ဢိင်ၼိူဝ်ၾူၼ်တူၵ်းႁၢဝ်ႈႁႅင်း ၼမ်ႉထူမ်ႈလၢႆတီႈ ၵူၼ်းထူပ်းၽေးဢၢၼ်ႇႁူဝ်သႅၼ်ၵေႃႉ ၸုမ်းၼမ်ႉၶူင်း ပိုတ်ႇႁပ်ႉၶူဝ်းၶွင်ပိူဝ်ႈၸွႆႈထႅမ် ၵူၼ်းထူပ်းၽေးၼမ်ႉထူမ်ႈ။

ဝၼ်းတီႈ 05 လိူၼ်ဢေႃႊၵတ်ႉသ် 2015 ၸုမ်းၼမ်ႉၶူင်း ပလရႁိတ ပိုတ်ႇႁပ်ႉတၢင်းၸွႆႈ ၶူဝ်းၶွင် ၶိူင်ႈၸႂ်ႉ ၶူဝ်းတိုဝ်း တႄႇဢဝ်ၶၢဝ်းယၢမ်း 08:00 – 17:00 မူင်း ၶၢဝ်းတၢင်းမွၵ်ႈ 2 ဝူင်ႈ ပိုတ်ႇႁပ်ႉ 3 ပိုၼ်ႉတီႈ 1. သဵၼ်ႈတၢင်းလဵပ်ႈဝဵင်းတၢင်းၸၢၼ်း တၢင်းၼႃႈႁၢၼ်ႉၼမ်ႉၼဵင်ႈတေႃႇဝိၼ်ႇပလႄးၼိၼ်းသီႇ 2. ၼိူဝ်သဵၼ်ႈတၢင်းလူင် ၼႃႈႁၢၼ်ႉၶၢႆၶႅပ်းတိၼ် တေႃႇဝိၼ်ႇ 3. တီႈလုမ်းၼမ်ႉၶူင်း ။

ယိူင်းဢၢၼ်းပိူဝ်ႈတႃႇၸွႆႈထႅမ် ၵူၼ်းၸိူဝ်းထူပ်းၽေး ဢၼ်တၢင်ႇၸုမ်းဢမ်ႇၶဝ်ႈထိုင်ၼၼ်ႉ ဢမ်ႇၸႅၵ်ႇဝႃႈပဵၼ် ၶိူဝ်းၵူၼ်းသင် ။ ဢွၼ်တၢင်းသုတ်းတေၸႅၵ်ႇတၢင်း မိူင်းတႆးသေၸင်ႇမႃးၸႅၵ်ႇတၢင်း မိူင်းႁူမ်ႈတုမ်တင်းသဵင်ႈ ဝႃႈၼႆ။

ၼႂ်းဝၼ်းမိူဝ်ႈၼႆႉမီးပီႈၼွင်ႉတႆး ၊ မၢၼ်ႈ လႄႈၸၢဝ်းၶိူဝ်းဢၼ်မီး ယူႇတီႈဝဵင်းလူင်တူၼ်ႈတီးမႃးၸွႆႈထႅမ် တင်းၼမ် မိူၼ်ၼင်ႇ ၶဝ်ႈသၢၼ်၊ၶဝ်ႈသွႆးႁႅင်ႈ ၊ ၼမ်ႉမၼ်း၊ ငိုၼ်းတွင်း၊ ၶူဝ်းၼုင်ႈ ၊ယႃႈယႃ၊ ဢိၵ်ႇၶွင်ၵိၼ်ၶွင်ၸႂ်ႉၸဵမ်ၸိူဝ်းၼႆႉ။


ၼၢင်းၼူၼ်းမူဝ် ၽူႈပွင်ၵၢၼ်ၸုမ်းၼမ်ႉၶူင်းလၢတ်ႈဝႃႈ -“ယွၼ်ႉလႆႈထူပ်းၽေးၼမ်ႉယႂ်ႇၵႃႈၼႆႉတႄႉ မီးတီႈၽူႈဢွၼ်ႁူဝ်ဝၢၼ်ႈမိူင်း ၶဝ်ပၼ်ဢၼုၺၢတ်ႈ ဢမ်ႇမီးပၵ်းပိူင် ၽႂ်ၶႂ်ႈတႅပ်းမႆႉၸိူင်ႉႁိုဝ်ယႃႉပႃႇထိူၼ်ႇၸိူင်ႉ ႁိုဝ်ၶဝ်ၵေႃႈပၼ်ယႃႉတႅပ်း။

ယွၼ်ႉပိူဝ်ႈဝႃႈတူၼ်ႈမႆႉၼႆႉ ပေႃးၾူၼ်တူၵ်းမႃးသင် ၸိူဝ်ႉဝႃႈႁဝ်းမီးတူၼ်ႈမႆႉမီးပႃႇမႆႉၼႆၸိုင် ႁၢၵ်ႈတူၼ်ႈမႆႉၵေႃႈတေ တိုတ်ႉဝႆႉၸၼ်ဝႆႉဢူမ်ၼမ်ႉၸိူဝ်းၼႆႉသေ ၼမ်ႉၵေႃႈတေဢမ်ႇထူမ်ႇပဵင်းၼႆႉ ယွၼ်ႉပိူဝ်ႈတႅပ်းတူၼ်ႈမႆႉဢမ်ႇမီးတူၼ်ႈမႆႉႁၢၵ်ႈမႆႉယဝ်ႉလႄႈၸင်ႇပဵၼ်ၼမ်ႉထူမ်ႈယႂ်ႇလူင်ၸိူင်ႉၼႆ ပိူင်လူင်မၼ်းတႄႉယွၼ်ႉပိူဝ်ႈယႃႉပႃႇမႆႉပႃႇထိူၼ်ႇ” ဝႃႈၼႆ။

ၸုမ်းၼမ်ႉၶူင်းၼႆႉ ၵေႃႇတင်ႈမႃးမိူဝ်ႈ 01/01/1989 ။ ယိူင်းဢၢၼ်းပိူဝ်ႈတႃႇၸွႆႈထႅမ်ပေႃႈမႄႈ ၵူၼ်းမိူင်းတႆး။ ၵူၺ်းၵႃႈယွၼ်ႉပိူဝ်ႈငဝ်းလၢႆးၵူႈလွင်ႈလွင်ႈသေ ၸုမ်းၼမ်ႉၶူင်းလႆႈၵိုတ်းယင်ႉ ၵၢၼ်တူင်ႉၼိုင်ၵႂႃႇ ၵမ်းၼိုင်ႈ။ ထိုင်မႃးပီ 2010 ၵူၼ်းၼုမ်ႇၽူႈမီးၼမ်ႉၸႂ်ၵမ်ႈၽွင်ႈ ၶိုၼ်းၶွတ်ႇၽွတ်ႈၶွမ်ႊမတီႊမႂ်ႇ သႂ်ႇၸိုဝ်ႈၸုမ်းပဵၼ် ၼမ်ႉၶူင်းၶိုၼ်းသေတူင်ႉၼိုင်မႃး။ ဢၼ်လႆႈပၵ်းလုမ်း ပိုတ်ႇႁူင်းယႃတႄႉတိုၵ်ႉတႄႇမိူဝ်ႈ ႁူဝ်ပီ 2013 ၼႆႉၵူၺ်း။ ႁူဝ်ပဝ်ႈၸုမ်းပဵၼ် ၸၢႆးထုၼ်းမျႃႉ (ၵုၼ်ႁဵင်)- ၼႆယဝ်ႉ။