ၸုမ်း တပ်ႉသိုၵ်း ၵူၼ်းမိူင်း တပ်ႉၸုမ်း (7) ၵိင်ႇၸႄႈ ဝဵင်းၵႃလိ ၸႄႈဝဵင်း ၵုၼ်ႁဵင် ၸိုင်ႈတႆး ပွတ်းၸၢၼ်း လႆႈၸွႆႈထႅမ် ငိုၼ်း တႃႇၵူၼ်း ထူပ်းၽေး ၼမ်ႉထူမ်ႈ ၊ လႆႈၸွႆႈထႅမ် ယိုၼ်ႈမွပ်ႈတီႈ ပႃႊတီႊ ႁူဝ်သိူဝ် ဝဵင်းတႃႈၶီႈလဵၵ်း တႃႇငိုၼ်း 100 သႅၼ်ပျႃး ။

ပူၼ်ႉမႃး မိူဝ်ႈဝၼ်းတီႈ 21/08/2015 ၶၢဝ်းယၢမ်း 9.00 မူင်းပၢႆ ၸုမ်း တပ်ႉသိုၵ်း ၵူၼ်းမိူင်း တပ်ႉၸုမ်း (7) ၵိင်ႇ ၸႄႈဝဵင်းၵႃလိ ၸႄႈဝဵင်း ၵုၼ်ႁဵင် ၸိုင်ႈတႆး ပွတ်းၸၢၼ်း လႆႈၸွႆႈငိုၼ်း တႃႇၵမ်ႉထႅမ် ၸွႆႈၵူၼ်း ထူပ်းၽေး ၼမ်ႉထူမ်ႈ တၢင်းပွတ်း ဢွၵ်းၶူင်း လၢႆလၢႆတီႈ မိူၼ် မိူင်းတူၼ်၊  မိူင်းၵျွတ်ႈ ၊ မိူင်းယွင်းလႄႈ ဢိူင်ႇပႃႇလႅဝ်း ၵိင်ႇၸႄႈဝဵင်း ၵဵင်းလၢပ်ႈ ၸဵမ်ၸိူဝ်ႉၼႆႉ ။ ၽူႈမီးၸၼ်ႉၸုမ်း (7) လႆႈမွပ်ႈပၼ် ငိုၼ်းၵမ်ႉၸွႆႈ တႃႇ 100 သႅၼ်ပျႃး တီႈၸုမ်းပွင်ၵၢၼ် ပႃႊတီႊႁူဝ်သိူဝ် ဝဵင်းတႃႈၶီႈလဵၵ်း ၼင်ႇႁိုဝ် ၵူၼ်းထူပ်းၽေး ပေႃးတေလႆႈ တင်းၸွႆႈထႅမ် ထိုင်ၼႂ်းမိုဝ်း ။


ၸၢႆးၼုမ်ႇတုၺ်ႈ ၽူႈၼမ်းၼႂ်း ပႃႊတီႊ ႁူဝ်သိူဝ် ဝဵင်းတႃႈၶီႈလဵၵ်း လၢတ်ႈဝႃႈ မိူဝ်ႈပူၼ်ႉမႃး ၶၢဝ်းတၢင်း ၼပ်ႉလၢႆဝၼ်း ၼၼ်ႉ ပႃႊတီႊ ႁူဝ်သိူဝ် ဝဵင်းတႃႈၶီႈလဵၵ်ႈ လႆႈႁပ်ႉတင်း ၸွႆႈထႅမ် တီႈ ၸဝ်ႈတႃႇၼ လၢႆမူႇ လၢႆၸုမ်း ၸွႆႈထႅမ်မႃး မွၵ်ႈငိုၼ်း 50 သႅၼ်ပျႃး ။ ပႃႊတီႊႁဝ်းၶႃႈ လႆႈၸတ်း ၵၢၼ်သိုဝ်ႉ ၶူဝ်းၸႂ်ႉသွႆလႄႈ ၶွင်ၵိၼ်ယႅမ်ႉ ဢၼ်ၵူၼ်း ထူပ်းၽေး တၵ်းတေလႆႈၸႂ်ႉ ။


ၶူဝ်းၶွင် ၸိူဝ်းၼၼ်ႉ ႁဝ်းၶႃႈ လႆႈၸတ်းသႂ်ႇ ထူင်ၸၢၼ်း ပဵၼ်ထူင်သေ ၵႂႃႇၸွႆႈထႅမ် ၵူၼ်းၽေးၼမ်ႉထူမ်ႈ ပွတ်းမိူင်းတူၼ် ၊ မိူင်းၵျွတ်ႈ ထႅင်ႈၾၢႆႇၼိုင်ႈၵေႃႈ တၢင်းပွတ်း မိူင်းယွင်း လႄႈ တၢင်းပွတ်း ဢိူင်ႇပႃႇလႅဝ်း ၵိင်ႇၸႄႈဝဵင်းၵဵင်းလၢပ်ႈ ၸႄႈတွၼ်ႈ တႃႈၶီႈလဵၵ်း ဝႃႈၼႆ။


ၸုမ်း တပ်ႉသိုၵ်း ၵူၼ်းမိူင်း တပ်ႉၸုမ်း (7) ၵႃလိသေ ၸွႆႈငိုၼ်းမႃး တႃႇ 100 သႅၼ်ပျႃးတီႈ ပႃႊတီႊ ႁူဝ်သိူဝ် လႄႈ တၢင်း ပႃႊတီႊ ႁူဝ်သိူဝ်လႆႈ ႁၢင်ႈႁႅၼ်းၸတ်းပၼ် ဢဝ်ၵႂႃႇ ၵမ်ႉထႅမ် ၸွႆႈၵူၼ်း ထူပ်းၽေးၼမ်ႉထူမ်ႈ ၼႆယဝ်ႉ ။


ဢိင်ၼိူဝ် ၾူၼ်တူၵ်း ႁၢဝ်းႁႅင်း ၼပ်ႉဝၼ်း ထပ်းၵၼ်သေ ပူၼ်ႉမႃး မိူဝ်ႈဝၼ်းတီႈ 04/08/2015 ၶၢဝ်းယၢမ်း ၵၢင်ၶိုၼ်း ယွၼ်ႉ မႄႈၼမ်ႉၵႆး ၼွင်းၶိုၼ်ႈႁႅင်းသေ လႆႈလုပ်ႇပႃး ႁိူၼ်းၵႂႃႇ တင်းမူတ်း21 လင်ႁိူၼ်း ၊ ၶူဝ်ၵွႆၵႂႃႇ (9) တီႈ ၊ ၵူၼ်း လူႉတၢႆၵႂႃႇ ၸွမ်းၼမ်ႉ 4 ၵေႃႉ ၊ ၵူၼ်းဢၼ်လႆႈ ဝၢတ်ႇၸဵပ်း 3 ၵေႃႉ ၊ ၼႃးဢၼ်လႆႈလူႉၵွႆ 700 ဢေႊၵိူဝ်ႊပၢႆ ၼႆယဝ်ႉ ။