ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ပိုတ်ႇလၢတ်ႈ သပ်းလႅင်းၼႄ ၸုမ်းၽူႈသိုဝ်ႇၶၢဝ်ႇ လွင်ႈငဝ်းလၢႆး ဝၢႆးပၢင်လိူၵ်ႈတင်ႈယဝ်ႉ ပၢင်တိုၵ်းယိင်ႈၶႅၼ်းႁၢဝ်ႈႁႅင်းမႃး ။ ၵူၼ်းပၢႆႈၽေးသိုၵ်းမီးမိုၼ်ႇပၢႆ ၊ လုၵ်ႈဢွၼ်ႇႁၢမ်းတိုဝ်ႉတၢင်း ႁဵၼ်းသွၼ်ပၺ်ၺႃ ။

ပူၼ်ႉမႃးမိူဝ်ႈဝၼ်းတီႈ 16/11/2015 ယူႇတီႈ SSPP/SSA ဢွၵ်ႇလိၵ်ႈပိုတ်ႇလၢတ်ႈၸႅင်ႈထိုင် ၸုမ်းၽူႈသိုဝ်ႇၶၢဝ်ႇ ၵူႈၸုမ်းၸုမ်း ဝႃႈ - ဝၢႆးလင်ပၢင်လိူၵ်ႈတင်ႈ ဝၼ်းတီႈ 08/11/2015 ယဝ်ႉတူဝ်ႈလီငၢမ်းသေ တင်ႈတႄႇဝၼ်းတီႈ 10/11/2015 မႃးၼႆႉ သိုၵ်းမၢၼ်ႈၵေႃႈထႅမ်ႁႅင်းသိုၵ်း တိုၵ်းယိုဝ်းတေႃႇ SSPP/SSA ႁၢဝ်ႈႁႅင်းမႃး ၊ ဢဝ်ၵွင်ႈလူင်ယိုဝ်းပဵၼ်လၢႆပွၵ်ႈလၢႆၵမ်း ၊ တၢင်းသၢႆၵၢင်ႁၢဝ်ၵေႃႈယိုဝ်း ၊ တၢင်းသၢႆလိၼ်ၵေႃႈယိုဝ်း ၊ ယိုဝ်းၵွင်ႈၸၢၵ်ႈ လႄႈ ႁိူဝ်းဝိၼ်ယိုဝ်းသိုၵ်းၸိူဝ်းၼႆႉၵေႃႈ ပွႆႇမၢၵ်ႇလူင်သႂ်ႇၵူၼ်းဝၢၼ်ႈၵူၼ်းမိူင်းလႄႈ SSPP/SSA ။


မိူဝ်ႈဝၼ်းတီႈ 15/11/2015 ၼၼ်ႉ ႁိူဝ်းဝိၼ်တိုၵ်း ၵျႅတ်ႊ 2 လမ်း ၊ ႁိူဝ်းဝိၼ်မႅင်းမီႈ (Helicopter) 6 လမ်း မႃးယိုဝ်းပွတ်းႁိမ်းဝၢၼ်ႈသေႃႉသေ ပွႆႇမၢၵ်ႇၶိူဝ်းယႂ်းဢမ်ႇထၢတ်ႇ ႁိုင်မွၵ်ႈ 2 ၸူဝ်ႈမူင်း ။ ဢၼ်မႃးယိုဝ်းၼႆႉ  ပဵၼ်တီႈတပ်ႉပၢင်သဝ်း SSPP/SSA ၵွင်းလွႆၸူဝ်းမူဝ်း ဢၼ်မီးၾၢႆႇၸၢၼ်းဝၢၼ်ႈသေႃႉ ။ ဝၢႆးလင်ဢဝ်ၵွင်ႈလူင် ယိုဝ်းသႂ်ႇ / ပွႆႇမၢၵ်ႇလူင်သႂ်ႇယဝ်ႉ တၢင်းတပ်ႉလိၼ်ၶဝ်ၵေႃႈထႅမ်ႁႅင်းသိုၵ်းၶိုၼ်ႈယိုဝ်း ။


ဝၼ်းၼၼ်ႉၵူၺ်းၼင်ႇၵဝ်ႇ ၊ သိုၵ်းမၢၼ်ႈတီႈမိူင်းၼွင် ယူႇတီႈပၢင်သဝ်းဝဵင်းၵဝ်ႇၼၼ်ႉသေ ယိုဝ်းၵွင်ႈလူင် လူင်းတၢင်းပၢင်ႇတၢင်းပဵင်း ၊ တၢင်းဢၼ်ၶဝ်လၢမ်းဝႃႈ ပဵၼ်ပၢင်တိုၵ်း ၊ ယိုဝ်းၵွင်ႈလူင်ဢမ်ႇယွမ်း 40 လုၵ်ႈ ။


ဝၼ်းတီႈ 15/11/2015 ယၢမ်းဝၢႆးဝၼ်း 13:45 မူင်းၵေႃႈ သိုၵ်းမၢၼ်ႈဢဝ်ႁိူဝ်းဝိၼ်ယိုဝ်းသိုၵ်း 4 လမ်း ယိုဝ်းထပ်းၵၼ်ၶိူဝ်းယႂ်း တေႃႇထိုင်ဝၢႆးဝၼ်းႁူဝ်ၶမ်ႈ 4 မူင်းၶိုင်ႈ ။ ၽိူဝ်ႇထိုင်ႁူဝ်ၶမ်ႈ 6 မူင်းမႃးၵေႃႈ ယူႇတီႈတပ်ႉၵိဝ်ႇမွၵ်ႇၶၢဝ် ဢၼ်မီးၾၢႆႇဢွၵ်ႇဝၢၼ်ႈႁႆးၼၼ်ႉသေ ယိုဝ်းၵွင်ႈလူင်ထႅင်ႈ ။ တပ်ႉပႆလိၼ်ၵေႃႈ ထႅမ်ႁႅင်းသိုၵ်းသေ ၶိုၼ်ႈမႃးယူႇတိၵ်းတိၵ်း ။


ယွၼ်ႉပိူဝ်ႈပၢင်တိုၵ်းႁၢဝ်ႈႁႅင်းၶိုၼ်ႈမႃးတိၵ်းတိၵ်းလႄႈ ဝၼ်းၼိုင်ႈယဝ်ႉဝၼ်းၼိုင်ႈ ၵူၼ်းပၢႆႈၽေးသိုၵ်းၵေႃႈ တိူဝ်းၼမ်လိူဝ်မႃးတိၵ်းတိၵ်းသေ မီးၵႂႃႇမိုၼ်ႇပၢႆ ။ ၵူၼ်းဝၢၼ်ႈၵူၼ်းမိူင်းၸိူဝ်းၼႆႉ လႆႈပွႆႇပႅတ်ႈသူၼ်ႁႆႈၼႃး ႁိူၼ်းယေးၶူဝ်းၶွင်တူဝ်ၵဝ်ႇသေ ပၢႆႈတင်းဝၢၼ်ႈတင်းဝၢၼ်ႈ ၵႂႃႇၵေႃႉႁူးၵေႃႉတၢင်း ၊ ၶၢဝ်းပၢတ်ႇၶဝ်ႈၵေႃႈဢမ်ႇၸၢင်ႈပၢတ်ႇၶဝ်ႈ ၊ လုၵ်ႈဢွၼ်ႇႁူင်းႁဵၼ်းၵေႃႈ ဢမ်ႇလႆႈၶိုၼ်ႈႁူင်းႁဵၼ်း ၊ ပဵၼ်ဢၼ်ႁၢမ်းႁႅၵ်းသုၼ်ႇလႆႈၵူႈၸိူဝ်ႉၵူႈလွင်ႈ - ၼႆယဝ်ႉ ။