တီႈဝဵင်းလႃႈသဵဝ်ႈ လုၵ်ႈႁဵၼ်းၸၼ်ႉၸွမ် ဢိၵ်ႇပႃးၵူၼ်းၼုမ်ႇ လၢႆၵေႃႉလၢႆမူႇလၢႆၸုမ်း ဢွၼ်ၵၼ်ႁဵတ်းၵၢၼ် တူင်ႉၼိုင် ႁႃငိုၼ်းၵွင်ၵၢင် ပိူဝ်ႈတႃႇၸွႆႈထႅမ်ၵူၼ်းပၢႆႈၽေး ဢၼ်ႁွတ်ႈဝႆႉတီႈလႃႈသဵဝ်ႈ ၼပ်ႉႁူဝ်ပၢၵ်ႇ ။

ပူၼ်ႉမႃးမိူဝ်ႈဝၼ်းတီႈ 18/11/2015 လုၵ်ႈႁဵၼ်းၸၼ်ႉၸွမ် ဝဵင်းလႃႈသဵဝ်ႈ ဢိၵ်ႇတင်း ၵူၼ်းၼုမ်ႇလၢႆမူႇလၢႆၸုမ်း တီႈဝဵင်းလႃႈသဵဝ်ႈ လႆႈဢွၼ်ၵၼ်ၸတ်းႁဵတ်းၵၢၼ်တူင်ႉၼိုင် ပၢင်ႁွင်ႉၽဵင်းၵႂၢမ်း ၊ ၼႄတၢင်းၵႃႈၼူၵ်ႉၵႃႈတူဝ်း ၊ ႁပ်ႉငိုၼ်းၸွႆႈထႅမ် ပိူဝ်ႈတႃႇၸွႆႈထႅမ်ၵူၼ်းပၢႆႈၽေး (ၸိူဝ်းဢၼ်မႃးႁွတ်ႈဝႆႉ တီႈဝတ်ႉ / ၵျွင်းဝၢၼ်ႈသူႈ လႃႈသဵဝ်ႈ) တီႈၼႂ်းၸၼ်ႉၸွမ် ၵမ်ႇပေႃးၸၶၢၼ်းမ ဝဵင်းလႃႈသဵဝ်ႈ ။ မီးလုၵ်ႈႁဵၼ်းၸၼ်ႉၸွမ်လႃႈသဵဝ်ႈ (ၵမ်ႈၼမ်) ၊ မေႃသွၼ်ၼႂ်းၸၼ်ႉၸွမ်လႄႈပီႈၼွင်ႉၵူၼ်းဝၢၼ်ႈ ၵူၼ်းမိူင်းႁိမ်းႁွမ်းဝဵင်းလႃႈသဵဝ်ႈၶဝ်ႈႁူမ်ႈမွၵ်ႈ 300 ပၢႆ ။ လႆႈငိုၼ်း 5 သႅၼ်ပၢႆ - ၸၢႆးဝၼ်း ၵူၼ်းၼုမ်ႇၽူႈၶဝ်ႈႁူမ်ႈၵၢၼ်တူင်ႉၼိုင် လၢတ်ႈ ။


ၵေႃႉဢွၼ်ႁူဝ်ၸတ်းႁဵတ်း ပဵၼ်ၸၢႆးမၢဝ်းလႅင်း ဝဵင်းလႃႈသဵဝ်ႈ ။ လုၵ်ႈႁဵၼ်းၸၼ်ႉၸွမ်တီႈလႃႈသဵဝ်ႈၼႆႉ ၶွတ်ႇၽွတ်ႈဝႆႉၸုမ်းၵေႃလိၵ်ႈလၢႆးလႄႈ ၾိင်ႈငႄႈတႆး ၊ ၵူၼ်းၼုမ်ႇၼႂ်းၸၼ်ႉၸွမ်ဢွၼ်ႁူဝ် ။ ယိူင်းဢၢၼ်း ဢၼ်လႆႈၸတ်းႁဵတ်းၼႆႉ မီးလၢႆဢၼ် - 1. ပိူဝ်ႈတႃႇႁပ်ႉၼွင်ႉမႂ်ႇ ၊ လုၵ်ႈႁဵၼ်းတႆးမႂ်ႇမႂ်ႇ ။ 2. သူင်ႇသင်ႇ လုၵ်ႈႁဵၼ်းတႆးၵဝ်ႇၵဝ်ႇ ဢၼ်မႃးၶိုၼ်ႈၸၼ်ႉၸွမ်သေယဝ်ႉၵႂႃႇ ။ 3. ႁဵတ်းပၢင်တုၵ်းယွၼ်း ၵိုတ်းပၢင်တိုၵ်း (Stop the war) သေ 4. ႁပ်ႉငိုၼ်း ပိူဝ်ႈတႃႇၸွႆႈထႅမ်ၵူၼ်းပၢႆႈၽေးသိုၵ်းၶဝ် - ၸၢႆးဝၼ်း လၢတ်ႈ ။


ၵူၼ်းပၢႆႈၽေး တီႈဝဵင်းလႃႈသဵဝ်ႈၼႆႉ မိူဝ်ႈဝၼ်းတီႈ 18/11/2015 ၼၼ်ႉ ႁွတ်ႈၽႅဝ်ဝႆႉ 300 ပၢႆႁိမ်း 400 ၊ လႆႈငိၼ်းဝႃႈ ဢၼ်တေမႃးထႅင်ႈၵေႃႈမီး ။


“ ဢမ်ႇဝႃႈၸၢဝ်းၶိူဝ်းတႆး ၸၢဝ်းၶိူဝ်းလႂ် ၊ သင်ဝႃႈပဵၼ်လႆႈ ၶၢဝ်းၼႆႉယွၼ်ႉပိူဝ်ႈပဵၼ်ၶၢဝ်း တေလႆႈဢဝ်မၢၵ်ႇၶဝ်ႈ တဝ်ႈၼမ်ႉ ၊ ပီႈၼွင်ႉတႆးႁဝ်းသမ်ႉလႆႈပၢႆႈၽေး ။ တွၼ်ႈတႃႇၶဝ်ၼႆႉ ပီၼႃႈပီလိုၼ်းမႃး တႃႇတေၵိၼ်ၵေႃႈ တေဢမ်ႇမီး ၊ သင်ဝႃႈပွင်ပဵၼ်လႆႈတႄႉ ၸွမ်းၼင်ႇဝႃႇႁႅင်းၼၼ်ႉ ၶႅၼ်းတေႃႈႁႃပၼ်ငိုၼ်းၵွင်ၵၢင် ၵူၼ်းပၢႆႈၽေးႁဝ်းသေၵမ်း - ၸၢႆးဝၼ်း သိုပ်ႇလၢတ်ႈၵႂႃႇၼင်ႇၼႆ ။