ႁၢင်ႈႁေႃၸဝ်ႈၾႃႉလူင် မိူင်းယွင်ႁူၺ်ႈ ၸဝ်ႈၶမ်းသိူၵ်ႈ ႁိုဝ် ၸဝ်ႈသူၺ်ႇတႅၵ်ႈ၊ (ၵေႃႉဢၼ်ပဵၼ်ၸွမ်ၸိုင်ႈ ၵေႃႉႁႅၵ်ႈ ၸိုင်ႈမိူင်းႁူမ်ႈတုမ်မၢၼ်ႈ) ဢၼ်မီးယူႇတီႈပွၵ်ႉ ၼၼ်ႇတႃႇဝၼ်ႇ ဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ၼၼ်ႉ ၵေႃႉပဵၼ်လုၵ်ႈယိင်းဢွၼ်ႇ မၼ်းၸဝ်ႈ၊ ၸဝ်ႈယိင်းႁေႇမႃႇတႅၵ်ႈ ယွၼ်းၶိုၼ်း။

ႁေႃလူင် မိူင်းယွင်ႈႁူၺ်ႈ

လိၵ်ႈဢၼ်မၼ်းၸဝ်ႈ (ၸဝ်ႈယိင်းႁေႇမႃႇတႅၵ်ႈ) ယွၼ်းဢဝ်ႁၢင်ႈႁေႃၶိုၼ်းၼႆႉ တၢင်ႇထိုင်ၸွမ်ၽွင်းလူင်မိူင်းတႆး မိူဝ်ႈဝၼ်းတီႈ 22/07/2015 ။ လၢတ်ႈဝႃႈ ပဵၼ်လုၵ်ႈၸဝ်ႈၾႃႉ ၵေႃႉဢၼ်ၵိုင်ႇႁပ်ႉပူၺ်ႈၶူဝ်းၶွင်ပေႃႈမႄႈ၊ မၼ်းၸဝ်ႈယုမ်ႇယမ် ၸိူင်ႉၼႆသေယွၼ်း- ၼႆယဝ်ႉ။

ယူႇတီႈၵဝ်ၶႃႈသေ ႁေႃမိူင်းယွင်ႁူၺ်ႈၼႆႉ ပဵၼ်ႁေႃပေႃႈမႄႈႁဝ်းၶႃႈလႄႈ ႁဝ်းၶႃႈၶႂ်ႈလႆႈၶိုၼ်း၊ ၸဵမ်မိူဝ်ႈမႄႈၵဝ်ၶႃႈ (ၸဝ်ႈၼၢင်းမျႃႉဝိၼ်း) ပႆႇလူႉသဵင်ႈသုတ်းမုၼ်ၵႂႃႇၼၼ်ႉၵေႃႈ ယၢမ်ႈတႅမ်ႈလိၵ်ႈတၢင်ႇထိုင် ၸွမ်ၸိုင်ႈတဵင်းၸဵင်ႇ၊ ၵူၺ်းၵႃႈ ဢမ်ႇတွပ်ႇသင်မႃး။ ၵွပ်ႈၼၼ်လႄႈ ၸွမ်းၼင်ႇပိူင်ထမ်း/တြႃး ဢၼ်ပၵ်းပိူင်မၢႆမီႈၸိုင်ႈမိူင်းမီးၼၼ်ႉသေ ဢၼ်ႁဝ်းၶႃႈပဵၼ်လုၵ်ႈလၢင်းၼႆႉ ၵိုင်ႇထုၵ်ႇလီႁပ်ႉပူၺ်ႈ ၶူဝ်းၶွင်ပေႃႈမႄႈယူႇ၊ ႁဝ်းၶႃႈယုမ်ႇယမ်ၸိူင်ႉၼႆသေ ၸင်ႇယိုၼ်ႈယွၼ်း- ဝႃႈၼႆ။

ၸဝ်ႈၼၢင်းမျႃႉဝိၼ်းၼႆႉ ပဵၼ်မေးၵေႃႉၼိုင်ႈ ၶွင်ၸဝ်ႈၶမ်းသိူၵ်ႈ ၸဝ်ႈၾႃႉလူင် မိူင်းယွင်ႁူၺ်ႈ။ လွင်ႈတၢင်ႇယွၼ်းၶိုၼ်း ႁၢင်ႈႁေႃၼႆႉ ၵမ်းၼႆႉ ပဵၼ်ပွၵ်ႈၵမ်းသွင်၊ ၵမ်းတီႈၼိုင်ႈ လႆႈယွၼ်းမိူဝ်ႈဝၼ်းတီႈ 23/07/2013 ။

ၸဝ်ႈၼၢင်း ႁေႇမႃႇတႅၵ်ႈလၢတ်ႈဝႃႈ- သင်ၸိူဝ်ႉဝႃႈ လူင်ပွင်ၸိုင်ႈမိူင်းတႆး ဢဝ်ႁေႃၼႆႉမွပ်ႈပၼ်ၶိုၼ်းၼႆၵေႃႈ တေဢဝ်ႁဵတ်းၶူဝ်းၶွင်ၵိုၵ်းမိူင်းတႆးသေ တေႁဵတ်းပဵၼ်ႁူင်းၼႄပိုၼ်းဝႆႉၵူၺ်းၼင်ႇၵဝ်ႇ။ ၵဵဝ်ႇၵပ်းလွင်ႈပိုၼ်ႉတီႈလိၼ် ဝၢင်းႁေႃတင်းသဵင်ႈၵေႃႈ ယူႇတီႈၵေႃႉဢၼ်ၵိုင်ႇထုၵ်ႇသေ ၶႂ်ႈၶိုၼ်းဢဝ် ဝၢင်းၽႅၼ်ၸတ်းၵၢၼ်ၶိုၼ်းႁင်းၵူၺ်း- ဝႃႈၼႆ။

ၾၢႆႇတႅၵ်ႈၼႃႈလိၼ်ၶဝ် ယၢမ်ႈပိုၼ်ၽၢဝ်ႇဝႃႈ- ၼႂ်းဝၢင်းႁေႃၼႆႉ မီးယူႇတၢင်းၵႂၢင်ႈ 11.29 ဢေႊၵႃႊ။ မိူဝ်ႈပီ 1969 ၼၼ်ႉ ယၢမ်ႈတတ်းဢဝ်ႁဵတ်းႁူင်းႁဵၼ်းၸၼ်ႉငဝ်ႈ တႃႇလွၵ်းၼိုင်ႈ၊ တတ်းၵႂႃႇႁဵတ်းပၢင်ပိတ်ႉ မၢၵ်ႇၼင်လွၵ်းၼိုင်ႈ၊ တတ်းႁဵတ်းလုမ်းၾၢႆႇတိတ်းတေႃႇၵပ်းသၢၼ် လွၵ်းၼိုင်ႈ။ ယၢမ်းလဵဝ်ၼႆႉ လႆႈႁူႉဝႃႈ လွၵ်းလိၼ်ဢၼ်ၵိုၵ်းၵပ်းႁေႃ ဢၼ်ႁဵတ်းဝၢင်းႁေႃႁႄႉႁွပ်ႈဝႆႉ မီးယူႇ 7.8 ဢေႊၵႃႊ။

ႁေႃၼႆႉ မိူဝ်ႈ 29/05/2013 ၼၼ်ႉ ႁွင်ႈၵၢၼ်လူင် ၾၢႆႇၼႂ်းမိူင်း ဢဝ်မွပ်ႈပၼ်တီႈ လူင်ပွင်ၸိုင်ႈမိူင်းတႆးသေ ႁဵတ်းပဵၼ်ၶိုၼ်းႁူင်းၼႄပိုၼ်း ၼႂ်းမိူင်းတႆးဝႆႉ။

ၵဵဝ်ႇၵပ်းလွင်ႈႁေႃလူင် မိူင်းယွင်ႁူၺ်ႈၼႆႉ ဝၢႆးလူင်ပွင်ၸိုင်ႈသိုၵ်းမၢၼ်ႈ ယိုတ်းဢမ်းၼၢၸ်ႈ (ဢႃႇၼႃႇ)ပီ 1962 မႃးယဝ်ႉ ၶၢႆႉလႅၵ်ႈလၢႆႈၸိုဝ်ႈမႃးလၢႆလၢႆၵမ်း၊ ပဵၼ်ႁူင်းၼႄပိုၼ်းၸဝ်ႈၾႃႉ၊ ႁူင်းၼႄပိုၼ်း ၾိင်ႈငႄႈႁိတ်ႈႁွႆး၊ ႁူင်းၼႄပိုၼ်းပုတ်ႉထၸဝ်ႈ ၸိူဝ်းၼႆႉ။

တီႈၼႂ်းႁေႃၼၼ်ႉ တမ်းဝၢင်းၼႄဝႆႉၶႅပ်းႁၢင်ႈမီး 91 ၶႅပ်း၊ ပဵၼ်ႁၢင်ႈၵဵဝ်ႇၵပ်းၸဝ်ႈၾႃႉ၊ ၶူဝ်းၼုင်ႈတၢင်းဝႆ မီး 138 ယၢင်ႇ၊ လိူဝ်ၼၼ်ႉ ၶူဝ်းတၢင်ႇၸိူဝ်ႉတၢင်ႇပိူင်ၵေႃႈ မီးထႅင်ႈ။ ပေႃးပဵၼ်ၵူၼ်းၼွၵ်ႈမိူင်း လႆႈမႃးသိုဝ်ႉၶဝ်ႈတူၺ်း ၼိုင်ႈၵေႃႉ 2 ၻေႃႊလိူဝ်ႊ၊ ပေႃးပဵၼ်ၵူၼ်းၼႂ်းမိူင်း ၼိုင်ႈၵေႃႉ 200 ၵျၢတ်ႉ၊ ပေႃးပဵၼ်လုၵ်ႈႁဵၼ်း လႆႈၶဝ်ႈဢႅဝ်ႇယဵမ်ႈလၢႆလၢႆ- ၼႆယဝ်ႉ။