ၽွင်းတူဝ်တႅၼ်း လူင်ပွင်ၸိုင်ႈမၢၼ်ႈ UPWC တင်းတူဝ်တႅၼ်း SSPP/SSA ႁူပ်ႉဢုပ်ႇၵၼ်တီႈ ဝဵင်းတႃႈၵုင်ႈ ၊ ပိူဝ်ႈတႃႇၵႄႈလိတ်ႈ ပၼ်ႁႃလွင်ႈပဵၼ်သိုၵ်းၵၼ်လႄႈ ပၼ်ႁႃၵူၼ်းပၢႆႈၽေး ။ ၵူၺ်းၵႃႈ ၾၢႆႇၼိုင်ႈၵေႃႈ သိုၵ်းမၢၼ်ႈႁႅၼ်းသိုၵ်းလေႃႇတိုၵ်း တပ်ႉႁူမ်ႇလူမ်ႈငဝ်ႈငုၼ်းဝၢၼ်ႈႁႆး ႁၢဝ်ႈႁႅင်း ။

ဢိင်ၼိူဝ် ၽွင်းလူင်ၾၢႆႇၾႆးၾႃႉ လႄႈ ဢိၵ်ႇတၼ်းႁဵင်းၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) ဢူးၶိၼ်ႇမွင်ႇၸူဝ်း ၊ ႁွင်ႉဝွၵ်ႇထိုင်ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) သေ ဝၼ်းၸၼ်တီႈ 23/11/2015 (မိူဝ်ႈဝႃး) ၼႆႉ တင်ႈတႄႇၵၢင်ၼႂ် 8 မူင်းထိုင် ၵၢင်ၶမ်ႈ 6 မူင်းႁူဝ်ၶမ်ႈ ၊ သွင်ၾၢႆႇလႆႈႁူပ်ႉထူပ်း ဢုပ်ႇၵုမ်ၵၼ် တီႈဝဵင်းတႃႈၵုင်ႈ ။ ၵူၺ်းၵႃႈ ၵၢၼ်ဢုပ်ႇဢူဝ်းၵၼ် ဢမ်ႇပေႃးၶိုပ်ႈၼႃႈသင် လႆႈသိုပ်ႇဢုပ်ႇဢူဝ်းၵၼ်ထႅင်ႈ မိူဝ်ႈၼႆႉ (24/11/2015) ။


လွင်ႈဢုပ်ႇၵုမ်ၵၼ်ၼႆႉ ၾၢႆႇလူင်ပွင်ၸိုင်ႈမၢၼ်ႈ မိပ်ႇႁႂ်ႈၾၢႆႇ SSPP/SSA ထွၼ်တပ်ႉပၢင်သဝ်းဢွၵ်ႇပၼ် ။ လွင်ႈၼႆႉ ႁဵတ်းႁႂ်ႈၵၢၼ်ဢုပ်ႇဢူဝ်းၵၼ်ဢမ်ႇပေႃးၶိုပ်ႈၼႃႈ ။ ၵွပ်ႈၼၼ်လႄႈ မိူဝ်ႈဝႃးဢုပ်ႇၵၼ်ဢမ်ႇယဝ်ႉသေ မိူဝ်ႈၼႆႉ သိုပ်ႇဢုပ်ႇၵၼ်ထႅင်ႈ ။ ပိူင်လူင်မၼ်း ၵဵဝ်ႇၵပ်းလွင်ႈပၼ်ႁႃ တမ်းတပ်ႉတီႈယူႇပၢင်သဝ်းၼႆႉ ၵုမ်ႇထဵင်ၵၼ်ယူႇတိၵ်းတိၵ်း ၊ ပႆႇယဝ်ႉပႆႇတူဝ်ႈလႆႈ - လႆႈႁူႉၼင်ႇၼႆ ။


ၾၢႆႇၼိုင်ႈတၢင်းၼိုင်ႈ ၊ ၽွင်ႈမိူဝ်ႈဢၼ် တူဝ်တႅၼ်း 2 ၾၢႆႇႁူပ်ႉဢုပ်ႇဢူဝ်းၵၼ် တီႈတႃႈၵုင်ႈ ပႆႇယဝ်ႉပႆႇတူဝ်ႈၼႆႉ တၢင်းၼႂ်းတွၼ်ႈၵၢင်ၸိုင်ႈတႆးၵေႃႈ သိုၵ်းမၢၼ်ႈသူင်ႇႁႅင်းသိုၵ်းၶိုၼ်ႈမႃးထႅင်ႈ မိူဝ်ႈဝၼ်းတီႈ 22/11/2015  ယၢမ်းဝၢႆးဝၼ်းသေ ယိုဝ်းၵွင်ႈလူင်သႂ်ႇလၢႆတီႈ။ မိူဝ်ႈဝႃး ဝၼ်းတီႈ 23/11/2015 တႄႇယၢမ်းၵၢင်ၼႂ် 8 မူင်းၶိုင်ႈ တႄႇဢဝ်ႁႅင်းသိုၵ်း ၶိုၼ်ႈလေႃႇတပ်ႉပၢင်သဝ်း SSPP/SSA တပ်ႉႁူမ်ႇလူမ်ႈငဝ်ႈငုၼ်းဝၢၼ်ႈႁႆး တွၼ်ႈၼႃႈတၢင်းၸၢၼ်းႁၢဝ်ႈႁႅင်း ။ တပ်ႉပၢင်သဝ်း ဢၼ်သိုၵ်းမၢၼ်ႈၶိုၼ်ႈလေႃႇတိုၵ်းၸိူဝ်းၼႆႉ ပဵၼ်တပ်ႉဢၼ်မီးတၢင်းဝၢၼ်ႈလူၺ် မိူင်းဢၢၵ်ႇ ။


လိူဝ်သေၼၼ်ႉ သိုၵ်းမၢၼ်ႈၶဝ် ယူႇတီႈတပ်ႉပၢင်ႇဝူဝ်း ၊ လွႆယူႈ ၊ ၵိဝ်ႇမွၵ်ႇၶၢဝ်ၸိူဝ်းၼႆႉ ယိုဝ်းၵွင်ႈလူင်ၵႂႃႇ လၢႆႁူးလၢႆတၢင်း မိူၼ်ၼင်ႇဢၼ်ၵႆႉယိုဝ်းၵႂႃႇလၢႆၾၢႆႇ ၵႃႈပူၼ်ႉမႃး ။ ဢမ်ႇၵွမ်ႉၵႃႈယိုဝ်းၵႂႃႇတၢင်း ပၢင်တိုၵ်းၵူၺ်း - ၼႆယဝ်ႉ ။


ၵဵဝ်ႇၵပ်းလွင်ႈဢၼ် ဢုပ်ႇၵၼ်တီႈတႃႈၵုင်ႈၼႆႉ ၵႅမ်ၽူႈၼမ်းၼႂ်း 2  ၸဝ်ႈၶမ်းတီႇ ဢၼ်ဢွၼ်ႁူဝ်ၵႂႃႇ ဢုပ်ႇၼၼ်ႉ လၢတ်ႈဝႃႈ - ဢုပ်ႇဢူဝ်းၵၼ် ပႆႇယဝ်ႉပႆႇတူဝ်ႈ၊ ပႆႇၸၢင်ႈလၢတ်ႈသင် ။ ပိူင်လူင်မၼ်း ဢၼ်ၶွင်ႉၶမ်ယူႇၼႆႉ ပဵၼ်လွင်ႈတမ်းဝၢင်းတီႈယူႇသိုၵ်း - ဝႃႈၼႆ ။


ဢၼ်ပဵၼ်ပၢင်တိုၵ်း ႁိမ်းႁွမ်းငဝ်ႈငုၼ်းဝၢၼ်ႈႁႆးၼၼ်ႉ ၶုၼ်သိုၵ်းၸၢႆးမိူင်း လၢတ်ႈဝႃႈ - ဢိင်ၼိူဝ်ဢူးၶိၼ်ႇမွင်ႇၸူဝ်း တူဝ်တႅၼ်းၾၢႆႇလူင်ပွင်ၸိုင်ႈ ႁွင်ႉဝွၵ်ႇမႃးလႄႈ ၵူၼ်းလူင်ႁဝ်းၶႃႈၵေႃႈ ၵႂႃႇဢုပ်ႇၵၼ်တီႈတႃႈၵုင်ႈ ။ ပၢင်ၵုမ်တီႈတႃႈၵုင်ႈတႄႉ လိုဝ်ႈၵႂႃႇၵမ်းၼိုင်ႈသေတႃႉၵေႃႈ ပၢင်တိုၵ်းတီႈဝၢၼ်ႈလူၺ် မိူင်းဢၢၵ်ႇၼႆႉတႄႉ ပႆႇလိုဝ်ႈသေၵမ်း ၊ ယိုဝ်းၵၼ်ယူႇတိၵ်းတိၵ်းတေႃႇထိုင်မိူဝ်ႈလဵဝ် (မိူဝ်ႈဝႃးတၢမ်းၶမ်ႈ) သဵင်ၵွင်ႈယင်းပႆႇယဵၼ် - ဝႃႈၼႆ ။


ဢၼ်မႃးလေႃႇတိုၵ်းတႄႉ ပဵၼ်သိုၵ်းမၢၼ်ႈတပ်ႉလႂ်ဢမ်ႇႁူႉ ။ လႆႈႁူႉဝႃႈ ပဵၼ်တပ်ႉဢၼ်ႁူမ်ႈၵၼ်သေမႃး ၊ ငဝ်ႈငုၼ်းၵုမ်းၵႅမ်ၽႅၼ်ၵၢၼ်ယၼ်ႇသိုၵ်း (ၸၵၶ) 2 မိူင်းၼွင် ၊ ၸၵၶ 17 မိူင်းပၼ်ႇ လႄႈတင်း တပ်ႉၵွင် ပႃႈတႂ်ႈတိူင်းသိုၵ်းဝၼ်းဢွၵ်ႇ (ယပၶ) တူၼ်ႈတီး ။ လႆႈဝႃႈပၢင်တိုၵ်း ႁၢဝ်ႈႁႅင်းၶိုၼ်ႈမႃး ။ ၵူၺ်းၵႃႈ မိူဝ်ႈဝႃးတေႃႇထိုင်မႃးမိူဝ်ႈၼႆႉတႄႉ ဢၼ်ဢဝ်ႁိူဝ်းဝိၼ်တိုၵ်းမႃးယိုဝ်းတႄႉ ပႆႇမီး - ၶုၼ်သိုၵ်းၸၢႆးမိူင်း သိုပ်ႇလၢတ်ႈ ။


ဢၼ်ႁူပ်ႉဢုပ်ႇၵုမ်ၵၼ်တီႈတႃႈၵုင်ႈ ပွၵ်ႈၼႆႉ တူဝ်တႅၼ်းၾၢႆႇ SSPP/SSA ၵႅမ်ၽူႈၼမ်းၼႂ်း 2 SSPP/SSA ၸဝ်ႈၶမ်းတီႇဢွၼ်ႁူဝ် ။ ၼႂ်းၼၼ်ႉပႃး ၸဝ်ႈၶိူဝ်းမၢဝ်း ၊ ၸဝ်ႈၼေႃႇလဵၵ်း ၊ ၸဝ်ႈၸၢႆးသု လႄႈတင်း ၵူၼ်းလုမ်းၵမ်ႈၽွင်ႈ ။ ၾၢႆႇတူဝ်တႅၼ်း လူင်ပွင်ၸိုင်ႈမၢၼ်ႈ ဢူးၶိၼ်ႇမွင်ႇၸူဝ်း လႄႈ ၽူႈမီးပုၼ်ႈၽွၼ်းၼႂ်း UPWC ၊ ဢိၵ်ႇၵူၼ်းၼႂ်း သုၼ်ၵၢင်လွင်ႈငမ်းယဵၼ်မၢၼ်ႈ (MPC) ဢူးလႃႉမွင်ႇသူၺ်ႇ ၶဝ်ၸိူဝ်းၼႆႉ ။


ပၢင်တိုၵ်း ဢၼ်တပ်ႉသိုၵ်းမၢၼ်ႈ ပိုတ်ႇၼႃႈသိုၵ်းတေႃႇ SSPP/SSA တင်ႈတႄႇဝၼ်းတီႈ 06/10/2015 မႃးတေႃႇထိုင်ဝၼ်းမိူဝ်ႈလဵဝ်ၼႆႉ ၸမ်မႃး 2 လိူၼ်ယဝ်ႉ ။ ဢၼ်ၾၢႆႇတပ်ႉသိုၵ်းမၢၼ်ႈ ၸႂ်ႉႁိူဝ်းဝိၼ်ယိုဝ်းသိုၵ်း မီး 8 ဝၼ်း ၊ ပဵၼ်ပၢင်တိုၵ်းၵၼ် 40 ပွၵ်ႈပၢႆ ။ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ၼႂ်းၸႄႈဝဵင်းမိူင်းသူႈ မိူင်းၼွင် ၵေးသီး 1 မိုၼ်ႇပၢႆ လႆႈပၢႆႈယၢၼ်ႁိူၼ်းယေး တီႈယူႇ ။