ၶွမ်ႊမသျိၼ်ႊ ၵၢၼ်လိူၵ်ႈတင်ႈ မိူင်းႁူမ်ႈတုမ် UEC တႅပ်းတတ်းဝႆႉဝႃႈ မိူင်းလႃး ၶဝ်ႈပႃးၼႂ်းၶဵတ်ႇလိူၵ်ႈတင်ႈ ၼႂ်းၸႄႈတွၼ်ႈ ၵဵင်းတုင် ၊ ၵူၺ်းၵႃႈ ၸုမ်းမိူင်းလႃး ပၢၵ်ႈပႅတ်ႈ ၊ တေဢမ်ႇႁပ်ႉပုၼ်ႈၽွၼ်း ၸတ်းႁဵတ်း ပၢင်လိူၵ်ႈတင်ႈ ၼႂ်းၼႃႈလိၼ်ၶိုၵ်ႉတွၼ်းမၢႆ 4 မိူင်းလႃး။

ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ ပႃႊတီႊႁူဝ်သိူဝ် ၸၢႆးလဵၵ်ႉ လၢတ်ႈဝႃႈ- ၵူၼ်းႁဝ်းၶႃႈၼႆႉ ၵႂႃႇတၢင်ႇယိုၼ်ႈ သဵၼ်ႈမၢႆၼေႃႇၽူႈတႅၼ်း တႃႇၶဝ်ႈၶႅင်ႇၼႂ်းမိူင်းလႃး ၊ ၵူၺ်းၵႃႈ ၸုမ်းမိူင်းလႃးၶဝ်ဝႃႈ တေဢမ်ႇၸၢင်ႈႁပ်ႉ ပုၼ်ႈၽွၼ်းသေ ႁဵတ်းပၼ်ပၢင်လိူၵ်ႈတင်ႈ ၊ တေဢမ်ႇၸၢင်ႈ ႁပ်ႉပုၼ်ႈၽွၼ်းသေ တင်ႈပၼ်ပုင်း တႃႇတေတွတ်ႈ ၶႅပ်းၵၢင်ၸႂ် ၼႂ်းၼႃႈလိၼ်မိူင်းလႃး- ဝႃႈၼႆ။


ဝဵင်းမိူင်းလႃး ၸိုင်ႈတႆးပွတ်းဢွၵ်ႇၼႆႉ ၸွမ်းၼင်ႇ ပိူင်ၵၢၼ်ၽွင်းငမ်း လူင်ပွင်ၸိုင်ႈမၢၼ်ႈ ၶဝ်ႈပႃးၼႂ်း ၸႄႈတွၼ်ႈၵဵင်းတုင် ၊ ယူႇတီႈ ၶွမ်ႊမသျိၼ်ႊ ၵၢၼ်လိူၵ်ႈတင်ႈ ၸိုင်ႈမိူင်းႁူမ်ႈတုမ် လႆႈတႅပ်းတတ်းဝႆႉဝႃႈ ၼႂ်းမိူင်းလႃးၼႆႉ တေၸတ်းႁဵတ်း ၵၢၼ်လိူၵ်ႈတင်ႈ။ ၵူၺ်းၵႃႈ ယူႇတီႈၸုမ်းမိူင်းလႃး သမ်ႉဝႃႈ ၼႂ်းၼႃႈလိၼ်ၶိုၵ်ႉတွၼ်းမၢႆ 4 မိူင်းလႃးၼႆႉ တႃႇတေၸတ်းႁဵတ်း ပၢင်လိူၵ်ႈတင်ႈၼႆႉ ငဝ်းလၢႆးမၼ်း ဢမ်ႇတဵမ်ထူၼ်ႈ။


“တီႈမိူင်းလႃးႁဝ်းၶႃႈၼႆႉ ပႃႊတီႊတၢင်ႇဢၼ် ဢၼ်မႃးပၵ်းလုမ်းသေ ယူႇသဝ်း ၵေႃႈဢမ်ႇမီး။ တီႈမိူင်းလႃးၼႆႉ မီးပႃႊတီႊဢၼ်ၼိုင်ႈ ပဵၼ်ပႃႊတီႊ ၶွၼ်ႈတုမ်ငမ်းယဵၼ် ၵူၺ်း။ ၵူၺ်းၵႃႈ မၼ်းဢမ်ႇၸႂ်ႈ ပႃႊတီႊၵၢၼ်မိူင်း ၊ ပဵၼ်ပႃႊတီႊ ဢၼ်ၵုမ်းၵမ် တပ်ႉသိုၵ်းၵူၺ်းလႄႈ ဢမ်ႇၸၢင်ႈႁဵတ်း ပၢင်လိူၵ်ႈတင်ႈ။ တႃႇတေ ဢဝ်ပုၼ်ႈၽွၼ်းသေ ႁဵတ်းပၼ်ပၢင် လိူၵ်ႈတင်ႈၵေႃႈ ငဝ်းလၢႆးမၼ်း ၵေႃႈဢမ်ႇပဵၼ် ဢမ်ႇပၼ်မႃး- ၽူႈမီးၸၼ်ႉ ၼႂ်းလုမ်းႁူဝ်ပဝ်ႈလူင် မိူင်းလႃး ၸဝ်ႈၼိုင်ႈလၢတ်ႈ။


တႃႇတေၶဝ်ႈလိူၵ်ႈတင်ႈ ၼႂ်းၸႄႈဝဵင်းမိူင်းလႃးၼႆႉ ယူႇတီႈပႃႊတီႊႁူဝ်သိူဝ် ႁၢင်ႈႁႅၼ်းဝႆႉၼေႃႇၽူႈတႅၼ်း 3 ၵေႃႉ။  ၼေႃႇၽူႈတႅၼ်းၸႄႈမိူင်း 2 ၵေႃႉ၊ ၼေႃႇၽူႈတႅၼ်းၵူၼ်းမိူင်း 1 ၵေႃႉ။


ၼႂ်းၼႃႈလိၼ် မိူင်းလႃးၼႆႉ မိူဝ်ႈပၢင် လိူၵ်ႈတင်ႈပီ 2010 ၼၼ်ႉၵေႃႈ ဢမ်ႇလႆႈၸတ်းႁဵတ်း ပၢင်လိူၵ်ႈတင်ႈမႃး။ ၸုမ်းမိူင်းလႃးၼႆႉ ပဵၼ်ၸုမ်းဢၼ် ၽၢတ်ႇဢွၵ်ႇမႃးတီႈ ပႃႊတီႊ ၶွမ်ႊမိဝ်ႊၼိတ်ႉ မိူင်းမၢၼ်ႈသေ မႃးတင်ႈပဵၼ်တပ်ႉသိုၵ်း တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊ ၸိူဝ်ႉၸၢတ်ႈ-ၸိုင်ႈတႆးပွတ်းဢွၵ်ႇၶူင်း (NDAA-ESS) ဢၼ်တင်းၼမ်ႁူႉၸၵ်းဝႃႈ ၸုမ်းမိူင်းလႃး ၊ ၸဝ်ႈၸၢႆးလိုၼ်း ပဵၼ်ၽူႈဢွၼ်ႁူဝ်။


မိူင်းလႃးၼႆႉ ၾၢႆႇလူင်ပွင်ၸိုင်ႈ တတ်းမၵ်းဝႆႉဝႃႈ ပဵၼ်ၸႄႈဝဵင်းမိူင်းလႃး ဢၼ်လဵဝ်သေ ယူႇၼႂ်းၸႄႈတွၼ်ႈၵဵင်းတုင်။ ၵူၺ်းၵႃႈ ၸုမ်းမိူင်းလႃး တတ်းမၵ်းဝႆႉပဵၼ် ၸႄႈဝဵင်းမိူင်းလႃး ဢၼ်မီးဝဵင်းသိုဝ်လိုဝ်းလႄႈ ဝဵင်းမိူင်းမႃႉ ယူႇပႃႈတႂ်ႈ၊ တင်းမူတ်းမီး 3 ၸႄႈဝဵင်း။ ၾၢႆႇၼိုင်ႈၵေႃႈ ၸုမ်းမိူင်းလႃးၼႆႉ ၶႂ်ႈပူၵ်းတင်ႈၼႃႈလိၼ် ၽွင်းငမ်းတူဝ်ၵဝ်ႇ တွၼ်ႈတႃႇၸၢဝ်းၶိူဝ်းဢႃးၶႃႇ ၊ ၵွပ်ႈဝႃႈ ၼႂ်းပိုၼ်ႉတီႈ ၼႃႈလိၼ်မိူင်းလႃးၼႆႉ မီးၸၢဝ်းၶိူဝ်းဢႃးၶႃႇ ယူႇသဝ်းၼမ်။