သိုၵ်းမၢၼ်ႈ တင်းတပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ် ပွတ်းဝၢၼ်ႈသေႃႉႁၢဝ်ႈႁႅင်း။ သိုၵ်းမၢၼ်ႈဢဝ်ႁိူဝ်းဝိၼ်တိုၵ်း ၵျႅတ်ႊ လႄႈႁိူဝ်းဝိၼ်မႅင်းမီႈ (Helicopter) ယိုဝ်းၸွႆႈထႅင်ႈ ။

ပူၼ်ႉမႃးမိူဝ်ႈဝၼ်းတီႈ 14/11/2015 တင်ႈတႄႇၵၢင်ၼႂ်ၶၢဝ်းယၢမ်း 09:45 မူင်းတေႃႇထိုင်ယၢမ်း 11:45 မူင်း ၊ သိုၵ်းမၢၼ်ႈ တင်းတပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ် တီႈတၢင်းၵုင်းမႆႉႁႆးလူင် ၵိဝ်ႇမီတၢႆ ၊ ဢၼ်မီးၾၢႆႇတူၵ်းဝၢၼ်ႈသေႃႉ (ၵႄႈၵၢင်ဝၢၼ်ႈသေႃႉတင်းမိူင်းဢၢၵ်ႇ) ဢိူင်ႇဝၢၼ်ႈသေႃႉ ၸႄႈဝဵင်းမိူင်းသူႈ။ ပၢင်တိုၵ်းပွၵ်ႈၵမ်းၼႆႉ ပဵၼ်ပၢင်တိုၵ်းၵၼ်ႁၢဝ်ႈႁႅင်းလႄႈ  ၾၢႆႇသိုၵ်းမၢၼ်ႈဢဝ်ႁိူဝ်းဝိၼ်တိုၵ်းသိုၵ်း ၵျႅတ်ႊ 3 လမ်း မႃးတိုၵ်းယိုဝ်းၸွႆႈ တေႃႇပေႃးထိုင်ယၢမ်း 12:45 မူင်း - ၽူႈမီးၸၼ်ႉ ၼႂ်း SSPP/SSA ၸဝ်ႈၼိုင်ႈလၢတ်ႈ ။


သိုပ်ႇလၢတ်ႈထႅင်ႈဝႃႈ - မိူဝ်ႈဝၼ်းတီႈ 14/11/2015 ၼၼ်ႉၵူၺ်းၼင်ႇၵဝ်ႇ ၊ ႁူဝ်ၶမ်ႈယၢမ်း 16:15 မူင်းၼၼ်ႉ သိုၵ်းမၢၼ်ႈဢဝ်ႁိူဝ်းဝိၼ်မႅင်းမီႈ ထႅင်ႈ 2 လမ်း မႃးယိုဝ်းတပ်ႉသိုၵ်းၸိုင်ႈတႆးထႅင်ႈ ပွတ်းဝၢၼ်ႈသေႃႉ တေႃႇပေႃးထိုင်ယၢမ်း 16:40 မူင်း - ဝႃႈၼႆ ။


ဢၼ်ပဵၼ်ပၢင်တိုၵ်းၵၼ် ပွၵ်ႈၵမ်းၼႆႉ ၾၢႆႇတပ်ႉသိုၵ်းၸိုင်ႈတႆး ႁုပ်ႈယိုတ်းလႆႈၵွင်ႈ M1 ၼိုင်ႈလဝ်းလႄႈ မၢၵ်ႇ RPG ၵမ်ႈၽွင်ႈ ၊ မၢၵ်ႇၵွင်ႈ M1 တင်းမၢၵ်ႇ 79 ၵမ်ႈၽွင်ႈ ။ ၾၢႆႇတပ်ႉသိုၵ်းၸိုင်ႈတႆး ဝၢတ်ႇၸဵပ်းဢိတ်းဢွတ်း ၊ ဢမ်ႇမီးလွင်ႈလူႉတၢႆ ၊ ၾၢႆႇသိုၵ်းမၢၼ်ႈမီးလွင်ႈလူႉတၢႆသေတႃႉ ၵူၺ်းၵႃႈ ၼမ်ဢေႇၵႃႈႁိုဝ်ၼၼ်ႉ ဢမ်ႇလႆႈႁူႉၸွမ်း - ဝႃႈၼႆ ။


မိူဝ်ႈဝၼ်းတီႈ 15/11/2015 ၼၼ်ႉၵေႃႈ တင်ႈတႄႇၵၢင်ၼႂ်ယၢမ်း 10:25 တေႃႇထိုင် 12:30 မူင်း ၊ သိုၵ်းမၢၼ်ႈယူႇတီႈ တပ်ႉၼမ်ႉမွၼ်းသေ ယိုဝ်းမၢၵ်ႇလူင်သႂ်ႇတီႈလွႆယူႇ ဢၼ်မီးႁိမ်းမိူင်းဢၢၵ်ႇ ဢိူင်ႇဝၢၼ်ႈသေႃႉ - ၸၼ်ႉၶုၼ်သိုၵ်းၵေႃႉၼိုင်ႈ ၼႂ်း SSPP/SSA လၢတ်ႈ ။


ယွၼ်ႉၾၢႆႇတပ်ႉသိုၵ်းမၢၼ်ႈ ဢဝ်ႁႅင်းသိုၵ်းၼပ်ႉႁဵင် ၽိုတ်ႉၶဝ်ႈၸူးဢိူမ်ႈၸမ် ငဝ်ႈငုၼ်းဝၢၼ်ႈႁႆးလႄႈ ဢၼ်သွင်ၾၢႆႇလႆႈပဵၼ်ပၢင်တိုၵ်းၵၼ်မႃး ၶၢဝ်းတၢင်းတင်ႈတႄႇႁူဝ်လိူၼ် ဢွၵ်ႊထူဝ်ႊၿိူဝ်ႊ တေႃႇထိုင် ၼႂ်းလိူၼ်ၼူဝ်ႊဝႅမ်ႊၿိူဝ်ႊ (2015) ၼႆႉ မီးၵူၼ်းဝၢၼ်ႈၵူၼ်းမိူင်းမိုၼ်ႇပၢႆ ထူပ်းၽေးသိုၵ်းသိူဝ် လႆႈပၢႆႈယၢၼ်ႁိူၼ်းယေး ၵႂႃႇယူႇသဝ်းပိုင်ႈဢိင်ၸွမ်းလၢႆဝၢၼ်ႈလၢႆဝဵင်း ၼႂ်းမိူင်းတႆး ၊ ၵမ်ႈၼမ်လႆႈပိုင်ႈဢိင်ယူႇသဝ်း ၸွမ်းဝတ်ႉ(ၵျွင်း) မုၼ်ၸဝ်ႈ ၊ ၵမ်ႈၽွင်ႈပိုင်ႈဢိင်ယူႇသဝ်းၸွမ်း ပီႈၽႂ်ၼွင်ႉမၼ်း ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ မီးၶေႃႈလႆႈၸႂ်ဝႃႈ ပေႃးဢမ်ႇပႃး ၵူႈမူႇၵူႈၸုမ်း ၶဝ်ႈပႃးလူင်းလၢႆးမိုဝ်းၸိုင် ပႆႇတူဝ်ႈတၼ်း တႃႇတေလူင်းလၢႆးမိုဝ်း လိၵ်ႈၵိၼ်ၵႅၼ်ႇၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) သေတႃႉၵေႃႈ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်း ၵေႃႇသၢင်ႈလွင်ႈငမ်းယဵၼ် တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ပူၼ်ႉမႃးမိူဝ်ႈဝၼ်းတီႈ 28/01/2012 ။