ဢိင်ၼိူဝ်ၾူၼ်တူၵ်းႁၢဝ်ႉႁႅင်း ၼပ်ႉဝၼ်း ထပ်းၵၼ်သေ  မႄႈၼမ်ႉယွင်း တၢင်းပွတ်ႇမိူင်းယွင်း ၸိုင်ႈတႆး ပွတ်းဢွၵ်ႇၶူင်း ၼွင်းလုပ်ႇပႃးလင်ႁိူၼ်း ၵူၼ်းဝၢၼ်ႈၵႂႃႇ 7 လင်။

ပူၼ်ႉမႃး မိူဝ်ႈဝၼ်းတီႈ 04/08/2015 ၶၢဝ်းယၢမ်း မွၵ်ႈ 20:00 မူင်းၼၼ်ႉ မႄႈၼမ်ႉယွင်း ၼွင်းလုပ်ႇလင်ႁိူၼ်းၵႂႃႇၸွမ်း 7 လင် တီႈမိူင်းႁၢၼ်း ဢိူင်ႇမိူင်းလၢႆႈ မိူင်းယွင်း ၸိုင်ႈတႆးပွတ်းဢွၵ်ႇၶူင်း ယွၼ်ႉဝႃႈ ၾူၼ်တူၵ်းႁၢဝ်းႁႅင်း ၼပ်ႉဝၼ်းထပ်းၵၼ်သေ ၼမ်ႉယွင်း ယိုင်ႈၶိုၼ်ႈသုင်လႄႈ လုပ်ႇၶဝ်ႈထူမ်ႈၼႂ်းဝၢၼ်ႈ ပတ်ႉပႃးဢဝ်ၶူဝ်းၶွင်ၵူၼ်းဝၢၼ်ႈၵူၼ်းမိူင်း ၵႂႃႇၸွမ်းၼမ်ႉ ၼမ်လၢႆ ၵွပ်ႈဢမ်ႇတၼ်းၶၢႆႉဢွၵ်ႇ ႁိူၼ်းယေးၽႂ်မၼ်း ၼႆယဝ်ႉ။

ႁူဝ်ပဝ်ႈပႃႊတီႊႁူဝ်သိူဝ် ဝဵင်းမိူင်းယွင်း လုင်းၸၢႆးသႅင်လၢတ်ႈဝႃႈ ၼမ်ႉၼႆႉ ၵိုင်ႉၵင်ႉလႆလေႃႇၶဝ်ႈမႃးၵမ်းလဵဝ်လႄႈ ၽႂ်ၽႂ်ၵေႃႈဢမ်ႇတၢၼ်းလႆႈၶၢႆႉၶူဝ်းႁိူၼ်းယေးသင်
လႆႈဢဝ်တူဝ်ၽႂ်မၼ်းသေ လွတ်ႈဢွၵ်ႈပၢႆႈဢွၼ်တၢင်း၊ ယွၼ်ႉဝႃႈ ၾူၼ်တူၵ်းႁႅင်းထပ်းၵၼ်မႃး လၢႆဝၼ်းယဝ်ႉ ယွၼ်ႉၼၼ်ႉမႄႈၼမ်ႉယွင်းလႆႈထူမ်ႈလုပ်ႇ။ ၵၢပ်းၵၢႆႇလယင်ႈၼႆႉသေ လွင်ႈတုမ်ႉတိူဝ်ႉၵူၼ်းမိူင်းတႄႉဢမ်ႇမီး လွင်းဝၢတ်ႇၸဵပ်းၵေႃႈဢမ်ႇမီး လွင်ႈလုသုမ်းတူဝ်သတ်းၵေႃႈဢမ်ႇပေႃးမီး ယွၼ်ႉဝႃႈ ၵူၼ်းဝၢၼ်ႈၶဝ် လႆႈႁူႉၼမ်ႉၵိုင်ႉၵၢင်ႉလႆမႃးလႄႈ ၶဝ်ၵေႃႈၼႅတ်ႈလဵၼ်ႈၵႂႃႇပိုတ်ႇပၼ် ၶွၵ်ႈဝူဝ်း၊ၵႂၢႆး၊ ပဵတ်း ၸဵမ်ၸိူဝ်ႉၼၼ်ႉ ဢွၵ်ႇၵႂႃႇ။
သိုပ်ႇလၢတ်ႈထႅင်ႈဝႃႈ ဢၼ်လူႉသုမ်းယႂ်ႇလူင်တႄႉ ပဵၼ်တိူၵ်ႇႁႆႈလွၵ်းၼႃး ပီၼႆႉတႄႉ ဢမ်ႇလႆႈၵိၼ်ၶဝ်ႈၼႃးယဝ်ႉ ယွၼ်ႉဝႃႈ ၼႂ်းလွၵ်းၼႃးၼႆႉ မီးတေႇသၢႆး၊ ၶီႈငႂ်ႈ(ၶီႈၵူမ်ႇ)လႄႈ တုမ်မႆႉ၊ ပူတ်းမႆႉ မီးၼႂ်းလွၵ်းၼႃးဝႆႉ ၼမ်တႄႉတႄႉၼႃးလုသုမ်းတင်းၼမ်လၢႆ ဝႃႈၼႆ။

မိူဝ်ႈလဵဝ် ၵူၼ်းမိူင်းၼႂ်းဝဵင်းမိူင်းယွင်း၊ ပႃႊတီႊၵၢၼ်မိူင်း လႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ဢွၼ်ၵၼ် ၵဵပ်းငိုၼ်းႁပ်ႉတၢင်းၸွႆႈ တီႈၽူႈမီးၸႂ်သတ်ထႃးၵၼ် ၵေႃႉႁဵင် သွင်ႁဵင် ၶဝ်ႈၼမ်ႉတင်းၵိၼ် ၶူဝ်းၶွင်ၸႂ်ႉ လႄႈၼမ်ႉၵိၼ် ၸဵမ်ၸိူဝ်ႉၼႆႉ တေဢဝ်ၵႂႃႇၸွႆႈထႅမ် ပီႈၼွင်ႉထူပ်းၽေးၼမ်ႉထူမ်ႈၼႂ်းမိူင်းယွင်းၼႆယဝ်ႉ။

ဝၢၼ်ႈ ၼႂ်းမိူင်းယွင်းၸိူဝ်းထုၵ်ႇၼမ်ႉထူမ်ႈ ၸိူင်ႉၼင်ႇ ၼႂ်းဢိူင်ႇမိူင်းလၢႆႈမိူၼ် မိူင်းႁၢၼ်းၼႆႉ ထုၵ်ႇၼမ်ႉလုပ်ႇပႃးႁိူၼ်းၵႂႃႇ 7 လင်ႁိူၼ်း၊ ယဝ်ႉၵေႃႈ ႁိူၼ်းဢၼ်ၸိူၼ်း(ဢဵၼ်ႈ)ဝႆႉ မီး 4 လင်ႁိူၼ်း၊ ၼွၵ်ႈလိူဝ်ၼၼ်ႉၵေႃႈ ဝၢၼ်ႈတလူၵ်ႈ၊ ဝၢၼ်ႈၵွၵ်းၶွႆ၊ ဝၢၼ်ႈလွမ်ဝူဝ်း၊ ဝၢၼ်ႈတႃႈ၊ ဝၢၼ်ႈတွင်း၊ ဝၢၼ်ႈႁူဝ်လုင်း ယွၼ်ႉဝႃႈ ဝၢၼ်ႈၸိူဝ်ႉၼႆႉ ယူႇၸွမ်းသဵၼ်ႈသၢႆၼမ်ႉလႆ ၵမ်ႉၼမ်ယဝ်ႉ။

ၼမ်ႉထူမ်ႈပွၵ်ႈၵမ်းၼႆႉ တၢင်းသုင်မၼ်းတေမီး မွၵ်ႈၸူဝ်ႈႁိူၼ်းပၢႆပၢႆ ၵူၼ်းမိူင်းလႆႈပၢႆႈၵႂႃႇယူႇႁိူၼ်းပီႈၼွင်ႉၽႂ်မၼ်းၵေႃႈမီး ၵႂႃႇယူႇတီႈဝတ်ႉမုၼ်ၸဝ်ႈၵေႃႈမီး၊ မၢင်ၵေႃႉၵေႃႈပွၵ်ႈမိူဝ်းၶိုၼ်းႁိူၼ်းၽႂ်မၼ်းၵေႃႈမီး ဝၢၼ်ႈမိူင်းႁၢၼ်းၼႆႉတႄႉ ဢမ်ႇၸင်ႈယူႇလႆႈသေဢိတ်း။ လင်းႁိူၼ်းၼႂ်းဝၢၼ်ႈမိူင်းႁၢၼ်း တင်းမူတ်းမီး မွၵ်ႈ 20 လင်ႁိူၼ်းပၢႆ ၼႆယဝ်ႉ။

ဝၢၼ်ႈၼမ်ႉထူမ်ႈၼႂ်းဢိူင်ႇမိူင်းလၢႆႈၼႆႉ ပဵၼ်ပီႈၼွင်ႉတႆး၊ ဢႃးၶႃႇ၊ လႃးႁူႇလႄႈ ပီႈၼွင်ႉလွႆ ၸဵမ်ၸိူဝ်ႉၼႆႉ ယူႇသဝ်း။

ဝဵင်းမိူင်းယွင်းၼႆႉ မီး 9 ပွၵ်ႉ၊ ဢိူင်ႇသမ်ႉ 6 ဢိူင်ႇ ၵူၼ်းမိူင်းဢၼ်ယူႇသဝ်းတင်းၼမ် ပဵၼ်ပီႈၼွင်ႉတႆးလိုဝ်ႉ လႄႈပီႈၼွင်ႉၸၢဝ်းၶိူဝ်း ။