ဢိင်ၼိူဝ် မၢၵ်ႇတႅၵ်ႇ ၼိူဝ်သဵၼ်ႈတၢင်း ရၢသ်ႊပရႃႊသူင်ႊသေ ႁဵတ်းႁႂ်ႈၵူၼ်းတၢႆ ဢၢၼ်ႇသိပ်း မၢတ်ႇၸဵပ်း ဢၢၼ်ႇႁူဝ်ပၢၵ်ႇ လူင်ပွင်ၸိုင်ႈမိူင်းထႆး ၸတ်းႁဵတ်း တၢင်းလီ ပိူဝ်ႈ သူင်ႇၽွၼ်းလီထိုင် ဝိၺဵၼ်ႇၶႂၼ်ငဝ်း ၵူၼ်းၸိူဝ်းသဵင်ႈသၢႆၸႂ်။

သိုဝ်ႇၶၢဝ်ႇထႆး ရတ်ႊပိုၼ်ၽၢဝ်ႇဝႃႈ- လူင်ပွင်ၸိုင်ႈ မိူင်းထႆးတင်း ႁွင်ႈၵၢၼ်လူင်ဝဵင်း လူင်မိူင်းၵွၵ်ႇဢိၵ်ႇ လၢႆႁွင်ႈၵၢၼ် တေႁူမ်ႈၵၼ် ၸတ်းႁဵတ်း ပၢင်လူႇတၢၼ်းယႂ်ႇလူင် ဢၼ်မီး 5 သႃသၼႃ မိူၼ်ၼင်ႇပုတ်ႉထ ၊ ၶရိတ်ႉ ၊ ဢီႊသရၢမ်ႊ ၊ ႁိၼ်ႊၻူႊ ၊ သိၵ်ႉၶ်ၸိူဝ်းၼႆႉပိူဝ်ႈသူင်ႇ တၢင်းလီထိုင် ဝိၺဵၼ်ႇၶႂၼ် ငဝ်းၵူၼ်းၸိူဝ်း ဢၼ်သဵင်ႈမုၼ်ၵႂႃႇတီႈ သီႇယႅၵ်ႈရၢသ်ႊပရႃႊသူင်ႊ ၵၢင်မိူင်းလူင် မိူင်းၵွၵ်ႇ ၸိုင်ႈထႆး ၼႂ်းဝၼ်းတီႈ 21 လိူၼ်ဢေႃႊၵတ်ႉသ် 2015 ဝႃႈၼႆ။


မၢၵ်ႇတႅၵ်ႇ မိူဝ်ႈဝၼ်းတီႈ 17 /08/2015 ၶၢဝ်းယၢမ်းၵၢင်ၶမ်ႈမွၵ်ႈ 7 မူင်းႁဵတ်းႁႂ်ႈၵူၼ်းထႆး လႄႈၵူၼ်း ၼွၵ်ႈမိူင်း လူႉတၢႆလႄႈ မၢတ်ႇၸဵပ်း တၢင်းၼမ် ၊ ၵူၼ်းတၢႆ 20 ၵေႃႉပၢႆမၢတ်ႇၸဵပ်းဢၢၼ်ႇ ႁူဝ်ပၢၵ်ႇ။ ယၢမ်းလဵဝ်ၵူၼ်းဢၼ် တိုၵ်ႉယူတ်းယႃ တူဝ်ယူႇတီႈ ႁူင်းယႃမီး 60 ၵေႃႉပၢႆၼႆယဝ်ႉ။


ၵဵဝ်ႇလူၺ်ႈလွင်ႈ မၢၵ်ႇတႅၵ်ႇ ႁၢဝ်ႈႁႅင်းၼႆႉသေ ၸဝ်ႈၼႃႈတီႈ တိုၵ်ႉၶတ်းၸႂ် သွၵ်ႈႁႃ ၵူၼ်းႁဵတ်းၽိတ်း မႃးပၼ်တူတ်ႈတၢမ်ႇ။ သင်ဝႃႈ ၽႂ်ထူပ်းႁၼ်သေ တၢင်ႇလၢတ်ႈတီႈ ၸဝ်ႈၼႃႈတီႈၼႆ ၸိုင်တေလႆႈႁပ်ႉ ငိုၼ်း ရၢင်ႊဝလ်ႊဢၢၼ်ႇႁူဝ်လၢၼ်ႉ ဝႃႈၼႆ။