ပၢင်ၵုမ်ၶိုၵ်ႉၶၵ်ႉ သၽႃးမိူင်းတႆး ပူတ်းတၼ်းႁဵင်း ၶုၼ်ၽွင်းလူင်ၾၢႆႇႁူမ်ႇလူမ်ႈလႄႈလႅၼ်လိၼ် ၸႄႈမိူင်းတႆး ၸဝ်ႈသိုၵ်းလူင်ဢွင်ႇတူႇ၊ တႅင်ႇတင်ႈ ၸဝ်ႈသိုၵ်းလူင်ၸူဝ်းမူဝ်းဢွင်ႇ ပုတ်ႈတႅၼ်း။

ၵဵဝ်ႇၵပ်းလွင်ႈၼႆႉ ဝၢႆးပၢင်ၵုမ်သၽႃးမိူင်းတႆး ဢၼ်ၸတ်းမိူဝ်ႈဝၼ်းတီႈ 18-19/08/2015 တီႈဝဵင်းလူင် တူၼ်ႈတီးယဝ်ႉ၊ ထိုင်မႃးဝၼ်းတီႈ 20/08/2015 မီးၵၢၼ်ႁွင်ႉပၢင်ၵုမ်ၶိုၵ်ႉၶၵ်ႉထႅင်ႈ။ တီႈပၢင်ၵုမ်ၼၼ်ႉ ပိုၼ်ၽၢဝ်ႇဝႃႈ ၽွင်းလူင်ၾၢႆႇႁူမ်ႇလူမ်ႈလႄႈလႅၼ်လိၼ် ၸႄႈမိူင်းတႆး ၸဝ်ႈသိုၵ်းလူင်ဢွင်ႇတူႇၼၼ်ႉ တေပုတ်ႈလၢႆႈယဝ်ႉ။ တၼ်းႁဵင်းတီႈၸဝ်ႈသိုၵ်းလူင်ဢွင်ႇတူႇၼႆႉ တေပဵၼ်ၸဝ်ႈသိုၵ်းလူင် ၸူဝ်းမူဝ်းဢွင်ႇ- ၼႆယဝ်ႉ။


ၸဝ်ႈသိုၵ်းလူင် ၸူဝ်းမူဝ်းဢွင်ႇၼႆႉ ပဵၼ်ၽူႈၵွၼ်းတိူင်းဝၼ်းဢွၵ်ႇ (ယပၶ) ဢၼ်ပၵ်းတီႈတူၼ်ႈတီး။ တၼ်းႁဵင်း ၸဝ်ႈသိုၵ်းလူင်ဢွင်ႇတူႇၼႆႉ တႅင်ႇတင်ႈၸဝ်ႈသိုၵ်းလူင် ၸူဝ်းမူဝ်းဢွင်ႇ ပုတ်ႈတႅၼ်း၊ တီႈသၽႃးလႆႈတႅပ်းတတ်းမၵ်းမၼ်ႈသေ လႆႈပိုၼ်ၽၢဝ်ႇမိူဝ်ႈဝႃးၼႆႉ - ၽူႈတႅၼ်းသၽႃးၸႄႈမိူင်း ၸၢႆးသူႇရိၼ်ႇဢူး လၢတ်ႈ။


ပၢင်ၵုမ်သၽႃးမိူင်းတႆး ဢၼ်ႁူဝ်ပဝ်ႈသၽႃးၸႄႈမိူင်းတႆး  ႁွင်ႉတီႈတူၼ်ႈတီးၼႆႉ ၸတ်းဝၼ်းတီႈ 18-19/08/2015 ။ ဝၼ်းတီႈ 18 ဝၼ်းႁႅၵ်ႈ ဢုပ်ႇၵုမ်လွင်ႈ ၵူၼ်းထူပ်းၽေးၼမ်ႉထူမ်ႈ။ ဝၼ်းတီႈ 19 ဢုပ်ႇၵုမ်လွင်ႈငိုၼ်းတွင်း တႃႇၸႂ်ႉၸၢႆႇ ပီ 2015-2016  သေပိုၼ်ၽၢဝ်ႇဝႃႈ  ပၢင်ၵုမ်သၽႃးပွၵ်ႈၼႆႉယဝ်ႉတူဝ်ႈယဝ်ႉ။


ၵူၺ်းၵႃႈ ထိုင်ဝၼ်းတီႈ 20 ၵၢင်ၼႂ်မႃး မီးယိုၼ်ႈလိၵ်ႈၸူး ၽူႈတႅၼ်းသၽႃးၶဝ်ၶိုၼ်းၵူႈၵေႃႉသေ ႁႂ်ႈၽူႈတႅၼ်းၶဝ်ၵႂႃႇၶဝ်ႈႁူမ်ႈပၢင်ၵုမ်။ ႁဝ်းၶႃႈၵေႃႈ ဢွၼ်ၵၼ်ၵႂင်မူတ်း၊ ၵွပ်ႈဝႃႈ မိူဝ်ႈဝၼ်းတီႈ 19 ပိုၼ်ၽၢဝ်ႇဝႃႈ ပၢင်ၵုမ်သၽႃးယဝ်ႉတူဝ်ႈယဝ်ႉ၊ ၽိူဝ်ႇၵၢင်ၼႂ်မႃး သမ်ႉႁွင်ႉမႃးၶိုၼ်းၸိူင်ႉၼႆ မၼ်းၵေႃႈလၢၵ်ႇလၢႆး။ ၽူႈတႅၼ်းၵမ်ႈၽွင်ႈ ဢၼ်ယူႇၸမ်ဝဵင်းတူၼ်ႈတီးၸိူဝ်းၼၼ်ႉ ၶဝ်ပွၵ်ႈမိူဝ်းၵႂႃႇမူတ်းယဝ်ႉ၊ မိူဝ်ႈဝႃး ၽိူဝ်ႇႁွင်ႉပၢင်ၵုမ်ၶိုၵ်ႉၶၵ်ႉ ထႅင်ႈၵမ်းၼႆႉ ၵိုတ်းၽူႈတႅၼ်းသၽႃးမွၵ်ႈ 60 ပၢႆၵူၺ်း ဢၼ်မႃးၶဝ်ႈႁူမ်ႈပၢင်ၵုမ်- ၸၢႆးသူႇရိၼ်ႇဢူး လၢတ်ႈ။


ၼၢင်းၶမ်းဢေး ၽူႈတႅၼ်းသၽႃးၸႄႈမိူင်း ၸႄႈဝဵင်းၼမ်ႉတူႈ လၢတ်ႈဝႃႈ- ဝၼ်းတီႈ 18 လႄႈ 19 ဢၼ်ၶဝ်ႁွင်ႉပၢင်ၵုမ်ၶိုၵ်ႉၶၵ်ႉ 2 ဝၼ်းၼႆႉ ဢုပ်ႇဢူဝ်းၵၼ် ဢၼ်လမ်ႇလွင်ႈမီး 2 လွင်ႈ။ 1.တႃႇတၢင်ႇယွၼ်းငိုၼ်းၸႂ်ႉၸၢႆႇ ပီ 2015-2016 ။ 2.တႃႇႁပ်ႉႁွင်းမၼ်းမၼ်ႈ ပိူင်ယုၵ်းယၢင်ႇ ဢၼ်တၢင်ႇဝႆႉ မိူဝ်ႈပီၵၢႆ (2014) ၵဵဝ်ႇၵပ်းလွင်ႈယႃႈယႃပိုၼ်ႉမိူင်း ၼၼ်ႉၵူၺ်း။ ဢၼ်ၶဝ်လႆႈယွၼ်းၵႂႃႇငိုၼ်း တႃႇတေၸႂ်ႉၸၢႆႇၼၼ်ႉတႄႉ  လၢၼ်ႉမၼ်း 240 ။ ငိုၼ်းၼႆႉ တႃႇၸႂ်ႉၸၢႆႇၵူႈႁွင်ႈၵၢၼ် ၵူႈတီႈၵူႈမူႇၸုမ်း ၼႂ်းလူင်ပွင်ၸိုင်ႈမိူင်းတႆး- ဝႃႈၼႆ။


လႆႈႁူႉထႅင်ႈဝႃႈ တႃႇတေႁဵတ်းပၢင်ၵုမ်ထႅင်ႈၵမ်းၼိုင်ႈ တေပဵၼ်ၼႂ်းလိူၼ်သႅပ်ႊထႅမ်ႊၿိူဝ်ႊ ဝူင်ႈလိုၼ်းသုတ်း တေမႃးၼႆႉ။ လႅပ်ႈတေပဵၼ်ပၢင်ၵုမ်သၽႃး လူင်ပွင်ၸိုင်ႈမိူင်းတႆး ပွၵ်ႈၵမ်းလိုၼ်းသုတ်း တွၼ်ႈတႃႇၼႂ်းၽွင်းယၢမ်းဢႃယု ႁဵတ်းၵၢၼ်လူင်ပွင်ၸိုင်ႈမိူင်းတႆး ၸုပ်ႈၼႆႉ။