ပၢင်ၾိုၵ်းၾွၼ်ႉ ၶူးသွၼ်ႁူင်းႁဵၼ်း ထမ်းမ ၸတ်းႁဵတ်းတီႈ ဝတ်ႉသုၶိတႃႇရုင်ႇ ပွၵ်ႉ(4) ဝဵင်းၼမ်ႉၸၢင် ၸိုင်ႈတႆး ပွတ်းၸၢၼ်း။ ၼင်ႇႁိုဝ်ၶူးသွၼ် ပေႃးတေလႆႈ လူင်းပူင်သွၼ်ပၼ် လုၵ်ႈဢွၼ်ႇၼႂ်းဝၢၼ်ႈၽႂ်မၼ်း လွင်ႈတိုဝ်းၵမ်သိလ်ထမ်းမ တရႃး(တြႃး)လႄႈ လွင်ႈယူႇသဝ်း ၾိင်ႈငႄႈပိူင်ၵူၼ်း။

ပၢင်ၾိုၵ်းၾွၼ်ႉၶူးသွၼ်ႁူင်းႁဵၼ်း ထမ်းမၼႆႉ တႄႇၸတ်းႁဵတ်းၼႂ်းဝၼ်းတီႈ 03-07/08/2015 ၶၢဝ်းတၢင်း 5 ဝၼ်း၊ ၼိုင်ႈဝၼ်း 3 ပွၵ်ႈ၊ ၶၢဝ်းယၢမ်း 07:00-12:00 မူင်း၊ 13:00-16:00 မူင်းလႄႈ 18:00-21:00 ၼိုင်ႈပွၵ်ႈ တီႈဝတ်ႉသုၶိတႃႇရုင်ႇပွၵ်ႉ(4) ဝဵင်းၼမ်ႉၸၢင်ၸိုင်ႈတႆးပွတ်းၸၢၼ်း။ ၽူႈဢွၼ်ႁူဝ်ၸတ်းႁဵတ်းပၢင်ၽိုၵ်းၾွၼ်ႉၵမ်းၼႆႉ ပဵၼ်ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆး ။

ၶပ်ႉမၢႆၵၢၼ် ဢၼ်လႆႈပူင်သွၼ်ပၼ်သမ်ႉလွင်ႈထမ်းမတရႃး(တြႃး)၊ လွင်ႈၼင်ႈသမထိလွင်ႈႁပ်ႉသိလ်၊ ဝႆႈၽရႃး(ၽြႃး) လွင်ႈၵိူဝ်းလီၾိင်ႈပိူင်ၵူၼ်း ၸိူဝ်ႉၼႆႉ။

ၵူၼ်းပိုၼ်ႉတီႈဝဵင်းၼမ်ႉၸၢင် ၵေႃႉၼိုင်ႈလၢတ်ႈဝႃႈ ဢၼ်လႆႈၸတ်းႁဵတ်းပၢင်ၽိုၵ်းၾွၼ်ႉ ၶူးသွၼ်ႁူင်းႁဵၼ်းထမ်းမၼႆႉ ပဵၼ်ပွၵ်ႈၵမ်းဢွၼ်တၢင်းသုတ်းယဝ်ႉ။ တင်းမူတ်းမီးၶူးသွၼ်မႃးၶိုၼ်ႈ ပၢင်သွၼ်မွၵ်ႈ 200 ၵေႃႉ ၊ ၵမ်ႈၼမ်ပဵၼ်သင်ၶလႄႈ ၵူၼ်းႁိူၼ်း ၼႂ်းတူင်ႇဝဵင်းၼမ်ႉၸၢင်ၼိုင်ႈဝၢၼ်ႈ 5 ၵေႃႉ ဝႃႈၼႆ။

ယိူင်းဢၢၼ်း ဢၼ်လႆႈၸတ်းႁဵတ်းပၢင်ၾိုၵ်းၾွၼ်ႉၼႆႉ ၼင်ႇႁိုဝ်ပေႃးတေပဵၼ်ၶူး သိုပ်ႇလူင်းမိူဝ်းသွၼ်ပၼ်ၶိုၼ်း တီႈဝၢၼ်ႈဢိူင်ႇၽႂ်မၼ်း ၽွင်းလုၵ်ႈဢွၼ်ႇဢိုတ်းႁူင်းႁဵၼ်း ဝၼ်းသဝ်ဝၼ်းတိတ်ႉ- ဝႃႈၼႆ။