ၵူၼ်းဝၢၼ်ႈၵူၼ်းမိူင်း ၼႂ်းၸိုင်ႈတႆးပွတ်းၸၢၼ်း ပွတ်းဢွၵ်ႇ ဢွၼ်ၵၼ်တူင်ႉတိုၼ်ႇ သၢၼ်ၶတ်းလွင်ႈ ၶွမ်ႊပၼီႊ SMEC လူင်းၵဵပ်းၶေႃႈထတ်းသၢင် လွင်ႉတုမ်ႉတိူဝ်ႉ တူင်ႇဝူင်းၵူၼ်းလႄႈ သိင်ႇဝႅတ်ႉလွမ်ႉ SIA/ EIA ။

ၵဵဝ်ႇၵပ်းလွင်ႈၼႆႉ ဝၼ်းတီႈ 05/08/2015 ၵေႃၵပ်းသၢၼ်တူင်ႉၼိုင် ပိူဝ်ႈတႃႇမႄႈၼမ်ႉ ၼႂ်းၸိုင်ႈတႆး ပိုၼ်ၽၢဝ်ႇဝႃႈ- ၵွပ်ႈငဝ်းလၢႆးၵၢၼ်မိူင်း ဢမ်ႇမၼ်ႈၼိမ်လႄႈ ၵူၼ်းမိူင်းၼႂ်းပိုၼ်ႉတီႈ ၼႂ်းၸိုင်ႈတႆးပွတ်းၸၢၼ်း တင်း ပွတ်းဢွၵ်ႇ ဢွၼ်ၵၼ်သၢၼ်ၶတ်း SMEC ၶွမ်ႊပၼီႊဢေႃႊသတြေႊလီႊယိူဝ်ႊ ဢၼ်လူင်းၵဵပ်းၶေႃႈထတ်းသၢင် လွင်ႈတုမ်ႉတိူဝ်ႉတူင်ႇဝူင်းၵူၼ်း လႄႈသိင်ႇဝႅတ်ႉလွမ်ႉ (SIA/ EIA) - ပိူဝ်ႈတႃႇၵေႃႇသၢင်ႈၾၢႆၼိူဝ်မႄႈၼမ်ႉၶူင်း။

ၼ်ႂ်းၶေႃႈပိုၼ်ၽၢဝ်ႇ ပိူင်လူင် လၢတ်ႈလွင်ႈ ၶွမ်ႊပၼီႊ SMEC လူင်းလဵပ်ႈႁဵၼ်း ၵဵပ်းၶေႃႈထတ်းသၢင် SIA/ EIA မိူဝ်ႈၼႂ်းလိူၼ်ၵျူႊလၢႆႊ ပူၼ်ႉမႃး။ ပိုၼ်ႉတီႈဢၼ်လူင်းၵဵပ်း ၶေႃႈထတ်းသၢင်ၼၼ်ႉ မိူၼ်ၼင်ႇၼႂ်းၸႄႈဝဵင်း ၵုၼ်ႁဵင်/ မိူင်းပဵင်း ၸိူဝ်းၼႆႉ ပေႃးၵေႃႇသၢင်ႈၾၢႆမႃး ပဵၼ်ပိုၼ်ႉတီႈဢၼ်ၼမ်ႉၸၢင်ႈထူမ်ႈ၊ ၵူၼ်းမိူင်းၵမ်ႈၼမ် ဢွၼ်ၵၼ်သၢၼ်ၶတ်း ၵၢၼ်ၵေႃႇသၢင်ႈၾၢႆႇၼမ်ႉၶူင်း မိူင်းတူၼ်။ တွၼ်ႈၼႂ်းၼႃႈလိၼ်ဝႃႉၼၼ်ႉ တၢင်းငဝ်ႈငုၼ်းဝႃႉပၢင်သၢင်း တိုၼ်းဢမ်ႇဢၼုၺၢတ်ႈပၼ်ၶဝ်ႈၵဵပ်း၊ ၵူၺ်းလၢတ်ႈဝႃႈ ထႅင်ႈ 2-3 လိူၼ် ၸင်ႇၵွႆႈမႃးဢုပ်ႇၵၼ်ၶိုၼ်း- ၼႆယဝ်ႉ။

ၶွမ်ႊပၼီႊ SMEC (Environment and Social Impact Assessment) ၼႆႉ ပဵၼ်ၶွမ်ႊပၼီႊ မိူင်းဢွတ်ႊသထြေႊလီႊယိူဝ်ႊ၊ ပဵၼ်ၸုမ်းၶွမ်ႊပၼီႊ ဢၼ်ၶွမ်ႊပၼီႊၾၢႆႇၵေႃႇသၢင်ႈၾၢႆလႄႈ တင်းလူင်ပွင်ၸိုင်ႈမၢၼ်ႈ ႁူမ်ႈၵၼ်ၶၢတ်ႈဝႆႉ ပိူဝ်ႈတႃႇ လူင်းၵူတ်ႇထတ်းၼႂ်းပိုၼ်ႉတီႈဝႃႈ ပေႃးၵေႃႇသၢင်ႈၾၢႆႇယဝ်ႉ မီးလွင်ႈတုမ်ႉတိူဝ်ႉ သိင်ႇဝႅတ်ႉလွမ်ႉလႄႈ တူင်ႇဝူင်းၵူၼ်းၵႃႈႁိုဝ်။

ပိူဝ်ႈတႃႇႁဵတ်းသၢင်ႈၾၢႆလူင်မိူင်းတူၼ်ၼႆႉ မီးၶွမ်ႊပၼီႊၶႄႇ ၶွမ်ႊပၼီႊသၢမ်ၽႃ (Three Gorges group Corporation-CTGC) ၊ ၶွမ်ႊပၼီႊထႆး ဢီႊၵဵတ်ႊ (Electricity Generating Authority of Thailand-EGAT) ၊ ၶွမ်ႊပၼီႊ ၵူႈၸိုင်ႈမိူင်း (International Group of Entrepreneurs Company-IGOEC) ၸိူဝ်းၼႆႉလႄႈ ႁွင်ႈၵၢၼ်လူင်ၾၢႆႇၾႆးၾႃႉ လူင်ပွင်ၸိုင်ႈမၢၼ်ႈ ႁူမ်ႈၵၼ်။ ၶူင်းၵၢၼ်တႄႉ ဢၢၼ်းတႄႇၼႂ်းပီ 2017 ထႅင်ႈသွင်ပီ တေမႃးတၢင်းၼႃႈ။

ပေႃးၵေႃႇသၢင်ႈၾၢႆယဝ်ႉတူဝ်ႈၸိုင် ၾႆးၾႃႉဢၼ်ႁဵတ်းဢွၵ်ႇလႆႈ တင်းမူတ်း 100% ၼႆႉ တေသူင်ႇၶၢႆဢွၵ်ႇၼွၵ်ႈမိူင်း 90%  (မိူင်းၶႄႇ 45%၊ မိူင်းထႆး 45%) ။ လိူဝ်သေၼၼ်ႉ ဢၼ်ၵိုတ်း 10% ဢဝ်ၸႂ်ႉၼႂ်းမိူင်း၊ တေဢဝ်ၵႂႃႇၸႂ်ႉၼေႇပျီႇတေႃႇထႅင်ႈသေ ဢၼ်ၵိုတ်းလိူဝ်ဝႆႉၼၼ်ႉ ၸင်ႇပၼ်ၵူၼ်းမိူင်း ၼႂ်းပိုၼ်ႉတီႈ။ ၵွပ်ႈၼႆ ၾၢႆႇၼိုင်ႈၵေႃႈ ၵူၼ်းဝၢၼ်ႈၵူၼ်းမိူင်း ၸင်ႇလႆႈဢွၼ်ၵၼ်သၢၼ်ၶတ်း- ၼႆယဝ်ႉ။