မေႃသွၼ် လိၵ်ႈတႆး 33 ၵေႃႉ လႆႈႁပ်ႉ ပုၼ်ႈၽွၼ်း ပဵၼ်တၢင်းၵၢၼ် တႃႇသွၼ် လိၵ်ႈတႆး ၼႂ်းႁူင်းႁဵၼ်း လူင်ပွင်ၸိုင်ႈ ၼႂ်းၸႄႈဝဵင်း ၵျွၵ်ႉမႄး ၸိုင်ႈတႆး ပွတ်းႁွင်ႇ ။

မေႃသွၼ် ၸိူဝ်း ႁပ်ႉပုၼ်ႈၽွၼ်း သွၼ်လိၵ်ႈတႆး ၼႆႉပဵၼ် မေႃသွၼ်ၸၢႆး 3 ၵေႃႉ လႄႈ မေႃသွၼ်ယိင်း 30 ၵေႃႉသေ တေတႄႇသွၼ် ၼႂ်းႁူင်းႁဵၼ်း လူင်ပွင်ၸိုင်ႈ ၸႄႈဝဵင်း ၵျွၵ်ႉမႄး ၼႂ်းဝၼ်းတီႈ 1 လိူၼ် သႅပ်ႊထႅပ်ႊပိူဝ်ႊ 2015  (လိူၼ်တေမႃး) ။


ႁူင်းႁဵၼ်း ဢၼ်တေသွၼ် ၸိူဝ်းၼၼ်ႉပဵၼ် - ႁူင်းႁဵၼ်း ၸၼ်ႉငဝ်ႈ မၢႆ (1) ထိုင်မၢႆ (13) ၊ ႁူင်းႁဵၼ်း ၸၼ်ႉၵၢင် မၢႆ (3) ၊ ႁူင်းႁဵၼ်း ၸၼ်ႉသုင် မၢႆ (2) မၢႆ(3) လႄႈ တင်းမၢႆ (4) ၊ ႁူင်းႁဵၼ်းၸၼ်ႉသုင်မိူင်းတၢင်ႈ၊ႁူင်းႁဵၼ်းၸၼ်ႉငဝ်ႈမၢၼ်ႈၼမ်ႉႁူးတွင်း၊မၢၼ်ႈၵွင်းမူး၊မၢၼ်ႈၶႃႇ၊
ၶူဝ်တႅၼ်ႈ ၊ ပူးၶႃး ၊ ၼႃးထွၼ်ႇ ၊ ၼႃးမူၼ်း ၊ ၼမ်ႉၸေႃႉ ၊ ၸွၺ်းၵုင်း ၊ ႁူင်းႁဵၼ်း ပၵဝတ်ႉ ၵျွင်းယွတ်ႈ လႄႈ ႁူင်းႁဵၼ်း ပၵဝတ်ႉ ၵမ်ႇပေႃးၸ ၵျွင်းတႆး ၸဵမ်ၸိူဝ်း ၼႆႉ ။


ယူႇတီႈ ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်း ၵျွၵ်ႉမႄးသေ မိူဝ်ႈပူၼ်ႉမႃး ဝၼ်းတီႈ 20/8/2015 ၼၼ်ႉလႆႈ ၸတ်းႁဵတ်း ပၢင်ယိုၼ်ႈဢၢပ်ႈ ပၼ်ပုၼ်ႈၽွၼ်း မေႃသွၼ် လိၵ်ႈတႆး တႃႇတေသွၼ် လိၵ်ႈတႆး
ၼႂ်းႁူင်းႁဵၼ်း လူင်ပွင်ၸိုင်ႈ တီႈႁူင်းႁဵၼ်း ၸၼ်ႉသုင် မၢႆ ( 4) ပွၵ်ႉၼမ်ႉတုမ် ဝဵင်းၵျွၵ်ႉမႄး ၸိုင်ႈတႆးပွတ်း ႁွင်ႇ - ဝႃႈၼႆ ။


မိူဝ်ႈပူၼ်ႉမႃး ဝၼ်းတီႈ 1/8/2015 ၼၼ်ႉ ၵေႃႈၵေႃလိၵ်ႈလၢႆး လႄႈ ၾိင်ႈငႄႈတႆးၸႄႈ ဝဵင်းၵျွၵ်ႉမႄး ယင်းလႆႈ ၸတ်းႁဵတ်း ပၢင်ၽိုၵ်းၽွၼ်ႉ မေႃသွၼ် တွၼ်ႈတႃႇ မေႃသွၼ် ၸိူဝ်းတေ သွၼ်လိၵ်ႈတႆး ၼႂ်းႁူင်းႁဵၼ်း လူင်ပွင်ၸိုင်ႈ ။