ၼုမ်ႇႁၢႆးၸၢႆးယိင်းတႆး ၸိူဝ်းႁဵၼ်းလိၵ်ႈလၢႆး ယူႇၼႂ်း ဝဵင်းၵဵင်းမႂ်ႇ မိူင်းထႆးႁူမ်ႈၵၼ် ယွၼ်းႁပ်ႉငိုၼ်းတွင်း လႄႈၶူဝ်းၶွင် တီႈၸဝ်ႈၽူႈမီးၼမ်ႉၸႂ်ၶႂ်ႈၸွႆႈ ထႅမ်ၵူၼ်းထူပ်းၽေးၼမ်ႉထူမ်ႈ ၼႂ်းမိူင်းတႆး မိူင်းမၢၼ်ႈ ။ 

ၸၢႆးသႅင်မၢဝ်း လုၵ်ႈႁဵၼ်းၸၼ်ႉၸွမ် ၵဵင်းမႂ်ႇ ဢွၼ်ဢူၺ်းၵေႃႉၵူၼ်းၼုမ်ႇ တႆး၊ ယၢင်း၊ ၶၢင်လႄႈ ႁႅင်းၵၢၼ်ယၢၼ်မိူင်းၵမ်ႈၽွင်ႈ ႁူမ်ႈၵၼ် ၵေႃႇတင်ႈ ၸုမ်းၸွႆႈထႅမ်ၵူၼ်းထူပ်းၽေး ၼႂ်းမိူင်းႁူမ်ႈတုမ်မၢၼ်ႈ ၼႆသေ ၸူဝ်းၵၼ်ပႂ်ႉႁပ်ႉၶူဝ်းၵမ်ႉၸွႆႈ တူဝ်ႈမိူင်းၵဵင်းမႂ်ႇ ။ မိူၼ်ၼင်ႇၸွမ်းၵၢတ်ႇၼတ်ႉၸွမ်းၼႂ်းပွၵ်ႉၼႂ်းယွမ်ႇ ၊ ႁူင်းၶၢႆၶူဝ်း Lotus/ BigC  ၊ ဢိၵ်ႇ Plaza လႄႈ ၸွမ်းသဵၼ်ႈတႃႈသၢႆတၢင်း တႄႇဢဝ်ဝၼ်းတီႈ 04 ထိုင်  14 လိူၼ်ဢေႃႊၵတ်ႊ 2015 တႃႇၶၢဝ်းတၢင်း 10 ဝၼ်း ။ ႁပ်ႉၸဵမ် ငိုၼ်းတွင်း၊ ၶူဝ်းၼုင်ႈတၢင်းဝႆ ၊ တၢင်းၵိၼ်တၢင်းယႅမ်ႉ  ၊ဢိၵ်ႇ ယႃႈယႃ ၸဵမ်ၸိူဝ်းၼႆႉ။

ၸုမ်းလုၵ်ႈႁဵၼ်းတႆးၼႆႉ လႆႈသၢၼ်မိုဝ်းၵၼ်တင်းၸုမ်း Green and Clean ဢၼ်ပဵၼ်ၸုမ်းႁႅင်းၵၢၼ် ၵူၼ်းမိူင်းမၢၼ်ႈ  ၸိူဝ်းႁဵတ်းၵၢၼ်ယူႇတီႈမိူင်း  သိင်ႊၵႃႊပူဝ်ႊ Singapore  လႄႈၸုမ်းMyanmar Children Focus Group ဢၼ်ပၵ်းလုမ်းဝႆႉ တီႈတႃႈၵုင်ႈ ပိူဝ်ႈဢဝ်ငိုၼ်းလႄႈ ၶူဝ်းၶွင်ၵႂႃႇမွပ်ႈ ယိုၼ်ႈပၼ် ၵူၼ်းၸိူဝ်း ထူပ်းၽေး ၵူႈၸႄႈမိူင်းလႄႈတိူင်း ၼႂ်းမိူင်းႁူမ်ႈတုမ်မၢၼ်ႈ။

ယိင်းၵွၼ်တႆး ၽူႈၵပ်းသၢၼ်ၵေႃႁူမ်ႈသၢင်ႈလုၵ်ႈႁဵၼ်းၸၼ်ႉၸွမ်တႆးၼႂ်းၵဵင်းမႂ်ႇ လၢတ်ႈဝႃႈ ယိူင်းဢၢၼ်းပိူဝ်ႈတႃႇ ၸွႆႈထႅမ်ၵူၼ်း ထူပ်းၽေးၼႂ်းမိူင်းႁူမ်ႈတုမ်မၢၼ်ႈ တင်းသဵင်ႈ ၸွႆႈလႆႈၵႃႈႁိုဝ်ၵေႃႈ တေၸွႆႈၵႂႃႇလူၺ်ႈတီႈဢမ်ႇၸႅၵ်ႇၽႄဝႃႈ ပဵၼ်ၸၢဝ်းၶိူဝ်းသင်။

သိုပ်ႇလၢတ်ႈထႅင်ႈဝႃႈ - ၽေးသၽႃႇဝ ဢၼ်ပဵၼ်မႃး ယူႇယၢမ်းလဵဝ်ၼႆႉ မၼ်းပဵၼ် ယွၼ်ႉၵၢၼ် တႅပ်းတူၼ်ႈမႆႉ ၊ ႁဵတ်းသၢင်ႈၾၢႆ၊ ယွၼ်ႉဢမ်ႇမီးတူၼ်ႈမႆႉၼမ် လႄႈပေႃး ၾူၼ်တူၵ်းလူင်းမႃး ဢမ်ႇမီးဢၼ်လုတ်ႇၼမ်ႉ ၊  ၸၼ်ၼမ်ႉ။ ၸင်ႇပဵၼ်မႃးၽေးသၽႃႇဝ ယႂ်ႇလူင်ၸိူင်ႉၼင်ႇၼႆ ။ ဢၼ်လႆႈတုမ်ႉတိူဝ်ႉတႄႉတႄႉ သမ်ႉပဵၼ်ၵူၼ်းဝၢၼ်ႈ ၊ ၵွပ်ႈၼၼ် ႁႂ်ႈမေႃ ႁၵ်ႉသႃသိင်ႇဝႅတ်ႉလွမ်ႉ။ ႁူမ်ႈၵၼ်ၵႅတ်ႇၵင်ႈၽေး ၸဝ်ႈငိုၼ်းသႃးၸိူဝ်းမႃး   ႁဵတ်းႁၢႆႉတေႃႇသိင်ႇဝႅတ်ႉလွမ်ႉ ၼႂ်းၸိုင်ႈတႆး- ဝႃႈၼႆ။

ယိင်းလႃႉဝုၼ်း ၽူႈႁူမ်ႈၵေႃႇတင်ႈၸုမ်း လၢတ်ႈဝႃႈ  ၽေးသၽႃႇဝ ဢၼ်ဝႃႈၼႆႉ ၽႂ်ၵေႃႈဢမ်ႇႁႄႉလႆႈ ။  မိူဝ်ႈမၼ်းပဵၼ်မႃးယဝ်ႉၵေႃႈ ယူႇတီႈၸုမ်းၼႆႉသေ  ၼင်ႇၵႃႈပွင်ပဵၼ်လႆႈၼၼ်ႉ တေၶတ်းၸႂ်ၸွႆႈထႅမ်ၵႂႃႇယူႇဝႃႈၼႆ။

ငဝ်းလၢႆးၼမ်ႉထူမ်ႈၼႂ်းမိူင်းတႆး မိူင်းၸၢဝ်းၶိူဝ်းတင်းၼမ်  ယင်းတိုၵ်ႉလီမႆႈၸႂ်ယူႇ။ မိူဝ်ႈပူၼ်ႉမႃး 2 ဝူင်ႈၼၼ်ႉ ၼမ်ႉထူမ်ႈ လိၼ်ၵူၼ်ႇပင်း  ၼႂ်းပတ်းပိုၼ်ႉမိူင်းႁူမ်ႈတုမ်မၢၼ်ႈ ႁဵတ်းႁႂ်ႈၵူၼ်းတၢႆဢၢၼ်ႇႁူဝ်ပၢၵ်ႇၵေႃႉ ၊ ႁၢမ်းတီႈယူႇ ၊ ၶူဝ်းၼုင်ႈ၊တၢင်းၵိၼ်ယမ်ႉ ဢၢၼ်ႇႁူဝ်သႅၼ်ၵေႃႉ တီႈၼႃးလူႉၵွႆဢၢၼ်ႇႁူဝ်လၢၼ်ႉဢေႊၶိူဝ်ႊ ။ တီႈဢိူင်ႇၵဵင်းလၢပ်ႈ ၊ ပႃႇလႅဝ်းလႄႈမိူင်းယွင်းၼႂ်းၸေႈတွၼ်ႈတႃႈၶီႈလဵၵ်း ၼႂ်းၸိုင်ႈတႆးပွတ်းဢွၵ်ႇၶူင်းၵေႃႈ ၼမ်ႉထူမ်ႈလိူဝ်ႁႅင်းလႄႈ ၵူၼ်းမိူင်းယင်းတိုၵ်ႉလူဝ်ႇတၢင်းၸွႆႈထႅမ်ယူႇတၢင်းၼမ်တၢင်းလၢႆ။