မၢၵ်ႇတႅၵ်ႇတီႈၶူဝ်ၸူမ် ႁိမ်းဝဵင်းမိူင်းသူႈ ၊ တိူဝ်ႉၵူၼ်းၶီႇရူတ်ႉၶိူင်ႈ ၽွင်းၵႂႃႇႁႃၽၼ်းမႆႉ 2 ၵေႃႉ တိုၵ်ႉမီးယူႇၸွမ်းတၢင်း ဝၢတ်ႇၸဵပ်းလိူဝ်ႁႅင်း ၊ လႆႈသူင်ႇတူဝ် ၵႂႃႇယူတ်းယႃတီႈၶူဝ်လမ် ။

ဝၼ်းတီႈ (24/11/2015) မိူဝ်ႈၼႆႉ မွၵ်ႈၵၢင်ၼႂ်ယၢမ်း 8 မူင်း မၢၵ်ႇတႅၵ်ႇ တီႈၶူဝ်ၸူမ် ၼွၵ်ႈဝဵင်းမိူင်းသူႈ ၊ ၼိူဝ်သဵၼ်ႈတၢင်း လုၵ်ႉမိူင်းသူႈ ဢွၵ်ႇၵႂႃႇၼႃႈတၢင်းႁွင်ႇ မိူင်းဢွတ်ႇ - ၶူဝ်ၸူမ် ၊ သဵၼ်ႈတၢင်းၵႂႃႇတၢင်ႉယၢၼ်း ၊ ယၢၼ်ဝဵင်းမိူင်းသူႈ ဢမ်ႇထိုင် 1 လၵ်း ။ တိူဝ်ႉသႂ်ႇၵူၼ်းၵႂႃႇတၢင်း ဢၼ်ၶီႇရူတ်ႉၶိူင်ႈလမ်းၼိုင်ႈ တၢင်ႇၵၼ်ၵႂႃႇႁႃၽၼ်းမႆႉ 2 ၵေႃႉ ဝၢတ်ႇၸဵပ်းလိူဝ်ႁႅင်း ။


မၢၵ်ႇတႅၵ်ႇတီႈၶူဝ်ၸူမ်ၼႆႉ ပဵၼ်တီႈၼႃႈႁူဝ်ႉႁိူၼ်းပိူၼ်ႈ ၊ တီႈမၢၵ်ႇတႅၵ်ႇတႄႉ ႁဝ်းဢမ်ႇၵႂႃႇတူၺ်း ၊ ႁဝ်းၵႂႃႇတူၺ်းလုၵ်ႈဢွၼ်ႇၸၢႆး 2 ၵေႃႉ ဢၼ်ၶိုၼ်ႈႁူင်းယႃဝႆႉၵူၺ်း ။ ၵေႃႉၼိုင်ႈ ၸိုဝ်ႈၸၢႆးသူၺ်ႇ ဢႃယု 25 ၊ ၵူၼ်းပွၵ်ႉ 4 ၵုၼ်ၼႃး ၊ ၸၢၵ်ႇမၢၵ်ႇၸပ်းတီႈၼႃႈၽၢၵ်ႇမၼ်းလႄႈ တီႈႁိမ်းပဵမ်ႉၶၢင်ႈၾၢႆႇၶႂႃ ။ ထႅင်ႈၵေႃႉၼိုင်ႈ ၸၢႆးပွၵ်း (ႁိုဝ်) ၸၢႆးမွင်ႇၼု ၊ ဢႃယု 19 ပီ ။ တိူဝ်ႉတီႈႁိမ်းၵႅမ်ႈ ၊ တီႈၶႅၼ်လႄႈၶေႃႈတိၼ် 3 တီႈ ။ တင်းသွင်ၵေႃႉၼႆႉ ၵူၼ်းပွၵ်ႉ 4 ၵုၼ်ၼႃးၼင်ႇၵၼ် ၊ ပဵၼ်တႆးၵေႃႉၵၼ်။ ၶဝ်ၶီႇရူတ်ႉၶိူင်ႈၵႂႃႇၸွမ်းၵၼ် ဝႃႈတေၵႂႃႇၽၼ်းမႆႉ ၊ သမ်ႉၵႂႃႇၺႃးမၢၵ်ႇတႅၵ်ႇ - ၼၢင်းၸိင်ႇ ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈမိူင်းသူႈ လၢတ်ႈ ။


သိုပ်ႇလၢတ်ႈဝႃႈ - ၶၢဝ်းၶႃသွင်ၵေႃႉၵႂႃႇၼၼ်ႉ ပိူၼ်ႈၵေႃႈၵႂႃႇၵႂႃႇမႃးမႃးၵၼ်ယူႇ ။ ၶဝ်လၢတ်ႈဝႃႈ မၢၵ်ႇတႅၵ်ႇၼႆႉ မၼ်းတႅၵ်ႇသဵၼ်လူင်မႃး ၊ ၶဝ်ၵေႃႈဢမ်ႇႁူႉဝႃႈပဵၼ်မၢၵ်ႇဢီႈသင် ၊ ၶဝ်ဢမ်ႇတၼ်းႁၼ် ။ ပိူၼ်ႈၵႂႃႇတူၺ်းတႄႉ မၢၵ်ႇတႅၵ်ႇတီႈႁိမ်းႁူဝ်ႉ ။ မၢၵ်ႇတႅၵ်ႇယဝ်ႉၵေႃႈ ၶႃသွင်ၵေႃႉတင်းၶီႇလူတ်ႉၶိူင်ႈသေ တင်းလိူတ်ႈတူၵ်း လိူတ်ႈယွႆႉသေပွၵ်ႈမႃးလႆႈယူႇ - ဝႃႈၼႆ ။


မိူဝ်ႈလဵဝ်ၼႆႉ ၵူၼ်းဝၢတ်ႇၸဵပ်းၼႆႉ ဢဝ်သူင်ႇၵႂႃႇယူတ်းယႃ တီႈၶူဝ်လမ်ယဝ်ႉ ၊ ၵေႃႉဢၼ်ၸပ်းၼႃႈၽၢၵ်ႇၼၼ်ႉ ၶၢင်းႁူဝ်မဝ်းၼႆသေ ၸင်ႇဢဝ်ၵႂႃႇၶူဝ်လမ် ။ မိူဝ်ႈတႄႇမၼ်းတႄႉ ဢၢင်ႈဢဝ်ၵႂႃႇၵေႃႉလဵဝ်ၵူၺ်း ။ ထႅင်ႈၵေႃႉၼိုင်ႈၵေႃႈ တိူဝ်ႉၶေႃႈတိၼ် ၊ ၶႅၼ် ၊ ႁိမ်းၵႅမ်ႈသေ ဢဝ်ၵႂႃႇၼင်ႇၵၼ် ။ ၽွင်းသွင်ၶႃယူႇတီႈႁူင်းယႃၼၼ်ႉ ၾၢႆႇလိူမ်ႈလႆႇၵေႃႈၵႂႃႇတူၺ်း ၊ ၾၢႆႇသိုၵ်းၼိူဝ်တပ်ႉၵေႃႈၵႂႃႇတူၺ်းယူႇ ။ ၸဝ်ႈၼႃႈတီႈ ၵူႈႁွင်ႈၵၢၼ်ၶဝ်ၶိုင်ပၼ်သေ ဢဝ်ၵႂႃႇယူတ်းယႃ တီႈၶူဝ်လမ် - ၼၢင်းၸိင်ႇ သိုပ်ႇလၢတ်ႈၼင်ႇၼႆ ။