သင်ၶတႆး လုၵ်ႈႁဵၼ်း ၸၼ်ႉၸွမ် (မိူင်းၵွၵ်ႇ) ဢွၼ်ႁူဝ် မုၵ်ႉၸုမ်း ၸၢဝ်းၶိူဝ်းတႆး မိူင်းၵွၵ်ႇ ႁူမ်ႈၵၼ်တင်း တၵ်ႉၵႃႇသတ်ႉထႃး တီႈတႃႈၶီႈလဵၵ်း ၵႂႃႇၸွႆႈထႅမ် ၵူၼ်းထူပ်းၽေး ၼမ်ႉထူမ်ႈ တီႈဢိူင်ႇ ပႃႇလႅဝ်း ၵဵင်းလၢပ်ႈ ။

မိူဝ်ႈဝၼ်းတီႈ 29/08/2015 သင်ၶတႆး လုၵ်ႈႁဵၼ်း ၸၼ်ႉၸွမ် လႄႈ လုၵ်ႈႁဵၼ်း ၸၼ်ႉၸွမ် မႁႃၸုလႃး မိူင်းၵွၵ်ႇ ႁူမ်ႈ 48 ၵေႃႉ ၊ ၽူႈတၢင်တူဝ် မုၵ်ႉၸုမ်း ၸၢဝ်းၶိူဝ်းတႆး မိူင်းၵွၵ်ႇ ၵေႃႉၼိုင်ႈ လႄႈ ႁူမ်ႈပႃးၸုမ်း ၶႅၵ်ႇလီပၢင်ၸႃႉ ႁူဝ်မိူင်းသႂ် ဝဵင်းတႃႈၶီႈလဵၵ်း ၸိူဝ်းၼႆႉ လႆႈႁူမ်ႈၵၼ် ၵႂႃႇၸွႆႈထႅမ် ၵူၼ်းဝၢၼ်ႈ ၵူၼ်းမိူင်း ၸိူဝ်းထူပ်းၽေး ၼမ်ႉထူမ်ႈ တီႈဢိူင်ႇ ပႃႇလႅဝ်း ၵဵင်းလၢပ်ႈ ၸိုင်ႈတႆး ပွတ်းဢွၵ်ႇ ။


ၶၢဝ်းတၢင်း ၵႂႃႇၸွႆႈထႅမ် ၵူၼ်းထူပ်း ၽေးၼမ်ႉပွၵ်ႈၼႆႉ ပဵၼ်ၸုမ်း ၶႅၵ်ႇလီပၢင်ၸႃႉ ႁူဝ်မိူင်းသႂ် ဝဵင်းတႃႈၶီႈလဵၵ်း ၊ ၸဝ်ႈ တူၼ်ၶူးလွႆယူၼ်း ၊ ၸဝ်ႈတူၼ်ၶူးဝတ်ႉ (ၵျွင်း) ပႃႇသၵ်း ၊ ၸုမ်းပႃႊတီႊ ႁူဝ်သိူဝ် ၸိူဝ်းၼႆႉ ဢဝ်ပုၼ်ႈၽွၼ်း ႁပ်ႉသူင်ႇ ၊ ႁူမ်ႈတင်းမူတ်း 49 ၵေႃႉ / ၸဝ်ႈ - ၼႆယဝ်ႉ ။


ၶူဝ်းၶွင် ၸိူဝ်းလႆႈ ၸွႆႈထႅမ်ၵႂႃႇၼၼ်ႉ ငိုၼ်းတွင်း ၊ ၶူဝ်းၼုင်ႈ တၢင်းဝႆ ၊ လွတ်ႇၼမ်ႉ ၊ ၼမ်ႉၵိၼ် ၊ ၶႅပ်းတိၼ် ၊ ၶဝ်ႈမုၼ်း ၊ ၶဝ်ႈသွႆး ဢေႃႇတေႃႇ ၊ ၽွင်သၵ်ႉ ၊ မႆႉသီၶဵဝ်ႈ ၊ ယႃႈသီၶဵဝ်ႈ ၊ ယႃႈယႃ ၊ ၵွၼ်ႈသီ ၊ ၶဝ်ႈသၢၼ် ၊ ၼမ်ႉမၼ်းလႄႈ ၽႃႈႁူမ်ႇၽႃႈဝႆ ဢိၵ်ႇၶူဝ်းၶွင်ထႅင်ႈတၢင်ႇလွင်ႈတၢင်ႇပိူင် ။


ၸဝ်ႈတႃႇၼ ၸိူဝ်းလႆႈ ႁူမ်ႈလူႇတၢၼ်း ၶူဝ်းၶွင်ၼၼ်ႉ ပဵၼ်ပီႈၼွင်ႉတႆး / ထႆး ၼႂ်းမိူင်းၵွၵ်ႇ ၊ တၵ်ႉၵႃႇ သတ်ႉထႃး ဝတ်ႉႁၢတ်ႇယႂ်ႇ သီၻႃးရၢမ်း လႄႈ ၸဝ်ႈၶွင် ၶွမ်ႊပၼီႊၶဝ်ႈမုၼ်း Dr.Sakchai Techakasri, Dr.Sudawan Techakaisri and Family မိူင်းၵွၵ်ႇ ၸိူဝ်းၼႆႉ ။


ဢိင်ၼိူဝ် လႆႈၵႂႃႇ ၸွႆႈထႅမ်ပၼ် ၶူဝ်းၶွင်သေ ၵူၼ်းထဝ်ႈ ၼႂ်းဝၢၼ်ႈ လၢတ်ႈဝႃႈ - “ ယိၼ်းၸူမ်း ယႂ်ႇၼမ် တႄႉတႄႉ ဢၼ်ပီႈၼွင်ႉ တီႈၸမ် တီႈၵႆ မႃးၸွႆႈထႅမ် ႁဝ်းၶႃႈ ၸိူဝ်းၼႆႉ ။ မိူဝ်ႈလဵဝ် ၶူဝ်းၸႂ်ႉ ၶူဝ်းတိုဝ်း တၢင်းၵိၼ်ၵေႃႈၼမ် ၊ ၵူၺ်းၵႃႈ ဢၼ်ႁဝ်းၶႃႈ တိုၵ်ႉၶႂ်ႈလႆႈ ထႅင်ႈတႄႉ ပဵၼ် ၽႃႈႁူမ်ႇ ၶူဝ်းၼွၼ်း ”- ဝႃႈၼႆ ။


မိူဝ်ႈလဵဝ် ပီႈၼွင်ႉ ၵူၼ်းထူပ်းၽေးၼမ်ႉ ၸိူဝ်းၼႆႉ ၸိူဝ်းပႆႇမီး တီႈယူႇၼၼ်ႉ ၵမ်ႈၼမ် တိုၵ်ႉလႆႈယူႇသဝ်း တီႈဝတ်ႉ ၊ ၵမ်ႈၽွင်ႈ ႁဵတ်းသုမ်ႉသေ ယူႇႁိမ်းဝတ်ႉ ၸွမ်းၵၢင်ပၢင်ႇ ။


ၸုမ်းၵႂႃႇ ၸွႆႈထႅမ် ၶူဝ်းၶွင် တွင်ႈထၢမ်ဝႃႈ မိူဝ်ႈၼမ်ႉ တိုၵ်ႉလႆ ၼွင်းမႃးယူႇၼၼ်ႉ သမ်ႉယူႇတီႈလႂ် ၊ ႁဵတ်းႁိုဝ် ယူႇၸိူဝ်းၼႆႉ လႆႈၵႂၢမ်းတီႈ ၵူၼ်းဝၢၼ်ႈ ၶဝ်ဝႃႈ - ၵမ်ႈၽွင်ႈ ပၢႆႈမႃးယူႇသဝ်း တီႈဝတ်ႉ ၊ ၵမ်ႈၽွင်ႈ ပၢႆႈယူႇၼိူဝ်လင်ၶႃး ႁိူၼ်း ၊ ၵမ်ႈၽွင်ႈၵေႃႈ ၵၢၼ်းၶိုၼ်ႈ ယူႇၸွမ်း ပၢႆမႆႉ ပၢႆတွၵ်ႇ ၼိူဝ်တူၼ်ႈ မၢၵ်ႇပၢဝ်ႉ - ၼႆယဝ်ႉ ။