ပႃႊတီႊႁူင်းၶဝ်ႈ (တၸၺ) တေၶဝ်ႈၶႅင်ႇ ၼႂ်းမိူင်းတႆး တႃႇ 15 ၸႄႈဝဵင်း ၊ 36 တီႈၼင်ႈ တင်း 3 သၽႃး။ ယုမ်ႇယမ်ဝႃႈ တေပေႉ ၵၢၼ်လိူၵ်ႈတင်ႈ ၵွပ်ႈဢၢၼ်းႁဵတ်းပၼ် ၽွၼ်းလီ ၵူၼ်းမိူင်း။

ပၢင်လိူၵ်ႈတင်ႈပီ 2015 ဢၼ်တေၸတ်းၼႂ်း လိူၼ်ၼူဝ်ႊဝႅမ်ႊၿိူဝ်ႊၼႆႉ ပႃႊတီႊၽွမ်ႉႁူမ်ႈ ၸိူဝ်ႉၸၢတ်ႈ ႁိုဝ် ပႃႊတီႊႁူင်းၶဝ်ႈ တၸၺ (National Unity Party-NUP)  တေၶဝ်ႈၶႅင်ႇ တၼ်းႁဵင်း ၽွင်းလူင်ၾၢႆႇ ၸၢဝ်းၶိူဝ်းဢွၼ်ႇ ၼႂ်းမိူင်းတႆး။ ၼႂ်းၸိုင်ႈမိူင်း ႁူမ်ႈတုမ်မၢၼ်ႈ ပတ်းပိုၼ်ႉၼႆႉ ပႃႊတီႊ တၸၺ တေၶဝ်ႈၶႅင်ႇ ၵၢၼ်လိူၵ်ႈတင်ႈ တႃႇ 700 တီႈၼင်ႈ။ ၼႂ်း 700 တီႈၼင်ႈၼႆႉ ၼႂ်းမိူင်းတႆးပဵၼ် 15 ၸႄႈဝဵင်း လႄႈ 36 တီႈၼင်ႈ- ၼႆယဝ်ႉ။


ႁူဝ်ပဝ်ႈပႃႊတီႊ တၸၺ မိူင်းတႆး ဢူးမျဵဝ်းမိၼ်ႉၼွင်ႇ လၢတ်ႈဝႃႈ- ဢၼ်ႁဝ်းၶႃႈ တေၶဝ်ႈၶႅင်ႇ ၼႂ်းမိူင်းတႆးၼႆႉ တေမီးၼေႃႇၽူႈတႅၼ်း ၼၢင်းယိင်း 6 ၵေႃႉ။ လိူဝ်သေၼၼ်ႉ ၼေႃႇၽူႈတႅၼ်းတၢင်ႇၵေႃႉ ဢၼ်ႁဝ်းၶႃႈလိူၵ်ႈဝႆႉၼႆႉ ယူႇၼႂ်းသႅၼ်းဢၼ် ႁဵတ်းသၢင်ႈႁၢင်ႈပွင်လႆႈ ၊ သႅၼ်းဢၼ်တၢင်းႁူႉတဵမ်တူဝ် ၊ ဢႃယု 36 တေႃႇထိုင် 59 လွၼ်ႉလွၼ်ႉ- ဝႃႈၼႆ။


ပႃႊတီႊ တၸၺ ဢၼ်တေၶဝ်ႈၶႅင်ႇ ၼႂ်းမိူင်းတႆးၼႆႉ ၼႂ်းၸိုင်ႈတႆးပွတ်းၸၢၼ်း ပဵၼ်ၸႄႈဝဵင်း တွင်ႇၼီႇ ၊ လွၵ်ႈၸွၵ်ႇ ၊ ပင်းတရႃႉ ၊ ၼမ်ႉၸၢင်။ ၼႂ်းၸိုင်ႈတႆးပွတ်းႁွင်ႇ လႃႈသဵဝ်ႈ ၊ ၼွင်ၶဵဝ် ၊ မိူင်းမိတ်ႈ ၊ မၢၼ်ႈပဵင်း။ ၼႂ်းမိူင်းတႆး ပွတ်းဢွၵ်ႇ ၸႄႈဝဵင်းၵဵင်းတုင် ၊ တႃႈၶီႈလဵၵ်း ၊ မိူင်းၽျၢၵ်ႈ ၊ မိူင်းယွင်း ၊ မိူင်းၶၢၵ်ႇ ၊ မိူင်းသၢတ်ႇ ၊ မိူင်းပဵင်း ၸိူဝ်းၼႆႉ။


တေႃႇၶိၼ်ႇလေးမိၼ်ႉ ဢၼ်တေၶဝ်ႈၶႅင်ႇ ၶဵတ်ႇလိူၵ်ႈတင်ႈမၢႆ 1 ၽွင်းတႅၼ်း သၽႃးၸႄႈမိူင်း ၸႄႈဝဵင်းတူၼ်ႈတီး လၢတ်ႈဝႃႈ- ႁဝ်းၶႃႈၼႆႉ ႁဵတ်းၸွမ်းၶေႃႈတိုဝ်းၵမ် ၵၢၼ်လိူၵ်ႈတင်ႈ 21 ၶေႃႈသေ ၶဝ်ႈၶႅင်ႇၵၢၼ်လိူၵ်ႈတင်ႈ ၊ ႁဝ်းၶႃႈမုင်ႈမွင်း တႃႇတေႁဵတ်းပၼ်ၽွၼ်းလီ ၵူၼ်းဝၢၼ်ႈ ၵူၼ်းမိူင်းလႄႈ ႁဝ်းၶႃႈယုမ်ႇယမ်ဝႃႈ ပႃႊတီႊတၸၺႁဝ်းၼႆႉ တိုၼ်းတေပေႉ- ဝႃႈၼႆ။


ပႃႊတီႊ တၸၺ ၼႆႉ ပဵၼ်ပႃႊတီႊဢၼ် ဢူးၼေႇဝိၼ်း ဢွၼ်ႁူဝ်ၼမ်းၼႃႈ ၵေႃႇတင်ႈမႃး ဝၢႆးယိုတ်းဢႃႇၼႃႇ ဝၢၼ်ႈမိူင်း (1962) ။ ၼႂ်းၵၢၼ်လိူၵ်ႈတင်ႈပီ 2015 ၼႆႉၼႂ်းၸိုင်ႈမိူင်း ႁူမ်ႈတုမ်မၢၼ်ႈ ပတ်းပိုၼ်ႉ ပႃႊတီႊတၸၺ ဢၢၼ်းၶဝ်ႈၶႅင်ႇ ၸႄႈဝဵင်းတင်းမူတ်း 300 ပၢႆ၊ ၼေႃႇၽွင်းတႅၼ်း 749 ၵေႃႉ- ၼႆယဝ်ႉ။