ၵူၼ်းထူပ်း ၽေးၼမ်ႉထူမ်ႈ ပွတ်းတွၼ်ႈဢိူင်ႇ ပႃႇလႅဝ်းၵဵင်းလၢပ်ႈ ၸႄႈဝဵင်းၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ။ ၼႂ်းဢိူင်ႇပႃႇလႅဝ်း လၢႆမူႇဝၢၼ်ႈသေ ၵူၼ်းဝၢၼ်ႈ ထူပ်းတၢင်းယၢပ်ႇၽိုတ်ႇ ၶၢတ်ႇတင်းၸွႆႈထႅမ် တီႈ လူင်ပွင်ၸိုင်ႈ ၸွႆႈၶပ်ႉၶိုင် ။

ပူၼ်ႉမႃး မိူဝ်ႈဝၼ်းတီႈ 18/08/2015 ၶၢဝ်းယၢမ်း 10:00 ထိုင် 17:00 မူင်း ၸုမ်းၶၢဝ်ႇၽူႈတွႆႈႁွၵ်ႈ လႆႈလူင်း ပိုၼ်ႉတီႈ တွင်ႈထၢမ် ၵၢင်ၸႂ်ၵူၼ်းဝၢၼ်ႈ ဢၼ်လႆႈ ထူပ်းၽေးၼမ်ႉထူမ်ႈ ၼႂ်းဢိူင်ႇပႃႇလႅဝ်း ၵိင်ႇၸႄႈဝဵင်းၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၼင်ႇႁိုဝ် ပေႃႈမႄႈပီႈၼွင်ႉ ၵူၼ်းမိူင်းတႆး ၵူၼ်းထူပ်း ၽေးၼမ်ႉ ထူမ်ႈၼၼ်ႉ ပေႃးတေလႆႈႁပ်ႉ တၢင်းၸွႆႈထႅမ် ၼႆႉ ၵူၼ်းထူပ်း ၽေးၼမ်ႉထူမ်ႈ ၶႂ်ႈလႆႈသင်ၽွင်ႈ ဢၼ်လမ်ႇလွင်ႈမၼ်း ၸဵမ်ၸိူဝ်ႉၼႆႉ။


ၽူႈၵွၼ်းဢိူင်ႇ ပႃႇလႅဝ်း လုင်းၸၢႆးသၢမ် လၢတ်ႈၼႄၸုမ်းၶၢဝ်ႇ ၽူႈတွႆႇႁွၵ်ႈ ဝႃႈ မိူဝ်ႈလဵဝ် ဢၼ်ႁဝ်းၶႃႈ ၶၢတ်ႇယူႇၼႆႉ မႅၵ်ႊၶရူဝ်ႊ (ၶုတ်းလိၼ်) တႃႇမႃးႁဵတ်း ႁွင်ႈၼမ်ႉပၼ် / တပ်ႉၼမ်ႉႁွင်ႈပၼ် ၵွပ်ႈဝႃႈ တေလႆႈၶုတ်းမိူင် တဵင်ၾၢႆၶိုၼ်းတႃႇ ၼမ်ႉတေမႃး လဵင်ႉၼႃး ၊ ၼႃးတီႈ ဢၼ်ဢမ်ႇလူႉၵေႃႈ သမ်ႉဢမ်ႇမီးၼမ်ႉ  တေဢဝ် ႁႅင်းၵူၼ်းႁဝ်း ႁဵတ်းၵေႃႈဢမ်ႇပေႉ ဢၼ်ႁဝ်းၶႃႈ ၶၢတ်ႇယူႇၼၼ်ႉ ပဵၼ်ရူတ်ႉမႅၵ်ႊၶရူဝ်ႊ (ရူတ်ႉၶုတ်းလိၼ်) ဝႃႈၼႆ။


လိူဝ်ၼၼ်ႉၵေႃႈ ႁိူၼ်းၵူၼ်းဝၢၼ်ႈ ဢၼ်လႆႈထူပ်း ၽေးၼမ်ႉထူမ်ႈ လူႉလႅဝ်ၵႂႃႇၸိူဝ်ႉၼၼ်ႉ တေလႆႈမႄးႁဵတ်းၶိုၼ်း  ပိူင်လူင်မၼ်း ၸိူင်ႉၼင်ႇ လဵၵ်းၽိူၵ်ႇ ၊ ပုၼ် ၊ လဵၵ်းမႆႇၼႃး ၸိူဝ်ႉၼႆႉ။ ယွၼ်ႉဝႃႈ ၼႂ်းဝၢၼ်ႈ ၼႂ်းၶူင်ႇႁဝ်းၼႆႉ မီးတုမ်မႆႉ ပွတ်းမႆႉလႄႈ ၶီႈၵူမ်ႇၶီႈငႂ်ႈ တဵမ်ၵႂႃႇသဵင်ႈ လႄႈတၵ်းတေလႆႈ ဢဝူတ်ႉၸၢၵ်ႈမႃး ထုၺ်ႇပႅတ်ႈ ။ ၵပ်းၵၢႆႇလူၺ်ႈ လွင်ႈၼမ်ႉၸႂ်ႉ ၼမ်ႉၵိၼ် လွတ်ႇၼမ်ႉ လႄႈ ၾႆးၾႃႉၵေႃႈ ႁဝ်းၶႃႈလႆႈ တၢင်ႇယွၼ်းတီႈ တၢင်းၼိူဝ်ဝႆႉယဝ်ႉ ၶဝ်လၢတ်ႈဝႃႈ တေမႃးလူင်းႁဵတ်းပၼ်ၼႆ တေႃႇထိုင်တေႃႈလဵဝ် ယင်းပႆႇမႃး ဝႃႈၼႆ။


ၵေႃးပၵ ဝၢၼ်ႈၼမ်ႉၽႅင် လုင်းၸၢႆးၼူၼ်း လၢတ်ႈဝႃႈ တေႃႈလဵဝ် ဢၼ်ႁဝ်းၶႃႈ ၶႂ်ႈလႆႈလိူဝ်ပိူၼ်ႈ ၼႆႉ 1. တဵင်ပၼ်ၾၢႆၼမ်ႉ ၊ ၵွပ်ုဝႃႈၾၢႆၼမ်ႉၸိူဝ်ႉၼၼ်ႉ ထုၵ်ႇၼမ်ႉလုပ်ႈပႃးၵႂႃႇယဝ်ႉ ၼမ်ႉတႃႇလဵင်ႉၼႃး ဢမ်ႇမီး ၊ 2.ၾႆးၾႃႉ ပေႃးထိုင်ၵၢင်ၶိုၼ်းမႃး လပ်းသိင်မူတ်း ဢမ်ႇႁၼ်သင် မိူဝ်ႈၵူႈပွၵ်ႈတႄႉ မီးၸၢၵ်ႈၾႆး ၽႂ်မၼ်းၸႂ်ႉယူႇ ၊ မၢင်ၵေႃႉၵေႃႈ ဢဝ်ႁႅင်းၼမ်ႉ သေပၼ်ႇတႆႈ ၊ မိူဝ်ႈလဵဝ် လပ်းသိင်မူတ်း ၊ 3. ၼမ်ႉၵိၼ် ၼမ်ႉၸႂ်ႉ ၼႂ်းဝၢၼ်ႈ ၊ 4 မႄႈၶုတ်း သဵၼ်ႈတၢင်းၼမ်ႉပၼ် ၊ မိူဝ်ႈလဵဝ် ၼမ်ႉလႆမႃး တၢင်းႁူဝ်ဝၢၼ်ႈႁဝ်း ၵမ်းသိုဝ်ႈ ပေႃးၾူၼ်တူၵ်းႁႅင်းၸိုင် တေၸင်ႈထူမ်ႈဝၢၼ်ႈႁဝ်းထႅင်ႈ ၊ 5. ႁႂ်ႈၶိုၼ်းမႄးႁဵတ်း ပၼ်ၶိုၼ်းလွၵ်းၼႃးၸိူဝ်း ဢၼ်ထုၵ်ႇသၢႆး လုပ်ႇထူပ်ႈလႄႈ တုမ်မႆႉ ပွတ်းမႆႉ ၸိူဝ်းၼႆႉ ဝႃႈၼႆ။


မိူဝ်ႈလဵဝ် ၵူၼ်းထူပ်းၽေးၼမ်ႉ ထူမ်ႈၶႂ်ႈလႆႈ တၢင်းၸွႆႈထႅမ် တီႈပႃႊတီႊၵၢၼ်မိူင်း ၊ ၸုမ်းတူင်ႇဝူင်းၵူၼ်း ၊ သုၼ်ႇတူဝ် ၊ ၽူႈမၢၵ်ႈမီး (ငိုၼ်း) ၵူႈၵေႃႉလႄႈ လူင်ပွင်ၸိုင်ႈ ယွၼ်းႁႂ်ႈမႃးၸွႆႈထႅမ်ပၼ် ၼႆယဝ်ႉ။


ဢိင်ၼိူဝ် ၾူၼ်တူၵ်းႁႅင်း ၼပ်ႉဝၼ်းထပ်းၵၼ်သေ ပူၼ်ႉမႃးမိူဝ်ႈဝၼ်းတီႈ 04/08/2015 ၶၢဝ်းယၢမ်း ၵၢင်ၶိုၼ်း ယွၼ်ႉမႄႈၼမ်ႉၵႆး ၼွင်းၶိုၼ်ႈႁႅင်းသေ လုပ်ႇပႃးႁိူၼ်း ၵႂႃႇတင်းမူတ်း 21 လင်ႁိူၼ်း ၊ ၶူဝ်ၵွႆၵႂႃႇ (9) တီႈ ၊ ၵူၼ်းလႆႈ လူႉတၢႆၵႂႃႇ ၸွမ်းၼမ်ႉ 4 ၵေႃႉ ၊ ၵူၼ်းဢၼ်လႆႈ ဝၢၼတ်ႇၸဵပ်း 3 ၵေႃႉ ၊ ၼႃးဢၼ်လႆႈလူႉၵွႆ 700 ဢေႊၵိူဝ်ႊပၢႆ ။