ၵူၼ်းမိူင်း 7 ၵေႃႉ ဢၼ်ထုၵ်ႇ သိုၵ်းမၢၼ်ႈ တီႉၺွပ်း ၵႂႃႇၸွမ်း ငႃးသိုၵ်းမၢၼ်ႈ ၊ ဝၢႆးပဵၼ် ပၢင်တိုၵ်းၵၼ် တင်းသိုၵ်းတႆး RCSS/SSA ၼၼ်ႉ ဢိင်ၼိူဝ် ၽူႈတႅၼ်း သၽႃးၵူၼ်းမိူင်း ၵုၼ်ႁဵင် တုၵ်းယွၼ်းသေ ပွႆႇပၼ်ၶိုၼ်း ဝၼ်းတီႈ 26 ပွတ်းၼႂ် ။

ပူၼ်ႉမႃး မိူဝ်ႈဝၼ်းတီႈ 25/08/2015 ၵူၼ်းဝၢၼ်ႈ 7 ၵေႃႉ 1.လုင်းႁဵင်ၼၼ်ႇတ ။ 2.ၸၢႆးဢႃႉ ။ 3.လုင်းၵေႃးလီႇ ။ 4.ၵူဝ်ႇထုၼ်း ။ 5.ၸၢႆးၼႃႇရတ်ႉတ ။ 6.ၸၢႆးၵေႃးလိင်ႇၺ (ဢႃယု 15 ပီ) ။ 7.ၸၢႆးၶိူဝ်းႁၢၼ်တ ၸိူဝ်းထုၵ်ႇ သိုၵ်းမၢၼ်ႈ တီႉၺွပ်းၵႂႃႇ ဝၢႆးသိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် ၼႂ်း ၸႄႈဝဵင်း ၵုၼ်ႁဵင်ၼၼ်ႉ သိုၵ်းမၢၼ်ႈ ပွႆႇပၼ်ၶိုၼ်း မိူဝ်ႈဝၼ်းတီႈ 26/08/2015 ပွတ်းၼႂ် - ၽူႈတႅၼ်း သၽႃး ၸႄႈမိူင်း ၵုၼ်ႁဵင် ၼၢင်းဝႃႇၼု လၢတ်ႈ ။


လွင်ႈတၢင်း ဢၼ်သိုၵ်းတႆး တင်းသိုၵ်းမၢၼ်ႈ ပဵၼ်ပၢင်တိုၵ်းၼၼ်ႉ လႆႈႁူႉဝႃႈ ငႃးသိုၵ်း တပ်ႉသိုၵ်းၸိုင်ႈတႆး (RCSS/SSA) လုၵ်ႉတၢင်း ၵဵင်းတွင်း ၶူဝ်လမ်သေ မႃးတၢင်း ၵဵင်းလူမ်း ၵဵင်းၶမ်း ၊ ၾၢႆႇသိုၵ်းမၢၼ်ႈ လႆႈၶၢဝ်ႇသေ ႁၢင်ႈႁႅၼ်းသိုၵ်း လမ်းဝႅတ်ႉ ၊ ၾၢႆႇသိုၵ်းမၢၼ်ႈ ဢိင်ဢၢင်ႈဝႃႈ သိုၵ်းတႆး ဢမ်ႇယွၼ်း ဢၼုၺၢတ်ႈ ဢမ်ႇၸႅင်ႈ လူင်ႈၼႃႈသေ ၵႂႃႇတႃႈပႆတၢင်း - ၼႆယဝ်ႉ ။


ဝၢႆးပဵၼ် ပၢင်တိုၵ်းၼၼ်ႉ ၵူၼ်းမိူင်း 7 ၵေႃႉ ထုၵ်ႇတီႉ ၺွပ်းၵႂႃႇယဝ်ႉ ဝၼ်းတီႈ 25/08/2015 ပွတ်းၶမ်ႈ ၼၢင်းဝႃႇၼု လႆႈတႅမ်ႈ လိၵ်ႈတၢင်ႇ တီႈၵႅမ်ႁူဝ်ပဝ်ႈ ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈ မိူင်းႁူမ်ႈတုမ် (UPWC) ဢူးဢွင်ႇမိၼ်း ၵဵဝ်ႇၵပ်းလွင်ႈၼႆႉ ။


ၵဵဝ်ႇၵပ်းလွင်ႈ ပၢင်တိုၵ်းၼႆႉ ၸဝ်ႈသိုၵ်းလူင် ၸၢႆးလႃႉ ၽူႈၶၢၼ်ပၢၵ်ႇ RCSS/SSA ၵေႃႈလၢတ်ႈဝႃႈ - မိူဝ်ႈဝၼ်းတီႈ 25/08/2015 ပဵၼ်ပၢင်တိုၵ်းၵၼ် 2 တီႈ ၊ ပဵၼ်ၼႂ်းဢိူင်ႇ သၢႆးၶၢဝ် တီႈဝၢၼ်ႈ ပဵင်းၶၢၼ် တင်းဝၢၼ်ႈလဝ်း ၊ ပဵၼ်ယၢမ်းၵၢင်ၼႂ် တင်းယၢမ်း ဝၢႆးဝၼ်း ။ ဝၢႆးပၢင်တိုၵ်းယဝ်ႉ သိုၵ်းမၢၼ်ႈ ထႅမ်ႁႅင်းသိုၵ်း ၼႂ်းၸႄႈဝဵင်း ၵုၼ်ႁဵင်ထႅင်ႈ - ဝႃႈၼႆ ။


တပ်ႉသိုၵ်းၸိုင်ႈတႆး (RCSS/SSA) တင်း လူင်ပွင်ၸိုင်ႈ မၢၼ်ႈၼႆႉ တႄႇၵိုတ်း တိုၵ်းၵၼ် မိူဝ်ႈႁၢင်ပီ 2011 ။ ၼႂ်းၸုမ်း ယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်ဝႆႉ ပေႃႇလသီႇ ၶႅင်တေႃႇ လူင်ပွင်ၸိုင်ႈၼႆႉ ပဵၼ်ၸုမ်း ၵိုတ်းတိုၵ်း ဢွၼ်တၢင်းသုတ်း ။ လႆႈလူင်းလၢႆးမိုဝ်း ၸၼ်ႉၸိုင်ႈမိူင်းႁူမ်ႈတုမ် ၵၼ်တင်း လူင်ပွင်ၸိုင်ႈမၢၼ်ႈ ၵူၺ်းပႆႇပေႃး ၊ ပူၼ်ႉမႃးမိူဝ်ႈ ဝၼ်းၸိုင်ႈမိူင်း ႁူမ်ႈတုမ် 12/02/2015 ၼႆႉၵေႃႈ လႆႈလူင်းလၢႆးမိုဝ်း ပိူဝ်ႈတႃႇၵေႃႇသၢင်ႈ လွင်ႈၶိုၼ်းမႄး လီၵၼ်ၼႂ်း ၸိူဝ်ႉၸၢတ်ႈ ႁူမ်ႈၵၼ်တင်း လူင်ပွင်ၸိုင်ႈမၢၼ်ႈ ။