ဢိင်ၼိူဝ် ဝၢႆးပၢင်လိူၵ်ႈတင်ႈယဝ်ႉ ပၢင်တိုၵ်းႁၢဝ်ႈႁႅင်းမႃး ၊ သိုၵ်းမၢၼ်ႈဢဝ်ပႃးႁိူဝ်းဝိၼ်တိုၵ်းသိုၵ်း တိုၵ်းယိုဝ်းလႄႈ ၸုမ်းၸၢဝ်းၶိူဝ်း 3 ၸုမ်း တဢၢင်း (TNLA/PSLF) ၊ ရၶႅင်ႇ (AA) လႄႈ ၸုမ်းၵူဝ်းၵၢင်ႉ (MNDAA) ႁူမ်ႈၵၼ် ဢွၵ်ႇလိၵ်ႈပိုၼ်ၽၢဝ်ႇ ။ တုၵ်းယွၼ်း ႁႂ်ႈပၢင်တိုၵ်းၸဵဝ်းယဝ်ႉတူဝ်ႈ ၊ ၵေႃႇတင်ႈလႆႈမိူင်းႁူမ်ႈတုမ် ၸိုၼ်ႈၸၢင်ႇ ။

ၵဵဝ်ႇၵပ်းလွင်ႈၼႆႉ လၢတ်ႈၼႄလွင်ႈတၢင်းဝႃႈ - တၢင်းၼႃႈလိၼ်တဢၢင်းၼႆႉ လႆႈပဵၼ်ပၢင်တိုၵ်းၵၼ် တင်ႈတႄႇဝၼ်းသုၵ်းတီႈ 13/11/2015 ပူၼ်ႉမႃးသေ ပၢင်တိုၵ်းႁၢဝ်ႈႁႅင်းမႃးၶိုၼ်း ။ ဝၼ်းတီႈ 14 သိုၵ်းမၢၼ်ႈ တင်းသိုၵ်းတဢၢင်း ပဵၼ်ပၢင်တိုၵ်းၵၼ် တီႈဝၢၼ်ႈပၢင်ၵၢင်း ၸႄႈဝဵင်းဝၢၼ်ႈတူင်ႈ ။ လႆႈယိုဝ်းၵၼ် တင်ႈတႄႇၵၢင်ၼႂ်ယၢမ်း 11:30 မူင်း ၊ တီႈၼႆႈၼႆႉ မိူဝ်ႈဝၼ်းတီႈ 13 ၵေႃႈ လႆႈယိုဝ်းၵၼ်ၵမ်းၼိုင်ႈယဝ်ႉ ။ တပ်ႉသိုၵ်းမၢၼ်ႈ ပဵၼ်တႂ်ႈတပ်ႉၸုမ်းလူင် (တမ်ႉမ) 77 ၊ တပ်ႉသိုၵ်းတဢၢင်း ပဵၼ်တပ်ႉၵွင် 876 ၊ 478 ၊ 101 ၸိူဝ်းၼႆႉ ။ ဝၢႆးပၢင်တိုၵ်းယဝ်ႉ သိုၵ်းမၢၼ်ႈၶဝ်ႈၵႂႃႇၼႂ်းဝၢၼ်ႈပၢင်ၵၢင်းသေ ၵႂႃႇဢဝ်ၵိၼ်ၵႆႇလဝ်ႈၶဝ်ႈၼိူဝ်ႉၵူၼ်းဝၢၼ်ႈ - ဝႃႈၼႆ ။


ဝၼ်းတီႈ 10 တေႃႇထိုင်ဝၼ်းတီႈ 17 ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းမိူင်းမိတ်ႈ ။ ဝၼ်းတီႈ 17 ပဵၼ်ပၢင်တိုၵ်း တႄႇၵၢင်ၼႂ် 08:45 တေႃႇထိုင် 10:30 မူင်း ။ ၼႂ်းၸႄႈဝဵင်းမိူင်းမိတ်ႈၼႆႉ ၾၢႆႇသိုၵ်းမၢၼ်ႈ တပ်ႉမ 77 ပဵၼ်ပၢင်တိုၵ်းၵၼ်တင်း သိုၵ်းတဢၢင်း တပ်ႉၵွင် 527 ။


ဢိင်ၼိူဝ်ဢၼ်လႆႈပဵၼ်ပၢင်တိုၵ်း ၸိူဝ်းၼႆႉသေ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ 3 ၸုမ်း ၊ တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈ တဢၢင်း (TNLA/PSLF) ၊ တပ်ႉသိုၵ်းရၶႅင်ႇ (AA) ၊ တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊ ၵူႈၸၢဝ်းၶိူဝ်းမိူင်းမၢၼ်ႈ (MNDAA) ၸုမ်းၵူဝ်းၵၢင်ႉ လႆႈႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇ မိူဝ်ႈဝၼ်းတီႈ 18/11/2015 တင်းမူတ်း 5 ၶေႃႈ ။


ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉဝႃႈ - ပၢင်လိူၵ်ႈတင်ႈၵေႃႈယဝ်ႉတူဝ်ႈၵႂႃႇ လီငၢမ်းယဝ်ႉ ၊ ၼႂ်းပၢင်လိူၵ်ႈတင်ႈၼႆႉ လႆႈႁူႉဝႃႈ NLD ပေႉၼမ် ။ ၵူၺ်းၵႃႈ လူင်ပွင်ၸိုင်ႈၵဝ်ႇ ၸွမ်ၸိုင်ႈတဵင်းၸဵင်ႇဝႃႈ တႃႇတေၽွင်းငမ်း ဝၢၼ်ႈမိူင်း ၵႂႃႇၼၼ်ႉ တေမွပ်ႈပၼ်ပုၼ်ႈၽွၼ်းလႄႈဢမ်းၼၢၸ်ႈ တီႈပႃႊတီႊဢၼ်ပေႉၵၢၼ်လိူၵ်ႈတင်ႈမႃးၼၼ်ႉ ဝႃႈၼႆသေတႃႉ တေႃႇထိုင်မိူဝ်ႈလဵဝ် ၼႂ်းၼႃႈလိၼ်ၸၢဝ်းၶိူဝ်းၵေႃႈ ယင်းတိုၵ်ႉပဵၼ်ပၢင်တိုၵ်းယႂ်ႇလူင် ၊ ထိုင်တီႈၾၢႆႇတပ်ႉသိုၵ်းမၢၼ်ႈ လႆႈဢဝ်ႁိူဝ်းဝိၼ်တိုၵ်းသေ မႃးယိုဝ်းၶိုၼ်း ။ ပေႃးပဵၼ်ပၢင်တိုၵ်းၼႂ်းမိူင်း ၸိူင်ႉၼႆ ႁၢဝ်ႈႁႅင်းမႃးတိၵ်းတိၵ်း တေပဵၼ်ဢၼ်ၶွင်ႉၶမ် တွၼ်ႈတႃႇလူင်ပွင်ၸိုင်ႈမႂ်ႇ တေမႃးၶိုၼ်ႈၽွင်းငမ်းမိူင်း ၊ ဢမ်ႇၼၼ်ၵေႃႈ တိုၼ်းတင်ႈၸႂ်ႁဵတ်းႁႂ်ႈလူင်ပွင်ၸိုင်ႈမႂ်ႇ ၶိုၼ်ႈမႃးၽွင်းငမ်းဝၢၼ်ႈမိူင်းယၢပ်ႇၼႆ ပဵၼ်ၶေႃႈၵႂၢမ်းထၢမ်ဢၼ်ၼိုင်ႈ ။


ယွၼ်ႉၼၼ်လႄႈ ၸုမ်းၸၢဝ်းၶိူဝ်းႁဝ်းၶႃႈ တင်းသဵင်ႈ ထိုင်ၶၢဝ်းယၢမ်းတၵ်းလႆႈဝႆႉၼၵ်းၼၵ်းၼႃၼႃ လွင်ႈဢၼ်ပဵၼ်ပၢင်တိုၵ်းသိုၵ်းသိူဝ်ယူႇယၢမ်းလဵဝ် ဢိၵ်ႇ  ဢၼ်ပဵၼ်ၵၢၼ်မိူင်းသုၵ်ႉသၵ်ႉယုင်ႈယၢင်ႈယူႇ ယၢမ်းလဵဝ်ယဝ်ႉ ။ ၵွပ်ႈၼႆ ပၢင်တိုၵ်းဢၼ်ပဵၼ်ယူႇယၢမ်းလဵဝ်ၼႆႉ ႁႂ်ႈၸဵဝ်းယဝ်ႉတူဝ်ႈလီငၢမ်းသေ ႁႂ်ႈႁဝ်းၶႃႈၸၢဝ်းၶိူဝ်းတင်းသဵင်ႈ ႁူမ်ႈၵၼ်ၵေႃႇတင်ႈၸိုင်ႈမိူင်းႁူမ်ႈတုမ် ၾႅတ်ႊၻရႄႊလ် ၻီႊမူဝ်ႊၶရေႊၸီႊၵႂႃႇ ။


ပေႃးဝႃႈ NLD (ပႃႊတီႊၼူၵ်ႉယုင်း) တေၶွတ်ႇၽွတ်ႈလူင်ပွင်ၸိုင်ႈၼႆၵေႃႈ ႁႂ်ႈပီႈၼွင်ႉၵူၼ်းမိူင်း ၸၢဝ်းၶိူဝ်းတင်းသဵင်ႈလႄႈ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇတင်းသဵင်ႈ ႁႂ်ႈလႆႈႁူမ်ႈၵၼ်ပၼ်ဢဵၼ်ပၼ်ႁႅင်း ၊ ပၼ်တၢင်းႁူမ်ႈမိုဝ်းလူင်ပွင်ၸိုင်ႈမႂ်ႇသေ ႁႂ်ႈပၢင်တိုၵ်းသိုၵ်းသိူဝ်ၼႂ်းမိူင်း ၸဵဝ်းယဝ်ႉတူဝ်ႈလီငၢမ်း - ၼႆယဝ်ႉ ။