ၸုမ်းတူဝ်တႅၼ်း လူင်ပွင်ၸိုင်ႈမၢၼ်ႈ ၾၢႆႇသၢင်ႈလွင်ႈငမ်းယဵၼ် တင်း ပႃႊတီႊမႂ်ႇသုင်ၸိုင်ႈတႆး ဢုပ်ႇဢူဝ်းၵၼ် ၊ ၼႂ်းၶေႃႈလႆႈၸႂ်တူၵ်းလူင်းၵၼ်ၼၼ်ႉ ၾၢႆႇလူင်ပွင်ၸိုင်ႈမၢၼ်ႈ ႁႂ်ႈ SSPP ထွၼ်တပ်ႉဢၼ်ပၵ်း ၽၢႆႇၸၢၼ်းတၢင်းၵႃး ဝူင်းၵၢင်မိူင်းၼွင် - မိူင်းသူႈ တင်းသဵင်ႈ ။ ႁႂ်ႈၶိုၼ်းဢုပ်ႇၸုမ်းၽႂ်မၼ်းသေ တွပ်ႇပၼ် ၼႂ်းၶၢဝ်းတၢင်း 5 ဝၼ်း ။

ဝၼ်းတီႈ 23-24/11/2015 တူဝ်တႅၼ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တင်းတူဝ်တႅၼ်း လူင်ပွင်ၸိုင်ႈမၢၼ်ႈ ၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ်မၢၼ်ႈ (UPWC) ႁူပ်ႉဢုပ်ႇၵၼ်တီႈ သုၼ်ၵၢင်လွင်ႈငမ်းယဵၼ်မၢၼ်ႈ (MPC) တီႈဝဵင်းတႃႈၵုင်ႈ ။ လႆႈၸႂ်တူၵ်းလူင်းၵၼ် 3 ႁူဝ်ၶေႃႈယႂ်ႇလႄႈ ႁူဝ်ၶေႃႈယွႆႈ 6 ၶေႃႈ ။


ၼႂ်းႁူဝ်ၶေႃႈယႂ်ႇ 3 ၶေႃႈၼၼ်ႉ ၶေႃႈတီႈ (1) လၢတ်ႈၼႄလွင်ႈတၢင်းဝႃႈ - ဢၼ်ပဵၼ်ပၢင်တိုၵ်း သိုၵ်းသိူဝ်ၵၼ် ယူႇၼႆႉ ၾၢႆႇတပ်ႉသိုၵ်းမၢၼ်ႈ ဢမ်ႇမီးၽႅၼ်ၵၢၼ်လေႃႇတိုၵ်း ငဝ်ႈငုၼ်းဝၢၼ်ႈႁႆး ။ ၶေႃႈတီႈ (2) ပဵၼ်ၶေႃႈလႆႈၸႂ်တူၵ်းလူင်းၵၼ်မီး 6 ၶေႃႈ ။


1. ၼင်ႇႁိုဝ်ပေႃးတေလူတ်းယွမ်းလႆႈ ပၼ်ႁႃဢၼ်ပဵၼ်သိုၵ်းသိူဝ်ၵၼ်သေ လူတ်းယွမ်းတေႃႇပေႃးထိုင် ၵိုတ်းပၢင်တိုၵ်းလႆႈၼၼ်ႉ  တေႁူမ်ႈၵၼ်ႁဵတ်းသၢင်ႈၵႂႃႇ ။


2. ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တင်းလူင်ပွင်ၸိုင်ႈၼႆႉ တင်ႈတႄႇဝၼ်းတီႈ 28/01/2012 မႃး လူင်းလၢႆးမိုဝ်း လိၵ်ႈၵိၼ်ၵႅၼ်ႇ ၵေႃႇသၢင်ႈလွင်ႈငမ်းယဵၼ်ၸွမ်းၵၼ် တီႈဝဵင်းလူင်တူၼ်ႈတီး ။ မီးၶေႃႈလႆႈၸႂ်ဝႆႉသေ တေသိုပ်ႇႁဵတ်းၵႂႃႇၸွမ်း ၶေႃႈၵိၼ်ၵႅၼ်ႇၼၼ်ႉ ။


3. တပ်ႉသိုၵ်းၸိုင်ႈတႆး (SSPP/SSA) ဢၼ်ပၵ်းၼႂ်းဝူင်ႈၵၢင်မိူင်းၼွင်- မိူင်းသူႈ တွၼ်ႈၾၢႆႇၸၢၼ်း တၢင်းၵႃးၼၼ်ႉ ႁႂ်ႈထွၼ်တပ်ႉ ၶၢႆႉၵႂႃႇယူႇၾၢႆႇႁွင်ႇတၢင်းၵႃး သဵင်ႈသဵင်ႈ ။ ၾၢႆႇတပ်ႉသိုၵ်းမၢၼ်ႈၵေႃႈ ဢၼ်ယူႇၾၢႆႇၸၢၼ်းတၢင်းၵႃး မိူင်းၼွင် - မိူင်းသူႈၼၼ်ႉၵေႃႈ တေၶိုၼ်းမႄးထတ်းသေ တမ်းဝၢင်းတီႈယူႇၵႂႃႇ ။


4. ႁႂ်ႈ SSPP/SSA ပၵ်းလုမ်းတီႈမိူင်းၼွင်သေ ၵႄႈလိတ်ႈပၼ်ႁႃၵၼ် ၊ ႁႂ်ႈသိုပ်ႇႁဵတ်းသၢင်ႈႁၢင်ႈပွင် ၵဵဝ်ႇၵပ်းၵၢၼ်ၽွင်းငမ်းၵႂႃႇ ။


5 ႁူင်းႁဵၼ်း 17 လင် ၸိူဝ်းပိတ်း / ဢိုတ်းၵႂႃႇၼၼ်ႉၵေႃႈ ႁႂ်ႈပိုတ်ႇပၼ်ၶိုၼ်းၽႂ်းၽႂ်း ၊ လွင်ႈၼႆႉ ႁႂ်ႈၵပ်းသၢၼ်ၵၼ်သေ ႁဵတ်းသၢင်ႈၵႂႃႇ ။


6. ၵဵဝ်ႇၵပ်းလွင်ႈ ၵူၼ်းပၢႆႈၽေးသိုၵ်းၸိူဝ်းၼၼ်ႉ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) တင်းသိုၵ်းမၢၼ်ႈ တေႁူမ်ႈၵၼ် ၶိုၼ်းမႄးတမ်းဝၢင်းတီႈယူႇၵႂႃႇ ။


ၼွၵ်ႈသေၼၼ်ႉ ၶေႃႈတီႈ (3) လၢတ်ႈထႅင်ႈဝႃႈ - ၶေႃႈလႆႈၸႂ်ၵၼ် တၢင်းၼိူဝ်ၼႆႉ ႁႂ်ႈၶိုၼ်းဢုပ်ႇဢူဝ်းၵၼ်တင်း ၸုမ်းၽႂ်ၸုမ်းမၼ်းသေ ၼႂ်းၶၢဝ်းတၢင်း 5 ဝၼ်း ႁႂ်ႈတွပ်ႇၵႄႈၶိုၼ်း ၊ ပိူဝ်ႈတႃႇ ႁဵတ်းသၢင်ႈၼႄၼမ်ႉၼႄတူဝ် - ၼႆယဝ်ႉ ။


တီႈပၢင်ႁူပ်ႉထူပ်းဢုပ်ႇဢူဝ်းၵၼ်ၼႆႉ တူဝ်တႅၼ်း ၾၢႆႇလူင်ပွင်ၸိုင်ႈမၢၼ်ႈမီး ၵႅမ်ႁူဝ်ပဝ်ႈ UPWC ဢူးဢွင်ႇမိၼ်း ။ ၵႅမ်ႁူဝ်ပဝ်ႈ UPWC ဢူးတဵင်းၸေႃႇ ။ ၽူႈၶဝ်ႈၸုမ်း UPWC ဢူးၶိၼ်ႇမွင်ႇၸူဝ်း ။ ၽူႈၵွၼ်းၽႅၼ်ၵၢၼ်သိုၵ်း ၶိုၵ်ႉတွၼ်း မၢႆ 2 (ၵသထ) ၸွမ်သိုၵ်းယႃႇပျေႉ  လႄႈတင်း ၽူႈၸတ်းၵၢၼ် MPC ၻွၵ်ႊတိူဝ်ႊ မိၼ်းၸေႃႇဢူး ၸိူဝ်းၼႆႉ ။ ၾၢႆႇတူဝ်တႅၼ်း SSPP/SSA  မီးၵႅမ်ႁူဝ်ပဝ်ႈ ၸဝ်ႈၶိူဝ်းတႆး ။ ၽူႈၼမ်းၼႂ်း ၸဝ်ႈၶမ်းတီႇ။ ၽူႈၼမ်းၼႂ်း ၸဝ်ႈၵျေႃႇလ ။ ၽူႈၶဝ်ႈၶွမ်ႊမတီႊငဝ်ႈငုၼ်း ၸဝ်ႈၶိူဝ်းမၢဝ်း ။ ၽူႈၶဝ်ႈၶွမ်ႊမတီႊငဝ်ႈငုၼ်း ၸဝ်ႈသု ။ ၽူႈၶဝ်ႈၶွမ်ႊမတီႊငဝ်ႈငုၼ်း ၸဝ်ႈၼေႃႇလဵၵ်း ၸိူဝ်းၼႆႉ ။