ပၢင်ၸႃပၼ ႁဵၼ်းတၢၼ်းပၼ် ၸဝ်ႈသိုၵ်းလူင် ဢွင်ႇမွင်း ၽူႈႁၢပ်ႇ ၵိုတ်ႉၵၢၼ် ၸိူဝ်ႉၸၢတ်ႈ ၼႂ်းၶွင်ႊသီႊ ဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ဢၼ်ၸတ်းတီႈ ဝတ်ႉၵူႇတဝ်ႈ ၵဵင်းမႆႇၼၼ်ႉ မွၵ်ႇထိုင် လၢႆမူႇ လၢႆၸုမ်း ၶဝ်ႈႁူမ်ႈ ။

ဝၼ်းတီႈ 03/09/2015 ( မိူဝ်ႈၽုၵ်ႈ )ၼႆႉ ပဵၼ်ဝၼ်း ပၢင်ၸႃပၼ လိုၼ်းသုတ်းၶွင် ၸဝ်ႈသိုၵ်းလူင် ဢွင်ႇမွင်း ၊ ၽူႈႁၢပ်ႇ ၵိုတ်ႉၵၢၼ်ၼႂ်း ၶွင်ႊသီႊ ဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ဢၼ်လူႉသဵင်ႈ သုတ်းမုၼ်ၵႂႃႇ ယွၼ်ႉ တၢင်းပဵၼ် ၶႅၼ်ႊသိူဝ်ႊ (မရဵင်း) တပ်း ၽွင်းဢႃယု 51 ပီ ၊ တီႈႁူင်းယႃလူင် ၵဵင်းမႆႇရၢမ်း ဝဵင်းၵဵင်းမႆႇ ၸိုင်ႈထႆး ။ ၶၢပ်ႈတူဝ်မၼ်း ၸဝ်ႈၼႆႉ ဢဝ်မႃးဝႆႉ တီႈဝတ်ႉ ၵူႇတဝ်ႈ ဢိူင်ႇသီၽုမ်း တင်ႈတႄႇဝၼ်းတီႈ 29/08/2015 သေ ႁႅၼ်းတၢၼ်းပၼ် ၸွမ်းၼင်ႇ ၾိင်ႈပုတ်ႉထ သႃသၼႃ ။


ၵူႈၶမ်ႈ ၵူႈၶိုၼ်း တင်ႈတႄႇ ဝၼ်းတီႈ 29/08/2015 မႃးၼႆႉ မီးၽူႈယႂ်ႇ ၵူၼ်းလူင် ၶွင်ႊသီႊ ဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး လႄႈ ၽူႈႁၵ်ႉၸၢတ်ႈ ၶဝ်ႈႁူမ်ႈ ပၢင်ႁႅၼ်းတၢၼ်း ႁေႃးထမ်းတြႃး ပိုၼ်ၽႄႈ ၵုသူလ် လၢႆၵေႃႉ လၢႆၸဝ်ႈ ။ မီး မူႇၸုမ်းတႆး လၢႆလၢႆၸုမ်း ၼႂ်းၵဵင်းမႆႇ ၶဝ်ႈႁူမ်ႈ ၸွႆႈထႅမ်လွင်ႈ ဝေယႃဝၸ်ႉၸ လႄႈ ၵူႈလွင်ႈလွင်ႈ ၊ ပိူင်လူင်မၼ်း ပဵၼ်မုၵ်ႉၸုမ်း ၸၢဝ်းၶိူဝ်းတႆး လႄႈ ၵေႃလိၵ်ႈလၢႆး လႄႈ ၾိင်ႈငႄႈတႆး ၵဵင်းမႆႇ ။


ပၢင်ၸႃပၼ ဝၼ်းလိုၼ်းသုတ်း မိူဝ်ႈၽုၵ်ႈၼႆႉ တၢင်း ၸဝ်ႈတႃႇၼလူင် ၶွင်ႊသီႊ ဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႆႈဝွၵ်ႇၸိူၼ်း (မွၵ်ႇထိုင်) ဝႆႉ ၸုမ်းယိပ်း ၵွင်ႈၵၢင်ႇ ၸၢဝ်းၶိူဝ်း ၵူႈၸုမ်းၸုမ်း ၊ ၸဝ်ႈၼႃႈတီႈ ထႆး ၊ ၸဝ်ႈၼႃႈတီႈ လူင်ပွင်ၸိုင်ႈမၢၼ်ႈ ၸိူဝ်းၼႆႉ ၶဝ်ႈႁူမ်ႈ ။ ပွတ်းၼႂ် မီးၵၢၼ် လူႇတၢၼ်း ၸွမ်းၾိင်ႈထုင်း ပုတ်ႉထ သႃသၼႃသေ တဵင်ႈဝၼ်းမွၵ်ႈ 12 မူင်းၶိုင်ႈ ႁၢင်ႈႁႅၼ်း ၶဝ်ႈထႅဝ် ပိူဝ်ႈတႃႇ လုမ်းလႃး ပူၼ်ႉၶၢပ်ႈတူဝ် - ႁွပ်ႇႁူဝ် ၶဝ်ႈႁဵဝ်ႈ တီႈပႃႇႁဵဝ်ႈ ၸၢင်ႉၽိူၵ်ႇ ( သၼ်တိထမ်း ) ဢိူင်ႇၸၢင်ႉၽိူၵ်ႇ ဝဵင်းၵဵင်းမႆႇ - ၼႆယဝ်ႉ ။


ၸဝ်ႈသိုၵ်းလူင် ဢွင်ႇမွင်းၼႆႉ ၵိူတ်ႇမိူဝ်ႈပီ 1964 ၊ လူႉသဵင်ႈမုၼ်ၵႂႃႇ မိူဝ်ႈ ဝၼ်းတီႈ 29/08/2015 ၽွင်းဢႃယု 51 ပီ ။


ပိုၼ်း ၸဝ်ႈသိုၵ်းလူင် ဢွင်ႇမွင်း

ၸိုဝ်ႈမိူဝ်ႈလဵၵ်ႉ ၸၢႆးဢွင်ႇၵျီး ၊

ၸိုဝ်ႈပေႃႈမႄႈ လုင်းသႆႇ + ပႃႈၵျီးၶႅင်ႇ ၊

ပီႈၼွင်ႉႁူမ်ႈတွင်ႉ ၸၢႆးဢွင်ႇၵူဝ်ႇ

ၸၢဝ်းၶိူဝ်း တႆး (တႆးလႅင်)

တီႈၵိူတ်ႇ ၼတ်ႉၵျီးၵူင်း ဢိူင်ႇမိူင်းၵွင် ၸႄႈဝဵင်း မိူင်းၵွင် (မိူင်းၵွင်း) ။

ၵၢၼ်ႁဵၼ်း ပၢႆးၸႂ် Psychology ပီထီႉ 3 ၸၼ်ႉၸွမ် ဝဵင်းလိူဝ်ႇ ။

ၼႃႈႁိူၼ်း ၼၢင်းဝႃႇထုၼ်း ၊ လုၵ်ႈၸၢႆး - ၸၢႆးၶမ်းၸိုၼ်ႈ ။


သဵၼ်ႈတၢင်းယၢင်ႈၸူးလၢႆးလုၵ်ႉၽိုၼ်ႉ

1988 ဢွၼ်ႁူဝ် ၶဝ်ႈပႃး တူင်ႉၼိုင် ၼႂ်းပၢင် လုၵ်ႉႁိုၼ် ၼႄၵၢင်ၸႂ် (8.8.8.8) ၼႂ်းမိူင်းမၢၼ်ႈ ။


18 Sep 1988 တႄႇၶဝ်ႈထိူၼ်ႇ ယိပ်းၵွင်ႈၵၢင်ႇ ၶဝ်ႈပႃးၼႂ်း တႅဝ်းႁူမ်ႈ လုၵ်ႈႁဵၼ်း မိူင်းမၢၼ်ႈ ၻီႊမူဝ်ႊၶရေႊသီႊ (ပွတ်းႁွင်ႇ) ။ ABSDF - NB ၊ လႆႈၽိုၵ်းသွၼ် ၵၢၼ်သိုၵ်း ၸုပ်ႈ 1 ၼႂ်းပိုၼ်ႉတီႈ ပႃႇၵျွင်ႇ ။


2005 - 2001 လႆႈၶဝ်ႈၸွႆႈထႅမ် ဢဝ်ပုၼ်ႈၽွၼ်း ၼႂ်း ၶူးႁူင်းႁဵၼ်းသိုၵ်း တပ်ႉၶိုၵ်ႉတွၼ်း ၾၢႆႇတိတ်းတေႃႇ ၸၢဝ်းၶိူဝ်း ႁွင်ႈၵၢၼ်လူင် ၵဝ်ႉငဝ်ႈ ပူၵ်းပွင်ၸိုင်ႈတႆး ၸုမ်းၾၢႆႇၽႅၼ် ၸတ်းသိုၵ်း ။


2011 - 2013    လႆႈႁၢပ်ႇ ၵိုတ်ႉပုၼ်ႈၽွၼ်း ၶဝ်ႈပႃးၼႂ်း ၶွမ်ႊမတီႊ ပွင်သၢင်ႈ လွင်ႈငမ်းယဵၼ် RCSS/SSA ဢုပ်ႇဢူဝ်းတင်း လူင်ပွင်ၸိုင်ႈ သိုၵ်းမၢၼ်ႈ တေႃႇထိုင်ဝၼ်း လပ်းတႃ လိုမ်းမိူင်း ။


ပၢင်တိုၵ်း ၶဝ်ႈပႃးတေႃႇသူႈတိၵ်းၽူႈၶဵၼ်

1990 ၶဝ်ႈတိုၵ်းသမ်း ႁိူဝ်းတီႈ သၢႆးၼမ်ႉ ၶၢဝ်းတၢင်း ပၢင်တိုၵ်းၼိုင်ႈ ၸူဝ်ႈမိူင်းပၢႆ (ABSDF-NB) ။


1991 ၽႅၼ်ၸတ်းသိုၵ်း “ လၢဝ်မိၼ် ” ၵႂႃႇလေႃႇ တိုၵ်းရူတ်ႉၾႆး ၼႂ်းပိုၼ်ႉတီႈ ၼႃႈလိၼ် ၾၢႆႇတူၵ်းမိူင်း ၵွင်းပွၵ်ႈၼိုင်ႈ ၊ တိုၵ်းၵၼ်တင်း သိုၵ်းပႂ်ႉ ႁူမ်ႇလူမ်ႈ ရူတ်ႉၾႆး ယၢမ်းၵၢင်ၶိုၼ်း ထႅင်ႈပွၵ်ႈၼိုင်ႈ (ABSDF-NB) ။


1999 တိုၵ်းၵၼ် တင်းသိုၵ်းမၢၼ်ႈ ၼိူဝ်သဵၼ်ႈတၢင်း ၼႂ်းၵႄႈမိူင်းၼႃႉ ၵႂႃႇမိူင်းပၼ်ႇ ၼိုင်ႈပွၵ်ႈ ။ ၵႂႃႇမူၵ်းပႂ်ႉ တိုၵ်းသၢႆ ရူတ်ႉၵႃး သိုၵ်းမၢၼ်ႈ ၼႂ်းပိုၼ်ႉတီႈ မိူင်းပၼ်ႇ ၼိုင်ႈပွၵ်ႈ ။ သိုၵ်းမၢၼ်ႈ ၶဝ်ႈမႃးယိုဝ်း တီႈပၢင်လိုဝ်ႈသဝ်း ၼႂ်းပိုၼ်ႉတီႈ မိူင်းပၼ်ႇ ၼိုင်ႈပွၵ်ႈ (RCSS/SSA) ။


2001 လႆႈၶဝ်ႈႁူမ်ႈ ပႃးၼႂ်းပၢင်တိုၵ်း ၶဝ်ႈတိုၵ်း တပ်ႉမၢၼ်ႈ တီႈပႃၶီး ။


3.1989-1998 ပဵၼ်ၽူႈ ၶဝ်ႈပႃးၼႂ်း ၶွမ်ႊမတီႊ ငဝ်ႈငုၼ်း ABSDF - NB လႄႈ ႁၢပ်ႇပုၼ်ႈၽွၼ်း ပဵၼ် ၽူႈၸတ်းၵၢၼ် ၾၢႆႇငိုၼ်း ။


4.Oct 1998 ဢိင်ၼိူဝ် တပ်ႉသိုၵ်း ၸိုင်ႈတႆး SSA ( ငဝ်ႈငုၼ်းသႅင်ၵႅဝ်ႉ ) လႄႈ တပ်ႉသိုၵ်း ၸိူဝ်ႉၸၢတ်ႈ ၸိုင်ႈတႆး (SSNA) ၶဝ်ၸဝ်ႈၸွႆႈ ထႅမ်ပၼ်လႄႈ တင်းၵေႃႉ သိုၵ်းတၢၼ်ႇၶျွင်း (ႁွင်ႉ) ၸဝ်ႈၶုၼ်ၵျေႃႇ သေ လႆႈဢွၼ်တပ်ႉ ၼႂ်းၼၢမ်း SNA ႁွတ်ႈထိုင် မႃးတီႈ တပ်ႉသိုၵ်းၸိုင်ႈတႆး RCSS/SSA ။


ပိုၼ်းၵႅပ်ႈ ႁူမ်ႈႁၢပ်ႇ ႁၢမ်ၵၢၼ် ၸိူဝ်ႉၸၢတ်ႈ ၼႂ်း RCSS/SSA

ၸိုဝ်ႈၸၼ်ႉသိုၵ်း ၸဝ်ႈသိုၵ်းလူင် ဢွင်ႇမွင်း

မၢႆတူဝ် 02556

2000-2001 ၶဝ်ႈၽိုၵ်းသွၼ် ၵၢၼ်သိုၵ်း ၸုပ်ႈ 2 ပၢတ်ႈ 3 တီႈ ငဝ်ႈၸိုင်ႈ လွႆတႆးလႅင်း ။


1998-2008 ၸၼ်ႉၸဝ်ႈႁၢၼ် ၊ ႁပ်ႉပုၼ်ႈၽွၼ်း ပဵၼ် ၵႅမ်ၽူႈ ၵွၼ်းတပ်ႉၸုမ်း 241 (RCSS/SSA) ။


2003 ၶဝ်ႈပႃးၼႂ်း ၶွမ်ႊမတီႊ ၶူးႁူင်းႁဵၼ်း ၽူႈမီးၸၼ်ႉ ဢူၺ်းလီသိုၵ်း MAOTS ဢၼ် တပ်ႉသိုၵ်း ဢူၺ်းလီ ၸၢဝ်းၶိူဝ်း (KNU, KNPP, ALP, RCSS) လႆႈမႃး ႁူမ်ႈၵၼ်ၽိုၵ်း တီႈ ငဝ်ႈၸိုင်ႈ လွႆတႆးလႅင်း ။


တမ်းမၢႆ ၵိုၵ်းပိုၼ်း တပ်ႉသိုၵ်း ၸိုင်ႈတႆး RCSS/SSA ၽူႈႁူမ်ႈ တႄႇတင်ႈ ငဝ်ႈၸိုင်ႈ လွႆတႆးလႅင်း

ၸဝ်ႈသိုၵ်းလူင် ဢွင်ႇမွင်းၼႆႉ ပဵၼ်ၽူႈမီး ၸၼ်ႉသုင် ၼႂ်း SNA သေ မႃး ၵေႃႇသၢင်ႈ လွင်ႈၽွမ်ႉႁူမ်ႈ တင်း တပ်ႉသိုၵ်းၸိုင်ႈတႆး (RCSS/SSA) တီႈမိူင်းၶုၼ် မိူဝ်ႈ ဝၼ်းတီႈ 04/08/1998 သေ လႆႈၶဝ်ႈ မႃးတီႈ လႅၼ်လိၼ်တႆး - ထႆး ၸွမ်းႁူဝ် ပဝ်ႈလူင် ၸဝ်ႈယွတ်ႈသိုၵ်း ၊ လႆႈႁူမ်ႈပႃး ၼႂ်းပၢင်တိုၵ်း တေႃႇသူႈ ၽဵဝ်ႈမူၺ်ႉ ယႃႈမဝ်းၵမ် ၸွမ်းလႅၼ်လိၼ် တႆး - ထႆး (1999-2002) လႄႈ ပဵၼ် ၽူႈၵေႃႉ ႁူမ်ႈပႃး တႄႇတင်ႈငဝ်ႈၸိုင်ႈ ၶွင်ႊသီႊ ဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး “ လွႆတႆးလႅင်း ” ။


ၶွင်ႊသီႊ ဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ယုၵ်ႉယွင်ႈ ဢဝ်ၵုၼ်းမုၼ် ၼမ်ႉၸႂ် ႁၵ်ႉၸၢတ်ႈ ၊ တင်းႁတ်းႁၢၼ်လႄႈ ၵၢၼ်ႁပ်ႉဢဝ် ပုၼ်ႈၽွၼ်း ဢၼ်ၸဝ်ႈသိုၵ်းလူင် ဢွင်ႇမွင်း ႁဝ်းလႆႈႁၢပ်ႇ ၵိုတ်ႉမႃး ၼၼ်ႉသေ တမ်းမၢႆၵိုၵ်းပိုၼ်း RCSS/SSA ဝႆႉယူႇ ။ RCSS/SSA ႁူမ်ႈလူၺ်ႈ ပီႈၼွင်ႉ ၸိူဝ်းၵိုတ်းပႃႈလင် ယိၼ်းသေ လၢႆၸွမ်း တႄႉတႄႉ - ၽိုၼ်လိၵ်ႈၶွင် ၵေႃၵမ်ၵၢၼ် ပွင်ၵၢၼ်လူင် ငဝ်ႈၸိုင်ႈ RCSS/SSA လၢတ်ႈပႃး ၼင်ႇၼႆ ။