ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး ပိုတ်ႇၶူဝ်မႂ်ႇ တူၼ်ႈႁုင်း တူင်ႇဝဵင်းၵေးသီး၊ ယိူင်းဢၢၼ်း ႁႂ်ႈပဵၼ်ၽွၼ်းလီ တႃႇၵူၼ်းမိူင်း ၼႂ်းပိုၼ်ႉတီႈ။ ၶူဝ်မႂ်ႇလင်ၼႆႉ ၸႂ်ႉႁႅင်းငိုၼ်း ၼပ်ႉႁူဝ်ႁဵင်သႅၼ်။

ဝၼ်းတီႈ 09/08/2015 ယၢမ်းၵၢင်ၼႂ် 9 မူင်းၶိုင်ႈ တေႃႇထိုင် 10 မူင်းပၢႆ၊ ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ဢွၼ်ႁူဝ်ၸတ်းႁဵတ်းပၢင်ၵႅဝ်ႈ ပိုတ်ႇၶူဝ်မႂ်ႇ တူၼ်ႈႁုင်း တူင်ႇဝဵင်းၵေးသီး ၸိုင်ႈတႆးပွတ်းၸၢၼ်း။ တီႈပၢင်ၵႅဝ်ႈၼၼ်ႉ ၽူႈယႂ်ႇၵူၼ်းလူင် SSPP/SSA လၢႆလၢႆၸဝ်ႈ တင်း သင်ၶၸဝ်ႈ ဢိၵ်ႇပေႃႈမႄႈၵူၼ်းမိူင်း ႁိမ်းႁွမ်းၼၼ်ႉ ၶဝ်ႈႁူမ်ႈမွၵ်ႈ 300 ၵေႃႉပၢႆ။

ၽူႈမီးပုၼ်ႈၽွၼ်းၼႂ်း SSPP/SSA လၢတ်ႈဝႃႈ- ယိူင်းဢၢၼ်းႁႂ်ႈပဵၼ်ၽွၼ်းလီ တႃႇၵူၼ်းမိူင်း၊ ၵူၼ်းမိူင်းၼႂ်းပိုၼ်ႉတီႈၼႆႉ ႁဵတ်းၵိၼ်ၵၢၼ်သူၼ်ႁႆႈၼႃးလႄႈ လဵင်ႉလူတူဝ်သတ်း၊ ၵူၼ်းဝၢၼ်ႈတႃႇ 2 ဢိူင်ႇ ၵႂႃႇမႃးႁႃၵၼ်ယၢပ်ႇ၊ ဢိူင်ႇၼိုင်ႈယူႇဝၼ်းတူၵ်းပၢင်၊ ဢိူင်ႇၼိုင်ႈယူႇဝၼ်းဢွၵ်ႇပၢင်။ ၶူဝ်လင်ၼႆႉ ၵၢႆႇပၼ်တႃႇသွင်ဢိူင်ႇၼႆႉ ႁႂ်ႈၵႂႃႇမႃးႁႃၵၼ်ငၢႆႈ။ ႁႂ်ႈဢဝ်ၶူဝ်းႁႆႈၶူဝ်းသူၼ်ၵႃႉၶၢႆတေႃႇၵၼ်ငၢႆႈ။ ပိူင်လူင် ၶႂ်ႈႁႂ်ႈၶၼ်ၵုၼ်ႇလူတ်းယွမ်း၊ ႁႂ်ႈၵူၼ်းမိူင်းယူႇငၢႆႈလူမ်ၸႂ် ၸင်ႇလႆႈသၢင်ႈပၼ်ၶူဝ်လင်ၼႆႉ- ဝႃႈၼႆ။


သိုပ်ႇလၢတ်ႈထႅင်ႈဝႃႈ- ၵူၼ်းမိူင်း တႄႇဢဝ်တၢင်းတၢင်ႉယၢၼ်းမႃးတေႃႇပေႃးထိုင် ၸိုင်ႈတႆးပွတ်းၵၢင်ၼႆႉ ၵမ်ႈၼမ်ၸႂ်ႉသဵၼ်ႈတၢင်းဢၼ်ၼႆႉ။ ၵၢၼ်ၵေႃႇသၢင်ႈၶူဝ်လင်ၼႆႉ လႆႈၸႂ်ႉငိုၼ်း 2,300 သႅၼ်ပျႃး။ ယွၼ်ႉပိူဝ်ႈၸႂ်ႉပႃးႁႅင်းၵူၼ်းႁႅင်းသိုၵ်းၼမ်လႄႈ ၵႃႈၸႂ်ႉၸၢႆႇတႃႇၵေႃႇသၢင်ႈၶူဝ် ဢမ်ႇပေႃးသဵင်ႈၼမ်- ဝႃႈၼႆ။

ၶုၼ်သိုၵ်း ၸၢႆးယီႈ ၽူႈဢွၼ်ႁူဝ်ၵေႃႇသၢင်ႈၶူဝ် လၢတ်ႈဝႃႈ- ဢိင်ၼိူဝ်ၽူႈယႂ်ႇၵူၼ်းလူင်ႁဝ်း ႁႂ်ႈႁဵတ်းၶႂ်ႈပဵၼ်ၵေႃႈ လွင်ႈၼိုင်ႈ၊ ပေႃႈမႄႈၵူၼ်းမိူင်းႁဝ်းၶႃႈၵေႃႈ ဢဝ်ဢဵၼ်ႁႅင်းၶဝ် ဢၼ်မီးၵႃႈၶၼ်၊ ဢဵၼ်ႁႅင်းငိုၼ်းတွင်း ၶူဝ်းၶွင် ၸဵမ်ၸိူဝ်းၼႆႉသေ မႃးၵမ်ႉၸွႆႈထႅမ်လႄႈ လႆႈဝႃႈၶူဝ်လင်ၼႆႉ ၵေႃႇသၢင်ႈယဝ်ႉတူဝ်ႈၵႂႃႇလီငၢမ်း။ လွင်ႈၵႅၼ်ႇၶႅင်ၶူဝ်လင်ၼႆႉ တေၸႂ်ႉလႆႈမွၵ်ႈၶၢဝ်းတၢင်းပၢၵ်ႇပီပၢႆ- ဝႃႈၼႆ။


လုင်းသူၺ်ႇၶမ်း မေႃသွၼ်ၵဝ်ႇ ဝၢၼ်ႈဝဵင်းၶုမ်ႇ လၢတ်ႈဝႃႈ- ၽူႈယႂ်ႇၵူၼ်းလူင်လႄႈ ၸုမ်းပေႃႈမႄႈၵူၼ်းမိူင်း တင်းသဵင်ႈ ႁူမ်ႈၵၼ်ၵေႃႇသၢင်ႈၶူဝ်ၼႆႉ ယဝ်ႉတူဝ်ႈလီငၢမ်းလႄႈ မီးၽွၼ်းလီတႃႇၵူၼ်းမိူင်းတႄႉတႄႉ- ဝႃႈၼႆ။

ၶူဝ်မႂ်ႇတူၼ်ႈႁုင်းၼႆႉ တႄႇႁဵတ်းမႃးမိူဝ်ႈဝၼ်းတီႈ 27/04/2014 ၸႂ်ႉၶၢဝ်းယၢမ်းၵေႃႇသၢင်ႈပီပၢႆ၊ ယၢဝ်း 560 ထတ်း၊ ၵႂၢင်ႈ 15 ထတ်းၶိုင်ႈ၊ ႁပ်ႉၼမ်ႉၼၵ်းလႆႈ 30 တၼ်ႊလူင်းတႂ်ႈ- ၼႆယဝ်ႉ။