မိူင်းထႆး ၊ မိူင်းမၢၼ်ႈ တင်း မိူင်းလၢဝ်း ဢုပ်ႇၵုမ် ပိူဝ်ႈတႃႇ ႁူမ်ႈၵႄႈလိတ်ႈ ပၼ်ႁႃ လွင်ႈ ၵႃႉၶၢႆၵူၼ်း ၸွမ်းလႅၼ်လိၼ် တီႈ ၸႄႈဝဵင်းမိူင်း ၸႄႈတွၼ်ႈ ၵဵင်းႁၢႆး ၸိုင်ႈထႆး ။

မိူဝ်ႈ ဝၼ်းတီႈ 31/08/2015 သိုဝ်ႇၶၢဝ်ႇ ထႆး ပိုၼ်ၽၢဝ်ႇဝႃႈ ႁွင်ႈၵၢၼ် ၾၢႆႇပူၵ်းပွင် တူင်ႇဝူင်း ၵူၼ်းလႄႈ လွင်ႈမၼ်ႈၵိုမ်း ၸႄႈဝဵင်း ၵဵင်းႁၢႆး ၸတ်းႁဵတ်း ပၢင်ၵုမ် လွင်ႈႁူမ်ႈမိုဝ်း ပိူဝ်ႈ ၵႄႈလိတ်ႈ ပၼ်ႁႃ လွင်ႈၵႃႉၶၢႆ ၵူၼ်း မီးၽူႈယႂ်ႇ ၵူၼ်းလူင် ၶဝ်ႈႁူမ်ႈ ဢၼ်လုၵ်ႉမႃး တၢင်းၸႄႈတွၼ်ႈ တႃႈၶီႈလဵၵ်း ၊ မိူင်းပေႃႊၵႅဝ်ႉ ၊ မိူင်း ၵဵင်းႁၢႆး ၽူႈလဵပ်ႈႁဵၼ်း မိူင်းၵျပၢၼ်ႊ (JICA) ဢိၵ်ႇၽူႈၵဵဝ်ႇၶွင်ႈ တင်းသဵင်ႈမီး 80 ၵေႃႉပၢႆ ။


ပရႃႊထိပ်ႉ မုလ်ၽဝ်ႊ တူဝ်တႅၼ်း ႁွင်ႈၵၢၼ် ပူၵ်းပွင် တူင်ႇဝူင်းၵူၼ်း ၸႄႈတွၼ်ႈ ၵဵင်းႁၢႆး လၢတ်ႈဝႃႈ - ပၢင်ၵုမ် လွင်ႈႁူမ်ႈမိုဝ်း ၸၼ်ႉ 3 မိူင်းၼႆႉ လႆႈႁပ်ႉ လွင်ႈႁူမ်ႈမိုဝ်း ၸဝ်ႈၼႃႈတီႈ ၾၢႆႇၵူတ်ႇထတ်း ၵူၼ်းၶဝ်ႈ မိူင်းၵဵင်းႁၢႆး ၊ ၵဵင်းသႅၼ် ၊ ၵဵင်းၶွင် လွင်ႈၵပ်းသၢၼ် ၽူႈၶဝ်ႈႁူမ်ႈ ပၢင်ၵုမ် မိူၼ်ၼင်ႇ ဝဵင်းတႃႈၶီႈလဵၵ်း ( မိူင်းတႆး ) မိူင်းပေႃႊၵႅဝ်ႉ ( မိူင်းလၢဝ်း ) မိူင်းၵဵင်းႁၢႆး ( မိူင်းထႆး ) ဢုပ်ႇဢူဝ်းၵၼ် ၵဵဝ်ႇလူၺ်ႈ ပၼ်ႁႃ လႄႈလွၵ်းလၢႆး ၵႄႈလိတ်ႈ ပၼ်ႁႃ လွင်ႈၵႃႉၶၢႆ ၵူၼ်းၸၼ်ႉ ၸိုင်ႈမိူင်း ၸိူဝ်းၼႆႉ ” ဝႃႈၼႆ ။


ယွၼ်ႉပိူဝ်ႈ ၼႂ်းပီ 2015 ၼႆႉ မိူင်းထႆး ယင်းတိုၵ်ႉ ထုၵ်ႇပၵ်းတႃ တူၺ်းဝႃႈ ပဵၼ်မိူင်းဢၼ် မီးလွင်ႈ ၵႃႉၶၢႆၵူၼ်းယူႇ ။ ၵွပ်ႈၼၼ် ၼင်ႇႁိုဝ် တေမီးလွင်ႈ ႁူမ်ႈမိုဝ်းၵၼ် ၵႄႈလိတ်ႈၼၼ်ႉ သေ ၸင်ႇၸတ်းႁဵတ်း ပၢင်ၵုမ် ဝႃႈၼႆ ။


ဝဵင်း 3 ဝဵင်းၼႆႉ ပဵၼ် ပိုၼ်ႉတီႈ လႅၼ်လိၼ် လႄႈမီး ႁႅင်းၵၢၼ် ယၢၼ်မိူင်း ၶၢမ်ႈၵႂႃႇမႃးၼမ် ၵမ်ႈၽွင်ႈၵေႃႈ ထုၵ်ႇလွၵ်ႇငိုတ်ႈ တဵၵ်းတဵင်း ၊ ၵမ်ႈၽွင်ႈ ၺႃးၺွပ်း ၵႂႃႇၶၢႆ ၸဵမ်ၸိူဝ်းၼႆႉ ။ ၵွပ်ႈၼၼ်လႄႈ ၼင်ႇႁိုဝ် ပၼ်ႁႃလွင်ႈၵႃႉၶၢႆၵူၼ်း တေႁၢႆၵႂႃႇၼၼ်ႉ တေႁူမ်ႈ မိုဝ်းၵၼ်သေ ၵႄႈလိတ်ႈၵႂႃႇ - ဝႃႈၼႆ ။