ၸုမ်းတူင်ႇဝူင်းတႆး လၢႆမူႇ လၢႆၸုမ်း ႁူမ်ႈၵၼ် ၵႂႃႇၸွႆႈထႅမ် ၵူၼ်းထူပ်းၽေး ၼမ်ႉထူမ်ႈ တၢင်းပွတ်း ဢိူင်ႇပႃႇလႅဝ်း ၵိင်ႇၸႄႈဝဵင်းၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်း ၼပ်ႉႁူဝ်သႅၼ်ဝၢတ်ႇ ။

ပူၼ်ႉမႃး မိူဝ်ႈဝၼ်းတီႈ 18/08/2015 ၶၢဝ်းယၢမ်း 06:00 –20:00 မူင်း ၸုမ်းတူင်ႇဝူင်းတႆး လၢႆမူႇၸုမ်းႁူမ်ႈၵၼ် ၵႂႃႇၸွႆႈထႅမ် ၵူၼ်းထူပ်းၽေး ၼမ်ႉထူမ်ႈ တၢင်းဢိူင်ႇပႃႇလႅဝ်း ၵိင်ႇၸႄႈဝဵင်းၵဵင်းလၢပ်ႈ ၸႄႈတွၼ်ႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇ ပိူဝ်ႈတႃႇ ၵူၼ်းထူပ်းၽေး ၼမ်ႉထူမ်ႈ ပေႃးတေလႆႈႁပ်ႉ ၶူဝ်းၶွင်လႄႈ ၸုမ်းတူင်ႇဝူင်းတႆး ၸင်ႇလႆႈလူင်းပိုၼ်ႉတီႈ ၶဝ်ႈၸွႆႈထႅမ် ၶူဝ်းၸႂ်ႉ သွႆတင်းၶွင်ၵိၼ်ယမ်ႉ ႁႂ်ႈလႆႈထိုင်မိုဝ်း ၵူၼ်းမိူင်းၼႆယဝ်ႉ။


ႁူဝ်ပဝ်ႈ ၸုမ်းၶႅၵ်ႇလီပၢင်ၸႃႉ ႁူဝ်မိူင်းသႂ် ဝဵင်းတႃႈၶီႈလဵၵ်း ၸၢႆးတိ လၢတ်ႈဝႃႈ ၸုမ်းႁဝ်း လႆႈႁၢင်ႈႁႅၼ်းဝႆႉသေ ၸုမ်းၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းလိူဝ်ႇ သမ်ႉမႃးၸွမ်းငိုၼ်း 47 သႅၼ်းပျႃး ၊ တိူၵ်ႈၵမ်မထၢၼ်း ၸွမ်ၵႅဝ်ႈလွႆမွင်း ဝဵင်းတႃႈၶီႈလဵၵ်း သၢမ်ၸုမ်းႁူမ်ႈၵၼ်။ ဢၼ်ႁဝ်းၶႃႈ တေၵႂႃႇၸႅၵ်ႇပၼ် ပီႈၼွင်ႉ ၵူၼ်းထူပ်းၽေး တေမီး 17 ယၢင်ႇ (ဢၼ်) ၊ ၶိူင်ႉၸႂ်ႉသွႆႈ လႄႈ လွင်ႈၵိၼ်ယမ်ႉ။ လိူဝ်ၼၼ်ႉၵေႃႈ လႆႈႁၢင်ႈႁႅၼ်းၸတ်းသႂ်ႇထူင်ၸၢၼ်ႈ တင်းမူတ်း မီး 100 ထူင် တႃႇႁူဝ်ႁိူၼ်း ပၢၵ်ႇလင်ႁိူၼ်း။ ၶူဝ်းၼႂ်းထူင်ၼၼ်ႉ 1 ထူင်လႂ် တေတူၵ်းငိုၼ်းထႆး 1440 ဝၢတ်ႇ ဝႃႈၼႆ။


ၸုမ်းၸဝ်ႈတႃႇၼ ၸွႆႈထႅမ် ၸုမ်းၶႅၵ်ႇလီပၢင်ၸႃႉ ႁူဝ်မိူင်းသႂ် ဝဵင်းတႃႈၶီႈလဵၵ်း ၊ ၵေႃလိၵ်ႈလၢႆး လႄႈ ၾိင်ႈငႄႈတႆး ဝဵင်းလိူဝ်ႇ ၊ တိူၵ်ႈၵမ်မထၢၼ်း ဝတ်ႉလွႆမွင်း ဝဵင်းတႃႈၶီႈလဵၵ်းလႄႈ ၸုမ်းလုၵ်ႈႁဵၼ်းတႆး ၸၼ်ႉၸွမ်မိူင်းထႆး လႆႈႁူမ်ႈၸွႆႈ ၵမ်ႉထႅမ်ငိုၼ်း လႄႈၶူဝ်းၶွင် တႃႇပီႈၼွင်ႉ ၵူၼ်းထူပ်းၽေး ။


ၼွၵ်ႉလိူဝ်ၼႆႉၵေႃႈ မီးၵေႃလိၵ်ႈလၢႆး လႄႈ ၾိင်ႈငႄႈတႆး တႃႈၶီႈလဵၵ်း ၊ ၵေႃလိၵ်ႈလၢႆး လႄႈ ၾိင်ႈငႄႈတႆး တူၼ်ႈတီး ၊ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဢိၵ်ႇထႅင်ႈလၢႆလၢႆၸုမ်း ။


ၸုမ်းၶႅၵ်ႇလီ ပၢင်ၸႃႉ လႆႈဢွၼ်ႁူဝ်ၼမ်းၼႃႈၵႂႃႇ တင်းမူတ်း ရူတ်ႉ 17 လမ်း ႁူဝ်ၵူၼ်းတင်းမူတ်းမွၵ်ႈ 80 ၵေႃႉပၢႆ။ ၶွင်ၵိၼ်ယႅမ်ႉ ဢၼ်ၵႂႃႇၸွႆႈထႅမ်သမ်ႉ မိူၼ် ၵွၼ်ႈသီ (သပူႇ) ဢၢပ်ႇၼမ်ႉ၊ ၽွင်ဝၢၼ် ၊ ၵိူဝ်၊ ၼမ်ႉမၼ်း ၊ ၶဝ်ႈသၢၼ် ၊ ၶဝ်ႈသဵၼ်ႈလဵၵ်ႉႁႅင်ႈ ၸဵမ်ၸိူဝ်ႉၼႆႉ ၶူဝ်းၶွင်ၸႂ်ႉသမ်ႉ မိူၼ် ဝၢၼ်ႇ ၊ ၸေႃး ၊ ၽႃႈႁူမ်ႇ ၊ မွၼ်ႁူဝ် ၊ ၽႃႈသိူဝ်ႇ ၊ ၵွၵ်းၼမ်ႉ ၊ ႁႆၶဝ်ႈ ၊ မေႃႈၶၢင်ၶူဝ်ႈၽၵ်း ၊ ထၢင်သႂ်ႇၼမ်ႉ ၊ မႆႉသီၶဵဝ်ႈ ၊ ယႃသီႈၶဵဝ်ႈ ၸဵမ်ၸိူဝ်ႉၼႆႉ။