁူပ်ႉၸွမ်ၸိုင်ႈဝႆႉ ။ လႆႈငိၼ်းဝႃႈလႆႈႁူပ်ႉယဝ်ႉ ၊ ၵူၺ်းၵႃႈ ဢုပ်ႇၵၼ်သင်လၢႆလၢႆၼၼ်ႉ ၶဝ်ပႆႇႁၢႆးငၢၼ်းၶိုၼ်ႈမႃး တီႈငဝ်ႈငုၼ်း ။


ထၢမ် - မိူဝ်ႈလဵဝ်ၼႆႉ ငဝ်းလၢႆးၼႂ်းပိုၼ်ႉတီႈၼႃႈသိုၵ်း ပဵၼ်ၸိူင်ႉႁိုဝ်ဝႆႉၶႃႈ ?။


တွပ်ႇ - မိူဝ်ႈလဵဝ် ငဝ်းလၢႆးမၼ်းယဵၼ်ဝႆႉ ၊ တင်ႈတႄႇဢဝ်ဝၼ်းတီႈ 19 မိူဝ်ႈဝႃးမႃးတေႃႇထိုင်မိူဝ်ႈၼႆႉ ဝၼ်းတီႈ 20 ၼႆႉယဵၼ်ဝႆႉ ပႆႇငိၼ်းဝႃႈၸိူင်ႉႁိုဝ် ။  မိူဝ်ႈသိုၼ်းပွတ်းၸဝ်ႉ ယင်းတိုၵ်ႉယိုဝ်းၵၼ်ယူႇ ။


ထၢမ် - ငိၼ်းဝႃႈမိူဝ်ႈဝၼ်းတီႈ 18 ၶဝ်ယိုဝ်းတီႈမိူင်းၼၢင်း ၼႆၶႃႈႁႃႉ ?။


တွပ်ႇ - တီႈမိူင်းၼၢင်းၼႆႉ တီႈတပ်ႉမူၺ်ႇတေႃႇဝဵင်းၵဝ်ႇၼႆႉ ၶဝ်ယူႇၵႆၵႆဢဝ်မၢၵ်ႇလူင်ယိုဝ်းမႃးတၢင်းႁဝ်းၶႃႈ ။ တီႈမိူင်းၼွင်ၸိူဝ်းၼႆႉ ၶဝ်ဢဝ်မၢၵ်ႇလူင် ယိုဝ်းသႂ်ႇမႃးတၢင်းဢၼ်ပဵၼ်ပၢင်တိုၵ်း ။


ထၢမ် - တင်ႈတႄႇလိူၼ်ဢွၵ်ႊထူဝ်ႊၿိူဝ်ႊ ဝၼ်းတီႈ 6 မႃးတေႃႇထိုင်ယၢမ်းလဵဝ်ၼႆႉ ဢဵၼ်ႁႅင်းသိုၵ်းမၢၼ်ႈ ဢၼ်ၶဝ်မႃးလေႃႇတိုၵ်း SSPP/SSA ၼႆႉ မီးလၢႆတပ်ႉၵွင်ၶႃႈ ?။


တွပ်ႇ - တင်းမူတ်းမီး 3 ပိဝ်ႇႁႃႇ ။ 1 ပိဝ်ႇႁႃႇ မီး 3 တပ်ႉၵွင် ။ ၵူၺ်းၵႃႈ တေဢမ်ႇၵႃးၼၼ်ႉ ႁႅင်းသိုၵ်းၶဝ်ၼႆႉတေမီးမွၵ်ႈ 1,300 ၸိူဝ်းၼႆႉ ။ ပဵၼ်ၼႂ်းတိူင်းသိုၵ်းဝၼ်းဢွၵ်ႇၵၢင် (ယလၶ) ၶူဝ်လမ် ။ ပႃႈတႂ်ႈငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) 17 မိူင်းပၼ်ႇ ၊ ၸၵၶ 2 မိူင်းၼွင် ၊ တိူင်းသိုၵ်းဝၼ်းဢွၵ်ႇ (တူၼ်ႈတီး) ၵေႃႈပႃးၽွင်ႈ ။ ၼႂ်းၼႆႉ ဢမ်ႇပႃးတပ်ႉၵွင်ႈလူင် ။


ထၢမ် - တင်ႈတႄႇဝၼ်းတီႈ 6/10/2015 မႃးတေႃႇထိုင်ယၢမ်းလဵဝ်ၼႆႉ ပဵၼ်ပၢင်တိုၵ်းလၢႆပွၵ်ႈယဝ်ႉၶႃႈ ?။


တွပ်ႇ - ပေႃးၼပ်ႉတူၺ်းတႄႉ ၶႂ်ႈမီးမွၵ်ႈ 30 ပွၵ်ႈ ။ ၵူၺ်းၵႃႈ မၢင်ဝၼ်းသမ်ႉပဵၼ်ႁၢဝ်ႈႁႅင်း ထိုင်ၸၼ်ႉဢဝ်ႁိူဝ်းဝိၼ်တိုၵ်းသိုၵ်းမႃးယိုဝ်း ။ မၢင်ဝၼ်းၵေႃႈ 1-2 ပွၵ်ႈ ၊ မၢင်ဝၼ်းၵေႃႈ 2-3 ပွၵ်ႈ ။ ပေႃးႁူမ်ႈၵၼ်တင်းမူတ်းတႄႉ ပၢင်တိုၵ်းဢမ်ႇယွမ်းမွၵ်ႈ 30 ၶိုၼ်ႈၼိူဝ်တေႃႇထိုင် 40 ပွၵ်ႈ ။


ထၢမ် - ဢၼ်ဢဝ်ႁိူဝ်းဝိၼ်မႃးလေႃႇတိုၵ်းၼႆႉ မီးလၢႆၵမ်းလၢႆပွၵ်ႈၶႃႈ ?။


တွပ်ႇ - ဢၼ်လႆႈႁူႉသၢႆမၢႆမၼ်းတႄႉ မီးဝႆႉ 8 ဝၼ်း ။ မိူဝ်ႈတႄႇမၼ်း ဝၼ်းတီႈ 25/10/2015 ၶဝ်ဢဝ်ႁိူဝ်းဝိၼ်ၸွပ်ႇၶၢဝ်ႇ ၶဝ်မႃးဢဝ်ၶၢဝ်ႇၵူၺ်း ။ ပေႃးပႃးၼၼ်ႉ မႃးၼပ်ႉတူၺ်းမီး 8 ဝၼ်း ။ ပေႃးဢဝ်ပွၵ်ႈမၼ်းဝႃႈတႄႉ မၢင်ဝၼ်းမႃး 2 ပွၵ်ႈ / ၸုပ်ႈ ။ မၢင်ဝၼ်းမႃး 3 ပွၵ်ႈ ။ ဢၼ်ႁၢဝ်ႈႁႅင်းၼႆႉ တႄႇဝၼ်းတီႈ 16-17-18 မႃးၼႆႉ ၶဝ်ၸႂ်ႉႁိူဝ်းႁိူဝ်းဝိၼ်တိုၵ်း Mig-29 , MI-35 ၸိူဝ်းၼႆႉ ။ ဝၼ်းတီႈ 17 ၼႆႉ ဝၼ်းလဵဝ်ၵူၺ်း ႁိူဝ်းဝိၼ်တိုၵ်းမီး 8 လမ်း ၊ ၶၢဝ်းတၢင်းၼိုင်ႈဝၼ်းၵူၺ်း မီး 2 ပွၵ်ႈ ။ လိူဝ်သေၼၼ်ႉတႄႉ 2 လမ်း ၊ 3 လမ်း ၊ မၢင်ဝၼ်းၵေႃႈ 4 လမ်း ၊ ဝၼ်းလႂ်သွင်ပွၵ်ႈ ၸိူဝ်းၼႆႉ ။


ထၢမ် - ႁိူဝ်းဝိၼ်တိုၵ်းသိုၵ်းမၢၼ်ႈမႃး 8 ဝၼ်းၼႆႉ တီႈဢၼ်ၶဝ်မႃးလေႃႇတိုၵ်းၼႆႉ ပဵၼ်တီႈလႂ်လၢႆလၢႆၽွင်ႈၶႃႈ ?။


တွပ်ႇ - တီႈႁိူဝ်းဝိၼ်မႃးတိုၵ်းယိုဝ်းၼႆႉ ပဵၼ်တီႈၵဝ်ႇ ၊ ၾၢႆႇတူၵ်းမိူင်းသူႈ ၊ ၾၢႆႇဢွၵ်ႇဝၢၼ်ႈႁႆး ၊ ၾၢႆႇႁွင်ႇမိူင်းၼွင် ။ ၼႂ်းၵႄႈၵၢင်ၼႆႉ ၼႂ်းတူင်ႇတၢင်ႇဝၢၼ်ႈသေႃႉ ဝၢၼ်ႈလူၺ် တႃႈသၢမ်ပူးၸိူဝ်းၼႆႉ ။ ၼွၵ်ႈလႅၵ်ႈမၼ်း ဢၼ်မႃးဝၼ်းတီႈ 18 ပဵၼ်တၢင်းမိူင်းၼၢင်း မႃးပွၵ်ႈၼိုင်ႈ ။


ထၢမ် - ဢိင်ၼိူဝ်ပဵၼ်ပၢင်တိုၵ်းသေ ပေႃးယူႇတီႈ SSPP/SSA ယိပ်းၵုမ်းၽွင်းငမ်းဝႆႉၼႆႉ ႁူဝ်ၵူၼ်းတေမီးမွၵ်ႈၵႃႈႁိုဝ် ၊ လင်ႁိူၼ်းမီးမွၵ်ႈၵႃႈႁိုဝ် ဢၼ်လႆႈပၢႆႈယၢၼ်ႁိူၼ်းယေး ယွၼ်ႉပၢင်တိုၵ်းသိုၵ်းသိူဝ်ၼႆႉၶႃႈ?။


တွပ်ႇ - ပေႃးဢဝ်ၾၢႆႇ SSPP/SSA ပဵၼ်ပိူင်ၼိုင်ႈ ။ ပေႃးဢဝ်ၾၢႆႇလူင်ပွင်ၸိုင်ႈမၢၼ်ႈ ပဵၼ်ပိူင်ၼိုင်ႈ ၊ တေၶဝ်ႈပႃးၼႂ်းၸႄႈဝဵင်းမိူင်းသူႈ မိူင်းၼွင် ၵေးသီး ။ တင်းၼမ်ဝၢၼ်ႈ တေမီးမွၵ်ႈ 25 ၶိုၼ်ႈၼိူဝ် ။


ထၢမ် - ပေႃးလၢမ်းတူၺ်း ႁူဝ်ၵူၼ်းတေမီးမွၵ်ႈၵႃႈႁိုဝ်ၶႃႈ ?။


တွပ်ႇ - ႁူဝ်ၵူၼ်းတႄႉ ဢၼ်လႆႈသၢႆမၢႆမၼ်းၼၼ်ႉ မီး 8,000 ပၢႆ ။ ဢၼ်ဢမ်ႇလႆႈသၢႆမၢႆမၼ်း မိူၼ်ၼင်ႇ ဢၼ်ၵႂႃႇတၢင်းလႃႈသဵဝ်ႈလႄႈသင် ၊ ၵႂႃႇတူၼ်ႈတီး ၊ လွႆလႅမ် ၊ ပၢင်လူင် လၢႆးၶႃႈၸိူဝ်းၼႆႉ ဢမ်ႇလႆႈသၢႆမၢႆမၼ်းတႅတ်ႈတေႃး ။ ၸိူဝ်းဢၼ်မီးပီႈၼွင်ႉၼႂ်းဝဵင်းၵေႃႈ ၵႂႃႇၸူးပီႈၼွင်ႉၼႂ်းဝဵင်း ။ ၸိူဝ်းဢမ်ႇမီးပီႈၼွင်ႉၼႂ်းဝဵင်းၵေႃႈ ဢၼ်ၵႂႃႇၶွၼ်ႈတုမ်ၵၼ်တီႈ ဝၢၼ်ႈဝႃႉ ၊ တီႈႁၢႆးပႃ ၊ တီႈမိူင်းသူႈၸိူဝ်းၼႆႉ ႁဝ်းၶႃႈလႆႈသၢႆမၢႆမၼ်းယူႇ ။ ပေႃးပႃးဢၼ်ၼႂ်းဝဵင်း တေမီးဢမ်ႇယွမ်းမွၵ်ႈ 1 မိုၼ်ႇ ။


ထၢမ် - ပေႃးပႃးၵူၼ်းမိူင်း ဢၼ်ယူႇတီႈဝၢၼ်ႈႁႆးသေပၢႆႈၸိူဝ်းၼႆႉ တင်းမူတ်းတေမီးမွၵ်ႈၵႃႈႁိုဝ်ၶႃႈ ?။


တွပ်ႇ - ဝၢၼ်ႈႁႆးတႄႉ တေလႆႈသႂ်ႇသၢႆမၢႆမၼ်းဝႃႈ ငိူင်ႉဝႄႈဢွၵ်ႇ ။ ၵွပ်ႈဝႃႈ ပေႃးၵၢင်ဝၼ်း ၵူဝ်ႁိူဝ်းဝိၼ်မႃး ၊ ၵူဝ်သိုၵ်းမၢၼ်ႈပွႆႇမၢၵ်ႇလူင်သႂ်ႇၸိူဝ်းၼႆႉလႄႈ ငိူင်ႉဝႄႈၵၢင်ဝၼ်း ၊ ၵၢင်ၶမ်ႈၵေႃႈဢွၼ်ၵၼ်မႃးၼွၼ်း ၊ ၵမ်ႈၽွင်ႈၵေႃႈဢမ်ႇႁတ်းၼွၼ်း ။ ပေႃးလုၵ်ႈဢွၼ်ႇၽူႈယိင်းတႄႉ ၵႂႃႇယူႇၸွမ်းဝၢၼ်ႈၼွၵ်ႈ ႁိမ်းႁွမ်းဝၢၼ်ႈႁႆး ။ ဝၢၼ်ႈၸိူဝ်းယူႇႁိမ်း ဢၼ်ပဵၼ်ပၢင်တိုၵ်းတႄႉတႄႉၼၼ်ႉ လႆႈပၢႆႈၵႂႃႇၼႂ်းဝဵင်း ။ တင်းဢၼ်ၵူဝ်ၽေးသိုၵ်းသေငိူင်ႉဝႄႈဢွၵ်ႇလႄႈသင် ၊ တင်းဢၼ်ၶၢႆႉဢွၵ်ႇဝၢၼ်ႈ ဝၢၼ်ႈပေႃးႁၢမ်းၼၼ်ႉ တင်းမူတ်းမီးမွၵ်ႈ 1 မိုၼ်ႇပၢႆ ။


ထၢမ် - မိူဝ်ႈလဵဝ်ၼႆႉ တူဝ်တႅၼ်းၾၢႆႇ SSPP/SSA တေၵႂႃႇႁူပ်ႉၸွမ်ၸိုင်ႈလႄႈ ၽူႈမီးပုၼ်ႈၽွၼ်း တီႈၼေႇပျီႇတေႃႇၶဝ်ၼႆႉ ၵၢၼ်ဢၼ်ၼႆႉ ၸွင်ႇမၼ်းတေလႅပ်ႈပဵၼ်ၵၢၼ် (ဢွင်ႇ) ယူႇၶႃႈႁႃႉ ။ တေၸၢင်ႈမီးမႃးလွင်ႈဢုပ်ႇဢူဝ်း သဵတ်ႈၵႃႈသဵတ်ႈႁူဝ်ၵၼ် ၸိူင်ႉႁိုဝ်ၶႃႈ ?။


တွပ်ႇ - ဢၼ်ၶဝ်ႁွင်ႉမႃးၼႆႉ ၵပ်းသိုပ်ႇၵၼ်ၼႂ်းၾူၼ်ႊသေ ႁွင်ႉမႃးၽူႈတၢင်တူဝ်ၼႂ်း SSPP/SSA ။ ၸဝ်ႈၼေႃႇလဵၵ်းၵေႃႈ ပဵၼ်ၶွမ်ႊမတီႊငဝ်ႈငုၼ်းၼိုင်ႈၵေႃႉလႄႈ တၢင်တူဝ် SSPP/SSA သေ ၵႂႃႇထူပ်းၸွမ်ၸိုင်ႈ တီႈၼေႇပျီႇတေႃႇ ဝႃႈၸိူင်ႉၼႆ ။ ႁႂ်ႈၶဝ်ႈထမ်းတြႃး ပဵၼ်ၽိုၼ်လိၵ်ႈၽိုၼ်လၢႆးတႄႉ ႁဝ်းၶႃႈဢမ်ႇလႆႈႁၼ် ။


ထၢမ် - တႃႇတေၵႂႃႇဢုပ်ႇဢူဝ်းၼႆႉ ၾၢႆႇ SSPP/SSA ႁၢင်ႈႁႅၼ်းဝႆႉၸိူင်ႉႁိုဝ်ၶႃႈ ?။


တွပ်ႇ - မိူၼ်ၼင်ႇ ၵႂႃႇၶႆႈၼႄလွင်ႈတၢင်းပၼ်ႁႃ ဢၼ်ပဵၼ်ပၢင်တိုၵ်းၸိူဝ်းၼႆႉ ။ မိူဝ်ႈပႆႇပဵၼ်ပၢင်တိုၵ်းဝၼ်းတီႈ 6 ၼၼ်ႉ ၾၢႆႇတပ်ႉမၢၼ်ႈၸႂ်ႉႁဝ်းၶၢႆႉပၼ်တီႈ တႃႈသၢမ်ပူး တႃႈၼမ်ႉပၢင် ပၼ်ႁႃမၼ်းတႄႇမိူဝ်ႈၼၼ်ႉမႃး ။


ထၢမ် - တင်ႈတႄႇ သိုၵ်းမၢၼ်ႈႁႅၼ်းသိုၵ်းမႃးလေႃႇတိုၵ်းၼႆႉ ဢၼ်တၢင်း SSPP/SSA လႆႈထွႆထွၼ်သိုၵ်းပၼ်ၼႆႉ မီးလၢႆတီႈၶႃႈ ?။


တွပ်ႇ - တၢင်းတႃႈသၢမ်ပူးၼႆႉ မၼ်းပဵၼ်တီႈႁဝ်းၶႃႈယူႇမႃး ၸဵမ်မိူဝ်ႈလႂ် ၊ ပဵၼ်ၼႃႈတီႈႁဝ်းၶႃႈၵဝ်ႇၵဝ်ႇ ၵူႈပွၵ်ႈ ။ တူၺ်းႁၼ်ထိုင်ၼႃႈ ၽွင်းလူင်ဢူးၶိၼ်ႇမွင်ႇၸူဝ်း ၊ ၵူၼ်းလူင်ႁဝ်းၶႃႈ ၊ လွင်ႈၵတ်းယဵၼ်သေ ႁဝ်းၶႃႈလႆႈငိူင်ႉထွႆပၼ်လီလီငၢမ်းငၢမ်း ။ ႁဝ်းၶႃႈထွႆပၼ်သေ ဝၼ်းတီႈ 6 ၶဝ်ၶဝ်ႈယိုဝ်း ။ ႁဝ်းၶႃႈဢမ်ႇၶႂ်ႈထွႆပၼ်ဢမ်ႇၸႂ်ႈ ၶဝ်မႃးယိုဝ်းႁဝ်းဢွၼ်တၢင်း ။ တႃႇတေထွႆပၼ်ၼၼ်ႉ ၶဝ်ဢမ်ႇႁွင်ႉဢုပ်ႇလီလီငၢမ်းငၢမ်း ၊ ယူႇၼႂ်းၾူၼ်ႊသေ လၢတ်ႈမႃးဝႃႈ တေထွႆဢမ်ႇထွႆ ၊ ပေႃးဢမ်ႇထွႆၵေႃႈႁဝ်းတေၶဝ်ႈယိုတ်းၼႆသေ ဢဝ်ၵၢၼ်သိုၵ်းမႃးလေႃႇႁဝ်းဢွၼ်တၢင်း ။


ထၢမ် - ဢၼ်လႆႈငိူင်ႉပၼ်ၶဝ်ၼႆႉ မီးလၢႆၵွင်းလွႆၶႃႈ ?။


တွပ်ႇ - မၼ်းမီး 3 သင်ႉ / ၸၼ်ႉ ။ ပေႃးတေငိူင်ႉ 3 သင်ႉၵေႃႈ မၼ်းလူဝ်ႇၶၢမ်ႈတၢင်းၵူၺ်း ။ ၼႃႈတီႈ တီႈယူႇႁဝ်းၼႆႉ ႁဝ်းဢမ်ႇႁဵတ်းတပ်ႉႁဵတ်းတႃႇသေ ယူႇတႄႉတႄႉဝႃႈဝႃႈ ၊ ၵွပ်ႈဝႃႈႁဝ်း ပဵၼ်ၽွင်းယၢမ်းလၢႆးလုၵ်ႉၽိုၼ်ႉ ၊ ႁဝ်းၶႃႈလႆႈယူႇၸွမ်းႁူၺ်ႈၸွမ်းလွႆသေ ႁဵတ်းသုမ်ႉၶႃးဢွၼ်ႇသေယူႇၵူၺ်း ၊ ႁဵတ်းတပ်ႉႁဵတ်းတႃႇ ဢမ်ႇမီး ။ တီႈလွႆလႂ်သုင်ၵေႃႈ ႁဝ်းၶႃႈယူႇတီႈၼၼ်ႈ ။ ပေႃးမႃးသွၼ်ႇတႄႉတႄႉ ႁဝ်းၶႃႈလႆႈငိူင်ႉဝႄႈပၼ် ။ တႃႈသၢမ်ပူးၵေႃႈ ငိူင်ႉဝႄႈပၼ်ယဝ်ႉၵမ်းၼိုင်ႈ ၊ ၼၼ်ႉၵူၺ်းဢမ်ႇၵႃး သမ်ႉၸႂ်ႉၶၢႆႉထႅင်ႈ ။ သင်ႉ 2 ႁိမ်းႁွမ်းတႃႈသၢမ်ပူးၵေႃႈ ႁဝ်းၶႃႈလႆႈထွႆထႅင်ႈ ၊ ၵမ်းလိုၼ်းသုတ်း ထိုင်မႃးတီႈၵွင်းလွႆ ဢၼ်ၸမ်ငဝ်ႈငုၼ်းႁဝ်းၶႃႈ 2-3 လၵ်းၼႆႉ ။ ၼႆႉၵေႃႈၸႂ်ႉႁဝ်းၶႃႈထွႆ ၵူၺ်းဢမ်ႇၸၢင်ႈထွႆလႆႈ ။


ထၢမ် - ပေႃးတူၺ်းမိူၼ်ၼင်ႇ ဢၼ်ၸွမ်ၸိုင်ႈယွၼ်းႁူပ်ႉဢုပ်ႇၼႆႉ ပေႃးယူႇတီႈၸဝ်ႈႁဝ်းၶဝ်တူၺ်း ၸွင်ႇမၼ်းတေၵႄႈလိတ်ႈလႆႈပၼ်ႁႃတႄႉ ယူႇၶႃႈႁႃႉ ?။


တွပ်ႇ - မၼ်းတေမီးပၼ်ႁႃ ၵဵဝ်ႇၵပ်းသဵၼ်ႈတႃႈသၢႆတၢင်း လုၵ်ႉတီႈတူၼ်ႈတီးမႃး ပၢင်လူင် လၢႆးၶႃႈ မိူင်းၼွင် မႃးၽႅဝ်မိူင်းသူႈ။ သဵၼ်ႈတၢင်းၼႆႉ လူင်ပွင်ၸိုင်ႈႁဵတ်း ၊ ၶဝ်သမ်ႉၶႂ်ႈၸႂ်ႉတိုဝ်းသဵၼ်ႈတၢင်းၼႆႉ ။ ႁဝ်းၶႃႈသမ်ႉယူႇဝႆႉၸမ်သဵၼ်ႈတၢင်းၼႆႉ ။ သဵၼ်ႈတၢင်းၼႆႉ ပေႃးလုၵ်ႉမိူင်းသူႈ ပၼ်ႇမိူဝ်းမိူင်းၵၢဝ် တၢင်ႉယၢၼ်း ၊ ၶဝ်ဝႃႈပဵၼ်သဵၼ်ႈတၢင်း ၸိုင်ႈမိူင်းႁူမ်ႈတုမ် (ပျီႇထွင်ႇၸုလၢၼ်း) ။


ထၢမ် - ၵဵဝ်ႇၵပ်းဢၼ်ပဵၼ်ပၢင်တိုၵ်းၸိူဝ်းၼႆႉသေ ယူႇတီႈၸဝ်ႈႁဝ်းၶႃႈ ၶႂ်ႈမွၵ်ႇလၢတ်ႈထိုင် ပီႈၼွင်ႉၵူၼ်းမိူင်းတႆးၸိူင်ႉႁိုဝ်ၽွင်ႈၶႃႈ ?။


တွပ်ႇ - ပိူဝ်ႈတႃႇပၢင်တိုၵ်း ႁႂ်ႈပေႃးယဵၼ်ၵႂႃႇၼၼ်ႉ ၵူၼ်းမိူင်းၶႅၼ်းမုင်ႈမွင်း ။ မိူဝ်ႈလဵဝ်ၼႆႉ ပဵၼ်ၶၢဝ်းႁႆႈၶၢဝ်းၼႃး ပဵၼ်ၶၢဝ်းပၢတ်ႇၶဝ်ႈ ပေႃႉၶဝ်ႈပုမ်ႇၶဝ်ႈ ၊ ပဵၼ်ၶၢဝ်းဢဝ်ၶဝ်ႈၵၢပ်ႇၸိူဝ်းၼႆႉ ။ ပီႈၼွင်ႉၵူၼ်းဝၢၼ်ႈၵူၼ်းမိူင်းၵေႃႈ ႁၢမ်းၵၢၼ်ႁၢမ်းငၢၼ်း ၊ ဢၼ်လူႉသဵင်ႈတၢႆၵေႃႈမီး ၊ ဢၼ်ဝၢတ်ႇၸဵပ်းၵေႃႈမီး ၊ ဢၼ်ၾႆးမႆႈဝၢၼ်ႈၵေႃႈမီး ။ ၵူၼ်းသမ်ႉလႆႈပၢႆႈၽေးၽၢတ်ႇၵၼ် ။ တၢင်းႁိူၼ်းၵေႃႈဝူဝ်းၵႂၢႆး ၽႃႇၺႃးမၢၵ်ႇတၢႆၵေႃႈမီး ။ ၵူၼ်းမိူင်းၵေႃႈ ဢမ်ႇၸၢင်ႈမိူဝ်းႁိူၼ်းယေးသေ ထူပ်းတၢင်းတုၵ်ႉၶတႄႉတႄႉဝႃႈဝႃႈ ။


ပေႃးမႃးသွၼ်ႇ ယွၼ်ႉႁဝ်းၶႃႈဢမ်ႇလူင်းလၢႆးမိုဝ်း NCA ၵေႃႈၸၢင်ႈပဵၼ်လႆႈ ။ ၵူၺ်းၵႃႈ ပၢင်တိုၵ်းၼႆႉ တၢင်းမိူင်းၶၢင် ၊ တၢင်းပီႈၼွင်ႉလွႆၵေႃႈသမ်ႉပဵၼ်။ ၼႂ်း 3 ၸုမ်းၼႆႉ ႁဝ်းၶႃႈပႆႇလူင်းလၢႆးမိုဝ်း ၊ တေဢဝ်လၢႆးၸိူင်ႉႁိုဝ် ၵမ်ၵိၼ်းမႃးထႅင်ႈ ပႆႇႁူႉလႆႈ ။ ႁဝ်းၶႃႈ တူၺ်းၼႃႈပေႃႈမႄႈၵူၼ်းမိူင်းတႄႉ ၶႂ်ႈႁႂ်ႈၵူၼ်းမိူင်းႁဝ်းၶႃႈ ယူႇငၢႆႈလူမ်ၸႂ်၊ လႆႈယူႇၵတ်းယဵၼ် ၊ လႆႈႁဵတ်းၵၢၼ်ငၢၼ်းၵႂႃႇၼၼ်ႉ ႁဝ်းၶႃႈမုင်ႈမွင်းၼင်ႇၼႆ ။ ဢၼ်ၽူႈတၢင်တူဝ်ႁဝ်းၵႂႃႇၼႆႉၵေႃႈ တေတုၵ်းယွၼ်းတီႈၸွမ်ၸိုင်ႈ ႁႂ်ႈၵိုတ်းပၼ်သိုၵ်းတင်းမူတ်းယူႇ ၊ ဢမ်ႇၸႂ်ႈတႆးၵူၺ်း တေပႃးပီႈၼွင်ႉလွႆ တင်းပီႈၼွင်ႉၶၢင်ၸိူဝ်းၼႆႉ ။