ၵူၼ်းပၢႆႈၽေး ဢၼ်ႁွတ်ႈဝႆႉတီႈဝၢၼ်ႈဝႃႉ ပွၵ်ႈမိူဝ်းပၢတ်ႇၶဝ်ႈ တီႈဝၢၼ်ႈမိူင်းဢၢၵ်ႇ ၊ ႁူပ်ႉၸုၼ်သႂ်ႇၺႃး သိုၵ်းမၢၼ်ႈ လႄႈထုၵ်ႇပေႃႉထုပ်ႉတီႉၺွပ်း လိူတ်ႈတူၵ်းယၢင်ဢွၵ်ႇ ၊ လၵ်ႉပၢႆႈလွတ်ႈသေ ယူတ်းယႃတူဝ်ဝႆႉတီႈ ဝၢၼ်ႈႁႆး ။

လုင်းၸၢႆးပီး ၵေႃႉထုၵ်ႇသိုၵ်းမၢၼ်ႈ တီႉမတ်ႉပေႃႉထုပ်ႉ

ဝၼ်းတီႈ 23/11/2015 (မိူဝ်ႈဝႃး) ပွတ်းၼႂ် ၊ လုင်းၸၢႆးပီး (ၸိုဝ်ႈပွမ်) ၵူၼ်းဝၢၼ်ႈမိူင်းဢၢၵ်ႇ ၊ တင်းဢူၺ်းၵေႃႉ ၸၢဝ်းတဢၢင်း (ပလွင်ႈ) 2 ၵေႃႉ ႁူမ်ႈ 3 ၵေႃႉ မိူဝ်းပၢတ်ႇၶဝ်ႈၼႃး တီႈမိူင်းဢၢၵ်ႇ ၊ ဢိူင်ႇဝၢၼ်ႈသေႃႉ ၸႄႈဝဵင်းမိူင်းသူႈ ။ ႁဵတ်းၵၢၼ်ယဝ်ႉ လိုဝ်ႈၵိၼ်ၶဝ်ႈဝၼ်းၼႂ်းဝၢၼ်ႈသေ ဢွၼ်ၵၼ်ၶိုၼ်းဢွၵ်ႇမႃး ။ ၽွင်းတေဢွၵ်ႇဝၢၼ်ႈၼၼ်ႉ မႃးၸုၼ်သႂ်ႇသၢႆသိုၵ်းမၢၼ်ႈလႄႈ ထုၵ်ႇသိုၵ်းမၢၼ်ႈထတ်းထၢမ် တီႉမတ်ႉတင်း 3 ၵေႃႉ ။


သိုၵ်းမၢၼ်ႈၶဝ်ထၢမ် လုင်းၸၢႆးပီးဝႃႈ ႁဵတ်းသင်ပိူၼ်ႈပၢႆႈမႂ်းဢမ်ႇပၢႆႈ ၊ မႂ်းပဵၼ်သိုၵ်းယူဝ်ႉ ။ လုင်းၸၢႆးပီးတွပ်ႇဝႃႈ ႁဝ်းပဵၼ်ၵူၼ်းဝၢၼ်ႈ၊ မိူဝ်ႈလဵဝ်ပၢႆႈၽေးဝႆႉ ၊ ႁဝ်းၶိုၼ်းမႃး ပၢတ်ႇၶဝ်ႈၼႃး ၊ ၼၼ်ႉၼႃႇႁိူၼ်းၵဝ် ၼႆသေဢဝ်မိုဝ်းၸီႉၼႄႁိူၼ်းမၼ်း ။ သိုၵ်းမၢၼ်ႈထၢမ်ဝႃႈ - ၸွင်ႇႁၼ်သိုၵ်းတႆး၊ လုင်းပီးဢဝ်မိုဝ်းၸီႉၼႄသေ တွပ်ႇဝႃႈ - တၢင်းပုၼ်ႉ ပဵၼ်သိုၵ်းတႆးလၢႆလၢႆ ။ ၵမ်းၼၼ်ႉ သိုၵ်းမၢၼ်ႈၵေႃႉတီႉၺွပ်းပေႃႉထုပ်ႉမၼ်း - ၵူၼ်းမိူင်းသူႈၵေႃႉၼိုင်ႈ ဢၼ်ၵႂႃႇႁူပ်ႉႁၼ် လုင်းၸၢႆးပီး လၢတ်ႈၼင်ႇၼႆ ။


သိုပ်ႇလၢတ်ႈဝႃႈ - သိုၵ်းမၢၼ်ႈတီႉၺွပ်း လုင်းၸၢႆးပီး ဢဝ်ၵႂႃႇၸွမ်းငႃးသိုၵ်းၶဝ် တင်းၸၢဝ်းပလွင်ႈ 2 ၵေႃႉၼၼ်ႉ ။ လုင်းၸၢႆးပီး ထုၵ်ႇသိုၵ်းမၢၼ်ႈၶဝ်ဢဝ်ၸိူၵ်ႈမတ်ႉမိုဝ်းမတ်ႉၶႅၼ်ထုပ်ႉပေႃႉၵွၵ်းႁူဝ်မၼ်း ပေႃးတႅၵ်ႇလိူတ်ႈ ။ ထိုင်ၶၢဝ်းႁူဝ်ၶမ်ႈ မၼ်းၵေႃႈလၵ်ႉပၢႆႈဢွၵ်ႇတပ်ႉမၢၼ်ႈသေ မုင်ႈၼႃႈ မႃးၸူးတၢင်းဝၢၼ်ႈႁႆး ၊ မိူဝ်ႈလဵဝ် မႃးယူတ်းယႃတူဝ်ဝႆႉတီႈႁူင်းယႃ ဝၢၼ်ႈႁႆး ။


လုင်းၸၢႆးပီး လၵ်ႉပၢႆႈလွတ်ႈဢွၵ်ႇမႃး ၊ မိူဝ်ႈလဵဝ် ဢၼ်ၵိုတ်းဝႆႉၸွမ်းသိုၵ်းမၢၼ်ႈ တီႈတပ်ႉၼၼ်ႉ ပဵၼ်ၸၢဝ်းပလွင်ႈ 2 ၵေႃႉ ။ ပလွင်ႈ 2 ၵေႃႉၼၼ်ႉ သိုၵ်းမၢၼ်ႈၶဝ်မတ်ႉဝႆႉယူႇ ၊ ၵူၺ်းၵႃႈ ၶဝ်ဢမ်ႇပေႃႉထုပ်ႉ ၊ ၶဝ်လႅပ်ႈတေဢဝ်ၵႂႃႇႁၢပ်ႇၶျေႃးလႄႈ သူင်ႇတၢင်းၵူၺ်း။ ၵွပ်ႈပိူဝ်ႈ ဢမ်ႇၸႂ်ႈတႆးလႄႈၶဝ်ဢမ်ႇႁႅမ် ။


ဢွၼ်ၼႃႈၼၼ်ႉ လုင်းပီးၼႆႉ မၼ်းဝူၼ်ႉဝႃႈ - ပၢင်တိုၵ်းၵေႃႈဢမ်ႇပဵၼ်ယဝ်ႉ ၊ ၵတ်းယဵၼ်ယဝ်ႉ ၼႆသေလၵ်ႉလွမ်မိူဝ်းပၢတ်ႇၶဝ်ႈမၼ်း ။ ပေႃႈမၼ်းတင်းၼွင်ႉယိင်းမၼ်းၵေႃႈ ၾၢင်ႉတိူၼ်ဝႃႈ - ယႃႇပေမိူဝ်းၼႆယူႇ ။ မၼ်းသမ်ႉဝႃႈ ၶဝ်ႈႁဝ်းၼႆႉ ပေႃးဢမ်ႇပၢတ်ႇ ၊ ပေႃးၾူၼ်တူၵ်းထႅင်ႈဢိတ်းၼိုင်ႈ မၼ်းတေၵူမ်ႈလူမ်ႉၸူးလိၼ်သေ မၼ်းတေငွၵ်ႈမူတ်းယဝ်ႉ မိူဝ်းပၢတ်ႇဝႆႉတေလီၼႆလႄႈၸင်ႇပွၵ်ႈမိူဝ်းၵႂႃႇတီႈ မိူင်းဢၢၵ်ႇ - ၵူၼ်းမိူင်းသူႈၼၼ်ႉ သိုပ်ႇလၢတ်ႈၼင်ႇၼႆ ။