ပိူဝ်ႈတႃႇၵူၼ်းဝၢၼ်ႈၵူၼ်းမိူင်း တေလႆႈၸႂ်ႉၶူဝ်ၵႂႃႇတႃႈ ပႆတၢင်း လႆႈလီၼၼ်ႉသေ ၵူၼ်းမိူင်းဝၼ်းတူၵ်းၶဝ် ၸွႆႈမႃးၶူဝ်လဵၵ်း ၼႂ်းၸိုင်ႈတႆးပွတ်းၸၢၼ်း မိူၼ်ၼင်ႇၼႂ်းၸႄႈဝဵင်းမိူင်းၵိုင်၊ လၢႆးၶႃႈ၊ ပၢင်လူင်၊ မိူင်းၼၢႆးၸိူဝ်းၼႆႉ။ ၵူၼ်းၼႂ်းပိုၼ်ႉတီႈ  လႆႈဢဝ်ဢဵၼ်ႁႅင်းၸဝ်ႈၵဝ်ႇ ၵေႃႇသၢင်ႈၶူဝ်လဵၵ်း ယဝ်ႉတူဝ်ႈလီငၢမ်း။

ၶူဝ်လင်ၼိုင်ႈ ဢၼ်ပိုတ်ႇၸႂ်ႉမိူဝ်ႈပီၵၢႆ ၼႂ်းၸိုင်ႈတႆးပွတ်းၸၢၼ်း

ၵဵဝ်ႇၵပ်းလွင်ႈၶူဝ်ၼႆႉ ပဵၼ်ၶူဝ် 2 လင် ၼႂ်းၸိုင်ႈတႆးပွတ်းၸၢၼ်း။ ၶူဝ်လင်တီႈ 1 ပဵၼ်ၶူဝ်ဢၼ်မီးၼႂ်း ဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ်၊ မီးၾၢႆႇဢွၵ်ႇသဵၼ်ႈတၢင်းလူင် မိူင်းၵိုင်-သီႇပေႃႉ၊ ပဵၼ်ၶူဝ်ၶၢမ်ႈမႄႈၼမ်ႉလဝ်း။ ပဵၼ်ၶူဝ်ၶၢမ်ႈၵႂႃႇမႃးဝူင်ႈၵၢင် တူၼ်ႈၵႅင်း-တူင်ႇလၢဝ်း။ ၶူဝ်လင်ၼႆႉ ပိုတ်ႇၸႂ်ႉမိူဝ်ႈဝၼ်းတီႈ 18/06/2015 ။

ၶူဝ်လင်တီႈ 2 ပဵၼ်တီႈဝၢၼ်ႈပၢင်ႇဢူ ၼႂ်းဢိူင်ႇၼႃးၸၢမ် (ၾၢႆႇႁွင်ႇမိူင်းၼၢႆး) ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း။ ၶူဝ်လင်ၼႆႉ ၵူၼ်းၼုမ်ႇၼႂ်းပိုၼ်ႉတီႈၶဝ် ႁူမ်ႈၵၼ်ၵေႃႇသၢင်ႈမႃး၊ ဢိင်ၼိူဝ်ၶူဝ်ယဝ်ႉတူဝ်ႈ ယဝ်ႉသေ ယၢမ်းလဵဝ် ပိုတ်ႇၸႂ်ႉယဝ်ႉ။ ၶူဝ်လင်ၼႆႉ ပိုတ်ႇၸႂ်ႉမိူဝ်ႈၽွင်းႁၢင်လိူၼ်ၵျုၼ်ႊၼႆႉ- ၵူၼ်းၼႂ်းပိုၼ်ႉတီႈ ၵေႃႉၼိုင်ႈ လၢတ်ႈ။

ၵဵဝ်ႇၵပ်း ၶူဝ်ၼႂ်းဢိူင်ႇတူင်ႇလၢဝ်းၼၼ်ႉ ၸၢႆးလႅင်း ၵူၼ်းၼႂ်းပိုၼ်ႉတီႈလၢတ်ႈဝႃႈ- ႁဝ်းၶႃႈၵူၼ်းမိူင်း တၢင်းတူင်ႇလၢဝ်းၼႆႉ လႆႈႁူပ်ႉတၢင်းယၢပ်ႇၽိုတ်ႇလိူဝ်ႁႅင်း၊ ပေႃးထိုင်ၶၢဝ်းၾူၼ်ၼႆ ၼမ်ႉလၢဝ်းယိုင်ႈၶိုၼ်ႈသေ ၸႅဝ်ႈလိူဝ်ႁႅင်း။ လုၵ်ႈဢွၼ်ႇႁူင်းႁဵၼ်းႁဝ်းၶႃႈၼႆႉ ပေႃးယဝ်ႉၸၼ်ႉ 4 ယဝ်ႉၵေႃႈ တႃႇတေၵႂႃႇၶိုၼ်ႈၸၼ်ႉ 5 တီႈ ၼႂ်းဢိူင်ႇတူင်ႇလၢဝ်းၼၼ်ႉ ဢမ်ႇမီးတိုဝ်ႉတၢင်းမၼ်း၊ ၵွပ်ႈမၼ်းၵႂႃႇမႃးယၢပ်ႇ။ ၾၢႆႇႁဝ်းၶႃႈၼႆႉ ႁူင်းႁဵၼ်းသမ်ႉထိုင်ၸၼ်ႉ 4 ၵူၺ်း။ ၵွပ်ႈၼၼ် လုၵ်ႈဢွၼ်ႇၵေႃႈလႆႈၶိုၼ်ႈထိုင်ၸၼ်ႉ 4 ၵူၺ်း၊ မၢင်ၵေႃႉယူႇၸၼ်ႉသီႇ 2-3 ပီ၊ ပေႃးဢႃယုယႂ်ႇမႃးၵေႃႈ ဢွၵ်ႇႁူင်းႁဵၼ်းသေ ၵႂႃႇႁဵတ်းၵၢၼ်ၸွမ်းပေႃႈၸွမ်းမႄႈ။ မိူဝ်ႈလဵဝ် မႃးၵေႃႇသၢင်ႈႁဵတ်းပၼ်ၶူဝ် ၵႂႃႇမႃးၵေႃႈငၢႆႈယဝ်ႉ၊ လုၵ်ႈဢွၼ်ႇၵေႃႈ တေသိုပ်ႇမီးတိုဝ်ႉတၢင်းလႆႈၶဝ်ႈႁူင်းႁဵၼ်း- ဝႃႈၼႆ။

ၼွၵ်ႈသေၼၼ်ႉ ပီႈၼွင်ႉတၢင်းႁူဝ်ၶၢႆး၊ ၼွင်လႅင်၊ ႁမ်းငၢႆး၊ ပၢင်ႇလေႃႉၸိူဝ်းၼႆႉၵေႃႈ တႃႇတေၵႂႃႇမႃး ဢွၵ်ႇတၢင်းၼႆႉ လႆႈၸႂ်ႉၶူဝ်တူၼ်ႈၵႅင်း (ၶူဝ်ၶၢမ်ႈၼမ်ႉလဝ်း)ၼႆႉၵူၺ်း ၼင်ႇၵဝ်ႇ။

ၸၢႆးမူၼ်း ၽူႈၶဝ်ႈႁူမ်ႈ ၵၢၼ်ၵေႃႇသၢင်ႈၶူဝ်လင်ၼႆႉ လၢတ်ႈဝႃႈ- လဵၵ်းၶူဝ်၊ ဢၼ်သိူဝ်ႇၶူဝ် တင်းသဝ်လဵၵ်းမၼ်းၸိူဝ်းၼႆႉ ပဵၼ်ၵူၼ်းမိူင်းဝၼ်းတူၵ်းၶဝ်ၸွႆႈမႃး။ ႁဝ်းၶႃႈတႄႉ လႆႈသႂ်ႇပုၼ် ႁိၼ် သၢႆး တႃႇတေၵေႃႇသၢင်ႈမၼ်းၸိူဝ်းၼႆႉ ဢိတ်းဢွတ်းၵူၺ်း။ ၾၢႆႇသၽႃးၸွႆႈထႅမ်မႃး သႅၼ်မၼ်း 50 ၼၼ်ႉၵေႃႈ ႁဝ်းၶႃႈၵႂႃႇႁပ်ႉမႃးသေ မႃးၸႂ်ႉတီႈၼႆႈ၊ ႁႅင်းၵေႃႇသၢင်ႈၶူဝ်ၵေႃႈ ဢဝ်ၵူၼ်းၼႂ်းပိုၼ်ႉတီႈ၊ မိူဝ်ႈလဵဝ် ယဝ်ႉတူဝ်ႈလီငၢမ်းသေ ၶူဝ်ၼႆႉလႆႈၸႂ်ႉယူႇယဝ်ႉ- ဝႃႈၼႆ။

ၵဵဝ်ႇၵပ်းလွင်ႈၶူဝ်ၼႆႉ ၸဝ်ႈတႃႇၼွၵ်ႈမိူင်း လၢတ်ႈဝႆႉဝႃႈ- ပေႃးတေၵေႃႇသၢင်ႈၶူဝ် တႃႇၸႂ်ႉတိုဝ်းၼႂ်းဝၢၼ်ႈၼႂ်းဢိူင်ႇ ၼိုင်ႈလင်ၼႆႉ တေလႆႈမီးႁႅင်းၵူၼ်းၵေႃႇသၢင်ႈၶူဝ် 30 ပၢႆ။ တေလႆႈမီးႁႅင်းငိုၼ်း တီႈဢေႇသုတ်းငိုၼ်းမၢၼ်ႈ သႅၼ်မၼ်း 50 ။ တီႈဢၼ်တေၵေႃႇသၢင်ႈၶူဝ်ၵေႃႈ တၢင်းၵႂၢင်ႈမႄႈၼမ်ႉ တေလႆႈမီး 100 ထတ်း၊ ပေႃးဝႃႈဢၼ်လၢတ်ႈဝႆႉၼႆႉ တဵမ်ထူၼ်ႈၸိုင် တၢင်ႇယွၼ်းလႆႈတီႈၸဝ်ႈတႃႇၼ ပိူဝ်ႈတႃႇသၢင်ႈၶူဝ်ၼိုင်ႈလင်၊ မိူၼ်ၼင်ႇလဵၵ်း သဝ်လဵၵ်း ဢၼ်သိူဝ်ႇမၼ်းၸိူဝ်းၼႆႉ။

ပေႃးၸဝ်ႈတႃႇၼမၼ်း သူင်ႇမႃးလဵၵ်းၸိူဝ်းၼၼ်ႉယဝ်ႉၵေႃႈ တေလႆႈၸႂ်ႉငိုၼ်းတူဝ်ၵဝ်ႇသေ ၵႂႃႇႁပ်ႉဢဝ်ႁင်းၵူၺ်း တီႈတႃႈႁိူဝ်း တႃႈၵုင်ႈ။ မၢႆမီႈၸဝ်ႈတႃႇၼၶဝ် တမ်းဝၢင်းပၼ်ဝႆႉၸိူင်ႉၼင်ႇၼႆ- ၸၢႆးမူၼ်းလၢတ်ႈ။

မၼ်းၸၢႆး သိုပ်ႇလၢတ်ႈထႅင်ႈဝႃႈ တူဝ်ၸဝ်ႈတႃႇၼၼႆႉ ဢႃယုမီးမွၵ်ႈ 47 ပီ၊ ဢမ်ႇၸႂ်ႈမၼ်းမီးငိုၼ်း လူၼ်ႉလိူဝ်သေ ၸွႆႈမႃး။ ပိူဝ်ႈတႃႇတေၸွႆႈၵေႃႇသၢင်ႈၶူဝ် ပၼ်ၵူၼ်းၼႂ်းပိုၼ်ႉတီႈၶဝ်ၸႂ်ႉတိုဝ်း ယွၼ်ႉၵူၼ်းၼႂ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇၸိူဝ်းၼႆႉ မၼ်းၵေႃႈၵႂႃႇယွၼ်းႁပ်ႉတၢင်းၸွႆႈ ၼႂ်းဝၢၼ်ႈၼႂ်းမိူင်းၶဝ် ပႃးၸဵမ်ၼွၵ်ႈမိူင်းတၢင်ႇဝၢၼ်ႈတၢင်ႇမိူင်း၊ မိူၼ်ၼင်ႇလဵၵ်းၸိူဝ်းၼႆႉ လႆႈမႃးတီႈမိူင်း ဢီႊတလီႊ၊ ဢၵျဵၼ်ႊတီႊၼႃႊ၊ မႅၵ်ႊသီႊၵူဝ်ႊ၊ သဝိတ်ႊသိူဝ်ႊလႅၼ်ႊၸိူဝ်းၼႆႉသေ ၸတ်းသူင်ႇမႃး။ ၵူၼ်းၼႂ်းပိုၼ်ႉတီႈၵေႃႈ လႆႈၵႂႃႇႁပ်ႉဢဝ်တီႈတႃႈႁိူဝ်း သိမ်းမႃးလၢႆႉ တီႈတႃႈၵုင်ႈ- ဝႃႈၼႆ။

ၸူဝ်ႈၸဝ်ႈတႃႇၼၶူဝ် လႆႈၶဝ်ႈမႃး ၼႂ်းၸိုင်ႈမိူင်းႁူမ်ႈတုမ်မၢၼ်ႈ လႆႈ 5-6 ပီမႃးၼႆႉ ၶူဝ်ဢၼ်မႃးလူႇၸွႆႈဝႆႉ ၼႂ်းမိူင်းမၢၼ်ႈ မီး 70 လင်ပၢႆယဝ်ႉ၊ ၵမ်ႈၼမ် ပဵၼ်ၼႂ်းတိူင်းၼမ်ႉၵဵဝ် (ဢိရႃႇဝၻီႇ)။ ၼႂ်းမိူင်းတႆး မီးၼႂ်းၸႄႈဝဵင်းမိူင်းၵိုင် 4 လင်၊ လၢႆးၶႃႈ 1 လင်၊ မိူင်းပွၼ် 1 လင်၊ ၼမ်ႉတူႈ မိူင်းယဵၼ် 1 လင်၊ သႅၼ်ဝီ 2 လင်၊ သီႇသႅင်ႇ 2 လင်၊ ၵျွၵ်ႉတလူင်း 1 လင်၊ မိူင်းၼၢႆး 1 လင်၊ ၼႂ်းမိူင်းတႆးတင်းမူတ်းမီး 13 လင်ယဝ်ႉ- ဝႃႈၼႆ။