သိုၵ်းမၢၼ်ႈ ႁၢင်ႈႁႅၼ်းသိုၵ်း ပႂ်ႉယိုဝ်း သိုၵ်းတႆး လူၺ်ႈ ဢိင်ဢၢင်ႈဝႃႈ သိုၵ်းတႆးၵႂႃႇတၢင်း ဢမ်ႇၸႅင်ႈ လူင်ႈၼႃႈ ။ သွင်ၾၢႆႇ ပဵၼ်ပၢင်တိုၵ်းၵၼ် ၼႂ်းၸႄႈဝဵင်း ၵုၼ်ႁဵင် ဝၼ်းလဵဝ် 2 ပွၵ်ႈ ။ ဝၢႆး ပၢင်တိုၵ်းယဝ်ႉ ၵူၼ်းမိူင်းလၢႆလၢႆ ၵေႃႉ ထုၵ်ႇသိုၵ်းမၢၼ်ႈ တီႉၺွပ်း ။

ဝၼ်းတီႈ 25/08/2015 (မိူဝ်ႈဝႃး) ၼႆႉပွတ်းၼႂ် ၊ သိုၵ်းမၢၼ်ႈ တင်း တပ်ႉသိုၵ်းၸိုင်ႈတႆး (RCSS/SSA) ပဵၼ် ပၢင်တိုၵ်းၵၼ် 2 တီႈ ၼႂ်း ၸႄႈဝဵင်းၵုၼ်ႁဵင် ။ ယွၼ်ႉ သွင်ၾၢႆႇ ပဵၼ်ပၢင်တိုၵ်း ၵၼ်သေ  ၾၢႆႇသိုၵ်းမၢၼ်ႈ တီႉၺွပ်းဢဝ် ၵူၼ်းမိူင်းၵႂႃႇ 7 ၵေႃႉ ၵႂႃႇၸွမ်း ငႃးသိုၵ်းၶဝ် ။ တင်ႈတႄႇ မိူဝ်ႈဝႃႈမႃး တေႃႇထိုင် မိူဝ်ႈၼႆႉ သိုၵ်းမၢၼ်ႈ တိုၵ်ႉထႅမ်ႁႅင်းသိုၵ်း ၼႂ်းၸႄႈဝဵင်း ၵုၼ်ႁဵင်ယူႇ - ၼႆယဝ်ႉ ။


လွင်ႈတၢင်း ဢၼ်လႆႈပဵၼ် ပၢင်တိုၵ်းၼၼ်ႉ လႆႈႁူႉဝႃႈ ငႃးသိုၵ်း တပ်ႉသိုၵ်း ၸိုင်ႈတႆး (RCSS/SSA) လုၵ်ႉတၢင်း ၵဵင်းတွင်း ၶူဝ်လမ်သေ လတ်းမႃး တၢင်းၵဵင်းလူမ်း ၵဵင်းၶမ်း ၊ ၾၢႆႇသိုၵ်းမၢၼ်ႈ လႆႈၶၢဝ်ႇသေ ႁၢင်ႈႁႅၼ်းသိုၵ်း လမ်းဝႅတ်ႉ ၊ ၾၢႆႇသိုၵ်းမၢၼ်ႈ ဢိင်ဢၢင်ႈဝႃႈ သိုၵ်းတႆး ဢမ်ႇယွၼ်း ဢၼုၺၢတ်ႈ ဢမ်ႇၸႅင်ႈ လူင်ႈၼႃႈသေ ၵႂႃႇတႃႈ ပႆတၢင်းလႄႈ လႆႈပဵၼ် ပၢင်တိုၵ်းၵၼ် - ၼႆယဝ်ႉ ။


ၵဵဝ်ႇၵပ်း လွင်ႈၼႆႉ ၽွင်းတႅၼ်း ၵုၼ်ႁဵင် ၼၢင်းဝႃႇၼု လၢတ်ႈဝႃႈ - ယွၼ်ႉပိူဝ်ႈ ပဵၼ်ပၢင်တိုၵ်းၼႆႉသေ သိုၵ်းမၢၼ်ႈ တီႉၺွပ်းဢဝ် ၵူၼ်းမိူင်း ၵႂႃႇ 7 ၵေႃႉ ။ ယွၼ်ႉပိူဝ်ႈ တီႉၵူၼ်းမိူင်း 7 ၵေႃႉၼႆႉသေ ၵူၼ်းဝၢၼ်ႈ ၵူၼ်းမိူင်းၼႆႉ ဢွၼ်ၵၼ်မႆႈၸႂ် ၊ ယွၼ်ႉပိူဝ်ႈ ပွတ်းတွၼ်ႈၼၼ်ႉ ဢမ်ႇမီး ပၢင်တိုၵ်း မႃးႁိုင် ၼၢၼ်းယဝ်ႉ ။ ၵူၼ်းမိူင်း ၸိူဝ်းထုၵ်ႇ သိုၵ်းမၢၼ်ႈ တီႉၺွပ်းၵႂႃႇ 7 ၵေႃႉၼၼ်ႉပဵၼ် 1.လုင်းႁဵင်ၼၼ်ႇတ ။ 2.ၸၢႆးဢႃႉ ။ 3.လုင်းဢေႃးလီႇ ။ 4.ၵူဝ်ႇထုၼ်း ။ 5.ၸၢႆးၼႃႇရၼ်ႇတ ။ 6.ၸၢႆးၵွၼ်းတၺ်ႇၺ ၊ 7.ၸၢႆးၶိူဝ်းႁၢၼ် ၶဝ်ၸိူဝ်းၼႆႉ- ဝႃႈၼႆ ။


ၵဵဝ်ႇၵပ်း လွင်ႈပဵၼ် ပၢင်တိုၵ်းၵၼ် တင်းလွင်ႈ ၵူၼ်းဝၢၼ်ႈ ၵူၼ်းမိူင်း ထုၵ်ႇသိုၵ်းမၢၼ်ႈ တီႉၺွပ်းၵႂႃႇၼႆႉ ဝၼ်းတီႈ 25/08/2015 ၼၢင်းဝႃႇၼု လႆႈ တႅမ်ႈလိၵ်ႈတၢင်ႇ တီႈၵႅမ်ႁူဝ်ပဝ်ႈ ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်း ႁူမ်ႈတုမ် (UPWC) ဢူးဢွင်ႇမိၼ်းယဝ်ႉ - ၼႆယူႇ ။


ၵဵဝ်ႇလွင်ႈ ပၢင်တိုၵ်းၼႆႉ ၸဝ်ႈသိုၵ်းလူင် ၸၢႆးလႃႉ ၽူႈၶၢၼ်ပၢၵ်ႇ RCSS/SSA ၵေႃႈလၢတ်ႈဝႃႈ - မိူဝ်ႈဝႃးၼႆႉ ပဵၼ်ပၢင်တိုၵ်းၵၼ် 2 တီႈ ၊ ပဵၼ်ၼႂ်းဢိူင်ႇ သၢႆးၶၢဝ် တီႈဝၢၼ်ႈ ပဵင်းၶၢၼ် တင်းဝၢၼ်ႈလဝ်း ၊ ပဵၼ်ယၢမ်းၵၢင်ၼႂ် တင်းယၢမ်း ဝၢႆးဝၼ်း - ဝႃႈၼႆ ။


တပ်ႉသိုၵ်း ၸိုင်ႈတႆး (RCSS/SSA) တင်း လူင်ပွင်ၸိုင်ႈမၢၼ်ႈ ၼႆႉ တႄႇၵိုတ်းတိုၵ်းၵၼ် မိူဝ်ႈႁၢင်ပီ 2011 ။ ၼႂ်းၸုမ်း ယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်ဝႆႉပေႃႇလသီႇ ၶႅင်တေႃႇ လူင်ပွင်ၸိုင်ႈၼႆႉ ပဵၼ်ၸုမ်း ၵိုတ်းတိုၵ်း ဢွၼ်တၢင်းသုတ်း ။ လႆႈလူင်းလၢႆးမိုဝ်း ၸၼ်ႉၸိုင်ႈမိူင်း ႁူမ်ႈတုမ် ၵၼ်တင်း လူင်ပွင်ၸိုင်ႈမၢၼ်ႈ ၵူၺ်းပႆႇပေႃး ၊ ပူၼ်ႉမႃးမိူဝ်ႈ ဝၼ်းၸိုင်ႈ မိူင်းႁူမ်ႈတုမ် 12/02/2015 ၼႆႉၵေႃႈ လႆႈလူင်းလၢႆးမိုဝ်း ပိူဝ်ႈတႃႇ ၵေႃႇသၢင်ႈ လွင်ႈၶိုၼ်း မႄးလီၵၼ် ၼႂ်းၸိူဝ်ႉၸၢတ်ႈ ႁူမ်ႈၵၼ်တင်း လူင်ပွင်ၸိုင်ႈ မၢၼ်ႈ ။