တင်ႈတႄႇ 6 လိူၼ် ပၢႆမႃးၼႆႉ ၼႂ်း Workpoint Channel ထီႊဝီႊထႆး ပွႆႇမႃး ပိုၼ်း ပုတ်ႉထၸဝ်ႈ ဢၼ်ၽၢၵ်ႈ (ပိၼ်ႇၽႃသႃ) ဝႆႉ ပဵၼ်ၵႂၢမ်းထႆး ။ တႆးႁဝ်း ၸိူဝ်းႁူႉ ၵႂၢမ်းထႆး ၼမ်ၼမ် ဢေႇဢေႇ ၵေႃႈ ပႃးၵၼ် ၸူမ်းတူၺ်းမႃး ။

ၼႂ်းၸိူဝ်း တူၺ်းယူႇၼႆႉ ၸိူဝ်းဢၼ် ဢမ်ႇဝူၼ်ႉ တႂ်ႈတႂ်ႈ ၼိူဝ်ၼိူဝ် သင်သေ တူၺ်းၵေႃႈမီး ။ ၸိူဝ်းဢၼ် ဝူၼ်ႉယဝ်ႉ ဢမ်ႇထုၵ်ႇၸႂ် ထုၵ်ႇၶေႃး ယွၼ်ႉဝႃႈ ဢမ်ႇမိူၼ်တင်း ပိုၼ်းတူဝ် ဢၼ်ယၢမ်ႈႁူႉ ယၢမ်ႈငိၼ်း ယၢမ်ႈဢၢၼ်ႇမႃးလႄႈ ပွင်ႉထႃႉ ၵေႃႈမီး ။ တင်ႈတႄႇ ဢဝ်မၼ်းပွႆႇ ဢွၵ်ႇမႃး မိူဝ်ႈ 8/9/2013 တီႈမိူင်း ဢိၼ်ႊၻီႊယိူဝ်း ယဝ်ႉ ။


တီႈၼႆႈ ၶႂ်ႈတူၵ်ႇၼႄ ၶေႃႈထတ်းသၢင် 2 ၸဝ်ႈ ။ ၵေႃႉၼိုင်ႈ ပဵၼ်ၸဝ်ႈ ပၢႆးပၺ်ၺႃ Dr Param Anand. မၼ်းပဵၼ် လုၵ်ႈၼွင်ႉ Dr B.K. Ambedkar ၵေႃႉဢၼ် ၶဵၼ်ႇတႅမ်ႈ ပိူင်ငဝ်ႈပိုင်းမိူင်း ဢိၼ်ႊၻီႊယိူဝ်ႊ လႄႈ ပဵၼ်ၽူႈၵေႃႉ ၽိုၼ်ႉၽူးၶိုၼ်း ပုတ်ႉထ သႃသၼႃ ၼႂ်းမိူင်း ဢိၼ်ႊၻီႊယိူဝ်ႊ ဢၼ်ႁၢႆလၢႆ ၵႂႃႇ 700 ပီပၢႆ ။


Dr Param ဝႃႈ ပိုၼ်းတူဝ် ပုတ်ႉထၸဝ်ႈၼႆႉ ထုၵ်ႇၶဵၼ်ႇ တႅမ်ႈဢွၵ်ႇၼႂ်း ပီႁူဝ်ပၢၵ်ႇ ၶရိတ်ႉ တီႈ 1 ဝၢႆး ပုတ်ႉထၸဝ်ႈ ဢဝ်ၼိပ်ႉပၢၼ်ႇၵႂႃႇ 500 ပီပၢႆ ။ ဝၢႆးၼၼ်ႉၵေႃႈ မီးလၢႆၽိုၼ် ဢၼ်တႅမ်ႈဢွၵ်ႇမႃး ။ ဢမ်ႇမီးၽိုၼ်လႂ် ထုၵ်ႇမႅၼ်ႈၸွမ်း ပိုၼ်းတူဝ် တႄႉမၼ်းၸဝ်ႈ ။ ၽႂ်လႂ်ၶႂ်ႈႁူႉ ပိုၼ်းတူဝ် တႄႉမၼ်းၸဝ်ႈၵေႃႈ တၵ်းဢၢၼ်ႇ ပိတၵၢတ်ႈ သၢမ်ၵွင် လႄႈ ပပ်ႉ “ ပုတ်ႉထၸဝ်ႈလႄႈ ထမ်းၸဝ်ႈ ” (Buddha and His Dhamma) ဢၼ် Dr Ambedkar တႅမ်ႈဝႆႉၼၼ်ႉၵူၺ်း ။


ၼွၵ်ႈသေ ၼၼ်ႉၵေႃႈ မီးၽူႈ ၶူၼ်ႉၶႆႈ ၸိုဝ်ႈယႂ်ႇ Rhys Davies ၵေႃႈပိၼ်ႇ သၽႃသႃ ပိတၵၢတ်ႈ သၢမ်ၵွင် ပဵၼ်ဢိင်းၵလဵတ်ႈ ၼၼ်ႉ တႅမ်ႈဝႆႉဝႃႈ - ၼႂ်းမိူင်းသၵ်ႉၵျႃႉ (Sakya) ဢၼ်ပုတ်ႉထ ၸဝ်ႈၵိူတ်ႇၼႆႉ ဢမ်ႇဝႆႉ လွၵ်းပိူင် ၶုၼ်ႁေႃၶမ်း ဢၼ်ဝၢႆးပေႃႈတၢႆယဝ်ႉ လုၵ်ႈသိုပ်ႇ ပုတ်ႈပူၺ်ႈၵၼ် ။ တီႈတႄႉမၼ်း မိူင်းသၵ်ႉၵျႃႉၼႆႉ ယူႇတႂ်ႈႁူမ်ႈငဝ်း ၶုၼ်ႁေႃၶမ်း ၵူဝ်းသလ (Kosala) လူးၵွၼ်ႇ ။


ပေႃးတေ တႅမ်ႈၸွမ်းၼင်ႇ Dr Param ဝႃႈတႄႉ မီးတီႈၼႄး ဢမ်ႇသုတ်းသဵင်ႈ လႆႈ ။ ၶႂ်ႈလၢတ်ႈ ၼႄလွင်ႈ ၸဝ်ႈတူၼ်ၶူးလူင် Dalai Lama လၢတ်ႈမိူဝ်ႈ 3/4/13 မိူဝ်ႈၸုမ်း ထၢႆႇငဝ်းတူင်ႉ ပုတ်ႉထၸဝ်ႈ ၵႂႃႇသူႇၸႂ်း မၼ်းၸဝ်ႈ ၼၼ်ႉၵူၺ်း ။


ၵဵဝ်ႇလူၺ်ႈ လၢႆးၵႂႃႇပႆ ငဝ်းတူင်ႉ ယိုဝ်းၾၼ်းၵၼ် ႁၵ်ႉၵၼ် ပႅင်းၵၼ် ၸိူဝ်းၼၼ်ႉတႄႉ မၼ်းၸဝ်ႈ ဢမ်ႇထတ်းသၢင် ဝႃႈႁိုဝ် ။ မၼ်းၸဝ်ႈႁူႉလီဝႃႈ ၼင်ႇႁိုဝ် ၵူၼ်းပေႃး ၸူမ်းတူၺ်းၼၼ်ႉ ဢမ်ႇပဵၼ် ၵေႃႈသႂ်ႇဝႃႈပဵၼ် ဢမ်ႇဝႃႈ ၵေႃႈသႂ်ႇဝႃႈ ၸိူဝ်းၼႆႉ ပဵၼ်သၽႃဝ ငဝ်းတူင်ႉ ။ ၵူၺ်း မၼ်းၸဝ်ႈတၵ်ႉဝႃႈ “ ၵဵဝ်ႇလူၺ်ႈ ထမ်းမၼ်း ၸဝ်ႈသွၼ် မိူၼ်ၼင်ႇ သဵၼ်ႈတၢင်း ပၢၼ်ၵၢင် လႄႈႁိုဝ် (Middle Path) ၊ လွင်ႈၵူႈသမ်ႇ သႅၼ်ပိူင် ၼႂ်းလေႃးၵ ၵဵဝ်ႇၶွင်ႈၵၼ် (Interconnectedness) လႄႈႁိုဝ်ႉ ၊ ပေႃးတႅပ်းတတ်းၸႂ်ၼႆ ဢမ်ႇဢဝ်ၾႃႉ ဢဝ်ၽီဝႃႈ ဢဝ်တၢင်းၶႆႈၸႂ် (Logical decision making) ဝႃႈလႄႈႁိုဝ်ႉ ၊ ၸိူဝ်းၼႆႉယႃႇပၼ်ပိူင်ႈ ။ မိူင်းၶူင်းၵၢင်ႁဝ်းၼႆႉ လူဝ်ႇလုၵ်ႉတီႈ ယုမ်ႇယမ် (Faith) ပဵၼ်ပိုၼ်ႉထၢၼ်ၼၼ်ႉ ၵႂႃႇၸူး ႁူႉႁၼ် (Knowledge) ပဵၼ်ပိုၼ်ႉထၢၼ်ယဝ်ႉ ။


ၼႂ်းမိူင်းထႆးၼႆႉ ပေႃးထိုင်ဝၼ်းတီႈ 12/9/2015 တေပွႆႇၼႂ်း TV ယဝ်ႉတူဝ်ႈ ။ တင်းမူတ်းမီး 55 တွၼ်ႈလႄႈ ဢမ်ႇႁိုင်ဢမ်ႇၼၢၼ်း ပီႈၼွင်ႉတႆးႁဝ်း ၼႂ်းမိူင်းတႆးၵေႃႈ ၶႄးတေလႆႈ တူၺ်းၼႂ်း ၽႅၼ်ႇၶႅပ်း CD ၼႆႉယူႇ ။ ပေႃးၵၢမ်ႇလီ တေမီးၵူၼ်း ပိၼ်ႇပဵၼ်ၵႂၢမ်းတႆး လူးၵွၼ်ႇ ။ ၵွပ်ႈၼၼ် ပေႃးတူၺ်းၼႆ ႁႂ်ႈၸႂ်ႉဢွၵ်း ဢေႃသေ တူၺ်းၸွမ်းမိူၼ် Dr Param လႄႈ ၸဝ်ႈတူၼ်ၶူးလူင် Dalai Lama ဝႃႈၼၼ်ႉသေၵမ်း ။