ဢိင်ၼိူဝ် ပီႈၼွင်ႉၵူၼ်းမိူင်း ၼႂ်းၸိုင်ႈတႆး ပွတ်းဢွၵ်ႇၶူင်း ပွတ်းပႃႇလႅဝ်း- ၵဵင်းလၢပ်ႈ ထူပ်းၽေး ၼမ်ႉထူမ်ႈသေ မီးၽူႈမီးၼမ်ႉၸႂ်လီ သတ်ႉထႃး လၢႆမူႇၸုမ်း ဢွၼ်ၵၼ် လူင်းပိုၼ်ႉတီႈ ၶဝ်ႈၸွႆႈထႅမ်ၶူဝ်းၶွင် တင်းၼမ်။

ဝၼ်းတီႈ 18/08/2015 (မိူဝ်ႈၼႆႉ) ပွတ်းၼႂ် ၊ ၸုမ်းတူင်ႉၼိုင် တူင်ႇဝူင်းတႆး လၢႆမူႇလၢႆၸုမ်း ဢဵၼ်ႁႅင်းမွၵ်ႈ 70 ၵေႃႉပၢႆ ၶွၼ်ႈတုမ်ၵၼ်တီႈ ဝဵင်းတႃႈၶီႈလဵၵ်းသေ ႁူမ်ႈၵၼ်ၵႂႃႇ ၸွႆႈထႅမ် ပီႈၼွင်ႉ ၵူၼ်းဝၢၼ်ႈ ၵူၼ်းမိူင်း ပွတ်းပႃႇလႅဝ်း-ၵဵင်းလၢပ်ႈ ၸိူဝ်းထူပ်းၽေးၼမ်ႉထူမ်ႈ ၽွင်းႁူဝ်လိူၼ် ဢေႃႊၵတ်ႊသ်ၼႆႉ- ၼႆယဝ်ႉ။


ၸုမ်းဢၼ်ၵႂႃႇၸွႆႈထႅမ် ၵူၼ်းထူပ်းၽေးပွၵ်ႈၼႆႉ တိူၵ်ႈၵမ်ႇမထၢၼ်း ၸွမ်ၵႅဝ်ႈလွႆမွင်း ဝဵင်းတႃႈၶီႈလဵၵ်း ၊ ၸုမ်းၶႅၵ်ႇလီပၢင်ၸႃႉ ႁူဝ်မိူင်းသႂ် ဝဵင်းတႃႈၶီႈလဵၵ်း ၊ ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းတႃႈၶီႈလဵၵ်း ၊ ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းလိူဝ်ႇ ၊  ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းတူၼ်ႈတီး ၊ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ၸဵမ်ၸိူဝ်းၼႆႉ။


ၶူဝ်းၶွင် ဢၼ်ဢဝ်ၵႂႃႇ ၸွႆႈၸိူဝ်းၼၼ်ႉ ၶူဝ်းၶွင်ၵိၼ် မိူၼ်ၼင်ႇ ၵျႃႇသၢၼ်ႇ ၊ ၽွင်ဝၢၼ် ၊ ၶဝ်ႈသၢၼ် ၊ ၼမ်ႉမၼ်း ၊ ၵိူဝ် ၸိူဝ်းၼႆႉ။ ၶူဝ်းၶွင်ၸႂ်ႉသွႆ မိူၼ်ၼင်ႇ ၽွင်သၵ်ႉၶူဝ်း ၊ ၵွၼ်ႈသီ (ဢၢပ်ႇၼမ်ႉ) ၊ ယႃႈသီၶဵဝ်ႈ ၊ မႆႉသီၶဵဝ်ႈ ၊ ၽႃႈၸဵတ်ႉၼႃႈ ၊ ၽႃႈႁူမ်ႇ ၽႃႈၵွပ်း မွၼ်ႁူဝ် ၊ ၸေႃႉ ၊ ဝၢၼ်ႇၶဝ်ႈဝၢၼ်ႇၽၵ်း ၊ ႁႆၶဝ်ႈ ၊ ထၢင်သႂ်ႇၼမ်ႉၶႅင် (ၵရႃႇတိၵ်း) ၊ မေႃႈၶၢင် ၊ ၵွၵ်းၼမ်ႉ ၸိူဝ်းၼႆႉ။


လႆႈႁူႉပႃးဝႃႈ ၸုမ်းလုၵ်ႈႁဵၼ်းၸၼ်ႉ ၸွမ်ၵဵင်းမႆႇ ၸွႆႈငိုၼ်းမႃး 14,777 ဝၢတ်ႇ။ ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းလိူဝ်ႇ ၸွႆႈငိုၼ်းမႃး တႃႇသိုဝ်ႉၶူဝ်းၶွင် 47 သႅၼ်ပျႃး။ ၼႂ်ၼႆႉ လူတ်ႉၵႃး ၸိူဝ်းတၢင်ႇၶူဝ်းၶွင် ပိူဝ်ႈတႃႇၵႂႃႇၸွႆႈ ၵူၼ်းထူပ်းၽေး ၼမ်ႉထူမ်ႈၼႆႉ မီး 10 လမ်း- ၼႆယဝ်ႉ။