ၼေႃႇၽူႈတႅၼ်းၸႄႈဝဵင်းမိူင်းပဵင်း 12 ႁူမ်ႈၵၼ်တႅမ်ႇလိၵ်ႈတင်ႇထိုင် တီႈငဝ်ႈလုမ်းၶွမ်ႊမသျိၼ်ႊ ပၢင်လိူၵ်ႈတင်ႈ ယွၼ်ႉဢမ်ႇၽဵင်ႇပဵင်း ဢမ်ႇပဵၼ်ထမ်း ၼေႃႇၽူႈတႅၼ်းသၽႃးၵူၼ်းမိူင်းပဵင်း လၢတ်ႈ ။

ဝၼ်တီႈ 10/11/2015 ၼေႃႇၽူႈတႅၼ်းၸႄႈဝဵင်းမိူင်းပဵင်း ၸႄႈတွၼ်ႈၵဵင်းတုင် ၸိုင်ႈတႆး ပွတ်းဢွၵ်ႇၶူင်း ႁူမ်ႈၵၼ် 12 ၵေႃႉ တႅမ်ႈလိၵ်ႈတင်ႇထိုင် လုမ်းၶွမ်ႊသျိၼ်ႊပၢင်လိူၵ်ႈတင်ႈ တီႈၼေႇပျီႊတေႃႇ 5 ၶေႃႈ ယွၼ်ႉဢမ်ႇမီးလွင်ႈၽဵင်ႇပဵင်းပဵၼ်ထမ်း ၸဝ်ႈၼႃႈတီႈၶွမ်ႊမသျိၼ်ႊ ၸႄႈဝဵင်းမိူင်းပဵင်းဢမ်ႇႁဵတ်းၸွမ်း ပၵ်းပိူင် ဢၼ်တမ်းဝၢင်းဝႆႉ ၸိူဝ်ႉၼၼ်ႉ ၼႆယဝ်ႉ ။


ၼၢင်းၼူၼ်း ၼေႃႇၽူႈတႅၼ်းသၽႃးၵူၼ်းမိူင်း ဝဵင်းမိူင်းပဵင်းလၢတ်ႈဝႃႈ ႁဝ်းၶႃႈ ၼေႃႇၽူႈတႅၼ်း ဢမ်ႇလူင်းလၢႆးမိုဝ်း ယွမ်းႁပ်ႉၶႅပ်းၵၢင်ၸႂ်  မိူဝ်ႈဝၼ်းတီႈ 9/11/2015 ၶၢဝ်းယၢမ်း 20.35 ၼႃးတီးၼၼ်ႉ ၵူၼ်းႁဵတ်းၵၢၼ်ၸႄႈဝဵင်းမိူင်းပဵင်းၼႆႉ ၶဝ်ဢမ်ႇႁဵတ်းၵၢၼ်တီႈၼႂ်းလုမ်း ၶဝ်သမ်ႉၶိုၼ်ႈၵႂႃႇႁဵတ်းၵၢၼ်ႈတီႈ ၽူႈၵွၼ်းၸႄႈဝဵင်း မိူင်းပဵင်း ၵႂႃႇလၵ်ႉလွမ်ႁဵတ်းၵၢၼ်ဢၼ်ၼႆႉ မၼ်းဢမ်ႇပဵၼ်ပၢင်လိူၵ်ႈတင်ႈသိုဝ်ႈယူဝ်း ဝႃႈၼႆ ။


ၼေႃႇၽူႈတႅၼ်း 12 ၵေႃႉၼႆႉ 1.  ပႃႊတီႊႁူဝ်သိူဝ် 3 ၵေႃႉ ၊ 2. ပႃႊတီႊသိူဝ်ၽိူၵ်ႇ 3 ၵေႃႉ ၊ 3. ပႃႊတီႊလႃးႁူႇ 3 ၵေႃႉ ၊ ပႃႊတီႊၼူၵ်းယုင်း 3 ၵေႃႉ  ႁူမ်ႈၵၼ်လူင်းလၢႆးမိုဝ်း ဝႃႈလွင်ႈဢၼ်ၼႆႉ ႁဝ်းဢမ်ႇယုမ်ႇယမ် ၸင်ႇလူင်းၸႅင်ႈထိုင်တီႈလုမ်းၶွမ်ႊမသျိၼ်ႊ ပၢင်လိူၵ်ႈတင်ႈ ၼႆယဝ် ။


ၼႂ်းလိၵ်ႈဢၼ်တင်ႇထိုင်တီႈၶွမ်ႊမသျိၼ်ႊပၢင်လိူၵ်ႈတင်ႈ 5 ၶေႃႈၼၼ်ႉ -

1. လွင်ႈၵႂႃႇဢဝ်ၶႅပ်းၵၢင်ၸႂ်လူင်ႈၼႃႈၼႆႉ မၼ်းဢမ်ႇမႅၼ်ႈၸွမ်းလွၵ်းလၢႆးဢၼ်ၶဝ်တႅမ်ႈဝႆႉ ၼႂ်းမၢႆမီႈၸိူဝ်းၼၼ်ႉ ။ ဢၼ်ၶဝ်တႅမ်ႈဝႆႉၸိူဝ်းၼၼ်ႉ ပေႃးဝႃႈ ၵႂႃႇဢဝ်ၶႅပ်းၵၢင်ၸႂ် တေလႆႈႁွင်ႉပႃး ၵူႈပႃႊတီႊ ၊ ၽူႈတင်တူဝ်ၵူႈပႃႊတီႊၵႂႃႇတူၺ်းၸွမ်း ၶဝ်ဢမ်ႇႁဵတ်းၸွမ်း။ တီႈဝၢၼ်ႈပၢင်ဝၢႆ ၶႅပ်းၵၢင်ၸႂ် 4 ၶႅပ်း ။ တီႈတူင်ႈတႃႈ တပ်ႉ 293 ၼၼ်ႉ ဢမ်ႇႁွင်ႉၽႂ်သေ ၵႂႃႇဢဝ်မႃးၸိူဝ်ႉၼၼ်ႉ ၊ တီႈတပ်ႉ ၶလယ 43 ၶႅပ်းၵၢင်ၸႂ် 566 ၶႅပ်း ၼၼ်ႉၵေႃႈ လၢႆးမိုဝ်းတူပ်ႉ ဢမ်ႇမိူၼ်ပိူင်မၼ်း ၸဵမ်ၸိူဝ်ႉၼႆႉ ။


2. ပွၵ်ႉၵၢင် ဝဵင်းမိူင်းပဵင်း ႁူင်းမၢႆ(4) ၶႅပ်းၵၢင်ၸႂ်လူင်ႈၼႃႈ 84 ၶႅပ်းၼၼ်ႉ ပဵၼ်ၶႅပ်းပဝ်ႇ (ပလႃႇ) ၸိူဝ်ႉၼႆႉ ၶဝ်ဢဝ်သွၼ်ႇပႃးဝႆႉ ။


3. ၼေႃႇၽူႈတႅၼ်းၵေႃႉလႂ် လႆႈၶႅပ်းၵၢင်ၸႂ်ၵႃႈႁိုဝ် တေလႆႈထႅမ်ၼႂ်းၾွမ်ႊ 16 ။ ၵူၺ်းၵႃႈ ၶဝ်ဢဝ်ၵမ်ႁႅင်ႈသေထႅမ် ဝၢႆးမႃးၶဝ်သမ်ႉသႂ်ႇၼႂ်းထူင်လိၵ်ႈသေဢဝ်မႃး ၸိူဝ်ႉၼႆႉ ဢမ်ႇမႅၼ်ႈၸွမ်းလၢႆးမၼ်း ။


4. ႁူင်းတွတ်ႈၶႅပ်း တီႈဝၢၼ်ႈမိူင်းမၢင်း ႁူင်းတွတ်ႈၶႅပ်းၼၼ်ႉ ပီႈၼွင်ႉတႆး ဝၢၼ်ႈလူင် 42 ၼၼ်ႉ တေၵႂႃႇတွတ်ႈၶႅပ်းၵၢင်ၸႂ်ၼႆလႄႈ သမ်ႉဝႃႈဝႂ်တွတ်ႈၶႅပ်းၵၢင်ၸႂ်သဵင်ႈၵႂႃႇယဝ်ႉၼႆ ဢမ်ႇပၼ်သႂ်ႇ ၼႆၵေႃႉ ပဵၼ်လွင်ႈတင်းဢၼ်ၼိုင်ႈ ။ ၾွမ်ႊ 16 ၼႆႉပေႃးဝႃႈတေမႃးပိုတ်ႇတူၺ်း ထူင်လိၵ်ႈမၼ်းၸိူင် ၶဝ်တေလႆႈႁွင်ႉပႃးၼေႃႇၽူႈတႅၼ်းတူၺ်းသေ ထႅမ်သေတႅမ်ႈ ၶဝ်ဢမ်ႇႁွင်ႉၼေႃႇၽူႈတႅၼ်း ။


5. မိူဝ်ႈဝၼ်းတီႈ 9/11/2015 ၶၢဝ်းယၢမ်း 20:35 ၼၼ်ႉ ၵူၼ်းႁဵတ်းၵၢၼ်ၼႂ်းလုမ်းႁူင်းတွတ်ႈၶႅပ်းၵၢင်ၸႂ် ဝဵင်းမိူင်းပဵင်းၼႆႉ ၶဝ်ဢဝ်ၶိူင်ႈၶူဝ်းသေ ၵႂႃႇႁဵတ်းၵၢၼ်တီႈလုမ်းၽူႈၵွၼ်းဢုပ်ႉပိူင်ၸႄႈဝဵင်းမိူင်းပဵင်း ၶဝ်ၶိုၼ်ႈၵႂႃႇၼိူဝ်ၼၼ်ႉသေ လၵ်ႉလွမ်ႁဵတ်းႁၢင်းၵူၺ်းၼႆ မၼ်းဢမ်ႇသိုဝ်ႈယူဝ်း ၸဵမ်ၸိူဝ်ႉၼႆႉ ။