ၵေႃၵမ်ၵၢၼ်လူင်ငဝ်ႈၸိုင်ႈ ၶွင်ႊသီႊဢဝ်ၶိုၼ်း ၸိုင်ႈတႆး (RCSS) ပိုၼ်ၽၢဝ်ႇ ဢွၵ်ႇၶေႃႈၸုၵ်းမၼ်ႈ ၵၢင်ၸႂ် တေႃႇငဝ်းလၢႆး ပိူင်ပဵၼ်ၵၢၼ်မိူင်း ယၢမ်းလဵဝ် မိူဝ်ႈဝၼ်းတီႈ 04/08/2015 တင်းမူတ်း 4 ၶေႃႈ။

1.ပုၼ်ႈတႃႇတေလူင်းလၢႆးမိုဝ်းလႆႈ လိၵ်ႈႁူမ်ႈမၢႆ ၶေႃႈတူၵ်းလူင်းလႆႈၸႂ် ၵၢၼ်ၵိုတ်းယိုဝ်းပတ်းပိုၼ်ႉတူဝ်ႈမိူင်း ဢၼ်လူင်ပွင်ၸိုင်ႈလႄႈ မုၵ်ႉၸုမ်းၾၢႆႇၵဵဝ်ႇၶွင်ႈၶဝ် ၶတ်းၸႂ်ၶိုင်သၢင်ႈ ဢၼ်ပဵၼ်သဵၼ်ႈတၢင်း ၼႃႈၵၢၼ်လွင်ႈငမ်းယဵၼ်ၼၼ်ႉ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၵမ်ႉထႅမ်ႁပ်ႉတွၼ်ႈယူႇ။

2.ပၼ်ႁႃၵၢၼ်မိူင်းၼၼ်ႉ ၸွမ်းၼင်ႇၵၢင်ၸႂ်ၵူၼ်းမိူင်းသေ ၼင်ႇႁိုဝ်တေဢဝ်လၢႆးၵတ်းယဵၼ် ဢုပ်ႇဢူဝ်းၵႄႈၶႆႁႃၶေႃႈတွပ်ႇ ၵႄႈပၼ်ႁႃၵႂႃႇလႆႈၼၼ်ႉ ပုၼ်ႈတႃႇတေတမ်းဝၢင်းမၵ်းမၼ်ႈလႆႈ ယူင်ႉၶၢပ်ႈဢုပ်ႇဢူဝ်းၵၢၼ်မိူင်း ဢၼ်မုၵ်ႉၸုမ်းၸိူဝ်းၵဵဝ်ႇၶွင်ႈၶဝ် တူၵ်းလူင်းလႆႈၸႂ်ၵၼ် ၶဵၼ်ႇတႅမ်ႈဝႆႉ ၵွၼ်ႇၼႃႈပၢင်လိူၵ်ႈတင်ႈၼၼ်ႉ RCSS တေၶတ်းၸႂ်ၶဝ်ႈႁူမ်ႈငူပ်ႉငီႉၵၼ်သေ ႁဵတ်းသၢင်ႈၵႂႃႇယူႇ။

3.ပၢင်လိူၵ်ႈတင်ႈ ဢၼ်တေၸတ်းႁဵတ်းၼႂ်း ဝၼ်းတီႈ 08/11/2015 ၼၼ်ႉ RCSS တေဢမ်ႇမီးလွင်ႈသၢၼ်ၶတ်းသင်၊ ၼင်ႇႁိုဝ်တေၸွႆႈထႅမ်ပၼ်လႆႈၵၢၼ်ႁူမ်ႇလူမ်ႈ ၸိူဝ်းဢၼ်ယူႇတီႈသုၼ်ႇတူဝ် ပုၵ်ႉၵလသေ တေၶဝ်ႈလိူၵ်ႈတင်ႈလႄႈ ၸိူဝ်းပဵၼ်တူဝ်တႅၼ်းပႃႊတီႊၶဝ် ဢၼ်တေၶဝ်ႈမႃးသူၼ်းတုမ်ႁႃသဵင်ၵမ်ႉထႅမ် ၶႅပ်းၵၢင်ၸႂ် ၼႂ်းပိုၼ်ႉတီႈၼႃႈလိၼ် RCSS ၵုမ်းၵမ်ဝႆႉၼၼ်ႉ ၵပ်းသိုပ်ႇမႃးတီႈ RCSS သေၵမ်း - ပွင်ႇလႅင်းတိုၵ်းသူၼ်းမႃးၼင်ႇၼႆ။

4.ၶေႃႈတူၵ်းလူင်းလႆႈၸႂ် 31 ၶေႃႈ ဢၼ်လူင်ပွင်ၸိုင်ႈလႄႈ ၶွင်ႊသီႊဢဝ်ၶိုၼ်းၸိုင်ႈတႆး RCSS တူၵ်းလူင်းလႆႈၸႂ်ၵၼ်ဝႆႉ ၼႂ်းၸၼ်ႉၵၢၼ်ၵိုတ်းတိုၵ်းမႃးဢွၼ်တၢင်းၼၼ်ႉ တေဢဝ်လွင်ႈၵေႃၵမ်ၵၢၼ်ႁူမ်ႈ တႃႇလူလွမ်ပႂ်ႉတူၺ်း လွင်ႈၵိုတ်းတိုၵ်း (Joint Monitoring Committee-JMC) ၊ လွင်ႈၵႅတ်ႇၶႄႁႄႉႁၢမ်ႈ ၽေးၶဵၼ်ယႃႈမဝ်းၵမ် ဝႆႉပဵၼ်ပိူင်လူင်သေ တေႁူမ်ႈမိုဝ်းၵၼ်တင်း လူင်ပွင်ၸိုင်ႈ ႁဵတ်းသၢင်ႈၵႂႃႇ- ၼႆယဝ်ႉ။

ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၼႆႉ ဢိင်ၼိူဝ်ၸွမ်ၸိုင်ႈတဵင်းၸဵင်ႇ ယိုၼ်ႈမိုဝ်းဢုပ်ႇဢူဝ်းလွင်ႈငမ်းယဵၼ် မိူဝ်ႈၼႂ်းပီ 2011 သေ လႆႈဢုပ်ႇဢူဝ်းတူၵ်းလူင်းၵိုတ်းယိုဝ်း  ၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ်ၵၼ်မႃး၊  ဝၢႆးမႃး ပိုတ်ႇလုမ်းၵပ်းသၢၼ်ဝႆႉ ၼႂ်းမိူင်းတႆး လၢႆလၢႆတီႈသေ ၶတ်းသၢင်ႈႁၢင်ႈပွင် လွင်ႈငမ်းယဵၼ်မႃး ဢမ်ႇၵိုတ်းဢမ်ႇလိုဝ်ႈ။