ပီမႂ်ႇတႆး 2110 လိူၼ်ၸဵင်မႂ်ႇ 1 ၶမ်ႈ ဝၼ်းတီႈ 11/12/2015 ႁႃႉ ဢမ်ႇၼၼ် 12/12/2015 ဝၼ်းလိူၼ်ၸဵင်မႂ်ႇ 1 ၶမ်ႈ ပီတႆး 2110 ဢၼ်တေထိုင်ၼႆႉ ႁဝ်းၶႃႈ ၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႆႇ (ၸိုင်ႈထႆး) ဢိၵ်ႇတင်းပီႈၼွင်ႉတႆး ၸိူဝ်းယူႇသၢင်ႈသဝ်းထင် ၼႂ်းမိူင်းၸိုင်ႈထႆး ယၢမ်းလဵဝ် ဢၼ်ၸႂ်ႉတိုဝ်းၸွမ်းပၵ်းယဵမ်ႈဝၼ်း ၸိုင်ႈထႆးၼႆၸိုင် လိူၼ်ၸဵင်မႂ်ႇ 1 ၶမ်ႈ တေတူၵ်းမႅၼ်ႈ ဝၼ်းတီႈ 11/12/2015 ။

ၵူၺ်းၵႃႈ ပီႈၼွင်ႉတႆး ၸိူဝ်းယူႇသဝ်းၼႂ်းမိူင်းၸိုင်ႈတႆး ဢၼ်ၸႂ်ႉတိုဝ်းၸွမ်း ပၵ်းယဵမ်ႈဝၼ်း ၵေႃလိၵ်ႈလၢႆးလႄႈၾိင်ႈငႄႈတႆး ၼႂ်းၸိုင်ႈတႆး ၼၼ်ႉ လိူၼ်ၸဵင်မႂ်ႇ 1 ၶမ်ႈ တေတူၵ်းမႅၼ်ႈ ဝၼ်းတီႈ 12/12/2015 (ပေႃးတူၺ်းပၵ်းယဵမ်ႈဝၼ်းမၢၼ်ႈၶဝ်ၵေႃႈ တေမိူၼ်ၼၼ်) ။


မၼ်းပိူင်ႈၵၼ် 1 ဝၼ်းၼၼ်ႉ ယွၼ်ႉပိူဝ်ႈသင်ၼႆလႄႈ ၸင်ႇလႆႈဢဝ် ပၵ်းယဵမ်ႈဝၼ်းမိူင်းထႆး တင်း မိူင်းတႆး လႄႈပၵ်းယဵမ်ႈဝၼ်းမၢၼ်ႈ မႃးတႅၵ်ႈၵၼ်တူၺ်း တေလႆႈႁၼ်တီႈဢၼ် ပိူင်ႈၵၼ် ၼင်ႇတီႈတႂ်ႈၼႆႉ ပၵ်းယဵမ်ႈဝၼ်းၸိုင်ႈထႆး ၼႂ်းပီ 2015 ၼႆႉလိူၼ်ၸဵတ်းလပ်း ပဵၼ်လိူၼ်ၸဵတ်းလွင်ႈ 14 ၶမ်ႈ၊ ပၵ်းယဵမ်ႈဝၼ်းမၢၼ်ႈ လႄႈ ၵေႃလိၵ်ႈလၢႆးၼႂ်းၸိုင်ႈတႆး ၼႂ်းပီ 2015 ၼႆႉ လိူၼ်ၸဵတ်းလပ်း ပဵၼ် လိူၼ်ၸဵတ်းလွင်ႈ 15 ၶမ်ႈ ။


ပေႃးတူၺ်းၶိုၼ်းပၵ်းယဵမ်းဝၼ်း မၢၼ်ႈ လႄႈ ၵေႃလိၵ်ႈလၢႆးၼႂ်းၸိုင်ႈတႆး ၼႂ်းပီ 2014 ပူၼ်ႉမႃး တေလႆႈႁၼ်ဝႃႈ လိူၼ်ၸဵတ်းလပ်း မႅၼ်ႈလိူၼ်ၸဵတ်းလွင်ႈ 14 ၶမ်ႈ ၊ သမ်ႉသိုပ်ႇႁူၼ်လင်တူၺ်းထႅင်ႈ ၼႂ်းပီ 2013 ၵေႃႈ တေလႆႈႁၼ် လိူၼ်ၸဵတ်းလပ်း မႅၼ်ႈလိူၼ်ၸဵတ်းလွင်ႈ 14 ၶမ်ႈ ၼင်ႇၵဝ်ႇ ။


ပေႃးမႃးၶပ်ႉတၢမ်းၵၼ်တူၺ်းၼႆ တေလႆႈႁၼ်ၼင်ႇတႂ်ႈၼႆႉ

ပီ 2013 လိူၼ်ၸဵတ်းလပ်း မႅၼ်ႈလိူၼ်ၸဵတ်းလွင်ႈ 14 ၶမ်ႈ ( မိူၼ်ၵၼ်တင်း ပၵ်းယဵမ်ႈဝၼ်းၸိုင်ႈထႆး )

ပီ 2014 လိူၼ်ၸဵတ်းလပ်း မႅၼ်ႈလိူၼ်ၸဵတ်းလွင်ႈ 14 ၶမ်ႈ ( မိူၼ်ၵၼ်တင်း ပၵ်းယဵမ်ႈဝၼ်းၸိုင်ႈထႆး )

ပီ 2015 လိူၼ်ၸဵတ်းလပ်း မႅၼ်ႈလိူၼ်ၸဵတ်းလွင်ႈ 15 ၶမ်ႈ ( ပိူင်ႈၵၼ်တင်း ပၵ်းယဵမ်ႈဝၼ်းၸိုင်ႈထႆး 1 ဝၼ်း )


ၸွမ်းၼင်ႇ ဢၼ်ယၢမ်ႈငိၼ်းၵႂၢမ်း ၵူၼ်းထဝ်ႈဝႃႈ လိူၼ်ၵူပ်ႉလပ်းၵိၵ်ႈ ၊ လိူၼ်ၵိၵ်ႈလပ်းၵူပ်ႉ ၼႆလႄႈ  ပၵ်းယဵမ်ႈဝၼ်းၵေႃလိၵ်ႈလၢႆး ၼႂ်းၸိုင်ႈတႆး ႁဝ်းၶႃႈ ပီ 2015 ၼႆႉလိူၼ်ၸဵတ်းသမ်ႉလပ်းၵိၵ်ႈ ပဵၼ် လပ်း 15 ၶမ်ႈ ဢၼ်ၼႆႉပဵၼ်လၢႆးၼပ်ႉတႆး ဢၼ်ပႅၵ်ႇပိူင်ႈၵၼ် တင်းပီႈၼွင်ႉထႆး ၵႂႃႇယဝ်ႉ ။


ဢၼ်လၢတ်ႈမႃးပႃႈၼိူဝ်ၼႆႉ ၼင်ႇႁိုဝ်ႁဝ်းၶႃႈ ပီႈၼွင်ႉတႆး ၸဵမ်ၼႂ်းမိူင်း ၼွၵ်ႈမိူင်းတင်းသဵင်ႈ တေလႆႈႁပ်ႉၸဵင်မႅၼ်ႈ ဝၼ်းလဵဝ်ၵၼ်ၼၼ်ႉလႄႈ ၸင်ႇလႆႈယွၼ်းပိုင်ႈၸဝ်ႈပၢႆးႁူႉၶူးမေႃ ဢၼ်လူင်ႉလႅၼ်ႇ လွင်ႈပၵ်းယဵမ်ႈဝၼ်းတႆးႁဝ်းၶႃႈ တင်းသဵင်ႈဢွၵ်ႇမႃးပိုတ်ႇ ငိူၼ်ႈငဝ်ႈပိူင်ပဵၼ်ဢၼ် ထုၵ်ႇမႅၼ်ႈပၼ် ႁဝ်းၶႃႈၸိူဝ်းလုၵ်ႈလၢၼ်လိၼ်လဵၼ် ပေႃးလႆႈလူင်ႉလႅင်းပွင်ႇပိုင်ႈသေၵမ်း တုၵ်းယွၼ်းၼင်ႇၼႆ ။


တီႈႁပ်ႉတၢင်းႁၼ်ထိုင်လႄႈၶေႃႈသပ်းၸႅင်ႈ

e-mail: seangtai@gmail.com

facebook : Tai Culture Chiangmai