ၵူၼ်းၼုမ်ႇတႆး ဝဵင်းတႃႈၶီႈလဵၵ်း ၊ သႅၼ်ဝီ ၊ သီႇပေႃႉ ၊ ဝဵင်းလိူဝ်ႇ လႄႈဢိၵ်ႇလၢႆလၢႆဝဵင်း ႁူမ်ႈၵၼ်သေ လူင်းတူၵ်းသူးႁႃ ငိုၼ်းၵွင်ၵၢင် တႃႇတေၵႂႃႇၸွႆႈၵူၼ်းၺႃးၽေး ပၢင်တိုၵ်း ၼႂ်းၸႄႈဝဵင်း မိူင်းသူႈ ၊ မိူင်းၼွင် ။

ဝၼ်းတီႈ 23/11/2015 ၸုမ်းပၢႆးမွၼ်းတႆးလႄႈ ၸုမ်းပႃႊတီႊႁူဝ်သိူဝ် ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ႁူမ်ႈၵၼ်တူၵ်းသူး ႁႃငိုၼ်းၵွင်ၵၢင် တႃႇၸွႆႈထႅမ်ၵူၼ်းထူပ်းၽေးသိုၵ်း ၼႂ်းမိူင်းတႆးပွတ်းၸၢၼ်း တႄႇဢဝ်ၶၢဝ်းယၢမ်း ၵၢင်ၼႂ်ထိုင် ႁူဝ်ၶမ်ႈ ။


ၸၢႆးဢေး ၽူႈၶၢၼ်ပၢၵ်ႇ ပႃႊတီႊႁူဝ်သိူဝ် ဝဵင်းတႃႈၶီႈလဵၵ်းလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ -

“ ႁဝ်းၶႃႈဢွၼ်ၵၼ် တႄႇလူင်းႁႃငိုၼ်းၵွင်ၵၢင် ၼႂ်းပွၵ်ႉပုင်းထုၼ်ၵူၺ်းၶႃႈ လႆႈငိုၼ်းထႆး 10000 ပၢႆ ၊ ငိုၼ်းမၢၼ်ႈသမ်ႉ ႁိမ်း 200000 ပျႃး ၊ မိူဝ်ႈၼႆႉ ဝၼ်းတီႈ 24 ၵေႃႈ  ႁဝ်းၶႃႈ တေဢွၼ်ၵၼ်သိုပ်ႇလူင်းႁႃထႅင်ႈ တီႈၽူႈမီးၼမ်ႉၸႂ်ၸေႇတၼႃႇ ၼႂ်းဝဵင်းတႃႈၶီႈလဵၵ်း ”- ဝႃႈၼႆ ။


ၼွၵ်ႈလိူဝ်သေ ဝဵင်းတႃႈၶီႈလဵၵ်းယဝ်ႉ သမ်ႉမီးထႅင်ႈ ၸုမ်းတူင်ႇဝူင်းတႆး ၸုမ်းသႅင်ၵဝ်ႈၼမ်ႉ ဝဵင်းသႅၼ်ဝီ ၊ ၸုမ်းၵူၼ်းၼုမ်ႇတႆး ဝဵင်းလိူဝ်ႇလႄႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလိူဝ်ႇ တေႁူမ်ႈၵၼ်သေ တူၵ်းသူးႁႃငိုၼ်းၵွင်ၵၢင် တီႈဝဵင်းလိူဝ်ႇ ၼၢင်းၽိူဝ်ၼုမ်ႇ ၽူႈၶဝ်ႈပႃး ၼႂ်းၸုမ်းသႅင်ၵဝ်ႈၼမ်ႉ လၢတ်ႈ ။


“ ၸုမ်းႁဝ်းၶႃႈ တေၵႂႃႇတီႈဝဵင်းလိူဝ်ႇသေ တေၵႂႃႇႁူမ်ႈ ၸုမ်းၵူၼ်းၼုမ်ႇတႆး ဝဵင်းလိူဝ်ႇလႄႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလိူဝ်ႇ သၢမ်ၸုမ်းႁူမ်ႈၵၼ်သေ တေတူၵ်းသူးတီႈ ပီႈၼွင်ႉဝဵင်းလိူဝ်ႇ တီႈလႂ်မီးၵူၼ်းၼမ်ၵေႃႈ တေၶဝ်ႈတူၵ်းသူးတီႈၼၼ်ႈ ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ “ ငိုၼ်းၵွင်ၵၢင်ဢၼ်လႆႈမႃးတင်းသဵင်ႈ တေၵႂႃႇၵမ်ႉၸွႆႈၵူၼ်းထူပ်းၽေး ” ဝႃႈၼႆ ။


မိူဝ်ႈပူၼ်ႉမႃး ဝၼ်းတီႈ 22/11/2015 ၸုမ်းၵေႃလိၵ်ႈလၢႆးလႄႈ ၾိင်ႈငႄႈတႆး ၊ ပႃႊတီႊႁူဝ်သိူဝ် လႄႈ ၸုမ်းပရႁိတ ဝဵင်းသီႇပေႃႉ ႁူမ်ႈၵၼ်သေ ၵႂႃႇၸွႆႈထႅမ်ၵူၼ်းၺႃးၽေး ၸိူဝ်းၶၢႆႉၵႂႃႇယူႇ တီႈဝၢၼ်ႈဝႃႉ ၵူၼ်းၵႂႃႇၶဝ်ႈႁူမ်ႈ ၵေႃႉၼိုင်ႈလၢတ်ႈ ။


ၼၢင်းမူဝ်ၶမ်း ၽူႈၵႂႃႇၸွႆႈထႅမ်ၵူၼ်းထူပ်းၽေး တီႈဝၢၼ်ႈဝႃႉလႄႈႁၢႆးပႃး လၢတ်ႈဝႃႈ “ ႁဝ်းၶႃႈ သၢမ်မူႇၸုမ်း တူင်ႇဝဵင်းသီႇပေႃႉ  ႁူမ်ႈၵၼ်ၵႂႃႇၸွႆႈၵူၼ်းၺႃးၽေး တီႈဝၢၼ်ႈဝႃႉ ၸႄႈဝဵင်းၵေးသီးလႄႈ တီႈႁၢႆးပႃ ၊ တီႈဝၢၼ်ႈဝႃႉသမ်ႉ လႆႈၸွႆႈငိုၼ်းပၼ် 30 သႅၼ်ပျႃး ၊ တီႈႁၢႆးပႃသမ်ႉ လႆႈၸွႆႈငိုၼ်းပၼ် 70 သႅၼ် ပျႃး ႁူမ်ႈၵၼ်တင်းမူတ်းငိုၼ်း 100 သႅၼ် ႁူမ်ႈပႃးလူၺ်ႈ ၶူဝ်းၼုင်ႈတင်းဝႂ်လႄႈ ၶွင်ၵိၼ်ယႅမ်ႉ ၸဵမ်ၸိူဝ်ႉၼႆႉ ” ဝႃႈၼႆ ။


သိုၵ်းလူင်ပွင်ၸိုင်ႈမိူင်းမၢၼ်ႈ ႁၢင်ႈသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA  မႃး မိူဝ်ႈဝၼ်းတီႈ 6/10/2015 တေႃႇထိုင်ယၢမ်းလဵဝ် ဢၼ်လႆႈပဵၼ်ပၢင်တိုၵ်းႁၢဝ်ႉႁႅင်း ဢမ်ႇယွမ်း 40 ပွၵ်ႈ ၊ ၵူၼ်းမိူင်းလႆႈပၢႆႈယၢၼ်ႁိူၼ်းယေး တီႈယူႇ ဢမ်ႇယွမ်း 10,000  ဝႃႈၼႆ ။