သဵၼ်ႈၸိုဝ်ႈ ၼေႃႇၽူႈတႅၼ်း ပႃႊတီႊ သိူဝ်ၽိူၵ်ႇ (SNDP) 2 ၵေႃႉ ၸႄႈဝဵင်း သီႇသႅင်ႇ တင်းပၢင်လွင်း ထုၵ်ႇ ၶွမ်ႊမသျိၼ်ႊ ပၢင်လိူၵ်ႈတင်ႈၶဝ် ပူတ်းပၢၵ်ႈပႅတ်ႈ ။ ဢိင်ဢၢင်ႈဝႃႈ ဢႃယု ပႆႇတဵမ် ။

ၵဵဝ်ႇၵပ်း လွင်ႈၼႆႉ ၾၢႆႇ ပႃႊတီႊ သိူဝ်ၽိူၵ်ႇ ႁိုဝ် ၻီႊမူဝ်ႊ ၶရႅတ်ႊတိၵ်ႊ ပႃႊတီႊ ၸၢဝ်းၶိူဝ်းတႆး (SNDP) လၢတ်ႈဝႃႈ - သဵၼ်ႈၸိုဝ်ႈၶဝ် 2 ၵေႃႉၼႆႉ ပဵၼ် ၼေႃႇၽူႈတႅၼ်း ၸႄႈဝဵင်း သီႇသႅင်ႇ တင်းၸႄႈဝဵင်း ပၢင်လွင်း ၸိုင်ႈတႆး ပွတ်းၸၢၼ်း ၊ တေၶဝ်ႈ ၶေႉၶႅင်ႇ လိူၵ်ႈတင်ႈ ၽွင်းတႅၼ်း သၽႃး ၸႄႈမိူင်း ၊ ႁဝ်းၶႃႈ လၢမ်းၶၢတ်ႈၵႂႃႇဝႃႈ ပေႃးထိုင် ၶၢဝ်းလိူၵ်ႈတင်ႈၼႆႉ ဢႃယု ၶဝ်တေတဵမ် 30 ယဝ်ႉ ၼႆသေသႂ်ႇၵႂႃႇ ။ ၵူၺ်းၵႃႈ ၾၢႆႇၶွမ်ႊမသျိၼ်ႊ ၵၢၼ်လိူၵ်ႈတင်ႈ လၢတ်ႈမႃးဝႃႈ ဢႃယုဢမ်ႇတဵမ် 30 ၼႆသေ ပူတ်းလူင်းပႅတ်ႈ ၸိုဝ်ႈသဵင်ၶဝ် ။


လွင်ႈၼႆႉ တေၵႂႃႇ ၸွပ်ႇထၢမ်တူၺ်း ၶိုၼ်းယူႇ ၊ ပဵၼ်ယွၼ်ႉပိူဝ်ႈ ၶဝ်ဢမ်ႇ ထတ်းတူၺ်း လီလီႁိုဝ် ၊ ဢမ်ႇၼၼ်ၵေႃႈ ဢႃယု တေလႆႈတဵမ် 30 ၵွၼ်ႇၼႃႈ လိူၵ်ႈတင်ႈႁိုဝ် ၊ ၸိူဝ်းၼႆႉ ၾၢႆႇၶွမ်ႊမသျိၼ်ႊ ၵၢၼ်လိူၵ်ႈတင်ႈ တွပ်ႇလၢတ်ႈ မႃးၵေႃႈ ဢမ်ႇပေႃး တႅတ်ႈတေႃး ။ ၵွပ်ႈၼႆ ယူႇတီႈ ပႃႊတီႊ သိူဝ်ၽိူၵ်ႇသေ တေၸွပ်ႇ ထၢမ်ၵႂႃႇထႅင်ႈယူႇ - ၸၢႆးလႃႉၵျေႃႇ ၽူႈၼမ်းၼႂ်း ပႃႊတီႊ သိူဝ်ၽိူၵ်ႇ လၢတ်ႈ ။


တွၼ်ႈတႃႇ ပၢင်လိူၵ်ႈတင်ႈ ဢၼ်တေ ၸတ်းႁဵတ်းၼႂ်း လိူၼ် ၼူဝ်ႊဝႅမ်ႊၿိူဝ်ႊ (2015) တေမႃးၼႆႉ ယူႇတီႈ ၶွမ်ႊမသျိၼ်ႊ ၵၢၼ်လိူၵ်ႈတင်ႈသေ လႆႈထတ်း ထွင်တူၺ်း သဵၼ်ႈမၢႆ ၼေႃႇ ၽူႈတႅၼ်းၶဝ် ။ ဢၼ် ထတ်းတူၺ်း ၼႂ်းလိူၼ် ဢေႃႊၵတ်ႊသ် လႄႈတင်း ႁူဝ်လိူၼ် သႅပ်ႊထႅမ်ႊၿိူဝ်ႊ ၼႆႉၵူၺ်း ၼႂ်းၸိုင်ႈမိူင်း ႁူမ်ႈတုမ် မၢၼ်ႈပတ်းပိုၼ်ႉ မီးၼႆႉ လႆႈပၢၵ်ႈပႅတ်ႈ ၸိုဝ်ႈသဵင် ၼေႃႇၽူႈတႅၼ်း ၵႂႃႇယဝ်ႉ 88 ၵေႃႉ - ႁူဝ်ပဝ်ႈ ၶွမ်ႊမသျိၼ်ႊ ပၢင်လိူၵ်ႈတင်ႈ ဢူးတိၼ်ႇဢေး ဢွၵ်ႇမႃး လၢတ်ႈၼႄ ၽူႈသိုဝ်ႇၶၢဝ်ႇၶဝ် မိူဝ်ႈဝၼ်းတီႈ 01/09/2015 (မိူဝ်ႈဝႃး) ၼင်ႇၼႆ ။


ယူႇတီႈ ၶွမ်ႊမသျိၼ်ႊ ၵၢၼ်လိူၵ်ႈတင်ႈ ၸိုင်ႈမိူင်း ႁူမ်ႈတုမ် ပိုၼ်ၽၢဝ်ႇ ဝၼ်းတီႈ 01/09/2015 တင်းမူတ်း 4 ၶေႃႈ ။ ၼႂ်းၼႆႉ ပႃးဝႃႈ ဝၼ်းတီႈ 14/09/2015 ၼႆႉ တေတိတ်း သဵၼ်ႈၸိုဝ်ႈ ၽူႈမီးသုၼ်ႇလႆႈ တွတ်ႈ ၶႅပ်းၵၢင်ၸႂ် ၊ ႁႂ်ႈ ၵူၼ်းဝၢၼ်ႈ ၵူၼ်းမိူင်း ဢွၼ်ၵၼ် ၵႂႃႇတူၺ်း သဵၼ်ႈၸိုဝ်ႈ ၽႂ်မၼ်း ၊ ပေႃး ဢမ်ႇပႃး သဵၼ်ႈၸိုဝ်ႈၸိုင် ႁႂ်ႈတၢင်ႇ ယိုၼ်ႈၶိုၼ်း ဝႅပ်ႊၾွမ်ႊ 3  တီႈ ၶွမ်ႊမသျိၼ်ႊ ပၢင်လိူၵ်ႈတင်ႈ ၼႂ်းပွၵ်ႉယွမ်ႇ ၸႄႈဝဵင်း တီႈၽႂ် တီႈမၼ်း ။ ယူႇတီႈ ၶွမ်ႊမသျိၼ်ႊ ပၢင်လိူၵ်ႈတင်ႈ တေမီး ၵၢၼ်လူင်းမႃး မူၼ်ႉမႄးပၼ် ။ ၼႂ်းၼႃႈလိၼ် ၸၢဝ်းၶိူဝ်း ဢၼ်ၺႃး ၽေးၼမ်ႉၸိူဝ်းၼႆႉၵေႃႈ တေဢွၵ်ႇ ဝၼ်းလဵဝ်ၵၼ် ဝၼ်းတီႈ 14 ၼင်ႇၵဝ်ႇ ။


ၵူၺ်းၵႃႈ ၵူၼ်းထူပ်း ၽေးၼမ်ႉ ထူမ်ႈၸိူဝ်းၼၼ်ႉ သင်ၸိူဝ်ႉဝႃႈ ဢမ်ႇပႃးသဵၼ်ႈၸိုဝ်ႈသေ ၶႂ်ႈမူၼ်ႉမႄး ထႅမ် / ထွၼ် ၶႂ်ႈတၢင်ႇဝႅမ်ႊ ၾွမ်ႊ 3 ဝႅမ်ႊၾွမ်ႊ 4 တႃႇ တေထႅမ် ၸိုဝ်ႈၸဝ်ႈၵဝ်ႇ ၼႆၵေႃႈ တေတူၺ်းငဝ်းလၢႆး တေဢုပ်ႇၵၼ်သေ ထႅမ်ၸိုဝ်ႈ ပၼ်ၶိုၼ်း ။ ပိူဝ်ႈတႃႇ ထႅမ် / ထွၼ်ၸိုဝ်ႈၼၼ်ႉ တေဝႆႉတေႃႇ ထိုင် ဝၼ်းတီႈ 27/09/2015 ၊ ၵူၺ်းၵႃႈ ပေႃးပဵၼ် ၼႃႈလိၼ် ဢၼ် ၼမ်ႉထူမ်ႈတႄႉ တေလိူၼ်ႈ ၶၢႆႉၶၢဝ်းယၢမ်းၵႂႃႇ ထႅင်ႈတၢင်းၼႃႈ ၵေႃႈပဵၼ်လႆႈ - ၼႆယဝ်ႉ ။