ထႆး တင်းမၢၼ်ႈ ဢုပ်ႇၵၼ် တႃႇပိုတ်ႇလၢၼ်ႇ ၸွမ်းလႅၼ်လိၼ် တႆးတင်းထႆး ပွတ်းဢၼ် တိတ်းၸပ်း မိူင်းတႆး။ ၼင်ႇႁိုဝ် ၵႃႇၶၢႆၼႂ်း မိူင်းထႆး လႄႈ မၢၼ်ႈ ပေႃးတေငၢႆႈလီ လႄႈ လႆႈၸတ်းႁဵတ်း ပၢင်ၵုမ် ဢုပ်ႇဢူဝ်း လွင်ႈပိုတ်ႇလၢၼ်ႇ တင်းပွတ်း လၵ်းတႅင်ႇ ၸႄႈဝဵင်း ဝဵင်းႁႅင် ၸႄႈတွၼ်ႈ ၵဵင်းမႆႇ ၸိုင်ႈထႆး။

ပူၼ်ႉမႃး မိူဝ်ႈဝၼ်း တီႈ 22/08/2015 ၶၢဝ်းယၢမ်း 09:00-17:00  မူင်း ၸၼ်ႉၸွမ် ၵဵင်းမႆႇ ၸတ်းႁဵတ်း ပၢင်ၵုမ် ၵဵဝ်ႇၵပ်းလွင်ႈ တေပိုတ်ႇလၢၼ်ႇ လၵ်းတႅင်း ၸႄႈဝဵင်း ဝဵင်းႁႅင် လႄႈလၢၼ်ႇ ၼွင်ဢုၵ်း ၸႄႈဝဵင်းၵဵင်းလၢဝ် ၸႄႈတွၼ်ႈ ၵဵင်းမႆႇ ၸိုင်ႈထႆး ပိူဝ်ႈတႃႇ လွင်ႈၵႃႉၶၢႆ မိူင်းမၢၼ်ႈ လႄႈ မိူင်းထႆး ပေႃးတေငၢႆႈလူမ်။ ထႅင်ႈလွင်ႈၼိုင်ႈ ၵေႃႈ ၽူႈတေၵႂႃႇ လူင်းတိုၼ်း ၵၢၼ်ၵႃႉၶၢႆ ၼႂ်းမိူင်းမၢၼ်ႈ လႄႈ လွင်ႈၵၢၼ်ဢႅဝ်ႇ တွင်ႈတဵဝ်း။ ၵွပ်ႈဝႃႈ သဵၼ်ႈတၢင်း ပွတ်းတွၼ်ႈၼႆႉ မၼ်းပဵၼ် သဵၼ်ႈတၢင်း ဢၼ်ၵတ်းယဵၼ် လႄႈ တီႈႁၢင်ႈလီ တွၼ်ႈတႃႇ ၶႅၵ်ႇတွင်ႈ တဵဝ်းၼႆယဝ်ႉ။


ပၢင်ၵုမ် ပိုတ်ႇလၢၼ်ႇ လႅၼ်လိၼ် ထႆးတင်း မၢၼ်ႈၵမ်းၼႆႉ ၵႅမ်ၽူႈၵွၼ်း ၸႄႈတွၼ်ႈ ၵဵင်းမႆႇ ၶုၼ်ႊသႃၼ ၽႅင်ႊၽိပုၼ်ႊ လႆႈၵၢဝ်ႇ လၢတ်ႈၵႂၢမ်း ပိုတ်ႇပၢင်ၵုမ်ၵႂႃႇ ဝႃႈ ၵၢၼ်တေပိုတ်ႇလၢၼ်ႇ ပွတ်းတၢင်း လၵ်းတႅင်ႇ ၸႄႈဝဵင်းဝဵင်းႁႅင် ၸႄႈတွၼ်ႈ ၵဵင်းမႆႇၼႆႉ ပေႃးတူၺ်း သဵၼ်ႈတၢင်း ပွတ်းတွၼ်ႈၼႆႉ မၼ်းပဵၼ် တွၼ်ႈဢၼ်ၵတ်းယဵၼ် သမ်ႉပဵၼ် တီႈႁၢင်ႈလီ ပဵၼ်သဵၼ်ႈတၢင်း လီဢႅဝ်ႇတွင်ႈတဵဝ်း ၵၢၼ်ၵႃႉၶၢႆၵေႃႈ တေတေႃႉသူင်ႇ ၶဝ်ႈဢွၵ်ႇငၢႆႈ ဝႃႈၼႆ။


ၽွင်းတၢင် မိူင်းမၢၼ်ႈ ဢွင်ႇသၢၼ်း လုၼ်ႇသပ်းလႅင်း လၢတ်ႈၼႄ ၵၢၼ်ၵႃႉၶၢႆ ၼႂ်းမိူင်းမၢၼ်ႈ ၊ လွင်ႈ ၶူဝ်းၶွင်းၶဝ်ႈ / ဢွၵ်ႇၼႂ်းမိူင်း ၊ လွင်ႈၵၢၼ်ငိုၼ်း ၊ လွင်ႈ ဝၢင်းၽႅၼ် ၵၢၼ်ပၢႆးမၢၵ်ႈမီး မိူဝ်းၼႃႈ ၼိုင်ႈပီတေႃႇ လၢႆပီ ငိုၼ်းတေ ၶဝ်ႈၵႃႈႁိုဝ် ၊ လွင်ႈၵူၼ်း ၼွၵ်ႈမိူင်း တေၶဝ်ႈၵႂႃႇ လူင်းတိုၼ်း ၵႃႉၶၢႆၼႂ်း မိူင်းမၢၼ်ႈ။


သိုပ်ႇ လၢတ်ႈထႅင်ႈဝႃႈ တႃႇတေပိုတ်ႇလၢၼ်ႇ တၢင်းပွတ်း လၵ်းတႅင်ႇ ဝဵင်းႁႅင် လႄႈ လၢၼ်ႇၼွင်ဢူၵ်း ၸႄႈဝဵင်း ၵဵင်းလၢဝ် ၸႄႈတွၼ်ႈ ၵဵင်းမႆႇ ၸိုင်ႈထႆးၼႆႉ တေပႂ်ႉတူၺ်း ၸုမ်းၸိူဝ်း ယိပ်းၵွင်ႈၵၢင် (SD) လႄႈၾၢႆႇၶိုင်သၢင်ႈ လွင်ႈငမ်းယဵၼ်း မိူင်းမၢၼ်ႈ (UPWC) လူင်းလၢႆးမိုဝ်း NCA ၵွၼ်ႇ ၸင်ႇတေ ဢုပ်ႇၵၼ်ၶိုၼ်းလွင်ႈ တေပိုတ်ႇလၢၼ်ႇ သၢင်ႇထုၵ်ႇ တီႈလႂ်ၵေႃႈ တေပိုတ်ႇၵႂႃႇ တီႈၼၼ်ႉၵွၼ်ႇ ဝႃႈၼႆ။


ၸၢႆးထုၼ်းဢွင်ႇ ၵူၼ်းမိူင်းပၼ်ႇ ပိုတ်ႇလၢတ်ႈဝႃႈ ၵၢၼ်ၵႃႉၶၢႆ တၢင်းပွတ်း မိူင်းပၼ်ႇ လႄႈ ပဵင်းလူင် လၵ်းတႅင်ႇ မိူဝ်ႈၵူႈ ပွၵ်ႈပူၼ်ႉမႃး 40 ပီပၢႆၼၼ်ႉ ပဵၼ်သဵၼ်ႈတၢင်း ၵႃႉၶၢႆႁႃၵၼ် ငၢႆႈတႄႉတႄႉ ဝၢႆးလင် 25 ပီမႃးၼႆႉ ထုၵ်ႇ ၢိုတ်းႁပ်းလၢၼ်ႇၵႂႃႇၵေႃႈ တၢင်းၵပ်းသိုပ်ႇ ပီႈၼွင်ႉတၢင်း ပဵင်းလူင် လၵ်းတႅင်ႇၵေႃႈ လႆႈၶၢတ်ႇၵၼ်ၵႂႃႇ။ ပေႃးတေဝႃႈၼႆၸိုင် ပဵင်းလူင် လၵ်းတႅင်ႇၼႆႉ ပဵၼ်သဵၼ်ႈတၢင်း ဢၼ်ၵႃႉၶၢႆ တွၼ်ႈတႃႇ ပီႈၼွင်ႉ ၵူၼ်းမိူင်းပၼ်ႇပွတ်းၸၢၼ်း တႄႉတႄႉ။


ၸၢႆးၸေႃႇလိၼ်း ၵူၼ်းမိူင်းတူၼ် လၢတ်ႈဝႃႈ သင်ဝႃႈ လူင်ပွင်ၸိုင်ႈမၢၼ်ႈ ပိုတ်ႇတၢင်း လၢၼ်ႇၼွင်ႉဢုၵ်း (PB1) ၼႆၸိုင် ၶႅၼ်းၶႅမ်ႉယဝ်ႉ ၵွပ်ႈဝႃႈ လၢၼ်ႇတၢင်းၼႆႉ မိူဝ်ႈပူၼ်ႉမႃးၵေႃႈ လႆႈပိုတ်ႇမႃးၵမ်းၼိုင်ႈ တေႃႈလဵဝ်သမ်ႉလႆႈ ဢိုတ်းၵႂႃႇ ပဵၼ်ဢၼ် ယၢပ်ႇၽိုတ်ႇ ၵၢၼ်ၵႃႉၶၢႆ ပီႈၼွင်ႉ ၵူၼ်းမိူင်းတူၼ် ႁဝ်းၶႃႈ တႄႉတႄႉ။ ၵွပ်ႈဝႃႈ ၼႂ်းမိူင်းတူၼ် ႁဝ်းၶႃႈၼႆႉ ၶူဝ်းၸႂ်ႉ သွႆၶွင် ၵိၼ်ယႅမ်ႉၼႆႉ ပဵၼ်ၶူဝ်းမိူင်းထႆး မူတ်းမူတ်း။ ဢၼ်ႁဝ်းၶႃႈ ၸႂ်ႉၶူဝ်းၶွင် မိူင်းထႆးၼႆႉ လႆႈၵႂႃႇသိုဝ်ႉ တီႈတႃႇၶီႈလဵၵ်း သေတေႃႉမႃး။ ထႅင်ႈၾၢႆႇၼိုင်ႈၵေႃႈ ၶူဝ်းဢွၵ်ႇ သူၼ်ႁဝ်းၼႂ်း မိူင်းတူၼ်  ႁူဝ်မီးၶၢဝ် ၊ ၼိုင်ႈပီလႂ် ဢွၵ်ႇ 4 လၢၼ်ႉၵီႊလူဝ်ႊ။


ႁူဝ်မီႇၶၢဝ်ၼႆႉ သင်ဝႃႈ ႁဝ်းၶၢႆတေႃႇ မိူင်းထႆးၸိုင် တေလႆႈၵႂႃႇ တၢင်းပွတ်း တႃႇၶီႈလဵၵ်း လႄႈပဵၼ် သဵၼ်ႈတၢင်း ဢၼ်ၵႆတႃႇႁဝ်း ၵူၼ်းမိူင်းတူၼ် တႄႉတႄႉ သင်ဝႃႈ ပိုတ်ႇလၢၼ်ႇ ၼွင်ဢုၵ်း (PB1) ၸိုင် မၼ်းပဵၼ် သဵၼ်ႈတၢင်း ဢၼ်သိူဝ်ႇ ယၢင်ၽႅဝ်လႅၼ်လိၼ် ထႆးၵမ်းသိုဝ်ႈ ၵႂႃႇငၢႆႈလိူဝ်သေ တၢင်းတႃႈၶီႈလဵၵ်း ဝႃႈၼႆ။


ၸၢႆးဢူင်းမိၼ်ႉ ၽူႈၸတ်းၵၢၼ် ၶွမ်ႊပၼီႊၵရဵၵ်ႉႁေႃၶမ်းၵေႃႈ လၢတ်ႈၼႄ လွင်ႈၶွမ်ႊပၼီႊၵရဵၵ်ႉႁေႃၶမ်းၶဝ် ၼႆယဝ်ႉ။


ပၢင်ၵုမ် လွင်ႈပိုတ်ႇလၢၼ်ႇ လႅၼ်လိၼ်ထႆး လႄႈ မၢၼ်ႈၵမ်းၼႆႉ ၸတ်းႁဵတ်း ယဝ်ႉၵႂႃႇ မိူဝ်ႈၶၢဝ်းယၢမ်း 17:00 မူင်းပၢႆ မီးၵူၼ်းမႃးၶဝ်ႈ မွၵ်ႈ 200 ၵေႃႉ ၊ ၵူၼ်းၶဝ်ႈႁူမ်ႈ ၵမ်ႈၼမ် ပဵၼ်ၸဝ်ႈငိုၼ်းတိုၼ်း ၊ ၶွမ်ႊပၼီႊ ၊ သုၼ်ႇတူဝ် ၊ ၸုမ်းတူင်ႇဝူင်းတႆး ၊ ပလိၵ်ႈထႆး ၊ သိုၵ်းထႆး ၊ ၶူးသွၼ်(ဢႃးၸၢၼ်) ၸၼ်ႉၸွမ်ၵဵင်းမႆႇ လႄႈၵူၼ်းၼႂ်း ပိုၼ်ႉတီႈၵဵင်းမႆႇ ၊ ၵဵင်းလၢဝ် ၊ လမ်းပုၼ်း ၊ လမ်းပၢင်း ၊ ဝဵင်းႁႅင်ႁူမ်ႈတင်း ပီႈၼွင်ႉတႆး လႄႈၵူၼ်းမိူင်းၵမ်ႈၽွင်ႈ ။