လူင်းပွင်ၸိုင်ႈ မိူင်းတႆးလႄႈ ၽူႈၵွၼ်း ၸႄႈတွၼ်ႈ တႃႈၶီႈလဵၵ်း ႁူမ်ႈပႃး ၸဝ်ႈတႃႇၼ ႁူမ်ႈၵၼ်ၸွႆႈ ထႅမ်ငိုၼ်း လႄႈ ၶူဝ်းၶွင် ၊ တမ်တူဝ် ၽူႈၵွၼ်း ၸႄႈတွၼ်ႈ တႃႈၶီႈလဵၵ်း ၵႂႃႇယိုၼ်ႈမွပ်ႈပၼ် ၼႂ်းမိုဝ်းၵူၼ်း ထူပ်းၽေးၼမ်ႉထူမ်ႈ ဢိူင်ႇပႃႇလႅဝ်း ၵိင်ႇၸႄႈဝဵင်း ၵဵင်းလၢပ်ႈ ၸႄႈတွၼ်ႈ တႃႈၶီႈလဵၵ်း ၸိုင်ႈတႆး ပွတ်းဢွၵ်ႇ တႃႇ 74 လင်ႁိူၼ်း ။

ပူၼ်ႉမႃး မိူဝ်ႈဝၼ်းတီႈ 19/08/2015 တူဝ်ၽူႈၵွၼ်း ၸႄႈတွၼ်ႈ တႃႈၶီႈလဵၵ်း ႁွတ်ႈၽႅဝ် တီႈဢိူင်ႇပႃႇလႅဝ်း ၵိင်ႇၸႄႈ ဝဵင်းၵဵင်းလၢပ်ႈ ၸႄႈတွၼ်ႈ တႃႈၶီႈလဵၵ်း ၶၢဝ်းယၢမ်း ပွတ်းဝၼ်းသေ မွပ်ႈပၼ်ငိုၼ်း ၵူၼ်းထူပ်းၽေး ၼမ်ႉထူမ်ႈ ၼႂ်းဢိူင်ႇ ပႃႇလႅဝ်း တႃႇလင်ႁိူၼ်း 74 လင် ၼိုင်ႈ လင်ႁိူၼ်းလၢႆ 10 သႅၼ်ပျႃး တွၼ်ႈတႃႇ ၵူၼ်းထူပ်းၽေး ပေႃးတေၸၢင်ႈ မႄးႁဵတ်းႁိူၼ်း ၶိုၼ်းလႆႈ ဢၼ်လူႉၵွႆၸွမ်း ၼမ်ႉလႄႈ ႁိူၼ်းၸိူဝ်း ထုၵ်ႇၼမ်ႉလုပ်ႇၵႂႃႇ ။


လုင်းၸၢႆးသၢမ် ၽူႈၵွၼ်းဢိူင်ႇ ပႃႇလႅဝ်း လၢတ်ႈၼႄ ၸုမ်းၶၢဝ်ႇ ၽူႈတွႆႈႁွၵ်ႈဝႃႈ ၵွၼ်ႇၼႃးဝၼ်းတီႈ 19 ၼၼ်ႉၵေႃႈ ၵမ်ႈတူဝ် ၽူႈၵွၼ်း ၸႄႈတွၼ်ႈ တႃႈၶီႈလဵၵ်း လႆႈမႃး မွပ်ႇပၼ်ငိုၼ်း ၵမ်ႉထႅမ်ယဝ်ႉ ၵမ်းၼိုင်ႈ မိူဝ်ႈၼၼ်ႉတႄႉ ပဵၼ်ငိုၼ်း လူင်ပွင်ၸိုင်ႈ မိူင်းတႆး ၸွႆႈထႅမ်မႃး ၼိုင်ႈႁိူၼ်း 30000 ပျႃး တႃႇ 74 လင်ႁိူၼ်း ၼင်ႇၵဝ်ႇ ။ သင်ဝႃႈ ႁူမ်ႈၵၼ်ပႃး ၼႂ်းဝၼ်းတီႈ 19 ၼႆႉ တေပဵၼ် 1030000 (သိပ်းသႅၼ် သၢမ်မိုၼ်ႇပျႃး) ။ ၼွၵ်ႈလိူဝ် ၼၼ်ႉၵေႃႈ တေမီးၶူဝ်း ၸႂ်ႉသွႆ လႄႈ ၶွင်ၵိၼ်ယႅမ်ႉ ၵမ်းၽွင်း ဝႃႈၼႆ။


ၵပ်းၵၢႆႇလူၺ်ႈ လွင်ႈငိုၼ်း ၵမ်ႉထႅမ် ၶူဝ်းၸႂ်ႉသွႆ လႄႈ ၶွင်ၵိၼ်ယႅမ်ႉတႄႉ ၵမ်ႈတူဝ် ၽူႈၵွၼ်း တႃႈၶီႈလဵၵ်း မႃးတွၼ်ႈပၼ် ၼႂ်းမိုဝ်း ၵူၼ်းထူပ်းၽေး ၵမ်းသိုဝ်ႈ ၼႆယဝ်ႉ။


ဢိင်ၼိူဝ် ၾူၼ်တူၵ်း ႁႅင်းသေ ပူၼ်ႉမႃး မိူဝ်ႈဝၼ်းတီႈ 04/08/20156 ၶၢဝ်းယၢမ်း ၵၢင်ၼႂ်ၸဝ်ႈ မွၵ်ႈ 4 မူင်းပၢႆၼၼ်ႉ ။ မႄႈၼမ်ႉၵႆး ၼွင်းလူၼ်ႉ ၶဝ်ႈထူမ်ႈၼႂ်း ဢိူင်ႇပႃႇလႅဝ်းလႄႈ ၵူၼ်းဝၢၼ်ႈ ဢၼ်လႆႈလူႉ တၢႆၵႂႃႇ မီး (4) ၵေႃႉ ၼႂ်း 4 ၵေႃႉ ၊ 1. ပႃႈသႅင် ဢႃယု (56) ပီ ၊ 2. ၼၢင်းၶမ်း ဢႃယု (30) ၊ 3. လုၵ်းၸၢႆးၼၢင်းၶမ်း ၸၢႆးဢွၼ်ႇၵႅဝ်ႈ ဢႃယု (8) ပီ ၊ 4. ၼၢင်းသုလႃႇတီႇ ပဵၼ်လုၵ်ႈၶူးသွၼ် ၼႂ်းႁူင်းႁဵၼ်းဝၢၼ်ႈ ၼမ်ႉၵႆး ဢႃယု (2) ပီ ။ ႁိူၼ်းဢၼ် လႆႈထုၵ်ႇၼမ်ႉ လုပ်ႇၵႂႃႇ မီး (6) ဝၢၼ်ႈ 1. ဝၢၼ်ႈၼမ်ႉၵႆး ၊ 2. ဝၢၼ်ႈမီးမႂ်ႇ ၊ 3. ဝၼ်းတေႃၵေႃႉ ၊ 4. ဝၢၼ်ႈၼမ်ႉၽဵင် ၊ 5. ဝၢၼ်ႈၼမ်ႉဝၼ်းသွင် ၊ 6. ထႅင်ႈဝၼ်ႈၼိုင်ႈ ဢမ်ႇႁူႉၸိုဝ်ႈ ။ ႁိူၼ်း ဢၼ်လူႉလႅဝ်သမ်ႉ မီး 9 လင်ႁိူၼ်း ။ ၵူၼ်းဝၢတ်ႇၸဵပ်းသမ်ႉ မီး 3 ၵေႃႉ ပဵၼ်ၼႂ်းၶွပ်ႈၶူပ်း လုင်းၸၢႆးၼူၼ်း (ဝၢၼ်ႈၼမ်ႉၵႆး) ၊ ၶူဝ်ဢၼ်လႆႈၵွႆသမ်ႉ မီး(9) တီႈ 1. ၶူဝ်ၼမ်ႉၶိုမ်း ၊ 2. ၶူဝ်ၶယေႇဢူး ၊ 3. ၶူဝ်ၵေႃမႆႉႁူင်း ၊ 4. ၶူဝ်ဝၢၼ်ႈမီးမႂ်ႇ ၊ 5. ၶူဝ်ၼမ်ႉသၢၼ်ႈ ၊ 6. ၶူဝ်ၼမ်ႉဝၼ်း ၊ 7. ၶူဝ်ဝၢၼ်ႈပုင်ႇ ၊ 8. ၶူဝ်ၼမ်ႉၽဵင် ၊ 9. ၶူဝ်ဢွၼ်ႇ/လဵၵ်ႉ ထႅင်ႈတီႈၼိုင်ႈ ။ ၼွၵ်ႈလိူဝ်သေၼၼ်ႉ ၼႃးဢၼ်လႆႈလူႉလႅဝ်ၵႂႃႇ မီးမွၵ်ႈ 700 ဢေႊၵိူဝ်ႊပၢႆ ၼႆယဝ်ႉ ။