ၵူၼ်းၼုမ်ႇ ၼႂ်းဝဵင်းသီႇပေႃႉ ၸတ်းႁဵတ်းပၢင် ၽဝ်ယႃႈမဝ်းၵမ် ပွၵ်ႈၵမ်း 2 ၽူႈယႂ်ႇၵူၼ်းလူင်သင်ႇ ၶၸဝ်ႈ ၊ သိုၵ်း ၊ ပႃႊတီႊၵၢၼ်မိူင်း ၊ ပေႃႈမႄႈၵူၼ်းမိူင်းလႄႈ ၵူၼ်းၼုမ်ႇၶဝ်ႈႁူမ်ႈ 500 ၵေႃႉပၢႆ ။

ပၢင်ၽဝ်ယႃႈမဝ်းၵမ်ၼႆႉ ၸတ်းႁဵတ်းၵႂႃႇ မိူဝ်ႈဝၼ်းတီႈ 03/10/2015 ၸုမ်းၵေႃႁူမ်ႈသၢင်ႈၵူၼ်း ၼုမ်ႇတႆးဢိူင်ႇသီထွတ်ႈ ၸႄႈဝဵင်းသီႇပေႃႉ ဢွၼ်ႁူဝ်ၼမ်းၼႃႈ ၸတ်းႁဵတ်းၵႃႇတီႈဝတ်ႉ (ၵျွင်း) လူင်ြသႃႇၸဝ်ႈၵွင်းႁုင်းဢိူင်ႇသီထွတ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။

ၸဝ်ႈႁၢၼ်ၸူမ်းၶိူဝ်း ၽူႈၸတ်းၵၢၼ်ႁွင်ႈလုမ်းၾၢႆႇၽွင်းငမ်း တပ်ႉသိုၵ်းၵူၼ်းမိူင်း မိူင်းၶိူဝ်း လၢတ်ႈဝႃႈ - “ ၵၢၼ်ၽဵဝ်ႈမူၺ်ႉယႃႈမဝ်းၵမ်ၼႆႉ တိုၼ်းထုၵ်ႇလီသိုပ်ႇႁဵတ်းၵႂႃႇ တိၵ်းတိၵ်းသင်ဝႃႈ ၶႂ်ႈလႆႈတၢင်းၸွႆႈထႅမ် ၸိူင်ႉႁိုဝ်ၼႆၵေႃႈ ၾၢႆႇတပ်ႉၸုမ်းႁဝ်းၶႃႈ ၸူမ်းသိူဝ်းတႃႇၸွႆးထႅမ်ယူႇ ။ ၾၢႆႇတပ်ႉၸုမ်းႁဝ်းၶႃႈ ၵေႃႈတိုၼ်းတေသိုပ်ႇၵႂၢတ်ႇ ၽဵဝ်ႈမူၺ်ႉၵႂႃႇ ” - ဝႃႈၼႆ ။

ၵဵဝ်ႇၵပ်းလွင်ႈ ၽဝ်ယႃႈမဝ်းၵမ်ၼႆႉ ယွၼ်ႉပိူဝ်ႈမိူဝ်ႈပူၼ်ႉမႃး လႆႈတီႉၺွပ်းၵူၼ်းၵႃႉၶၢႆ 10 ၵေႃႉပၢႆၵူၼ်းၸပ်းယႃႈ 5-6 ၵေႃႉသေ ယိုတ်းလႆႈယႃႈမဝ်းၵမ် မွၵ်ႈငိုၼ်းႁူဝ်သိပ်းသႅၼ် ၼႆယဝ်ႉ ။

ၼၢင်းမွၼ်းၶိူဝ်း ၵူၼ်းၼုမ်ႇၼႂ်းဢိူင်ႇသီထွတ်ႈ လၢတ်ႈဝႃႈ - “ ယႃႈမဝ်းၼႆႉ ပဵၼ်ၽေးတႃႇ သႅၼ်းႁုၼ်ႈမႂ်ႇႁဝ်းတႄႉတႄႉ ၊ ယွၼ်ႉၽေးၶဵၼ် ယႃႈမဝ်းၵမ်ၼႆႉသေ မီးလိၼ်လႆႈၶၢႆၽၢတ်ႇ ၊ မီးႁိူၼ်းယေးလႆႈယၢၼ်ၽၢတ်ႇ ၊ တႃႇၵၢၼ်ႁဵၼ်းသွၼ်လိၵ်ႈလၢႆး ၾိင်ႈငႄႈၾိင်ႈထုင်း ၸိူဝ်ႉၶိူဝ်းၸဝ်ႈၵဝ်ႇ ၵေႃႈလူင်လိုမ်းယွၼ်ႉၸပ်းတိတ်း ယႃႈမဝ်းၵမ် ” - ဝႃႈၼႆ ။

ၸၢႆးၵႃႇလိင်ႇ ၽူႈၵွၼ်းဢိူင်ႇသီထွတ်ႈ လၢတ်ႈဝႃႈ - “ ႁဝ်းၶႃႈၵူၼ်းမိူင်းတႄႉ ဝူၼ်ႉတႃႇလုၵ်ႈလၢၼ် သႅၼ်းႁုၼ်ႈမႂ်ႇႁဝ်းၶႃႈလႄႈ ႁႂ်ႈလႆႈႁူမ်ႈမိုဝ်းၵၼ်တင်း တပ်ႉသိုၵ်ႉၵူၼ်းမိူင်း ၊ တပ်ႉသိုၵ်းတင်းသဵင်ႈသေ ၽဵဝ်ႈမူၺ်ႉယႃႈမဝ်းၵမ်ၼၼ်ႉယူႇ ” - ဝႃႈၼႆ ။

ၸုမ်းၵူၼ်းၼုမ်ႇ ဢိူင်ႇသီထွတ်ႈၼႆႉ မိူဝ်ႈပူၼ်ႉမႃး ဝၼ်းတီႈ 25/3/2015 ၼၼ်ႉ ၵေႃႈလႆႈၸတ်းႁဵတ်း ပၢင်ၽဝ်ယႃႈမဝ်းၵမ် ယဝ်ႉပွၵ်ႈၼိုင်ႈ ၊ ပွၵ်ႈၼႆႉပဵၼ်ပွၵ်ႈတီႈ 2 သေ မိူဝ်ႈၼႃႈမႃးၵေႃႈ တေသိုပ်ႇႁဵတ်းၵႂႃႇယူႇ ဝႃႈၼႆ ။