ၵေႃႁူမ်ႈသၢင်ႈၵူၼ်းၼုမ်ႇတႆး (TYN) ၸတ်းႁဵတ်း ပၢင်ႁူပ်ႉထူပ်းဢုပ်ႇၵုမ် လႅၵ်ႈလၢႆႈတၢင်းႁူႉ တီႈဝဵင်းသႅၼ်ဝီ၊ လႆႈၸႂ်ၶွတ်ႇၽွတ်ႈၶွမ်ႊမတီႊ ၸႄႈဝဵင်းသႅၼ်ဝီ။

ပၢင်ႁူပ်ႉထူပ်းၵူၼ်းၼုမ်ႇ ၵေႃႁူမ်ႈသၢင်ႈ ၵူၼ်းၼုမ်ႇတႆး (Tai Youth Network-TYN) ၼႆႉ လႆႈၸတ်းၵႂႃႇ မိူဝ်ႈဝၼ်းတီႈ 05-06-08/2015 ၶၢဝ်းတၢင်း 2 ဝၼ်း။ ၵူၼ်းၼုမ်ႇၸိူဝ်းၶဝ်ႈႁူမ်ႈတင်းမူတ်းမီးႁိမ်းၸမ် 150 ၵေႃႉ။ TYN လႆႈဝွၵ်ႇၵၢဝ်ႇ(ၽိတ်ႈမွၵ်ႇ)ထိုင် ၽူႈမီးပိုၼ်ႉႁူႉ ၽူႈလူင်ႉလႅၼ်ႇၶဝ်မႃး ၵၢဝ်ႇလၢတ်ႈၶေႃႈၵႂၢမ်းပၼ် မိူၼ်ၼင်ႇလွၵ်းလၢႆးတႃႇတေႁႃၵိၼ်လဵင်ႉတွင်ႉ၊ လၢႆးတႃႇတေၵႄႈလိတ်ႈပၼ်ႁႃ ၼႂ်းဝၢၼ်ႈၼႂ်းဢိူင်ႇ၊ လၢႆးပိူင်ၶွတ်ႇၽွတ်ႈၵူၼ်းၼုမ်ႇ ဢိၵ်ႇလၢႆးပိူင်ၶွတ်ႇၽွတ်ႈမူႇၸုမ်း ၸိူဝ်းၼႆႉ- ၸၢႆးဝၼ်းလႅင်း ၽူႈဢွၼ်ႁူဝ် တူင်ႉၼိုင် TYN လၢတ်ႈ။

ၸၢႆးလွႆၶမ်းပၢင်ႇ TYN ဢၼ်လႆႈၶဝ်ႈႁူမ်ႈပၢင်ၵုမ် လၢတ်ႈဝႃႈ- “ၵူၼ်းၼုမ်ႇၼႆႉ မီးယူႇၵူႈဝၢၼ်ႈၵူႈဝဵင်း၊ ၵၢၼ်ၽႂ်ၵၢၼ်မၼ်း တူင်ႉၼိုင်ယူႇႁင်းၽႂ်ႁင်းမၼ်း။ တေႃႈလဵဝ်ၼႆႉ ႁဝ်းၶႃႈၵေႃႁူမ်ႈသၢင်ႈၵူၼ်းၼုမ်ႇ တင်းၵူၼ်းၼုမ်ႇတီႈသႅၼ်ဝီၼႆႉ လႆႈႁူမ်ႈမိုဝ်းၵၼ်သေ ႁဵတ်းၵၢၼ်ၵႂႃႇဝၼ်းတႃမိူဝ်းၼႃႈ။ ႁဝ်းၶႃႈလႆႈႁွင်ႉၵူၼ်းၼုမ်ႇ မႃးဢုပ်ႇၵုမ်ၵၼ်။ ဢဵၼ်းဢၢၼ်းတႄႉ ပိူဝ်ႈတႃႇၶွတ်ႇၽွတ်ႈၶွမ်ႊမတီႊသေ တူင်ႉၼိုင်လူၺ်ႈၼမ်ႉၵတ်ႉၵူၼ်းၼုမ်ႇ။ မိူၼ်ၼင်ႇ ၼႂ်းမိူင်းသႅၼ်ဝီၼႆႉ မီးၸုမ်းၵူၼ်းၼုမ်ႇလၢႆလၢႆၸုမ်း၊ ၵူၺ်းၵႃႈ ဢၼ်လႆႈႁူမ်ႈမိုဝ်းၵၼ် ပဵၼ်ၸုမ်းယႂ်ႇၸုမ်းလူင်ၸိူင်ႉၼႆသေ ႁဵတ်းၵၢၼ်တႄႉပႆႇမီး။ ယွၼ်ႉၼႆ ၶႂ်ႈဢဝ်ၵူၼ်းၼုမ်ႇၼႂ်းသႅၼ်ဝီၼႆႉ မႃးႁူမ်ႈတုမ်ၵၼ် ပဵၼ်မူႇလဵဝ်ၸုမ်းလဵဝ်သေ ႁဵတ်းသၢင်ႈၵၢၼ်ငၢၼ်းၵႂႃႇ”- ဝႃႈၼႆ။

“ပေႃးလိူၼ်ၻီႊသႅမ်ႊၿိူဝ်ႊ ဢၼ်တေထိုင်မႃးၼႆႉ ႁဝ်းၶႃႈၸုမ်းၵူၼ်းၼုမ်ႇ TYN  တေၸတ်းႁဵတ်း ပၢင်ၶုၵ်းထူပ်း ၶွတ်ႇၽွတ်ႈမူႇၸုမ်းမႃး ၶွပ်ႈၶူပ်ႇ 2 ပီ။ ပေႃးဝႃႈႁဝ်းၸတ်းႁဵတ်းပၢင်ပွႆးၸိုင် ၵူၼ်းၼုမ်ႇ သႅၼ်ဝီ ႁႂ်ႈလႆႈပဵၼ်မူႇပဵၼ်ၸုမ်းသေ မႃးၶဝ်ႈႁူမ်ႈၸွမ်းႁဝ်းၶႃႈ၊ ၵွပ်ႈၼၼ်လႄႈ လႆႈမႃးဢုပ်ႇၵုမ်ၵၼ်တီႈၼႆႈ”- ၸၢႆးလွႆၶမ်းပၢင်ႇ လၢတ်ႈ။

လိူဝ်သေၼၼ်ႉ မၼ်းၸၢႆးလၢတ်ႈၼႄထႅင်ႈဝႃႈ- ၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) ၼႆႉ တေၸတ်းႁဵတ်းပၢင်သွၼ်ပူၵ်းပွင် (ယုၵ်ႉမုၼ်း) ၼမ်ႉၵတ်ႉၵူၼ်းၼုမ်ႇ ၵႂႃႇထႅင်ႈတၢင်းၼႃႈတိၵ်းတိၵ်း၊ တေပူင်သွၼ်ပၼ် ၵဵဝ်ႇၵပ်းလွင်ႈၵၢၼ်မိူင်း၊ ၵၢၼ်ပိုၼ်ႉႁူႉပၢႆးႁၼ်ၵူႈလွင်ႈလွင်ႈလႄႈ ၵၢၼ်ၸိူဝ်ႉၸၢတ်ႈ ၸိူဝ်းၼႆႉ- ဝႃႈၼႆ။

ပၢင်ၵုမ် ၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) ၼႆႉ ၸတ်းႁဵတ်းမႃး 2 ဝၼ်း၊ ဝၼ်းတီႈ 06/08/2015 လႆႈၶွတ်ႇၽွတ်ႈၶွမ်ႊမတီႊၸႄႈဝဵင်း ယဝ်ႉတူဝ်ႈလီငၢမ်း။ ၽူႈၶဝ်ႈၶွမ်ႊမတီႊမီး 19 ၵေႃႉ၊ ၼႂ်း 19 ၵေႃႉၼႆႉ တေဢွၼ်ႁူဝ်ၼမ်းၼႃႈ ၵူၼ်းၼုမ်ႇၼႂ်းသႅၼ်ဝီသေ တူင်ႉၼိုင်ႁဵတ်းၵၢၼ်ၵႂႃႇ။

ၸၢႆးဝၼ်းလႅင်း လၢတ်ႈထႅင်ႈဝႃႈ- ဢၼ်ၵေႃႁူမ်ႈသၢင်ႈၵူၼ်းၼုမ်ႇတႆး (TYN) တူင်ႉၼိုင်မႃးၸိူဝ်းၼႆႉ ဢဵၼ်းဢၢၼ်းၶႂ်ႈႁႂ်ႈၵူၼ်းၼုမ်ႇၵူႈၸုမ်းၸုမ်း ၵူႈတီႈတီႈမႃးႁူမ်ႈမိုဝ်းၵၼ် ၵွင်ႉသၢၼ်ၵၼ်သေႁဵတ်းၵၢၼ်ၵႂႃႇ၊ ပေႃးဝႃႈမီးပၢင်သွၼ်ပူၵ်းပွင်ၼမ်ႉၵတ်ႉၸိူဝ်ႉၼႆႉၵေႃႈ ႁႂ်ႈလႆႈမႃးၶဝ်ႈႁူမ်ႈပၢင်သွၼ်၊ ပေႃးပၢင်သွၼ်ယဝ်ႉတူဝ်ႈၵႂႃႇၵေႃႈ ႁႂ်ႈလႆႈမိူဝ်းႁဵတ်းၵၢၼ် ဢၼ်ပဵၼ်ၽွၼ်းလီပၼ် ၼႂ်းၸႄႈဝဵင်းလႄႈၼႂ်းတူင်ႇတၢင်ႇပိုၼ်ႉတီႈၽႂ်မၼ်း၊ ႁႂ်ႈလႆႁဵတ်းၵၢၼ်ၵႂႃႇၵႂၢင်ႈၵႂၢင်ႈၶႂၢင်ၶႂၢင်- ဝႃႈၼႆ။