တေႃႈၵႅတ်ႊသ် ဢၼ်မီး ၼႂ်းၸႄႈဝဵင်း ၵျွၵ်ႉမႄး ၸိုင်ႈတႆး ပွတ်းႁွင်ႇၼၼ်ႉ ႁူဝ်ႈပွင်ႇ ဢွၵ်ႇဢၢႆမဵၼ် ၊ ႁဵတ်းႁႂ်ႈ တႃသႅပ်ႇ ၊ တေႃႇထိုင် ဝၼ်းမိူဝ်ႈၼႆႉ လႆႈဝူင်ႈၼိုင်ႈ ယဝ်ႉသေ တူၼ်ႈမႆႉ တူၼ်ႈတွၵ်ႇ ယိူဝ်ႈယႃႈ ႁိမ်းႁွမ်းၵေႃႈ ႁဵဝ်ႇမႃး ၼဝ်ႈမႃး လိူဝ်ၵဝ်ႇ ။ လွင်ႈၼႆႉ ၵူၼ်းဝၢၼ်ႈ ၵူၼ်းမိူင်း ၵျွၵ်ႉမႄး မႆႈၸႂ်သေ ဢွၼ်ၵၼ် တုၵ်းယွၼ်း ပႃႊတီႊ ၵၢၼ်မိူင်း လႄႈ ၸဝ်ႈၼႃႈတီႈ လူင်ပွင်ၸိုင်ႈၶဝ် ႁႂ်ႈလူင်း ၵူတ်ႇထတ်းပၼ် ထႅင်ႈၵမ်းၼိုင်ႈ ။

တေႃႈၵႅတ်ႊသ် ဢၼ်ႁူဝ်ႈ ပွင်ႇၼႆႉ ပဵၼ်တေႃႈလွတ်ႇ ဢၼ်လတ်းၼႂ်း သူၼ်ၶဝ်ႈၵၢပ်ႇ ႁိမ်းဝၢၼ်ႈ ႁွင်ႈႁႅင်ႈ ၼႂ်းဢိူင်ႇ ႁွင်ႈႁႅင်ႈ ၸႄႈဝဵင်း ၵျွၵ်ႉမႄး ။ တေႃႈၵႅတ်ႊသ်ၼႆႉ ႁူဝ်ႈပွင်ႇ ဢွၵ်ႇဢၢႆမဵၼ်သေ ပေႃးလတ်းၵႂႃႇ ႁိမ်းမၼ်းၵေႃႈ တႃသႅပ်ႇ ။ ၵဵဝ်ႇၵပ်း လွင်ႈၼႆႉ ၵူၼ်းဝၢၼ်ႈၶဝ် ဢွၼ်ၵၼ်ၵႂႃႇ လၢတ်ႈတီႈ ၸဝ်ႈၼႃႈတီႈ လူင်ပွင်ၸိုင်ႈလႄႈ ၽူႈမီးပုၼ်ႈၽွၼ်း ၶႄႇၶဝ် ၊ ၾၢႆႇ လူင်ပွင်ၸိုင်ႈလႄႈ ၽူႈမီးပုၼ်ႈၽွၼ်းၶႄႇ ၶဝ်ၵေႃႈ ဢွၼ်ၵၼ် လူင်းမႃးၵူတ်ႇထတ်း တူၺ်းယူႇ ၊ ၵူၺ်းၵႃႈ သမ်ႉဝႃႈ ယွၼ်ႉပိူဝ်ႈ မၼ်းပဵၼ်လုၵ်း မီးၼမ်ႉ ပဵၼ်တီႈ တၢင်းၶူင်ႈၶၢင်း လႄႈဢၢႆမဵၼ်မၼ်း ဢွၵ်ႇမႃးၵူၺ်း ၼႆသေ ၵႂႃႇထူမ်ပႅတ်ႈ လုၵ်းၼမ်ႉၼၼ်ႉ - ၼႆယဝ်ႉ ။


ၸၢႆးၸၢႆး ၵူၼ်းဝၢၼ်ႈ ႁွင်ႈႁႅင်ႈလၢတ်ႈဝႃႈ - တေႃႇထိုင် ဝၼ်းမိူဝ်ႈၼႆႉ (01/09/2015) ၵူၼ်းဝၢၼ်ႈၶဝ် ဢွၼ်ၵၼ် ၵႂႃႇတူၺ်းၵေႃႈ ဢၢႆမဵၼ်မၼ်း ယင်းပႆႇႁၢႆ ၊ ယင်းတိုၵ်ႉမီးယူႇ ။ တူၼ်ႈ ယိူဝ်ႈယႃႈလႄႈ တူၼ်ႈမႆႉ တူၼ်ႈတွၵ်ႇ ယုမ်းၶိူဝ်း ႁိမ်းႁွမ်း ၼၼ်ႉၵေႃႈ မၢၼ်ႉသေ ႁႅင်ႈႁဵဝ်ႇ ႁႅင်ႈၵႂႃႇ ၼဝ်ႈၵႂႃႇ ၊ မၼ်းပႅၵ်ႇပိူင်ႈ ႁူပိူင်ႈတႃဝႆႉ ။ ၵူၼ်းဝၢၼ်ႈၶဝ် ၵႂႃႇၼႂ်းဝဵင်းသေ ၵႂႃႇပွင်ႇၶၢဝ်ႇ ဝႆႉတီႈလုမ်း ပႃႊတီႊ ၵၢၼ်မိူင်းၶဝ်ယဝ်ႉ ၊ ၵူၺ်းၵႃႈ တေႃႇထိုင် မိူဝ်ႈလဵဝ် ပႆႇႁၼ်လူင်းမႃး ၵူတ်ႇထတ်း တူၺ်းပၼ် ။ သင်ၸိူဝ်ႉဝႃႈ ပွႆႇၵႂႃႇၸိူင်ႉၼႆ ၶၢဝ်းႁိုင်တႄႉ လႆႈမႆႈၸႂ် တွၼ်ႈတႃႇ ၵူၼ်းဝၢၼ်ႈ ၵူၼ်းသူၼ် ၸိူဝ်းယူႇ ႁိမ်းႁွမ်းၼၼ်ႉ - ဝႃႈၼႆ ။


မိူဝ်ႈ ဝၼ်းတီႈ 28/08/2015 ၼၼ်ႉ လုၵ်ႈဢွၼ်ႇ ၵႂႃႇလဵင်ႉ ဝူဝ်းၵႂၢႆးၶဝ် ဢွၼ်ၵၼ် ၵႂႃႇလဵၼ်ႈၼမ်ႉ တီႈႁိမ်း တေႃႈၼၼ်ႉလႄႈ ၸင်ႇလႆႈ ယိၼ်းဢၢႆပႅၵ်ႇပိူင်ႈ ဢၢႆတူႇ ဢၢႆမဵၼ် ၊ တႃၵေႃႈသႅပ်ႇ ၼမ်ႉတႃ ၵေႃႈလႆသေ လႅၼ်ႈမႃး လၢတ်ႈပေႃႈမႄႈ တၢင်းႁိူၼ်း ၊ ၵူၼ်းဝၢၼ်ႈၶဝ် ဢွၼ်ၵၼ်ၵႂႃႇ တူၺ်းသေ ၸင်ႇၵွႆႈႁူႉ - ၼႆယဝ်ႉ ။


ၸၢႆးၸၢႆး ဢၼ်လႆႈၵႂႃႇ တူၺ်းၸွမ်း သိုပ်ႇလၢတ်ႈ ထႅင်ႈဝႃႈ - တေႃႈၵႅတ်ႊသ်ၼႆႉ မီးၼႂ်းသူၼ် ၶဝ်ႈၵၢပ်ႇ ၊ မီးၼႂ်းၵႄႈ ဝၢၼ်ႈလွႆၶေႃ ဢိူင်ႇၵျွၵ်ႉမႄးၵျီး တင်းဝၢၼ်ႈ ႁွင်ႈႁႅင်ႈ ၼႂ်းဢိူင်ႇ ႁွင်ႈႁႅင်း ။ ႁိမ်းၼၼ်ႉ ယၢၼ်ဝၢၼ်ႈ သွင်ဝၢၼ်ႈၼႆႉ မွၵ်ႈ 1 လၵ်းပၢႆ ။ မိူဝ်ႈ ၸဝ်ႈၼႃႈတီႈ ၾၢႆႇၶႄႇၶဝ် မႃးတူၺ်းၵေႃႈ ၶဝ်ဝႃႈ ယွၼ်ႉပဵၼ်လုၵ်း ပဵၼ်ၼမ်ႉဝႆႉ လႄႈပဵၼ် ။ ယွၼ်ႉပိူဝ်ႈ လူတ်ႉၵႃး တၢင်ႇႁိၼ်ႁႄႈ ၵႂႃႇမႃးသေ ဢဝ်ႁိၼ်ႁႄႈ ထၢၼ်ႇႁိၼ် တူၵ်းဝိူဝ်ဝႆႉသေ သမ်ႉမႃးၺႃး ၼမ်ႉၾူၼ် ဢၢႆလႅတ်ႇ ဢၢႆလူမ်း သေပဵၼ်ၵႂႃႇ ၊ မၼ်းမႃးၺႃးၵၼ်သေ ၸိူမ်ႈပဵၼ် ထၢတ်ႈၶေႊမီႊၶိူဝ်ႊလ်သေ ဢွၵ်ႇၼမ်ႉ ဢၢႆမဵၼ်မႃး - ဝႃႈၼႆ ။


ယွၼ်ႉပိူဝ်ႈ သင်ၵေႃႈယဝ်ႉ ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈၶဝ်ၶႂ်ႈႁႂ်ႈ ၸဝ်ႈၼႃႈတီႈ ၾၢႆႇၵဵဝ်ႇၶွင်ႈ ၶဝ်လႄႈ ပႃႊတီႊ ၵၢၼ်မိူင်းၶဝ် မႃးၵူတ်ႇ ထတ်းတူၺ်း ပၼ်ထႅင်ႈၵမ်းၼိုင်ႈ - ၼႆယဝ်ႉ ။


မိူၼ်ၼင်ႇ ၼင်ႇၵဝ်ႇ တီႈၼႂ်း ၸႄႈဝဵင်း သီႇပေႃႉ ဢၼ်ပဵၼ်တီႈ ထၢတ်ႈၵိူဝ်ၼမ်ၵေႃႈ ၼႂ်းလိၼ်မီး ထၢတ်ႈၵိူဝ်သေ လွတ်ႇၵႅတ်ႊသ် ၼႂ်းလိၼ်ၸၢင်ႈႁေႃ ၸၢင်ႈႁူဝ်ႈ ၸၢင်ႈတႅၵ်ႇ လႆႈၵူႈၶၢဝ်း ၊ ၵူၺ်းၵႃႈ ၾၢႆႇၵူၼ်း ႁဵတ်းၵၢၼ်တေႃႈ လွတ်ႇၵႅတ်ႊသ်ၶဝ်ၼႆႉ ပေႃးႁၼ်တီႈ တေႃႈလွတ်ႇ လႅပ်ႈပွင်ႇၵေႃႈ ၵႂႃႇဢဝ်ယၢင်မၢၵ်ႇတွႆး (ယၢင်သိူဝ်ႇတၢင်း) မႃးတႃးဝႆႉ မၢင်မၢင်သေယဝ်ႉ ပွႆႇဝႆႉ ၊ ဢမ်ႇပေႃးသႂ်ႇ ၸႂ်ၼၵ်းၼႃလႄႈ တေႃႈလွတ်ႇ ၸၢင်ႈတႅၵ်ႇလႆႈ ၵူႈၶၢဝ်းယၢမ်း ၼႆ ၵူၼ်းဝဵင်းသီႇပေႃႉၶဝ် မႆႈၸႂ် ယူႇၵူႈဝၼ်း ၵူႈၶိုၼ်း - ၼႆယဝ်ႉ ။


တေႃႈလွတ်ႇၵႅတ်ႊသ် ၼမ်ႉမၼ်းလိပ်း ဢၼ်လူင်ပွင်ၸိုင်ႈမၢၼ်ႈ သူင်ႇၶဝ်ႈၶၢႆ တေႃႇမိူင်းၶႄႇၼႆႉ လုၵ်ႉဢဝ်တီႈ တႃႈႁိူဝ်း ၵျွၵ်ႉၽျူႇ မိူင်းရၶႅင်ႇသေ လွတ်ႇတေႃႇမႃး လတ်းမိူင်းမၢၼ်ႈ တိူင်းမၵူၺ်း တိူင်းမၼ်းတလေး ၊ လတ်းၽၢၼ်ႇၼႂ်း ၸိုင်ႈတႆးပွတ်းႁွင်ႇ 20 ၸႄႈဝဵင်းပၢႆသေ ၶဝ်ႈၸူးၸႄႈမိူင်း ယုၼ်ၼၢၼ် ၼႂ်းမိူင်းၶႄႇ ၊ ပဵၼ်ၶွမ်ႊပၼီႊၶႄႇ (China National Petroleum Corporation – CNPC) တင်း လူင်ပွင်ၸိုင်ႈမၢၼ်ႈ ႁူမ်ႈၵၼ်ႁဵတ်းသၢင်ႈ ။