လုၵ်ႈႁဵၼ်းတႆး - ၸၼ်ႉၸွမ် Yunnan University Of Nationalities မိူင်းသေ (ၶုၼ်းမိင်) ၸႄႈမိူင်း ယုၼ်ၼၢၼ် ၸိုင်ႈမိူင်းၶႄႇ ၸတ်းႁဵတ်းပွႆး ႁပ်ႉတွၼ်ႈ ပီမႂ်ႇတႆး 2110 ၼီႈ ၼႂ်းဝၢင်း ၸၼ်ႉၸွမ် မီးၵူၼ်းၶဝ်ႈႁူမ်ႈ 600 ပၢႆ ။

ဝၼ်းတီႈ 28/11/2015 ၶၢဝ်းယၢမ်း 13:30-22:00 မူင်း လုၵ်ႈႁဵၼ်းတႆး ဢၼ် ၶဝ်ႈႁဵၼ်းလိၵ်ႈ တီႈၸၼ်ႉၸွမ် တီႈၶုၼ်းမိင် (မိူင်းသေ) ၸိုင်ႈမိူင်းၶႄႇ ၊ ႁူမ်ႈၵၼ်ၸတ်းႁဵတ်းပွႆး ႁပ်ႉတွၼ်ႈပီမႂ်ႇတႆး 2110 ၼီႈ ။ ၸတ်းႁဵတ်းပႃးပၢင်ၵုမ် တႃႇသၢၼ်မိုဝ်းၵၼ် ၶူၼ်ႉႁႃ ပိုၼ်းတႆး ၊ ၾိင်ႈႁိတ်ႈႁွႆးတႆး ၊ လိၵ်ႈလၢႆးပၢႆၵမ်တႆး ဢိၵ်ႇ ၸိူဝ်ႉသၢႆၶိူဝ်းတႆး ၸိူဝ်းလႆႈယူႇၽၢတ်ႇၵၼ် လၢႆဝၢၼ်ႈလၢႆမိူင်း ။


ၸဝ်ႈတိုၼ်းတႆး ၵႅမ်ႁူဝ်ပဝ်ႈလုမ်း ပုတ်ႉထၸိုင်ႈမိူင်းၶႄႇ ၊ ၸဝ်ႈရႃႇႁူႉလႃႇၵွၼ်းၶမ်း (ၶူးသွၼ်ၼႂ်း ႁူင်းႁဵၼ်းပေႃးထိ ဝတ်ႉလူင်ႁေႃၶမ်း မိူင်းမၢဝ်း) ၶဝ်ၸဝ်ႈၵေႃႈ ယေႃးတူဝ်ယေႃးၶိင်း ၶဝ်ႈႁူမ်ႈပၢင်ပွႆး ။


တူၼ်ၶူးၸဝ်ႈတိုၼ်းတႆး မွၵ်ႇလၢတ်ႈဝႃႈ - တိုၵ်းသူၼ်းထိုင် လုၵ်ႈႁဵၼ်းဢၼ်မႃးၶိုၼ်ႈႁူင်းႁဵၼ်း တီႈၵုၼ်းမိင် (မိူင်းသေ) ၸိုင်ႈမိူင်းၶႄႇ တၢင်းလၢႆဝႃႈ ယွင်ႈယေႃးၼမ်ႉၸႂ်လုၵ်ႈႁဵၼ်း ဢၼ်လႆႈၽၢတ်ႇ ဝၢၼ်ႈ ယၢၼ်မိူင်းမႃးၵေႃႈ ၊ ဢမ်ႇလိုမ်းၾိင်ႈထုင်းတႆးလႄႈ ယင်းယုၵ်ႉယွင်ႈ ၸတ်းပွင် ႁဵတ်းသၢင်ႈလႆႈ ပွႆးပီမႂ်ႇတႆးလႆႈ - ဝႃႈၼႆ ။


လိူဝ်ၼၼ်ႉ မၼ်ၸဝ်ႈယင်းၶႆႈၼႄ ပိုၼ်းပီမႂ်ႇတႆး ၊ ပိုၼ်းတႆး လွင်ႈၸၢဝ်းတႆး တၢင်းလၢႆ လႆႈၸတ်းသၢင်ႈ ၾိင်ႈပွႆးပီမႂ်ႇတႆး ။


ဝၢႆးၼၼ်ႉ ၶူးသွၼ် ၼႂ်းႁူင်းႁဵၼ်း Yunnan University Of Nationalities မွၵ်ႇလၢတ်ႈၶေႃႈၵႂၢမ်းႁူမ်ၸူမ်းလႄႈ ပၼ်ၶေႃႈသင်ႇသွၼ် ႁႂ်ႈမေႃ ႁၵ်ႉၾိင်ႈႁိတ်ႈႁွႆး ၸဝ်ႈၵဝ်ႇ ။


ပၢင်ပွႆးႁပ်ႉတွၼ်ႈပီမႂ်ႇတႆး 2110 ၼီႈ ဢၼ်ၸတ်းႁဵတ်းတီႈ ပွႆးပီမႂ်ႇတႆး တီႈၸၼ်ႉၸွမ် Yunnan University Of Nationalities ပဵၼ်ပွၵ်ႈတီႈ 6 ။ တီႈပၢင်ပွႆးၼၼ်ႉ မီးတၢင်းၵႃႈၵႃႈတႆးလၢႆလၢႆယၢင်ႇ မိူၼ် တၢင်းၵႃႈ လၢႆးပဝ်ႇပီႇၼမ်ႉတဝ်ႈလၢႆလၢႆလၢႆး ၊ ၼႄပႃးလၢႆးဢႅဝ်ႇသၢဝ်ပၢၼ်ၵွၼ်ႇ၊ လွင်ႈၼႄၾိင်ႈထုင်း ၶူဝ်းၼုင်ႈတႆး ပၢၼ်ၵဝ်ႇပၢၼ်မႂ်ႇၵူႈလွင်ႈလွင်ႈ ၊ ၼႄပႃးလၢႆးၵဵပ်းမွၵ်ႇ ၊ ၶွၵ်းမွၵ်ႇ ၊ ဢဝ်မိုဝ်းတႅမ်ႈတူဝ်လိၵ်ႈတႆး ႁၢင်ႈလီ ၸဵမ်ၸိူဝ်ႉၼႆႉ ။


တီႈပၢင်ပွႆးႁပ်ႉပီမႂ်ႇ မိူင်းသေ ၼၼ်ႉ ယင်းႁဵတ်းပႃးပၢင်ၵုမ်ၵၼ်သေ တႅပ်းတတ်း ၼႃႈၵၢၼ် 4 ၶေႃႈ တႃႇႁဵတ်းတႃႇသၢင်ႈႁူမ်ႈၵၼ်ၵႂႃႇၶၢဝ်းၼႃႈ ။


1. ၶူၼ်ႉႁႃ ပိုၼ်းတႆး ဢၼ်တႅမ်ႈဝႆႉၼႂ်းလိၵ်ႈၶႄႇ လႄႈ လိၵ်ႈတႆး၊ မီးလွင်ႈပႅၵ်ႈပိူင်ႈၵၼ်ၸိူင်ႉႁိုဝ် ။

2. ၶူၼ်ႉႁႃ သပ်းလႅင်း ၵႂၢမ်းလၢတ်ႈ ၊ လိၵ်ႈလၢႆး ဢၼ်ပီႈၼွင်ႉတႆးႁဝ်း တီႈယူႇဢမ်ႇမိူၼ်ၵၼ် ၊ လွင်ႈယူႇႁၢင်ႇၵႆၵၼ်လႄႈ လွင်ႈၸႂ်ႉတိုဝ်းၵႂၢမ်းလၢတ်ႈ လိၵ်ႈလၢႆး ဢမ်ႇမိူၼ်ၵၼ် ။

3. ပၼ်ႁႃလိၵ်ႈတႆးလၢႆလွင်ႈ ဢၼ်ၸႂ်ႉတိုဝ်းၼႂ်းၾူၼ်း ၼႂ်းၶွမ်း ဢိၵ်ႇတင်း ပၼ်ႁႃတူၼ်းသဵင် လိၵ်ႈတူဝ်ယၢဝ်း ဢၼ်ၸမ်ႈမဵတ်ႉလႄႈ ဢၼ်မိူၼ်ႁၢင်ႈမႄႈလိၵ်ႈဢိင်းၵလဵတ်ႈ ။

4. လုၵ်ႈႁဵၼ်းၸၼ်ႉၸွမ်ထုၵ်ႇလီၶဝ်ႈၸႂ်လႄႈ လဵပ်းႁဵၼ်း ၵႂၢမ်းသွၼ်ပုတ်ႉထၸဝ်ႈ - ၸဵမ်ၸိူဝ်ႉၼႆႉ ။


ၶပ်ႉမၢႆတွၼ်ႈၵၢင်ၶမ်ႈသမ်ႉ မီးပၢင်မူၼ်ႈသိူဝ်းတၢင်ၵႃႈ ႁွင်ႉၽဵင်းၵႂၢမ်းပၢၼ်ၵဝ်ႇလႄႈ ပၢၼ်မႂ်ႇ ။ ယင်းမီးလုၵ်ႈႁဵၼ်း ၶႄႇ ၊ ဝ ၊ ၶၢင် ၸိူဝ်ႉၼႆႉၵေႃႈ ဢဝ်တၢင်းၵႃႈ ၽႂ်မၼ်း ၶဝ်ႈႁူမ်ႈ ပၼ်ႁႅင်း ။


ပွႆးပီမႂ်ႇတႆးၼႆႉ ၵွပ်ႈမၼ်းမီးၽွၼ်းလီယႂ်ႇၼမ် တႃႇပူၵ်းတိုၼ်ႇၼမ်ႉၸႂ် လုၵ်ႈလၢၼ်တႆး ၸိူဝ်းၽၢတ်ႇ ပေႃႈယၢၼ်မႄႈ၊ ၽၢတ်ႇဝၢၼ်ႈယၢၼ်မိူင်းမႃးလႄႈ တီႈၸၼ်ႉၸွမ်ၼႆႉ တေသိုပ်ႇႁဵတ်းပွႆးပီမႂ်ႇတႆးၵႂႃႇ ၵူႈပီၵူႈပီၼႆ ၽူႈၸတ်းၵၢၼ် ပွင်ပဵၼ်ပၢင်ပွႆး ပီမႂ်ႇတႆး ၸၼ်ႉၸွမ် Yunnan University Of Nationalities လၢတ်ႈ ။