ၵူၼ်းၼုမ်ႇတႆး ၼႂ်းၵဵင်းမႆႇလႄႈ ၽူႈႁွင်ႉၵႂၢမ်း ၊ ၼၢင်းဝႅပ်ႇတႆး ႁူမ်ႈၵၼ်တူင်ႉၼိုင် ဢႅဝ်ႇႁႃတူၵ်းသူး ၼႂ်းဝဵင်းၵဵင်းမႆႇ ၸိုင်ႈထႆး ၊ ပိူဝ်ႈတႃႇႁႃငိုၼ်း သူင်ႇမိူဝ်းၸွႆႈထႅမ်ၵူၼ်းထူပ်းၽေးသိုၵ်း ၼႂ်းမိူင်းတႆး ။

ဝၼ်းဢႃးတိတ်ႉတီႈ 29/11/2015 (မိူဝ်ႈဝႃး) ၼႆႉပီႈၼွင်ႉတႆး ႁႅင်းၵၢၼ်ယၢၼ်မိူင်း ၸိူဝ်းၸိူဝ်းႁဵတ်းၵၢၼ်ယူႇသဝ်းၼႂ်းၵဵင်းမႆႇ ၊ ၵမ်ႈၼမ်ပဵၼ်ၵူၼ်းၼုမ်ႇ ဢိၵ်ႇ မေႃႁွင်ႉၽဵင်းၵႂၢမ်း ၸၢႆးလွမ်ႉဝုၼ်း ၊ ၼၢင်းဝႅပ်ႇတႆး ၼွင်ႉၼႅၼ်း ၸိူဝ်းၼႆႉ လႆႈႁူမ်ႈၵၼ်ႁဵတ်းၵၢၼ်တူင်ႉၼိုင် ၵႂႃႇတူၵ်းသူး ႁႃငိုၼ်း ပိူဝ်ႈတႃႇသူင်ႇမိူဝ်းၸွႆႈထႅမ် ၵူၼ်းထူပ်းၽေးသိုၵ်း ၼႂ်းမိူင်းတႆး ။


ၵူၼ်းၼုမ်ႇ ၽူႈၶဝ်ႈႁူမ်ႈၵၢၼ်တူင်ႉၼိုင်ၵေႃႉၼိုင်ႈ ၸၢႆးလႃႉထုၼ်း လၢတ်ႈဝႃႈ - မိူဝ်ႈဝၼ်းဢႃးတိတ်ႉၼႆႉ ဢၼ်ႁူမ်ႈၵၼ်ၵႂႃႇႁပ်ႉတၢၼ်းငိုၼ်း (လူႇၶၢမ်ႇငိုၼ်း) ပွၵ်ႈၼႆႉ ၸၢႆးလွမ်ႉဝုၼ်း ပဵၼ်ၽူႈဢွၼ်ႁူဝ် ၊ ၼွင်ႉၼႅၼ်း ၊ ၸၢႆးလၢဝ်သႅင် လႄႈ ၵူၼ်းၼုမ်ႇတႆးၵဵင်းမႆႇ ။ ၵႂႃႇ တီႈသဵၼ်ႈတၢင်းၵူၼ်းပႆ (ထၼူၼ်ၶူၼ်းၻိူၼ်း) ။ လိူဝ်သေၼၼ်ႉ လႆႈၵႂႃႇတီႈၵၢတ်ႇလူင်ထႅင်ႈ ။ မိူဝ်ႈပူၼ်ႉမႃး ဝၼ်းလွႆးၵထူင်း (လိူၼ် 12 မူၼ်း)ၼၼ်ႉၵေႃႈ လႆႈၵႂႃႇႁႃႁပ်ႉငိုၼ်းၸွႆႈထႅမ် ။ မိူဝ်ႈလဵဝ် ငိုၼ်းတင်းမူတ်း လႆႈယူႇ 6,500 ဝၢတ်ႇ ။ ဢၼ်ၵႂႃႇၸွမ်းၵၼ်ၼႆႉ မီးၵူၼ်းၼုမ်ႇမွၵ်ႈ 20 ပၢႆ ။ ၶမ်ႈၼႆႉ တေၵႂႃႇတီႈၵၢတ်ႇၸၢင်ႉၶဵၼ်ႉ (ၵဵင်းမႆႇ) - ဝႃႈၼႆ ။


သိုပ်ႇလၢတ်ႈဝႃႈ - ဢဵၼ်းဢၢၼ်းႁဝ်းတႄႉ ၼႂ်းၶၢဝ်းတၢင်းၼိုင်ႈလိူၼ်ၼႆႉ ႁႂ်ႈလႆႈငိုၼ်းမွၵ်ႈ 5 မိုၼ်ႇ ။ ဝၢင်းၽႅၼ်ဝႆႉ တေၵႂႃႇတူၵ်းသူးႁပ်ႉတၢင်းၸွႆႈထႅမ်ၸွမ်းၵၢတ်ႇၼတ်ႉ (ၵၢတ်ႇလၢႆးဝူင်ႈ) ၊ ၸွမ်းႁၢၼ်ႉဢႃးႁၢရ် ဢၼ်ပီႈၼွင်ႉတႆးႁဝ်း ပိုတ်ႇဝႆႉၼႂ်းမိူင်းထႆးၸိူဝ်းၼၼ်ႉသေ ဢဝ်ငိုၼ်းမိူဝ်းၸွႆႈ ပီႈၼွင်ႉၵူၼ်းမိူင်းတႆးထူပ်းၽေးႁဝ်း ၼႂ်းမိူင်းတႆး ။ ၸွမ်းတီႈလိုဝ်ႈသဝ်း ၶႅမ်ႉႁႅမ်းၵေႃႇသၢင်ႈ ဢၼ်မီးပီႈၼွင်ႉတႆးႁဝ်းယူႇသဝ်း ၸိူဝ်းၼၼ်ႉၵေႃႈ တေၸူဝ်းၵၼ် ၵႂႃႇတူၵ်းသူးပႃး ။


ၵၢၼ်တူၵ်းသူးၼႆႉ မီးၵီႊတႃႊလုၵ်ႈၼိုင်ႈသေ ႁွင်ႉၽဵင်းၵႂၢမ်း ၊ ႁွင်ႉၵႂၢမ်း ယႃႇႁႂ်ႈဢဵၼ်ႁႅင်းႁၢႆ ၊ တႆးတိုၵ်ႉတွင်းယူႇ ၸိူဝ်းၼႆႉ ။ လၢတ်ႈတႆးတင်းထႆး - ၸၢႆးလႃႉထုၼ်း သိုပ်ႇလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


တင်ႈတႄႇႁူဝ်လိူၼ်ဢွၵ်ႊထူဝ်ႊၿိူဝ်ႊ (2015) မႃး ယွၼ်ႉတပ်ႉသိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) သေ ႁဵတ်းႁႂ်ႈၵူၼ်းမိူင်းတႆး ၼႂ်းၸႄႈဝဵင်းမိူင်းသူႈ မိူင်းၼွင် ၵေးသီးၸိူဝ်းၼႆႉ လႆႈပၢႆႈၽေးသိုၵ်းသိူဝ် မိုၼ်ႇပၢႆ ။ ၵူၼ်းၼုမ်ႇတင်း မေႃႁွင်ႉၽဵင်းၵႂၢမ်း ၼႂ်းမိူင်းၸိူဝ်းၼႆႉၵေႃႈ ဢႅဝ်ႇႁႃတူၵ်းသူး ႁႃငိုၼ်းလၢႆလၢႆတီႈလၢႆလၢႆဝဵင်း လႆႈငိုၼ်းၼပ်ႉႁူဝ်လၢၼ်ႉထႅပ်ႇ သေၸွႆႈထႅမ်ၵူၼ်းပၢႆႈၽေးဝႆႉ ။ ပွၵ်ႈၼႆႉ ပီႈၼွင်ႉတႆး ၸိူဝ်းမႃးႁွတ်ႈၽႅဝ် ၼႂ်းဝဵင်းၵဵင်းမႆႇၵေႃႈ လႆႈဢွၼ်ၵၼ်ၵႂႃႇႁႃႁပ်ႉငိုၼ်းၵမ်ႉၸွႆႈထႅမ် ပိူဝ်ႈၸွႆႈထႅမ် ပီႈၼွင်ႉၵူၼ်းထူပ်းၽေး ၼင်ႇၵဝ်ႇ ။

(ႁႅင်းၵၢၼ်ယၢၼ်မိူင်း)