သိုၵ်းမၢၼ်ႈဢမ်ႇပွင်ႇၶၢဝ်ႇသေ ၶဝ်ႈၼႂ်း ၼႃႈလိၼ် ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်း ၸိုင်ႈတႆးလႄႈ လႆႈပဵၼ်ပၢင်တိုၵ်းၵၼ်။ သိုၵ်းမၢၼ်ႈယိုဝ်းၵွင်ႈလူင်သႂ်ႇ တပ်ႉပၢင်သဝ်း SSPP/SSA ထႅင်ႈ။

တပ်ႉသိုၵ်းၸိုင်ႈတႆး SSPP/SSA တူင်ႉၼိုင်ၵၢၼ်သိုၵ်း

မိူဝ်ႈဝၼ်းတီႈ 07/08/2015 ၵၢင်ၼ်ႂ 7 ၵၢင်ၼႂ် 9:00 မူင်း သိုၵ်းမၢၼ်ႈလုၵ်ႈတၢင်းမိူင်းၼွင် ၶီႇလူတ်ႉၶိူင်ႈ 6 လမ်း မုင်ႈၼႃႈၸူး တၢင်း တပ်ႉၵိဝ်ႇမွၵ်ႇၶၢဝ် တပ်ႉပၢင်သဝ်းၶွင် ပႃႊတီႊမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး (SSPP/SSA)  ဢၼ်မီးၾၢႆႇၸၢၼ်းဝၢၼ်ႈႁႆး ။  ၽႃႇၺႃးသၢႆသိုၵ်း SSPP/SSA တပ်ႉၵွင် 322 ဢဵၼ်ႁႅင်း 25 ၵေႃႉ လုၵ်ႉၾၢႆႇတူၵ်းတၢင်းၶၢမ်ႈၵႂႃႇၾၢႆႇဢွၵ်ႇတၢင်း၊  ယွၼ်ႉပိူဝ်ႈဢမ်ႇပွင်ႇၶၢဝ်ႇၵၼ် ၶိုတ်းတၼ်းလႄႈ ႁူမ်ႇလူမ်ႈၾၢႆႇလင် ဢမ်ႇတၼ်းၶၢမ်ႈတၢင်းပူၼ်ႉ၊ သိုၵ်းမၢၼ်ႈၽႅဝ်သႂ်ႇသေ လႆႈပဵၼ်ပၢင်တိုၵ်းၵၼ်။ ၾၢႆႇသိုၵ်းမၢၼ်ႈ တၢႆထင်တီႈသွင်ၵေႃႉ-  ၸဝ်ႈၼႃႈတီႈၾၢႆႇတပ်ႉသိုၵ်းၸိုင်ႈတႆး လၢတ်ႈ။

ပၢင်တိုၵ်း ပဵၼ်တီႈၵွင်းမူးယႃႉတႂ်ႈ ဢၼ်မီး ၼႂ်းၵႄႈၵၢင် ဝၢၼ်ႈပၢင်ႇဝူဝ်းလႄႈမူၺ်ႇတေႃႇဝဵင်းၵဝ်ႇ ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။

ဝၢႆးသေပဵၼ်ပၢင်တိုၵ်းတီႈ ၵွင်းမူးယႃႉတႂ်ႈယဝ်ႉ ယၢမ်းၵၢင်ဝၼ်း 12:20 သိုၵ်းမၢၼ်ႈ လုၵ်ႉတီႈႁိမ်းတပ်ႉၵိဝ်ႇမွၵ်ႇၶၢဝ်သေ ယိုဝ်းၵွင်ႈလူင် 120mm ယိုဝ်းသႂ်ႇတပ်ႉ ဢၼ်မီးႁိမ်းၵွင်းမူးလွႆၼၼ်ႉ- ဝႃႈၼႆ။

"သိုၵ်းမၢၼ်ႈ ယိုဝ်းၵွင်ႈလူင်သႂ်ႇ 5 လုၵ်ႈ။ တႅၵ်ႇ  4 လုၵ်ႈၵူၺ်း။ တိူဝ်ႉၺႃးဝူဝ်းတူဝ်ၼိုင်ႈတၢႆ  ။ ဝၢႆးလင်ပၢင်တိုၵ်းၼႆႉၵေႃႈ  ၾၢႆႇသိုၵ်းမၢၼ်ႈ ယင်းတိုၵ်ႉမီးလွင်ႈထႅမ်ႁႅင်းသိုၵ်းယူႇ" ၸဝ်ႈၼႃႈတီႈ တီႈငဝ်ႈငုၼ်းဝၢၼ်ႁႆး လၢတ်ႈၼႄၼင်ႇၼႆ။

သိုၵ်းမၢၼ်ႈ ဢၼ်လႆႈပဵၼ်ပၢင်တိုၵ်းၵၼ်တင်း တပ်ႉသိုၵ်းၸိုင်ႈတႆးၼႆႉ ပဵၼ် ၶမယ 575  မိူင်းပၼ်ႇ၊ ၸဝ်ႈႁၢၼ် (ပူဝ်ႇမူး) ဝိၼ်းၵျေႃႇဢူး ဢွၼ်ႁူဝ် ၊ ၶမယ 575 ၼႆႉ ယူႇၾၢႆႇတႂ်ႈ ငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) 17 မိူင်းပၼ်ႇ။

ၽူႈၵွၼ်းတပ်ႉၼႂ်း SSPP/SSA ၸဝ်ႈၼိုင်ႈလၢတ်ႈဝႃႈ -“သိုၵ်းမၢၼ်ႈဢဝ်သိုၵ်း ၽႅၼ်ၵၢၼ်လၢႆးတိုၵ်း (ပိဝ်ႇႁႃႇ)          2 ပိဝ်ႇႁႃႇ၊ တပ်ႉၵွင် 7 တပ်ႉၵွင် မႃးလွမ်ႉႁွပ်ႈဝၢၼ်ႈႁႆးသေ  ဢဝ်လၢႆးၵူႈလၢႆးလၢႆး မႃးႁိပ်ႇၽိုတ်ႉ ႁဵတ်းႁႂ်ႈတူင်ႉၼိုင်ၵႂႃႇမႃးယၢပ်ႇ၊ မိူၼ်ၼင်ႇ ၵူၼ်းမႄးတႃႈမႄးတၢင်းၸိူဝ်းၼႆႉၵေႃႈ ပဵၼ်သိုၵ်းမၢၼ်ႈ ၼုင်ႈၶူဝ်းၵူၼ်းမိူင်းလွၼ်ႉလွၼ်ႉ။ ပႂ်ႉဢဝ်ၶၢဝ်ႇသိုၵ်းတႆး၊ ပေႃးမီးလွင်ႈတုမ်ႉတိူဝ်ႉၵၼ် ၼႄးသိုၵ်းတႆး ပဵၼ်ၾၢႆႇၽိတ်းလုမ်းလုမ်း” ဝႃႈၼႆ။

ပႃႊတီႊမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၼႆႉ လူင်းလၢႆးမိုဝ်းၵိုတ်းတိုၵ်း ၸၼ်ႉမိူင်းႁူမ်ႈတုမ် တင်းလူင်ပွင်ၸိုင်ႈမၢၼ်ႈ  မိူဝ်ႈပီ 2012 ။ ၵူၺ်းၵႃႈ တေႃႇထိုင်မိူဝ်ႈလဵဝ် သဵင်ၵွင်ႈယင်းပႆႇယဵၼ်။ မိူဝ်ႈဝူင်ႈပူၼ်ႉမႃးၵေႃႈ ပဵၼ်ပၢင်တိုၵ်းၵၼ်တီႈ တပ်ႉလွႆၼၢႆး ၼႂ်းၸႄႈဝဵင်းမိူင်းသူႈ ၼႂ်းၼႃႈလိၼ် SSPP/SSA ၵုမ်းၵမ်ၼင်ႇၵဝ်ႇ။

ၶၢဝ်းသိုၵ်းမၢၼ်ႈ မႃးယိုဝ်းတပ်ႉသိုၵ်းၸိုင်ႈတႆးၼႆႉ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ၵူႈမူႇၵူႈၸုမ်းသမ်ႉ တိုၵ်ႉၶတ်းၸႂ် တႃႇလူင်းလၢႆးမိုဝ်း ၵိုတ်းတိုၵ်းၵၼ်တင်းၸိုင်ႈမိူင်း။ ဢုပ်ႇၵၼ်တင်းလူင်ပွင်ၸိုင်ႈယူႇတီႈ  ဝဵင်းတႃႈၵုင်ႈ။ ၸုမ်းၽူႈတၢင်တူဝ် SSPP/SSA ယင်းပႆႇပွၵ်ႈမႃးၶိုၼ်း။

ၽူႈၵွၼ်းတပ်ႉၼႂ်းတပ်ႉသိုၵ်း SSPP/SSA ထႅင်ႈၸဝ်ႈၼိုင်ႈၵေႃႈ လၢတ်ႈဝႃႈ - " ၽွင်းၶတ်းၸႂ် တႃႇလွင်ႈငမ်းယဵၼ် သိုၵ်းမၢၼ်ႈသမ်ႉဢဝ်ၵွင်ႈလူင်ယိုဝ်းသႂ်ႇ ငဝ်ႈငုၼ်းဝၢၼ်ႈႁႆး ။ ပၼ်ႁႃဢၼ်လဵၵ်ႉလဵၵ်ႉၼၼ်ႉ ႁဵတ်း ႁႂ်ႈပဵၼ်လွင်ႈယႂ်ႇ၊ ၼႆႉပဵၼ်လွင်ႈသိုၵ်းမၢၼ်ႈ ဢမ်ႇၶႂ်ႈလႆႈလွင်ႈငမ်းယဵၼ်ၵူၺ်း"-  ဝႃႈၼႆ။

လိူဝ်သေၼၼ်ႉ ပၢင်လိူၵ်ႈတင်ႈ ပီ 2015 ၸမ်တေထိုင်ယဝ်ႉလႄႈ ၽူႈလဵပ်ႈႁဵၼ်းၵၢၼ်မိူင်းၶဝ် လၢတ်ႈဝႃႈ  ပၢင်လိူၵ်ႈတင်ႈၼႆႉ ၼင်ႇႁိုဝ်ၵူၼ်းဝၢၼ်ႈၵူၼ်းမိူင်း ပေႃးတေဢမ်ႇၸၢင်ႈၵႂႃႇတွတ်ႈၶႅပ်းၵၢင်ၸ်ႂၼၼ်ႉ သိုၵ်းမၢၼ်ႈ တိုၼ်းႁႃလၢႆးတၢင်းသေ သုၵ်ႉယုင်ႈယႃႉၵဝ်း - ဝႃႈၼႆ။