ၸုမ်း ပႃႊတီႊ ၵွင်ၸႆး ပွတ်းဢွၵ်ႇၶူင်း လူင်းႁူပ်ႉထူပ်း လုၵ်ႈႁဵၼ်း တီႈ ႁူင်းႁဵၼ်း ၶုၼ်ၸွမ်ၾႃႉ ၾၢႆႇပူၵ်းပွင် ၵူၼ်းၼုမ်ႇ ၸိုင်ႈတႆး ဢိူင်ႇလွႆလူင် ဝဵင်းၵဵင်းတုင် ပွတ်းဢွၵ်ႇၶူင်း ။

ပူၼ်ႉမႃး မိူဝ်ႈ ဝၼ်းတီႈ 30/08/2015 ၵၢင်ၼႂ် ၽူႈပွင်ၵၢၼ် ၸုမ်းပႃႊတီႊ ၵွင်ၸႆး ပွတ်းဢွၵ်ႇၶူင်း ႁူပ်ႉထူပ်း လုၵ်ႈႁဵၼ်း တီႈ ႁူင်းႁဵၼ်း ၶုၼ်ၸွမ်ၾႃႉ ၾၢႆႇပူၵ်းပွင် ၵူၼ်းၼုမ်ႇ ၸိုင်ႈတႆး ဢိူင်ႇလွႆလူင် ဝဵင်းၵဵင်းတုင် လႆႈသပ်းလႅင်း လၢတ်ႈၼႄ ပိူင် လိူၵ်ႈတင်ႈ ၵၢၼ်တွတ်ႈ ၶႅပ်းၵၢင်ၸႂ် ၊ ၶေႃႈယိူင်းဢၢၼ်း လွင်ႈပႃႊတီႊ ၵွင်ၸႆးလႄႈ လွင်ႈတိုၵ်းသူၼ်း ၵၢၼ်ၸိူဝ်ႉၸၢတ်ႈ ၼင်ႇႁိုဝ် လုၵ်ႈႁဵၼ်း သႅၼ်းႁုၼ်ႈလင် ပေႃးတေသိုပ်ႇ ယၢင်ႈပႆၸွမ်း ၼႆယဝ်ႉ ။


ၸၢႆးသၢမ်တိပ်ႉသိူဝ် ၵႅမ်ႁူဝ်ပဝ်ႈ ပႃႊတီႊ ၵွင်ၸႆး လၢတ်ႈဝႃႈ ပႃႊတီႊ ၵၢၼ်မိူင်းၼႆႉ ဢႃယုမၼ်း ၸင်ႈမူတ်း သဵင်ႈလႆႈ ၊ ယႃႉလႅဝ် မိူဝ်ႈၼႆႉ ၵေႃႈလႆႈ ၊ ယႃႉလႅဝ် မိူဝ်ႈၽုၵ်ႈ ၵေႃႈလႆႈ ။ ၵူၺ်းၵႃႈ ၵၢၼ်ၸိူဝ်ႉၸၢတ်ႈၼႆႉ ၸူဝ်ႈပၢၼ် တႆးႁဝ်းမီးယူႇ ၼႂ်းလူၵ်ႈယူႇၼႆ မၼ်းတိုၼ်း ဢမ်ႇဝွတ်ႈႁၢႆလႆႈ သေပွၵ်ႈ ႁဝ်းတိုၼ်း လူဝ်ႇဢွၼ်ၵၼ်ႁဵတ်း ယွၼ်ႉၼၼ်ႉ ၵၢၼ် ၸိူဝ်ႉၸၢတ်ႈၼႆႉ မၼ်း လမ်ႇလွင်ႈၼိူဝ် ပႃႊတီႊဢိူဝ်ႈ တိုၵ်းသူၼ်း လၢတ်ႈၵႂႃႇ ၼင်ႇၼႆ ။


တင်းမူတ်း လုၵ်ႈႁဵၼ်းၸၢႆး / ယိင်းလႄႈ သင်ၶ မႃးၶဝ်ႈႁူမ်ႈ မီး 87 ၵေႃႉ ၊ ၽူႈပွင်ၵၢၼ် ၼႂ်းပႃႊတီႊ ၵွင်ၸႆးလႄႈ လုၵ်ႈႁဵၼ်း မီးလွင်ႈ ထၢမ်တွပ်ႇၵၼ် ၼႆယဝ်ႉ ။