ၽွင်းယၢမ်း ဢၼ်လူင်ပွင်ၸိုင်ႈလႄႈ ၸုမ်းၸၢဝ်းၶိူဝ်း ႁူမ်ႈၵၼ်ၸတ်းႁဵတ်း ပၢင်ၵုမ်လူင် တႃႇၵိုတ်းယိုဝ်း ပတ်းပိုၼ်ႉတူဝ်ႈမိူင်း ပွၵ်ႈၵမ်းတီႈ 9 (ဝၼ်းတီႈ 2) ယူႇတီႈဝဵင်းတႃႈၵုင်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈ ယိုဝ်းၵွင်ႈလူင်သႂ်ႇ တပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) တီႈၼႂ်းၸႄႈဝဵင်းမိူင်းသူႈ။

လွႆဢၼ်မီးတၢင်းၵႂႃႇၵေးသီး- ဝၢၼ်ႈႁႆး၊ ၼိူဝ်သၼ်လွႆၸိူဝ်းၼႆႉ တပ်ႉသိုၵ်းမၢၼ်ႈလႄႈတပ်ႉသိုၵ်းတႆး SSPP/SSA ပၵ်းသဝ်းယူႇဝႆႉ ၸွမ်ႇၸိမ်ၵၼ်

ဝၼ်းတီႈ 07/08/2015 (မိူဝ်ႈၼႆႉ) တပ်ႉသိုၵ်း လူင်ပွင်ၸိုင်ႈမၢၼ်ႈ ယိုဝ်းၵွင်ႈလူင်သႂ်ႇတီႈ တပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) တီႈတပ်ႉပၢင်သဝ်း ၵိဝ်ႇလွႆမွၵ်ႇၶမ်း ၼႂ်းၸႄႈဝဵင်းမိူင်းသူႈ၊ ဢၼ်မီးတီႈတၢင်းၽႄၵႂႃႇ ဝၢၼ်ႈႁႆး (ငဝ်ႈငုၼ်း SSPP/SSA) ။

မိူဝ်ႈၼႆႉ ယၢမ်းၵၢင်ၼႂ် 9 မူင်းယိုဝ်းၵမ်းၼိုင်ႈ၊ ၵၢင်ဝၼ်းတဵင်ႈ ယိုဝ်းထႅင်ႈၵမ်းၼိုင်ႈ- တူဝ်တႅၼ်း SSPP/SSA ဢၼ်ႁွတ်ႈတီႈဝဵင်းတႃႈၵုင်ႈ ၵေႃႉၼိုင်ႈ လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

ၽူႈၵွၼ်းၼႃႈသိုၵ်း ဢၼ်ႁွတ်ႈတႅဝ်းၼႃႈသိုၵ်း ၼႂ်းၸႄႈဝဵင်းမိူင်းသူႈ ၵေႃႉၼိုင်ႈၵေႃႈလၢတ်ႈဝႃႈ- “သိုၵ်းမၢၼ်ႈၶဝ်လုၵ်ႉတီႈတၢင်းၽႄသေ ယိုဝ်းၵွင်ႈလူင်၊ ပဵၼ်ၵွင်ႈလူင် 105mm ၊ ဢဵၼ်ႁႅင်းသိုၵ်းမၢၼ်ႈ မီးမွၵ်ႈ 60 ပၢႆ၊ ၶဝ်ၶိုၼ်ႈမႃးယိုဝ်းတပ်ႉပၢင်သဝ်းႁဝ်းၶႃႈလႄႈ ၸင်ႇပဵၼ်ပၢင်တိုၵ်းၵၼ်။ ဝၢႆးသေလႆႈယိုဝ်းၵၼ် ၵမ်းၼိုင်ႈယဝ်ႉၵေႃႈ ၾၢႆႇသိုၵ်းမၢၼ်ႈၶဝ်ဢဝ်ၵွင်ႈလူင် ယိုဝ်းသႂ်ႇတပ်ႉပၢင်သဝ်းႁဝ်းၶႃႈ။ မၢၵ်ႇလူင်သိုၵ်းမၢၼ်ႈ ၵႂႃႇတူၵ်း ႁိမ်းဝၢၼ်ႈၵူၼ်းၵေႃႈမီး၊ ၶဝ်တိုၼ်းတင်ႈၸႂ်ယိုဝ်းၶဝ်ႈၵႂႃႇ တၢင်းဝၢၼ်ႈၵူၼ်း၊ ပေႃးဢမ်ႇၼၼ် မၢၵ်ႇလူင်တေႁဵတ်းႁိုဝ်တူၵ်းသႂ်ႇ ႁိမ်းဝၢၼ်ႈၵူၼ်း- ဝႃႈၼႆ။

ပၢင်တိုၵ်းယိုဝ်းၵၼ် ဢၼ်ပဵၼ်ဝၼ်းမိူဝ်ႈၼႆႉ မီးလွင်ႈဝၢတ်ႇၸဵပ်းလူႉတၢႆၵႃႈႁိုဝ်ၼၼ်ႉ ယင်းပႆႇလႆႈႁူႉ၊ လုၵ်ႉတီႈတိူင်းသိုၵ်းဝၼ်းဢွၵ်ႇၵၢင် (ယလၶ) ၶူဝ်လမ်သေ ယင်းသူင်ႇဢဵၼ်ႁႅင်းသိုၵ်းၶိုၼ်ႈမႃး တႃႇတေၽိူမ်ႉထႅမ် ၼႂ်းၸႄႈဝဵင်းမိူင်းသူႈယူႇ- ၸၢႆးမွၵ်ႇ ၵူၼ်းၵႂႃႇတၢင်းၵေႃႉၼိုင်ႈ ဢၼ်တေၵႂႃႇမိူင်းသူႈ လၢတ်ႈ။

ၽူႈမီးၸၼ်ႉ တီႈငဝ်ႈငုၼ်း SSPP/SSA ၸဝ်ႈၼိုင်ႈၵေႃႈလၢတ်ႈဝႃႈ- ပၢင်တိုၵ်းဢၼ်ပဵၼ်ယူႇၼႆႉ လႅပ်ႈၶဝ်ၶႂ်ႈပၼ်ႁႅင်းဢီးတီႈ SSPP/SSA သေလွင်ႈလွင်ႈ။ ၵူၺ်းၵႃႈ မႅၼ်ႈၽွင်းတိုၵ်ႉဢုပ်ႇဢူဝ်း လွင်ႈငမ်းယဵၼ်ယူႇလႄႈမႃးယိုဝ်းၸိူင်ႉၼႆၼႆႉ ႁဝ်းၶႃႈတိုၼ်းတေဢဝ်တၢင်ႇလၢတ်ႈၵႂႃႇၼႂ်း ပၢင်ဢုပ်ႇၵုမ်လွင်ႈငမ်းယဵၼ်- ဝႃႈၼႆ။